Faamamaluina o Lona Suafa
I le faasinomaga ma le auai i feagaiga, ua valaauina ai i tatou i le suafa o Iesu Keriso.
A o faatalitali ma le fiafia matua i le fanau mai o se tamaitiiti, ua ia i latou le tiutetauave o le filifilia o se igoa mo le latou pepe fou. Masalo ina ua e fanau mai, na e maua se igoa na tuufaasolo mai i lou aiga mo augatupulaga. Pe atonu o le igoa na e mauaina sa lauiloa i le tausaga po o le nofoaga lea na e fanau mai ai.
Sa tuuina atu e le perofeta o Helamana ma lona faletua ni igoa taua faaleaiga i o laua atalii pepe o Nifae ma Liae. Sa ta’u atu mulimuli ane e Helamana i ona atalii:
“Ua ou faaigoaina oulua i igoa o tatou uluai matua … ina a oulua manatua o oulua igoa ia oulua manatua ai i laua; ma a oulua manatua i laua ia oulua manatua a laua galuega; …ua taua, ma ua tusia foi, e faapea na lelei.
“O lea, ou atalii e, ou te manao ina ia oulua faia le mea ua lelei.”
O igoa o Nifae ma Liae na fesoasoani ia i laua e manatua ai galuega lelei a o la tuaa ma uunaia i laua ia faia foi mea lelei.
Uso e, po o fea lava o tatou nonofo ai, po o le a le gagana tatou te tautatala ai, pe ua 8 tausaga le matua pe ua 108, tatou te tausoaina uma se suafa faapitoa o loo i ai nei faamoemoega lava e tasi.
“Aua o [tatou] uma lava na papatisoina ia Keriso ua … oofu ia Keriso … aua ua tasi lava [tatou] uma ia Keriso Iesu.”
I le avea ai ma tagata o Le Ekalesia a Iesu Keriso o le Au Paia o Aso e Gata Ai, “na muamua tatou tautino atu i ai lo tatou naunautai e tauave i o tatou luga le suafa o Keriso, i le sauniga o le papatisoga.” E ala i lenei feagaiga, na tatou folafola atu e manatua pea o Ia, tausi i Ana poloaiga, ma auauna atu i isi. O lo tatou naunautaiga e tausia lenei feagaiga e faafouina i aso Sapati taitasi pe a tatou aai ma feinu i le faamanatuga ma toe olioli ai i le faamanuiaga o le “savavali i le ola toefuataiina.”
O le igoa na tuuina mai ia i tatou ina ua tatou fananau mai ua atagia ai lo tatou faasinomaga taitoatasi ma tuuina mai le lagona auai i totonu o o tatou aiga faalelalolagi. Peitai, ina ua “toe fanauina” i tatou i le papatisoga, o lo tatou malamalamaaga pe o ai i tatou na faateleina. “Ona o le feagaiga ua outou faia, o le a taʼua ai outou o le fanau a Keriso, … aua faauta, … ua fanauina ai e ia outou faaleagaga; aua ua outou fai mai ua liua o outou loto ona o le faatuatua i lona suafa; o lea, ua fanauina ai outou e ia.”
O lea la, i le faasinomaga ma le auai i feagaiga, ua valaauina ai i tatou i le suafa o Iesu Keriso. Ma “o le a lē i ai se isi igoa e tuuina mai po o se isi lava ala po o ni auala e mafai ona oo mai ai le olataga i le fanauga a tagata, ua nao i le suafa lava ma ala i le suafa lava o Keriso, le Alii Mamana Aoao.”
O le suafa o Iesu sa lauiloa ao lei taitai soifua mai o Ia. I le Tupu o Peniamina, na valoia e se agelu, “Ma o le a ta’ua o ia o Iesu Keriso, o le Alo o le Atua, … ma o lona tina o le a ta’ua o Maria.” O Lana galuega o le “alofa togiola” na faailoa mai foi i fanau a le Atua i soo se taimi lava na i ai le talalelei i le lalolagi, mai lava i ona po o Atamu ma Eva seia oo mai i le taimi nei, ina ia mafai ona latou iloa “le puna e mafai ona latou tepa taulai i ai mo se faamagaloga o a latou agasala.”
I le tausaga ua mavae, na tuuina mai ai e Peresitene Russell M. Nelson “se talosaga faavaloaga” i tamaitai ina “ia mamanuina le lumanai e ala i le fesoasoani e faapotopoto Isaraelu ua faataapeapeina.” Sa ia valaaulia i tatou e faitau le Tusi a Mamona ma “faailoga fuaiupu taitasi o loo talanoa pe o loo faasino i le Faaola.” Sa ia saunoa mai ia tatou “manatu i ai e uiga i le tautalatala e uiga ia Keriso, olioli ia Keriso, ma talai atu Keriso faatasi ma o [tatou aiga] ma uo.” Atonu ua amata ona e iloaina fua o ana folafolaga “o le a outou latalata atili atu i le Faaola. … Ma o suiga, e oo lava i vavega, o le a amata ona tutupu.”
O la tatou folafolaga ia manatua pea le Faaola tatou te maua ai le malosi e tu atu ai mo le upumoni ma le amiotonu—pe o tatou i ai i se faapotopotoga toatele o tagata po o ō tatou nofoaga tuufua, lea e leai se tasi e iloaina a tatou amioga vagana ai le Atua. A tatou manatuaina o Ia ma Lona suafa o loo tatou tauaveina, o le a leai so tatou nofoaga mo ni faatusatusaga e le lelei mo i tatou lava po o faamasinoga faamaualuga. Faatasi ma o tatou mata i le Faaola, tatou te vaai ia i tatou lava po o ai moni lava i tatou—o se afafine faapelepele o le Atua.
O le manatuaina o a tatou feagaiga e faafilemu ai popolega o le lalolagi, liliu ai le masalosalo o le tagata lava ia i le lototele, ma tuuina mai le faamoemoe i taimi o tofotofoga.
Ma afai tatou te tautevateva ma pauu i lo tatou alualu i luma i luga o le ala o feagaiga, tau lava o le tatou manatuaina o Lona suafa ma Lona alofa-agalelei ia i tatou. “Ona ua ia te ia le mana uma, ma le poto uma, ma le malamalama uma; ua silafia e ia mea uma, ma o ia o se Tagata alofa mutimutivale … o i latou o e e salamo ma talitonu i lona suafa.” E moni lava e leai se leo e sili atu ona logomalie nai lo le suafa o Iesu ia i latou uma o e, faatasi ma se loto momomo ma se agaga salamo, e saili ina ia “faia ia lelei atu ma ia lelei atu.”
Na aoao mai Peresitene Nelson: “Ua mavae aso sa mafai ai ona avea oe o se Kerisiano filemu ma le lagolelei. O lau tapuaiga e le na ona e auai atu lava i le lotu i le Aso Sa. O lona uiga o le auai atu o se soo moni mai le taeao o le aso Sa e oo atu i le po o le Aso Toonai. … E leai se mea e faapea o se soo ‘faavaitaimi’ a le Alii o Iesu Keriso.”
O lo tatou loto e ave i o tatou luga le suafa o Keriso e sili atu nai lo o se talanoaga aloaia. E lē o se folafolaga e lē taunuu po o se aganuu faafoliga. E lē o se sauniga o se mea na tupu i le olaga po o se pine o le igoa tatou te faapipiina. E lē o se faaupuga e tau lava ina tatou tuu i luga o se fata pe tautau i luga o se puipui. O Lona suafa o le suafa e “oofu [ai],” e tusia i o tatou loto, ma “togitogia i luga o [tatou] mata.”
O le taulaga togiola a le Faaola e tatau ona manatuaina, i taimi uma, e ala i o tatou mafaufauga, amioga, ma fegalegaleaiga ma isi. E le gata Na te manatua o tatou igoa, ae e manatua e Ia i tatou i taimi uma. Sa tautino mai le Faaola:
“Aua pe mafai ea ona galo i se fafine lana tama o susu, ina ia lē alofa o ia i le tama a lona manava? Ioe, atonu e galo ia te i latou, ae o le a le galo ia te aʼu oe, le aiga e o Isaraelu.
“Faauta, ua Ou togitogia oe i luga o alofilima o o’u lima.”
Na aoao mai Peresitene Siaosi Alapati Samita, “Faamamalu i igoa o loo e tauaveina, aua o le a i ai se aso e te maua ai le faamanuiaga ma le avanoa e lipoti atu ai … i lou Tama o i le Lagi … mea na e faia i [na igoa].”
E pei o igoa o Nifae ma Liae na filifilia ma le faaeteete, pe mafai ea ona talanoaina ma tusitusi e uiga ia i tatou o ni soo moni o le Alii o Iesu Keriso? Pe o tatou faamamaluina ea le suafa o Iesu Keriso lea ua tatou loto e ave i o tatou luga? O i tatou uma ea o “se auauna ma se molimau” o Lona alofa-agalelei ma Lona mana togiola?
E lei leva atu, sa ou faalogologo ai i le Tusi a Mamona. I le mataupu mulimuli o le 2 Nifae, sa ou faalogo o fai mai Nifae i se mea ou te le’i faitauina muamua i lea auala e tasi. I lana faamaumauga atoa, ua ia aoao mai ma molimau mai e uiga i le “Togiola,” le “Paia [e Toatasi] o Isaraelu,” le “Tamai Mamoe a le Atua,” ma le “Mesia.” Ae ina ua ia faaiuina lana tala, sa ou faalogo o ia fai mai upu nei: “Ou te olioli i le manino; ou te olioli i le upumoni; ou te olioli i lo’u Iesu, ona ua togiola e ia lo’u agaga.” Ina ua ou faalogo atu i upu nei, sa olioli lo’u loto ma sa tatau ona ou faalogo pea lava pea i ai. Sa ou iloaina ma tali atu i lena fuaiupu e pei lava ona ou iloa ma tali atu i loʻu lava igoa.
Na fetalai mai le Alii, “Ioe, amuia lava lenei nuu o e ua loto e tauave loʼu igoa; ona o loʼu igoa o le a valaau ai i latou; ma o ā aʼu i latou.”
I le avea ai ma tagata o Le Ekalesia a Iesu Keriso o le Au Paia o Aso e Gata Ai, tau ina ia tatou “ave ma le fiafia [i o tatou luga] le suafa o Keriso” e ala i le faamamaluina o Lona suafa i le alofa, tuuto, ma galuega lelei. Ou te molimau atu o Ia o le “Tamai Mamoe a le Atua, le Alo o le Tama Faavavau.” I le suafa o Lona alo paia, o Iesu Keriso, amene.