O Le I Ai i Feagaiga
O le auai faatasi ma le Atua ma savavali faatasi ma isi i luga o Lana ala o feagaiga o le faamanuiaina lea i le i ai i se feagaiga.
Uso e ma tuafafine pele, ua faamatalaina le tala e uiga i se tamaitiiti Peraimeri na aoao e tatalo. “Faafetai mo le mataitusi A, le mataitusi E, … le mataitusi G.” O loo faaauau pea le tatalo a le tamaitiiti, “Faafetai mo mataitusi H, K, R. Tama Faalelagi Pele, faafetai mo le numera 1, le numera 2.” Ua popole le faiaoga o le Peraimeri ae faatalitali pea ma le atamai. Fai mai le tamaitiiti, “Faafetai mo le numera 5, le numera 6—ma faafetai mo lo’u faiaoga Peraimeri. Na o ia lava le tagata na te tuu a’u ia uma la’u tatalo.”
E faafofogaina lava e le Tama Faalelagi tatalo a tamaiti uma. Faatasi ai ma le alofa e le iu, Na te valaaulia i tatou ia o mai ma talitonu ma auai e ala i se feagaiga.
Ua tumu lenei lalolagi i ata faafoliga, mea pepelo, togafiti e fai i lima. E tele mea ua foliga mai e lē tumau ma lē taua. Pe a tatou tuuese ia foliga taufaasese, faafoliga, mea e fiafia pe le fiafia i ai i luga o upegatafailagi, ua tatou naunau i mea e sili atu nai lo le aulelei mai fafo, fesootaiga pupuu, po o sailiga lē faamalieina o mea faalelalolagi e fiafia i ai le tagata lava ia. Faafetai, o loo i ai se auala e tau atu i tali e taua.
Pe a tatou oo i poloaiga sili a le Atua ia alofa ia te Ia ma i latou o siomia i tatou e ala i le feagaiga, tatou te faia e le o ni tagata ese po o ni malo, ae o Sona atalii po o se afafine i le aiga. O faamatalaga anamua o loo moni pea. O le lafoaiese o lo tatou tagata faalelalolagi ina ia i ai i le feagaiga, tatou te mauaina ai i tatou lava ma avea ai ma tagata sili e faavavau—saoloto, ola, moni—ma faauigaina ai o tatou sootaga sili ona taua. O le i ai i se feagaiga o le osia ma tausia lea o folafolaga faamaoni i le Atua ma le tasi ma le isi, e ala i feagaiga paia, lea e valaaulia le mana o le faaleatua e faaali mai i o tatou olaga. Pe a tatou osifeagaigaina mea uma o ia i tatou, e mafai ona avea i tatou ma tagata sili atu nai lo tagata o tatou i ai. O le i ai i feagaiga e aumaia ia i tatou se nofoaga, faamatalaga, gafatia ia avea ai. E tupu mai ai le faatuatua i le olaga ma le faaolataga.
O feagaiga paia e avea o se puna o le alofa mo, ma mai le Atua, ma o lea e mo le tasi ma le isi. E sili atu le alofa ma le silafiaina o i tatou e le Tama Faalelagi nai lo lo tatou alolofa po o le iloaina o i tatou lava. O le faatuatua ia Iesu Keriso ma le suiga patino (salamo) e aumaia ai le alofa mutimutivale, alofatunoa, ma le faamagaloga. E faamafanafana e nei mea le tiga, tuuatoatasi, faiga le tonu tatou te oo i ai i le faaletino. I le avea ai ma Atua, e finagalo ai lo tatou Tama Faalelagi ia tatou maua le meaalofa sili a le Atua—Lona olioli, Lana ola e faavavau.
O lo tatou Atua o se Atua o feagaiga. O Lona natura, Na te “tausia feagaiga ma faaalia le alofa mutimutivale.” O Ana feagaiga e tumau “a o tumau pea le taimi, pe a o tu pea le lalolagi, pe ao [ona] i ai se tagata e toatasi i luga o le lalolagi e faaolaina.” E lei faia i tatou ina ia tatou ola faasamasamanoa i le olaga faitino i le le mautinoa ma le masalosalo, ae ia olioli i sootaga taua o feagaiga “e sili atu le malosi … i lo fusi o le oti.”
O tulaga manaomia o sauniga ma feagaiga a le Atua e mo tagata uma, ae o lona faataunuuga e patino i le tagata lava ia. I le lē faaitu’au o le Atua, ua mafai ai e tagata taitoatasi i nofoaga uma ma vaitausaga uma ona mauaina sauniga faaola. E faaaoga le faitalia—e filifili tagata taitoatasi pe talia sauniga ua ofoina mai. O sauniga a le Atua e maua ai poutaiala i Lana ala o feagaiga. Tatou te ta’ua le fuafuaga a le Atua e aumai ai Lana fanau i le aiga, o le fuafuaga o le togiola, fuafuaga o le faaolataga, fuafuaga o le fiafia. O le togiola, faaolataga, fiafia faaselesitila ua mafai ona o Iesu Keriso lea “na faia lenei togiola ua atoatoa.”
O le auai faatasi ma le Atua ma savavali faatasi ma isi i luga o Lana ala o feagaiga o le faamanuiaina lea i le i ai i se feagaiga.
Muamua, o le i ai i se feagaiga e totonugalemu ia Iesu Keriso o le “puluvaga o le feagaiga fou.” O le a galulue mea uma mo lo tatou lelei pe a “faapaiaina [i tatou] ia Keriso … i le feagaiga o le Tama.” E oo mai uma faamanuiaga lelei ma folafolaina ia i latou o e tumau faamaoni e oo i le iuga. O le “tulaga fiafia o i latou o e tausi i poloaiga a le Atua” e “faamanuiaina i mea uma, i mea faaletino ma faaleagaga,” ma o le a “mau faatasi ma le Atua i le … fiafia e le gata.”
A o tatou faia le mea sili i le ola ai ia tatou feagaiga, atonu tatou te lagona i nisi taimi ua tatou i ai faatasi ma au agelu. Ma o le a tatou i ai—o i latou tatou te alolofa i ai ma o ē e faamanuiaina i tatou i lenei itu o le veli, ma i latou o ē alolofa ma faamanuiaina i tatou mai i le isi itu o le veli.
Talu ai nei sa ma vaaia ai ma Sister Gong se tulaga sili ona agamalu i le i ai i se feagaiga i se potu i le falema’i. Sa matuai manaomia lava e se tamā talavou se fatuga’o. Na fetagisi lona aiga, anapopogi, ma tatalo mo ia ina ia maua se fatuga’o. Ina ua oo mai le tala ua maua le fatuga’o e faasao ai le ola, na fai mai filemu lona toalua, “Talosia o manuia le isi aiga.” O le i ai i se feagaiga, i upu a le Aposetolo o Paulo, “ina ia tatou fefaamafanafanaa’i i lo tatou faatuatua, o outou atoa ma a’u.”
I le ala o le olaga, atonu e [i ai taimi] e leai ai so tatou faatuatua i le Atua, ae e le aveesea lava Lona faatuatua ia i tatou. E pei lava ona sa i ai, e ola pea Lona moli i taimi uma [ma faatalitali mai]. Na te valaaulia i tatou ia o mai pe toe foi mai i feagaiga ia e faailogaina ai Lona ala. Na te faatali e fusi ia i tatou, e tusa lava pe o tatou “mamao atu ma ia.” Pe a tatou vaai ma se mata o le faatuatua mo mamanu, faaofuofu, po o ni togi ua fesootai o lo tatou aafiaga, e mafai ona tatou vaai i Lona alofa mutimutivale agamalu ma le faamalosiauga, aemaise lava i o tatou tofotofoga, faanoanoaga, ma luitau, faapea foi i o tatou olioliga. Po o le a lava lo tatou tautevateva pe pauu soo, afai tatou te agai atu pea i luma ia te Ia, o le a Ia fesoasoani ia i tatou, i lea laasaga ma lea laasaga.
Lua, o le Tusi a Mamona o se faamaoniga faaletino e mafai ona tatou uuina i o tatou lima o le i ai i se feagaiga. O le Tusi a Mamona o se meafaigaluega folafolaina mo le faapotopotoina o fanau a le Atua lea na valoia e avea o se feagaiga fou. A o tatou faitauina le Tusi a Mamona, na o i tatou pe ma isi, leleoa pe leotele, e mafai ona tatou ōle atu i le Atua “ma le loto faamaoni, ma le manatu moni i ai, ma le faatuatua ia Keriso,” ma maua e ala i le mana o le Agaga Paia faamautinoaga a le Atua e moni le Tusi a Mamona. E aofia i lenei faamautinoaga o Iesu Keriso o lo tatou Faaola, o Iosefa Samita o le perofeta o le Toefuataiga, ma o le Ekalesia a le Alii ua faaigoaina i Lona suafa—O Le Ekalesia a Iesu Keriso o le Au Paia o Aso e Gata Ai.
E talanoa atu le Tusi a Mamona e ala mai i feagaiga anamua ma ona po nei ia te outou o fanau a Liae, “o fanau a perofeta.” Na maua e o outou augatama le folafolaga o le feagaiga faapea o outou, o o latou tupuaga, o le a iloaina se leo e pei e mai le efuefu i le Tusi a Mamona. O lena leo e te lagonaina pe a e faitau o loo molimau atu o outou o “fanau o le feagaiga” ma o Iesu o lo outou Leoleo Mamoe Lelei.
Ua valaauliaina i tatou taitoatasi e le Tusi a Mamona, i upu a Alema, ina ia ulu atu “i se feagaiga faatasi ma [le Alii], o le a [tatou] auauna atu ia te ia ma tausi ana poloaiga, ina ia mafai ona liligi atili tele mai e ia lona agaga i luga o [i tatou].” Pe a tatou mananao ia sui mo le lelei sili atu—e pei ona ta’ua ai e se tasi tagata, “ina ia taofi le faanoanoa ma ia fiafia i le fiafia”—tatou te taliaina le taitaiga, fesoasoani, ma le malosi. Pe a tatou o mai i le feagaiga ia i ai ma le Atua ma se nuu o tagata talitonu ma faatuatua, e mafai ona tatou maua faamanuiaga folafolaina i le mataupu faavae a Keriso—i le taimi nei.
O le toefuataiina o le pule o le perisitua e faamanuia ai Ana fanau uma o se vaega lona tolu lea o le i ai i se feagaiga. I lenei tisipenisione, na o mai ai Ioane le Papatiso ma Aposetolo o Peteru, Ioane ma Iakopo o ni avefeau faamamaluina mai le Atua e toefuatai mai Lana pule o le perisitua. O le perisitua a le Atua ma Ana sauniga e faatauaina ai sootaga i luga o le fogaeleele ma faatagaina ai sootaga o feagaiga ia i ai se aafiaga i le lagi.
O le perisitua e mafai ona faamanuiaina moni mai le fanau mai e oo i le tuugamau—mai le faaigoaina ma le faamanuiaina o se pepe e oo i le faapaiaga o se tuugamau. O faamanuiaga faaleperisitua e faamalolo, faamafanafana, ma faufautua. Sa ita se tama i lona atalii, seia oo ina oo mai le alofa faamagalo a o tuu atu e le tama i lona atalii se faamanuiaga faaperisitua mālū. O se tamaitai talavou pele e na o ia le tagata o le Ekalesia o lona aiga, sa le mautonu e uiga i le alofa o le Atua mo ia seia oo ina ia maua se faamanuiaga musuia faaleperisitua. I le salafa o le lalolagi, e saunia ai faaleagaga peteriaka faamamaluina e tuu atu ni faamanuiaga faapeteriaka. Pe a faaee atu e le peteriaka ona aao i luga o lou ao, na te lagonaina ma faaali atu le alofa o le Atua mo oe. Na te tautino atu lou tupuaga i le aiga o Isaraelu. Na te faailoa atu faamanuiaga mai le Alii. I le manatunatu lelei ua masani ai, sa tau mai ai e se avā a se peteriaka ia te a’u le auala na te valaaulia ai ma lona aiga le Agaga, aemaise lava i aso ia e tuuina atu ai e lo latou tama ni faamanuiaga faapeteriaka.
Ma le mea mulimuli, o faamanuiaga o le i ai i feagaiga e oo mai pe a tatou mulimuli i le perofeta a le Alii ma olioli i le ola ai i feagaiga, e aofia ai le faaipoipoga. O le faaipoipoga i le feagaiga e avea ma mea paia ma faavavau a o tatou filifili i aso taitasi e faamuamua le fiafia o o tatou taitoalua ma aiga nai lo i tatou lava. Pe a avea le “a’u” ma “tatou,” o le a tatou tuputupu ae faatasi. Tatou te ola matutua faatasi, tatou te ola laiti faatasi. A o tatou faamanuiaina le tasi ma le isi i se olaga atoa o le faagaloina o i tatou lava, o le a tatou iloaina le faapaiaina o a tatou miti ma olioli, i le olaga nei ma le faavavau.
E ui ina eseese tulaga, ae a tatou faia mea uma tatou te mafaia, i le mea sili tatou te mafaia, ma ōle atu ma le loto faamaoni ma saili atu i Lana fesoasoani i luga o le ala, o le a taialaina i tatou e le Alii, i Lana lava taimi ma Ana faiga, e ala i le Agaga Paia. O feagaiga o le faaipoipoga e fusia i filifiliga autasi a i latou o loo faia—o se faamanatu o le faamamaluina e le Atua ma lo tatou faamamaluina o le faitalia ma le faamanuiaga o Lana fesoasoani pe a tatou saili faatasi i ai.
O fua o le i ai i feagaiga i augatupulaga o aiga o loo lagonaina i o tatou aiga ma loto. Faamolemole faataga a’u sei faailoa atu i ni faataitaiga patino.
Ina ua amata ona ma alolofa faamama’i ma Sister Gong i le tasi ma le isi e agai atu i le faaipoipoga, sa ou aoao ai e uiga i le faitalia ma faaiuga. Mo se vaitaimi, sa ma aooga ai i ni atunuu eseese se lua i ni konetineta eseese se lua. O le mafuaaga lea e mafai ai ona ou fai atu ma le faamaoni, sa maua so’u PhD i sootaga faavaomalo.
Ina ua ou fesili, “Tama Faalelagi, pe tatau ona ou faaipoipo ia Susan?” Sa ou lagonaina le filemu. Ae o le taimi na ou aoao ai e tatalo ma le faamoemoega moni, “Tama Faalelagi, ua ou alofa ia Susan ma ua ou manao e faaipoipo ia te ia. Ou te folafola atu o le a avea au ma tane ma tamā aupito sili e mafai ona avea ai”—ina ua ou faatinoina ma faia a’u faaiuga aupito sili, o le taimi foi lea na oo mai ai ni faamautuuga aupito malolosi faaleagaga.
O lenei la, ua fesoasoani la matou gafa faaleaiga o le FamilySearch a Gong ma Lindsay, ma ata pu’e matou te maua ai ma fesootai ai i aafiaga o le ola ai i augatupulaga o le i ai i feagaiga. Mo i maua, ua aofia i o ma augatuaa faaaloalogia ia:
O le Tina o lo’u Tina-matua, o Alice Blauer Bangerter, o le sa toatolu e na faamalamalama atu e fia faaipoipo ia te ia i le aso e tasi, mulimuli ane sa fai atu i lana tane e faapipii se vilivae i lana vili pata ina ia mafai ai ona vili le pata, su’isu’i, ma faitau i le taimi e tasi.
O le Tamā o lo’u Tamā-matua o Loy Kuei Char na fafaina lana fanau i lona tua ma aveina nai meatotino a lona aiga i luga o se asini a o latou sopoina laufanua o le lava i le Motu Tele o Hawaii. O tautinoga ma osigataulaga a augatupulaga o le aiga o Char ua faamanuiaina ai lo matou aiga i le asō.
Sa tuua Tina-matua Mary Alice Powell Lindsay faatasi ma se fanau laiti e toalima ina ua maliliu faafuasei lona toalua ma le atalii ulumatua na o ni nai aso na va ai. I le avea ai ma se tina ua oti lana tane mo le 47 tausaga, sa tausia ai e Gram lona aiga ma le alofa tumau mai taitai ma tagata o le au paia i le lotoifale. I le tele o na tausaga, sa folafola atu ai e Gram i le Alii afai o le a Ia fesoasoani mai ia te ia, o le a le faitio lava. Sa fesoasoani le Alii ia te ia. Sa le’i faitio lava o ia.
Uso e ma tuafafine, ua molimauina e le Agaga Paia, o mea uma e lelei ma faavavau e faatotonugalemu i le soifua moni o le Atua, lo tatou Tama Faavavau ma Lona Alo, o Iesu Keriso, ma Lana Togiola. O lo tatou Alii, o Iesu Keriso, o le Puluvaga o le feagaiga fou. O le molimau atu e uiga ia Iesu Keriso o se faamoemoega o le feagaiga o le Tusi a Mamona. E ala i le tautoga ma le feagaiga, ua faamoemoe ai le pule o le perisitua toefuataiina a le Atua ina ia faamanuiaina fanau uma a le Atua, e aofia ai faaipoipoga i le feagaiga, augatupulaga o aiga, ma faamanuiaga a tagata taitoatasi.
Ua tautino mai e lo tatou Faaola, “O Au o le Alefa ma le Omeka, o Keriso le Alii; ioe, o A’u lava o ia, o le amataga ma le gataaga, o le Togiola o le lalolagi.”
Faatasi ai ma i tatou i le amataga, o loo faatasi o Ia ma i tatou, i lo tatou i ai uma lava i se feagaiga, e oo i le iuga. Ou te molimau atu ai i le suafa paia ma mamalu o Iesu Keriso, amene.