O Molimau, Korama a le Perisitua Arona, ma Vasega a Tamaitai Talavou
O fetuunaiga o le a matou faasilasila atu nei ua faamoemoe e fesoasoani i alii talavou ma tamaitai talavou ia atiae lo latou gafatia paia faaletagata lava ia.
Uso e ma tuafafine pele, ua matagofie lava le toe faatasi ai foi ma outou i lenei konafesi aoao. I le amataga o lenei vaiaso, sa faia ai ni faasilasilaga i tagata o le Ekalesia e uiga i suiga i aiaiga faavae e faatatau i tagata e mafai ona auauna atu o ni molimau i sauniga o le papatisoga ma faamauga. Ou te fia faamamafa atua na vaega e tolu.
-
O se papatisoga sui mo se tagata ua maliu e mafai ona molimau ai soo se tasi o loo umiaina se pepa faataga o le malumalu o loo aoga, e aofia ai se pepa faataga e tapulaa le faaaogaina.
-
Soo se tagata ua maua faaeega paia o loo i ai se pepa faataga o le malumalu o loo aoga e mafai ona auauna atu o se molimau i sauniga o faamauga, mo ē o soifua po o se faamauga sui.
-
Soo se tagata o le Ekalesia ua papatisoina, e mafai ona avea ma se molimau i le papatisoga o se tagata o soifua. O lenei suiga e faatatau i papatisoga uma i fafo atu o le malumalu.
O nei fetuunaiga i aiaiga faavae e faatatau i faiga faavae. O aoaoga faavae ma feagaiga ua faamamafaina e le masuia. E tutusa lava lo latou aafiaga i sauniga uma. O nei suiga e tatau ona matua faaleleia tele ai le auai o aiga i nei sauniga.
Ou te fia talanoa foi ia te outou i lenei taimi e faalauiloa atu fetuunaiga e faatatau i o tatou talavou ma o latou taitai.
Tou te manatua na ou valaauliaina le autalavou a Le Ekalesia a Iesu Keriso o le Au Paia o Aso e Gata Ai ia auai i le autau talavou a le Alii ia auai ai i le galuega silisili i luga o le lalolagi i le asō—le faapotopotoina o Isaraelu. Na ou tuuina atu lenei valaaulia i a tatou autalavou ona e matua maeu le faamanuiaina o i latou i le aapa atu i isi ma faasoa atu mea latou te talitonu i ai i se faiga faagauloto. O le galuega o le faapotopotoina o se vaega taua o le fesoasoani ina ia saunia le lalolagi ma ona tagata mo le Afio Faalua Mai o le Alii.
I uarota taitasi, o le autau talavou a le Alii e taitai e se epikopo, o se auauna tuuto a le Atua. O lona tiutetauave muamua lava ma le sili o le tausia lea o alii talavou ma tamaitai talavou o lana uarota. O le epikopo ma ona fesoasoani e tatiaia le galuega a korama o le Perisitua Arona ma vasega a Tamaitai Talavou i le uarota.
O fetuunaiga o le a matou faasilasila atu nei ua faamoemoe e fesoasoani i alii talavou ma tamaitai talavou ia atiae lo latou gafatia paia faaletagata lava ia. Matou te mananao foi ia faamalosia korama a le Perisitua Arona ma vasega a Tamaitai Talavou ma tuuina atu le lagolago i epikopo ma isi taitai matutua a o latou auauna atu i lenei tupulaga faiae.
O le a talanoaina nei e Elder Quentin L. Cook o le Korama a Aposetolo e Toasefululua ia fetuunaiga e faatatau i alii talavou. Ma o le po nei, i le sauniga aoao a tamaitai, o le a talanoaina ai e Sister Bonnie H. Cordon, le Peresitene Aoao o Tamaitai Talavou ia fetuunaiga e faatatau i tamaitai talavou.
Ua autasi le Au Peresitene Sili ma le Toasefululua i le faamaoniaina o nei taumafaiga e faamalosia ai a tatou talavou. E maeu tele lo tatou alolofa ia i latou ma tatalo mo i latou. O i latou o le “faamoemoe o Isaraelu, le autau a Siona, fanau o aso valoia.” Tatou te faailoa atu lo tatou talitonuga i a tatou talavou ma lo tatou lotofaafetai mo i latou. I le suafa paia o Iesu Keriso, amene.