O Tamaitai o le Feagaiga i Faigapaaga ma le Atua
O le avea ai ma se tamaitai o le feagaiga i le faipaaga ai ma le Atua o le maoae ma le lelei lea e faafailele, taitai, ma auauna atu ai pea e le aunoa afafine o le Atua.
Ou te faafetai mo le faamanuiaga e talanoa atu ai ia te outou, o afafine o le feagaiga a le Atua. O lo’u faamoemoega i le po nei ina ia uunaia outou i le galuega sili lea ua valaauina i ai outou. Ioe, o afafine uma o le Atua o loo faafofoga mai i lo’u leo ua mauaina se valaau mai le Alii o Iesu Keriso.
O lou valaauga na amata ina ua tuuina oe i le olaga faaletino, i se nofoaga ma se taimi na filifilia mo oe e se Atua e silafia atoatoa oe ma alofa ia te oe o Sona afafine. I le lalolagi o agaga, na Ia silafia oe ma aoaoina oe ma tuu oe i le mea o le a e maua ai le avanoa, e seasea i le talafaasolopito o le lalolagi, ina ia valaaulia i totonu o se faatanoa vai o le papatisoga. O iina, o le a e faalogo ai i upu nei e saunoa ai se auauna valaauina a Iesu Keriso: “Ona ua tofia au e Iesu Keriso, ou te papatiso ia te oe i le suafa o le Tama, ma le Alo, ma le Agaga Paia. Amene.”
Ina ua e aluese mai le vai, ua e taliaina se isi valaau e auauna atu. I le avea ai ma se afafine fou o le feagaiga a le Atua, ua e faia se folafolaga ma mauaina se tofiga i Le Ekalesia a Iesu Keriso o le Au Paia o Aso e Gata Ai, lea ua faamauina ai oe o se tagata o le ekalesia. Ua e osifeagaiga ma le Atua e ave i ou lava luga le suafa o Iesu Keriso, ia tausi i Ana poloaiga, ma auauna atu ia te Ia.
Mo tagata taitoatasi o e osia nei feagaiga, o le auaunaga ua valaau i ai o ia e le Alii e fai o le a fetaui lelei i lena tagata. Peitai, o afafine ma atalii o le feagaiga a le Atua, e tasi lava se valaauga taua ma olioli ua i ai ia i latou uma. O le auauna atu lea i isi mo Ia.
A o saunoa atu i tuafafine, na tuuina atu ai e Peresitene Russell M. Nelson se aotelega matagofie e uiga i le valaau a le Alii ia te oe ina ia auai ma Ia i Lana galuega. Ua faamatalaina e Peresitene Nelson lou valaauga i le auala lenei: “Na fetalai le Alii, ‘O la’u galuega ma lo’u mamalu lenei ia aumaia le tino ola pea ma le ola faavavau o le tagata.’ (Mose 1:39.) O lona uiga e mafai ona faapea atu Lona soo-afafine tuuto, ‘O la’u galuega ma lo’u mamalu o le fesoasoani lea i e pele ia te a’u ia latou ausia lena sini faalelagi.’
“O le fesoasoani atu i se isi tagata soifua ia ausia lona gafatia faaselesitila, o se vaega lena o le misiona paia a le tamaitai. I le avea ai ma se tina, faiaoga, po o se Tagata Paia faafailele, na te mamanuina olaga o isi ia tino mai i ona faamoemoega. I le faipaaga ai ma le Atua, o lana misiona paia o le fesoasoani lea i agaga ia ola ma loto ia faaeaina. O le pogai lea o lona foafoaga. E faamamaluina, faagaeetia, ma faaeaina.”
E le mafai ona e iloa po o afea, pe o le a le umi o le taimi, ae o lau misiona patino o le a taulai atu i auaunaga i valaauga e pei o se tina, taitai, po o tuafafine o auaunaga. Ona o le alofa o le Alii, e le tuuina mai ai ia i tatou le filifiliga o le taimi, umi, po o faagasologa o o tatou tofiga. Ae ua e silafia mai tusitusiga paia ma perofeta soifua o nei tofiga uma o le a oo mai, a le o lenei olaga po o le isi olaga, i afafine uma o le Atua. Ma o na mea uma o ni sauniuniga mo le ola e faavavau i ni aiga alofa—”o le meaalofa sili o meaalofa uma a le Atua.”
O le a e atamai e faatino taumafaiga uma e saunia ai i le taimi nei faatasi ma le taunuuga i le mafaufau. Ua faafaigofie atili lena galuega ona e manaomia tele e nei tofiga taitasi sauniuniga lava e tasi.
Sei o tatou amata i le tofiga o le avea ma se tuafafine o auaunaga. Pe ua e maua lena tofiga o se afafine e 10 tausaga i se aiga ua maliu le tamā, po o se peresitene o le Aualofa na aafia talu ai nei lona nuu i se afi, pe o loo e i ai i se falemai o loo sailiili malosi mai se taotoga—ua ia te oe se avanoa e faataunuu ai lou valaauga mai le Alii ina ia avea ma Ona afafine o auaunaga.
E foliga mai e matua eseese lava na tofiga faaleauaunaga. Ae latou te manaomia uma le sauniuniga o se loto malosi ma alofa, o se faatuatua le fefe auā e lē tuuina mai e le Alii se poloaiga vagana ua Ia saunia se ala, ma se manao e alu ma fai mo Ia.
Talu ai na saunia o ia, na faauouo e le afafine e 10 tausaga le matua lona tina ua maliu lana tane ma na tatalo ia iloa le ala e fesoasoani ai i lona aiga. Ma e faaauau pea ona ia faia.
Na saunia le peresitene o le Aualofa e auauna atu a o le’i tupu faafuasei le afi i lona nuu. Ua ia silafia lelei ma alofa i tagata. O lona faatuatua ia Iesu Keriso ua faatupulaia i le aluga o tausaga mai le mauaina o tali i ana tatalo mo le Alii ia fesoasoani ia te ia i ni auaunaga laiti mo Ia. Ona o le umi o ana tapenaga, ua saunia ai o ia ma naunau e faatulaga ona uso e auauna atu i tagata ma aiga o mafatia.
O se tuafafine i se falemai ua amata ona malosi mai se taotoga na saunia e auauna atu i ana uo mama’i. Sa ia faaaluina se taimi atoa e auauna atu ai i le Alii i tagata ese e pei o ia o se tuaoi ma se uo. Ina ua ia lagona i lona loto le valaau e auauna atu i le falema’i, sa ia auauna atu i isi ma le lototoa ma le alofa lea na amata faamoemoe ai isi ma’i ia ‘aua ne’i vave malosi o ia.
I le auala lava e tasi e te saunia ai e auauna atu, e mafai ma e tatau ona e saunia mo lou valaauga e avea ma se taitai mo le Alii pe a oo mai. O le a manaomia ai le faatuatua ia Iesu Keriso, ia mauaa i le loloto o lou fiafia i tusitusiga paia, e taitai tagata ma aoao atu Lana afioga e aunoa ma le fefe. Ona e saunia lea ia maua le Agaga Paia e avea ma au soa tumau. O le a e naunau e fai atu, “O le a ou [alu],” pe a fai mai lou fesoasoani i le au peresitene o Tamaitai Talavou, ma le atuatuvale i lona leo, “O loo gasegase Sister Alvarez i le asō. O ai o le a faiaoga i lana vasega?
E talitutusa lava le tele o sauniuniga mo se aso matagofie pe a valaauina oe e le Alii i se tofiga o se tina. Ae o le a manaomia ai foi se loto e sili atu ona alofa nai lo le mea na e manaomiaina muamua. O le a manaomia ai le faatuatua ia Iesu Keriso e sili atu nai lo se mea na i ai muamua i lou loto. Ma o le a manaomia ai se tomai e tatalo ai mo le faatosinaga, taitaiga, ma le faamafanafanaga a le Agaga Paia e sili atu i mea atonu na e lagonaina na mafai foi.
Atonu e te ono fesili ma le talafeagai pe faapefea e se alii o soo se vaitausaga ona iloaina mea e manaomia e tina. O se fesili aoga. E le mafai ona iloa e alii mea uma, ae e mafai ona tatou aoaoina ni lesona i se faaaliga mai le Atua. Ma e mafai foi ona tele ni mea tatou te aoaoina e ala i le matauga, pe a tatou faaaogaina le avanoa e saili ai le Agaga ia fesoasoani mai ia i tatou ia malamalama i mea tatou te matauina.
Na ou matauina Kathleen Johnson Eyring mo le 57 tausaga na ma faaipoipo ai. O ia o se tina o ni atalii se toafa ma ni afafine se toalua. E oo mai i le asō, na ia taliaina le valaau e avea ma se faatosinaga faatina i le silia ma le selau tagata moni lava faaleaiga ma le isi fia selau ia sa ia vaetamaina i totonu o lona loto faatina.
Tou te manatua le faamatalaga atoatoa a Peresitene Nelson e uiga i se misiona paia a tamaitai—e aofia ai lana misiona o se tulaga faatina: “I le avea ai o se tina, faiaoga, po o se Tagata Paia e faafailele, na te mamanuina olaga o isi ina ia tino mai i ona faamoemoega. I le faipaaga ai o ia ma le Atua, o lana misiona paia o le fesoasoani lea i agaga ia ola ma faaeaina tagata. O le pogai lea o lona foafoaga.”
I le latalata e mafai ona ou iloatino ai, na mulimuli lo’u toalua, o Kathleen, i lena valaauga na tuuina mai i afafine a lo tatou Tama. E foliga mai ia te a’u o le ki, o upu ia “na te fesoasoani i olaga o isi tagata ia tino mai i ona faamoemoega … i le faipaaga ai ma le Atua.” Na te le fosia. Na te mamanuina. Ma sa i ai sana mamanu mo ona faamoemoega, ma o lea, sa ia taumafai ai ia mamanuina i latou sa ia alofa ai ma faafailele. O lana mamanu o le talalelei a Iesu Keriso—e pei ona ou vaaia e ala i matauga ma le agaga tatalo i le aluga o tausaga.
O le avea ai ma se tamaitai o le feagaiga i le faipaaga ai ma le Atua o le maoae ma le lelei lea e faafailele, taitai, ma auauna atu ai pea e le aunoa afafine o le Atua, e auauna ai i soo se auala ma nofoaga ua Ia saunia mo i latou. Ou te folafola atu o le a e maua le olioli i lau faigamalaga i lou aiga faalelagi a o e toe foi atu ia te Ia o se afafine tausi feagaiga a le Atua.
Ou te molimau atu o loo soifua le Atua le Tama ma e alofa o Ia ia te oe. O le a Ia tali mai i au tatalo. O loo taitaia e Lona Alo Pele, i auiliiliga uma, Le Ekalesia a Iesu Keriso o le Au Paia o Aso e Gata Ai. O Peresitene Russell M. Nelson o Lana perofeta soifua. Ma sa vaai ma talanoa Iosefa Samita i le Atua le Tama ma Iesu Keriso i se togavao i Palamaira, Niu Ioka. Ou te iloa e moni lena mea. Ou te molimau atu foi o Iesu Keriso o lo outou Faaola; e alofa o Ia ia te outou. Ma e ala atu i Lana Togiola, e mafai ona faamama ma siitia outou i valaauga maualuluga ma paia lea o le a oo mai ia te outou. Ou te molimau atu ai i le suafa paia o Iesu Keriso, amene.