O Mai i le Lafu a le Atua

Saunia e Elder Randy D. Funk

O Le Fitugafulu

I totonu o le lafu a le Atua, tatou te iloa ai le tausiga mataalia, faafailele a le Leoleo Mamoe Lelei ma faamanuiaina ai i le lagonaina o Lona alofa togiola.

A o avea o ni matua talavou, sa aoaoina e Uso ma Tuafafine Samad le talalelei a Iesu Keriso i lo la fale faatauvaa e lua-potu i Semarang, Initoneisia.¹ Sa aoao atu e ni faifeautalai talavou se toalua i la’ua i upumoni e faavavau, a o nonofo faataamilo i se tama’i laulau, ma se moli tau le malamalma na foliga mai sa faatumulia ai le potu i namu nai lo le malamalama. O tatalo ma le loto ma le taitaiga a le Agaga Paia, na la talitonu ai i mea sa aoao ai i la’ua ma sa filifili ai ina ia papatiso ma avea ma tagata o Le Ekalesia a Iesu Keriso o le Au Paia o Aso e Gata Ai. O lena faaiuga, ma le la mamanu o le olaga talu mai ai, na faamanuiaina ai Uso ma Tuafafine Samad ma lo la aiga i itu uma o o latou olaga.²

O i latou o nisi o uluai Au Paia paionia i Initoneisia. Mulimuli ane, sa la maua ai sauniga o le malumalu, ma sa avea ai Uso Samad o le peresitene o le paranesi ona sosoo ai lea ma le peresitene o le itu, sa fealuai i Java Tutotonu atoa e faataunuu ai ona tiutetauave. Mo le sefulu tausaga ua mavae, sa avea o ia ma uluai peteriaka o le Siteki a Surakarta Initoneisia.

Elder Funk ma Sister ma Brother Samad

I le avea ai o se tasi o faifeautalai i lena fale faatauvaa, e tumu i le faatuatua i le 49 tausaga talu ai, sa ou molimauina ai ia i la’ua le mea sa aoao mai e le Tupu o Peniamina i le Tusi a Mamona: “Ou te manao ia outou manatunatu i le tulaga manuia ma le fiafia o i latou o e e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga.”³ O faamanuiaga e tafe atu i olaga o i latou o e mulimuli i le faataitaiga ma aoaoga a Iesu Keriso, o e filifili ia faitaulia faatasi ma Ona soo, e anoanoai, tumu i le fiafia, ma e faavavau.⁴

O Le Lafu a le Atua

O le valaaulia o feagaiga i le papatisoga a Alema ia i latou o e sa faapotopoto i le Vai o Mamona o loo amata i le fasifuaitau lenei: “O lenei, ona ua outou mananao e o mai i le lafu a le Atua.”⁵

Flock of sheep in the country side standing next to a rock fence.

O se lafu po o se lafumamoe o se pa telē, e tele ina fausia i puipui maa, e puipuia ai mamoe i le po. E na o le tasi le faitotoa. A uma le aso, e valaau e le leoleo mamoe ana mamoe. Latou te iloa lona leo, ma e ala mai i le faitotoa ona latou ulufale mai ai i le saogalemu o le lafu.

Masalo na iloa e le nuu o Alema e tutu leoleo mamoe i le faitotoa vaapiapi o le lafu a oo ina ulufale mai mamoe, latou te faitaulia⁶ ma taulima taitasitasi ai ni o latou manu’a ma ni faaletonu e mataulia. O le saogalemu ma le manuia o mamoe e faalagolago i le naunau e o mai i le lafu ma nonofo ai i totonu o le lafu.

Atonu o i ai nisi o i tatou o e manatu ua i ai i le faatausi’usi’uga o le lafu, atonu o mafaufau e le o manaomia tele pe le taua tele i latou, pe faapea foi e le o i latou o ni ō le lafu. Ma, a o i ai i totonu o le lafumamoe, i le lafu a le Atua o nisi taimi tatou te faatiga ai i se tasi ma e tatau ai ona salamo pe faamagalo atu.

Ae o le Leoleo Mamoe Lelei⁷—lo tatou leoleo mamoe moni—e lelei i taimi uma. I totonu o le lafu a le Atua, tatou te iloa ai Lana tausiga mataalia, faafailele ma faamanuiaina ai i le lagonaina o Lona alofa togiola. Na Ia fetalai, “Ua Ou togitogia oe i luga o alofilima o o’u lima; o ou pa ua i ai pea i oʼu luma.”⁸ Ua togitogia e lo tatou Faaola i luga o Ona alofilima a tatou agasala, tiga, puapuaga,⁹ ma mea uma e le fetaui i le olaga.¹⁰ E talia tagata uma e maua nei faamanuiaga, pe a latou “mananao e o mai”¹¹ ma filifili ia i ai i totonu o le lafu. O le meaalofa o le faitalia ua le na o le mea tonu e filifili; a’o le avanoa e filifili ai le mea tonu. Ma o papuipui o le lafu e le o se faasa ae o se faapogai o le saogalemu faaleagaga.

Sa aoao mai e Iesu e faapea e “tasi le lafu, e tasi foi le leoleo mamoe.”¹² Sa Ia fetalai:

“O le ui atu i le faitotoa, o le leoleo mamoe lava lea. …

“Ma e faalogo mamoe i lona leo … ,

“ … ona mulimuli atu lea o mamoe ia te ia: aua ua latou iloa lona siufofoga.”¹³

Ona fetalai lea o Iesu, “O A’u nei o le faitotoa: afai e ui mai se tasi ia te au, e faaolaina ia.”¹⁴ ua aoao manino mai ai e faapea e na o le tasi lava le ala i le lafu a le Atua ma na o le tasi foi le ala e faaolaina ai. E ala ia Iesu Keriso.¹⁵

E O’o Mai Faamanuiaga ia i Latou o i Totonu o le Lafu a le Atua

Tatou te aoao i le ala e o mai ai i le lafu mai le afioga a le Atua, o le aoaoga faavae autu lea na aoao mai e Iesu Keriso ma Ana perofeta.¹⁶ Pe a tatou mulimuli i aoaoga faavae autu a Keriso ma o mai i le lafu e ala i le faatuatua ia Iesu Keriso, salamo, papatiso ma le faamauga, ma tumau i le faamaoni,¹⁷ ua folafola mai e Alema ni faamanuiaga ma’oti, ma patino. E mafai ona(1) “togiolaina oe e le Atua,” (2) “faitauina faatasi ma i latou o le uluai toetutu,” (3) “ma maua le ola e faavavau” ma (4) o le a “liligi tele mai [e le Alii] lona agaga i o outou luga.”¹⁸

Ina ua uma ona aoao mai e Alema na faamanuiaga, sa patipati lima o tagata ona o le olioli. O le mafuaaga lenei.

Muamua: Ina ia togiolaina o lona uiga e totogi uma se aitalafu po o se matafaioi po o le faasaolotoina mai mea e mafatia pe faatama’ia ai.¹⁹ E leai se aofaiga o la tatou pitola’au o le faaleleiga faaletagata lava ia e mafai ona faamama ai i tatou mai agasala sa tatou faia, pe faaatoatoa ai mai manu’a na tatou mafatia ai e aunoa ma le Togiola a Iesu Keriso. O Ia o lo tatou Togiola.²⁰

Lua: Ona o le Toetu o Iesu Keriso, o le a toetutu ai ia tagata uma.²¹ A mavae ona tuua e o tatou agaga o tatou tino faitino, o le a le masalomia lo tatou sagisagi atu i le taimi e mafai ai ona tatou toe feopoai i se tino toetu ma i latou tatou te alolofa i ai. O le a tatou pulunaunau atu e mafuta ma i latou o le Uluai Toetutu.

Tolu: O le ola e faavavau o lona uiga o le ola faatasi ma le Atua ma e faapei ona Ia soifua ai. O “le meaalofa silisili lea o meaalofa uma a le Atua”²² ma o le a aumaia ai se atoaga o le olioli.²³ O le faamoemoega taualuga lea ma le faamoemoega o o tatou olaga.

Fa: O le mafutaga mai a se sui auai o le Aiga Atua, o le Agaga Paia, e maua mai ai le taitaiga e matuā moomia ma le faamafanafanaga i lenei olaga faitino.²⁴

Manatu i ni nai mafuaaga o le lē fiafia: o le mafatia e sau mai le agasala,²⁵ faanoanoa ma le tuuatoatasi mai le oti o se e pele, ma le atuatuvale mai le le mautonu i le mea e tupu pe a tatou oti. Peitai pe a tatou ulufale i le lafu a le Atua ma tausia a tatou feagaiga ma Ia, tatou te lagonaina le filemu i le iloa ai ma talitonu o le a faaolaina i tatou e Keriso mai a tatou agasala, o le a vave atu ona muta le tuueseesega o o tatou tino ma agaga, ma o le a tatou ola e faavavau ma le Atua i se tulaga e sili ona mamalu.

Faalagolago ia Keriso ma Faatino i le Faatuatua

Uso e ma tuafafine, ua tumu tusitusiga paia i faataitaiga o le mana malualii o le Faaola ma Lona alofa mutimutivale ma le alofa tunoa. I le taimi o Lana misiona i le lalolagi, na oo atu Ana faamanuiaga ia i latou o e na faalagolago ia te Ia ma faatino i le faatuatua. Mo se faataitaiga, o le tagata ma’i i le taelega i Petesa na savali ina ua, ia mulimuli ma le faatuatua i le poloaiga a le Faaola e “tulai, ma ave lou moega, ma savali.”²⁶ O i latou na mama’i pe tigaina i soo se itu i le nuu o Nuumau, na faamaloloina ina “ua taitasi” i latou ma “o mai ia te ia.”²⁷

E faapena foi, ina ia maua faamanuiaga ofoofogia ua folafola mai ia i latou o e o mai i le lafu a le Atua, e manaomia ona tatou faia foi lena lava mea—tatou te manaomia ona filifili e o mai. Na aoao mai Alema le Itiiti, “Ma o lenei, ou te fai atu ia te outou, o loo valaau mai le leoleo mamoe lelei ia te outou ma afai tou te faalogo i lona siufofoga, o le a ia aumai outou i lana lafu.”²⁸

I nai tausaga talu ai sa maliu ai se uo pele i le kanesa. Ina ua ulua’i tusia e lona toalua o Sharon, e uiga i auga o le gasegase, na ia fai mai ai: “Na Ma Filifilia le Faatuatua. Faatuatua i lo tatou Faaola, o Iesu Keriso. Faatuatua i le fuafuaga a lo tatou Tama Faalelagi, ma faatuatua Na Te silafia o tatou manaoga ma faataunuuina Ana folafolaga.”²⁹

Ua ou feiloai i le tele o le Au Paia o Aso e Gata Ai e pei o Sarona, o e latou te lagonaina le toafilemu o le loto o le malupuipuia i totonu o le lafu a le Atua, aemaise pe a oo mai faaosoosoga, tete’e, po o mafatiaga.³⁰ Sa la filifili e faatuatua ia Iesu Keriso ma mulimuli i Lana perofeta. Na aoao mai lo tatou perofeta pele o, Peresitene Russell M. Nelson: “O mea lelei uma i le olaga—o faamanuiaga faapolopolo uma e iai le taua e faavavau—e amata i le faatuatua.”³¹

O Mai Atoatoa i le Lafu a le Atua

O le tamā o le tamā o le tamā o lo’u tamā o James Sawyer Holman, na sau i Iuta i le 1847, ae sa le’i i ai faatasi ma i latou na taunuu ia Iulai faatasi ma Polika Iaga. Na sau o ia i se taimi mulimuli ane o lena tausaga, e tusa ai ma faamaumauga faaleaiga, o ia na nafa ma le aumaiga o mamoe. Faatoa taunuu i le Vanu o Sate Leki ia Oketopa, ae na saofia mai lava o ia ma mamoe.³²

I se tala faafaatusa, o nisi o i tatou o loo i ai lava i laufanua valevalenoa. E lei taunuu mai tagata uma i le vaega muamua. A’u uo pele, faamolemole ia faaauau pea le malaga—ma fesoasoani i isi—e o mai atoatoa i le lafu a le Atua. O faamanuiaga o le talalelei a Iesu Keriso e le mafuatiaina aua e faavavau.

Ou te matua faafetai i le avea ai o a’u o se tasi o Le Ekalesia a Iesu Keriso o le Au Paia o Aso e Gata Ai. Ou te tuu atu la’u molimau i le alofa o lo tatou Tama Faalelagi ma lo tatou Togiola, o Iesu Keriso, ma le filemu e na o i La’ua e maua mai ai—le filemu o le loto ma faamanuiaga e maua i le lafu a le Atua I le suafa o Iesu Keriso, amene.

Faamatalaga

1. Faapei o le toatele o Initoneisia o lana tupulaga, o Uso Samad e na o le tasi lava lona igoa. O lona toalua, o Sri Kantoningsh, ma le la fanau e faaaogaina Samad o lo latou faaiu.

2. Ua lipotia mai e Uso ma Tuafafine Samad e le itiiti ifo i le 44 o la aiga lautele ua avea ma tagata o le Ekalesia i le taimi nei. E toatele isi ua olioli foi i faamanuiaga o le talalelei ona o la la’ua faataitaiga ma galuega.

3. Mosaea 2:41.

4. Tagai i le Mataupu Faavae ma Feagaiga 59:23.

5. Mosaea 18:8.

6. Tagai i le Moronae 6:4.

7. Tagai i le Ioane 10:14; tagai foi ia Gerrit W. Gong, “Leoleo Mamoe Leleli, Tamai Mamoe a le Atua,” Liahona, Me 2019, 97.

8. Isaia 49:16.

9. Tagai i le Alema 7:11–13.

10. Tagai Dale G. Renlund, “Faapito’au Faaosolilivau,,” Liahona, Me 2021, 41–44.

11. Mosaea 18:8.

12. Ioane 10:16.

13. Ioane 10:2–4.

14. Ioane 10:9.

15. Tagai i le 2 Nifae 31:21; Helamana 5:9.

16. Tagai ia Henry B. Eyring, “O Le Mana o le Aoao Atu o Aoaoga Faavae,” Liahona, Iulai 1999, 85. Pe a tatou saili e o mai ia Keriso, e tatau ona tatou o mai e tusa ai ma afioga a Keriso, “aua e na o le toatasi le Atua ma le Leoleo Mamoe e tasi i le lalolagi uma” (tagai 1 Nifae 13:40–41).

17. O le aoaoga faavae autu a Keriso, ua ta’ua faigofie, e faapea o tagata uma i soo se mea e tatau ona faaaoga le faatuatua ia Iesu Keriso ma Lana Togiola, salamo, ma papatiso, talia le Agaga Paia, ma tumau e oo i le iuga, pe, faapei ona aoao mai e le Faaola i le 3 Nifae 11:38, “e le mafai ona fai mo o outou tofi le malo o le Atua.”

18. Mosaea 18:9, 10.

19. Tagai i le Merriam-Webster.com Dictionary, “redeem”; tagai foi ia D. Todd Christofferson, “Togiola,” Liahona, Me 2013, 109.

20. Tagai i le Alema 11:40.

21. Tagai i le 2 Nifae 2:8; 9:12.

22. Mataupu Faavae ma Feagaiga 14:7.

23. Tagai i le 2 Nifae 9:18.

24. Tagai i le 1 Nifae 4:6; Moronae 8:26.

25. Tagai i le Mosaea 3:24–25; Alema 41:10.

26. Ioane 5:8.

27. 3 Nifae 17:9.

28. Alema 5:60. I le Mose 7:53, na fetalai foi le Mesia, “Ai se e sau i totonu i le faitotoa ma ʼaʼe mai i luga e ala ia te aʼu, e lē paʼū lava.”

29. Sharon Jones, “Diagnosis,” wechoosefaith.blogspot.com, Mar. 18, 2012.

30. Tala’i La’u Talalelei o loo faamalamalama mai ai le “tumau e oo i le iuga” faapea: “Ina ia tumau faamaoni i poloaiga a le Atua ma faamaoni i sauniga o faaeega paia ma faamauga o le malumalu tusa lava po o a tofotofoga, tete’e, ma puapuaga i le olaga atoa” ([2019], 73). E fautua mai ai faapea o le a tatou oo i tofotofoga, tete’e, ma puapuaga i le gasologa o le olaga.

31. Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 102.

32. Tagai i talaaga pupuu o James Sawyer Holman and Naomi Roxina LeBaron Holman by their granddaughter Grace H. Sainsbury in the speaker (Charles C. Rich diary, Sept. 28, 1847, Church History Library, Salt Lake City; Journal History of O Le Ekalesia a Iesu Keriso o le Au Paia o Aso e Gata Ai, June 21, 1847, 49, Church History Library). O Holman o se kapeteni i le Vaega a Charles C. Rich i le 1847.