Sau, Mulimuli Mai ia te A’u—o le Fuafuaga Mamao a le Alii e Faatoilalo ai le Fili

Saunia e Mark L. Pace

Peresitene Aoao o le Aoga Sa

E saunia e le Alii Lona nuu e faasagatau atu i osofaiga a le fili. O le Sau, Mulimuli Mai ia te A’u o le fuafuaga mamao lea a le Alii e faatoilalo ai le fili.

Tatou te fiafia i le potopoto faatasi i lenei konafesi aoao maoae o Le Ekalesia a Iesu Keriso o le Au Paia o Aso e Gata Ai. O se faamanuiaga le mauaina o le mafaufau ma le finagalo o le Alii e ala i aoaoga a Ana perofeta ma aposetolo. O Peresitene Russell M. Nelson o le perofeta soifua a le Alii. E maeu lo tatou agaga faafetai mo ana fautuaga ma taitaiga musuia ua mauaina i le asō.

Ou te faaopoopo atu la’u molimau i molimau na faasoa atu muamua. Ou te molimau atu i le Atua, lo tatou Tama e Faavavau. O loo soifua o Ia ma e alofa ia i tatou ma leoleo ia i tatou. O Lana fuafuaga o le fiafia ua tuuina mai ai faamanuiaga o lenei olaga faaletino ma lo tatou toe foi atu mulimuli i Lona afioaga.

Ou te molimau atu foi ia Iesu Keriso. O Ia o le Alo e Toatasi o le Atua na Fanaua. Na Ia laveaiina i tatou mai le oti, ma ua Ia togiolaina i tatou mai le agasala pe a tatou faatino le faatuatua ia te Ia ma salamo. O Lana taulaga togiola le i’u mo i tatou ua aumaia ai faamanuiaga o le tino ola pea ma le ola e faavavau. Ioe, “Ia faafetaia le Atua mo lana meaalofa e le mafaatusalia o Lona Alo paia” (“O Le Keriso Soifua: O Le Molimau a Aposetolo,” Liahona, Me 2017, faavaa i totonu pito i luma).

Ua faamanuiaina le Au Paia o Aso e Gata Ai i le lalolagi atoa e tapuai ia Iesu Keriso i Ona malumalu. O se tasi o na malumalu o loo fauina i le taimi nei i Winnipeg, Kanata. Sa ma maua ma lo’u toalua, o Anne Marie, le avanoa e asiasi ai i le nofoaga o le galuega ia Aokuso o lenei tausaga. Ua matagofie le mamanuina o le malumalu ma o le a mautinoa lava le ofoofogia pe a maea. Peitai, e le mafai ona e maua se malumalu ofoofogia i Winnipeg, po o se isi lava mea, e aunoa ma se faavae mautu ma mausali.

O le taamilosaga o le to’a o le kiona ma le liusuavaia o le aisa ma tulaga o le faaleagaina ai o le palapala i Winnipeg na faigata ai ona saunia le faavae o le malumalu. O lea, sa tonu ai o le faavae o lenei malumalu o le a aofia ai ni poloka u’amea uumi se 70 e faasima faatasi. O nei poloka u’amea e 60 futu (18 m) le umi ae 12 i le 20 inisi (30 i le 50 sm) le lautele. Na viliina i lalo o le palapala seia tau i ni papa ma’a, pe tusa ma le 50 futu (15 m) i lalo o le palapala. O lenei faiga, o le a saunia ai e le 70 poloka u’amea se faavae mautu ma mausali mo le mea o le a avea ma malumalu matagofie o Winnipeg.

I le avea ai ma se Au Paia o Aso e Gata Ai, tatou te sailia se faavae mausali ma mautinoa talitutusa faapena i o tatou olaga—o se faavae faaleagaga e manaomia mo la tatou faigamalaga i le olaga faitino ma toe foi atu ai i lo tatou aiga faalelagi. O lena faavae ua faatuina i luga o papa ma’a o lo tatou liua i le Alii o Iesu Keriso.

Tatou te toe manatua aoaoga a Helamana mai le Tusi a Mamona: “Ma o lenei, ou atalii e, ia manatua, ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, … o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou” (Helamana 5:12).

Faafetai, ua tatou ola i se taimi ua aoao mai ai e perofeta ma aposetolo i tatou e uiga i le Faaola o Iesu Keriso. O le mulimuli ia latou fautuaga ua fesoasoani ia i tatou e faatulaga ai se faavae mautu ia Keriso.

O le tausaga ua mavae atu, i lana malelega amata o le konafesi aoao ia Oketopa 2018, na tuuina mai e Peresitene Russell M. Nelson lenei folafolaga ma le lapataiga: “O le faamoemoega lava o le Ekalesia ua leva ona i ai o le fesoasoani lea i tagata uma ia faateleina lo latou faatuatua i lo tatou Alii o Iesu Keriso ma i Lana Togiola, ia fesoasoani ia i latou i le osia ma le tausia o a latou feagaiga ma le Atua, ma ia faamalosia ai ma faamauina o latou aiga. I lenei lalolagi faigata i nei aso, ua le faigofie ai lenei mea. Ua faateteleina e le fili ana osofaiga i le faatuatua ma ua i o tatou luga ma o tatou aiga i se saoasaoa matua uigaese. Ina ia sao mai ai faaleagaga, tatou te manaomiaina ni fuafuaga e faatoilalo ai le fili ma ni fuafuaga mamao” (“Malelega Amata,” Liahona, Nov. 2018, 7; faaopoopo le faamamafa).

I le mavae ai o le savali a Peresitene Nelson, na faasilasila mai ai e Elder Quentin L. Cook o le Korama a Aposetolo e Toasefululua le punaoa o le Sau, Mulimuli Mai ia te A’u mo tagata taitoatasi ma aiga. Na aofia i lana saunoaga faamatalaga nei:

• “O le punaoa fou mo suesuega i le fale, o le Sau, Mulimuli Mai ia te A’u … ua mamanuina e fesoasoani i tagata o le ekalesia ina ia aoaoina le talalelei i totonu o le aiga.”

• “‘O lenei punaoa e mo tagata taitoatasi uma ma aiga i le Ekalesia’ [Sau, Mulimuli Mai ia te A’u—Mo Tagata Taitoatasi ma Aiga (2019), vi].”

• “O lo tatou faamoemoega o le faapaleni lea o aafiaga i le Lotu ma le aiga i se auala o le a matua faateleina ai le faatuatua, faaleagaga, ma faalolotoina ai le liua i le Tama Faalelagi ma le Alii o Iesu Keriso.” (“Liuaina Loloto ma Tumau i le Tama Faalelagi ma le Alii o Iesu Keriso,” Liahona, Nov. 2018, 9–10.)

O le amataga o Ianuari o lenei tausaga, na amata suesueina ai e le Au Paia o Aso e Gata Ai i le lalolagi atoa le Feagaiga Fou, ma le punaoa o le Sau, Mulimuli Mai ia te A’u e fai ma o tatou taiala. Faatasi ai ma se faatulagaga faalevaiaso, ua fesoasoani le Sau, Mulimuli mai ia te A’u ia i tatou e suesue i tusitusiga paia, aoaoga faavae o le talalelei, ma aoaoga a perofeta ma aposetolo. O se punaoa maoae mo i tatou uma.

I le mavae ai o le iva masina o lenei taumafaiga o le suesueina o tusitusiga paia i le lalolagi atoa, o le a se mea ua tatou vaaia? Ua tatou vaai i le Au Paia o Aso e Gata Ai i soo se nofoaga ua tuputupu ae i le faatuatua ma le tuuto i le Alii o Iesu Keriso. Ua tatou vaai i tagata taitoatasi ma aiga o faataatiaese se taimi i le aluga o le vaiaso e suesue ai i afioga a lo tatou Faaola. Ua tatou vaaia le faaleleia o le aoaoina o le talalelei i a tatou vasega o le Aso Sa a o tatou suesue i tusitusiga paia i le aiga ma faafesoaai o tatou malamalamaaga i le lotu. Ua tatou vaaia le olioli ma le lotogatasi sili atu faaleaiga a o tatou o ese mai i le na o le faitauina o tusitusiga paia i le suesueina o tusitusiga paia i se auala loloto atu.

O se faamanuiaga mo a’u le asiasi i le toatele o le Au Paia o Aso e Gata Ai ma faalogo muamua i o latou aafiaga i le Sau, Mulimuli Mai ia te A’u. O le faaalia o lo latou faatuatua ua faatumulia ai lo’u loto i le olioli. O nisi nei o ni nai manatu faaalia na ou faalogo i ai mai tagata eseese o le Ekalesia i vaega eseese o le lalolagi:

• Na faasoa mai se tama: “Ou te fiafia i le Sau, Mulimuli Mai ia te A’u, ona na te aumaia se avanoa e molimau atu ai i la’u fanau e uiga i le Faaola.”

• I se isi aiga, na fai mai ai se tamaitiiti: “O se avanoa lenei e faalogo ai i o’u matua o tuu mai a la molimau.”

• Na faasoa mai se tina: “Ua musuia ai i matou i le ala e faamuamua ai le Atua. O le taimi na matou [mafaufau ai matou te] ‘lei mauaina’ ua [tumu] i le faamoemoe, olioli, filemu, ma le manuia i auala matou te lei iloa e mafai.”

• Na matauina e se ulugalii: “Ua matua ese lava lo matou faitauina o tusitusiga paia nai lo se isi lava taimi muamua na matou faitauina ai. Ua matua tele lava mea o loo matou aoaoina nai lo se isi lava taimi muamua na matou aoaoina ai. E finagalo le Alii ia tatou vaai atu i mea i se auala ese. O loo sauniaina i tatou e le Alii.”

• Na ta’ua e se tina: “Ou te fiafia o loo tatou aoaoina faatasi le mea e tasi. I le taimi muamua, sa tatou faitauina. I le taimi nei, ua tatou aoaoina.

• Na faasoa mai e se tuafafine lenei vaaiga malamalama: “I le taimi muamua, sa ia te oe le lesona ae faaopoopo i ai tusitusiga paia. I le taimi nei, ua ia te oe tusitusiga paia ae faaopoopo i ai le lesona.”

• Na faaalia e se isi tuafafine: “Ou te lagona le eseesega pe a ou faia [e faatusa i le] taimi pe a ou le faia ai. Ua faigofie atu ia te a’u le talanoa i isi e uiga ia Iesu Keriso ma o tatou talitonuga.”

• Na ta’ua e se tinamatua: “Ou te valaau i la’u fanau ma latou fanau i Aso Sa ma e matou te fefaasoaai faatasi malamalamaaga mai le Sau, Mulimuli Mai ia te A’u.”

• Na matauina e se tuafafine: O le “Sau, Mulimuli Mai ia te A’u e lagona e pei o loo auauna patino mai lava le Faaola ia te a’u. Ua musuia e le lagi.”

• Na fai mai se tamā, “Pe a tatou faaaogaina le Sau, Mulimuli Mai ia te A’u, ua pei i tatou o le fanauga a Isaraelu, o loo faailoga pou o a tatou faitotoa, e puipuia ai o tatou aiga mai faatosinaga a le faaoosala.”

Uso e ma tuafafine, o se olioliga le asiasi atu ia te outou ma faalogo i auala o faamanuiaina ai e a outou taumafaiga i le Sau, Mulimuli Mai ia te A’u o outou olaga. Faafetai atu mo lo outou tuuto.

O le suesueina o tusitusiga paia faatasi ai ma le avea o le Sau, Mulimuli Mai ia te A’u o se taiala o loo faamalosia ai lo tatou liua ia Iesu Keriso ma Lana talalelei. Tatou te lē na ona faafesuiaia o le itula e tasi ua aveese mai le lotu i le Aso Sa mo le itula e tasi ua faaopoopo atu i suesuega o tusitusiga paia i le fale. O le aoaoina o le talalelei o se taumafaiga faisoo i le aluga o le vaiaso. E pei ona faasoa mai ma le malamalama e se tasi o tuafafine ia te a’u, “O le sini e le o le faapuupuuina o le lotu i le tasi le itula; ae ia ono aso le umi atu o le lotu!”

Ia, toe mafaufau i le lapataiga na tuuina mai e lo tatou perofeta, o Peresitene Nelson, ina ua ia tatalaina le konafesi aoao ia Oketopa 2018:

“Ua faateteleina e le fili ana osofaiga i le faatuatua ma o tatou luga ma o tatou aiga i se saoasaoa matua uigaese. Ina ia sao mai ai faaleagaga, tatou te manaomiaina ni fuafuaga mamao e faatoilalo ai le fili” (“Malelega Amata,” 7).

Ona oo lea (pe tusa ma le 29 itula mulimuli ane) i le aoauli o le As Sa, na ia tapunia ai le konafesi i lana folafolaga lenei: “Pe a e galue filiga e toe faafou lou fale e avea ma se nofoaga autu e aoaoina ai le talalelei, … o le a faaitiitia le faatosinaga a le fili i lou olaga ma i lou aiga” (“Avea ma Faataitaiga Lelei o le Au Paia o Aso e Gata Ai,” Liahona, Nov. 2018, 113).

E mafai faapefea ona vave faateleina osofaiga a le fili ae i le taimi lava e tasi o loo faatitiitia moni lava faatosinaga a le fili? E mafai ona tupu, ma o loo tupu i le Ekalesia atoa, aua o loo saunia e le Alii Lona nuu e faasagatau atu i osofaiga a le fili. O le Sau, Mulimuli Mai ia te A’u o le fuafuaga mamao lea a le Alii e faatoilalo ai le fili. E pei ona aoao mai e Peresitene Nelson, “O le mataupu aoaoina fou ua tuufaatasia e faatotonugalemu-i-le-aiga, ma lagolagoina-e-le-Ekalesia ua i ai le gafatia e tatala mai ai le mana o aiga.” Ae, o le a manaomia a tatou taumafaiga sili; tatou te manaomia ona “[mulimulitaia] ma le totoa ma le faaeteete ina ia liua o [tatou] fale i se malutaga o le faatuatua” (“Avea ma Faataitaiga Lelei o le Au Paia o Aso e Gata Ai,” 113).

Aua, e pei ona saunoa mai Peresitene Nelson, “E nafa i tatou taitoatasi ma lo tatou tuputupu ae faaleagaga faaletagata lava ia” (“Malelega Amata,” 8).

O le punaoa o le Sau, Mulimuli Mai ia te A’u, o loo saunia ai e le Alii i tatou “mo taimi faigata ua tatou feagai ai nei.” (Quentin L. Cook, “Liuaina Loloto ma Tumau,” 10). O loo Ia fesoasoani mai ia i tatou e faatulaga le “faavae mautinoa lea, o se faavae lea afai e atiae ai tagata e le mafai lava ona pauu i latou” (Helamana 5:12)—le faavae o se molimau e taula mausali i le papa o lo tatou liua i le Alii o Iesu Keriso.

Tau ina ia faamalosia i tatou e a tatou taumafaiga i aso taitasi i le suesueina o tusitusiga paia ma faamaonia ai lo tatou agavaa mo nei faamanuiaga folafolaina. Ou te tatalo atu ai i le suafa o Iesu Keriso, amene.