Pe o Aoga Le Fuafuaga?
Ou te molimau atu e aoga le fuafuaga o le fiafia. Sa foafoaina e lou Tama Faalelagi, o lē e alofa ia te oe.
Pe o aoga le fuafuaga?
Talu ai nei sa ou talanoa ai i se talavou matua o lē sa auauna atu i se misiona i ni nai tausaga ua mavae ma ua galue nei i lana galuega faalematata. I nisi o itu, sa foliga mai o loo manuia lona olaga. Ae sa faaitiitia lona faatuatua. Sa goto ifo o ia i se sami o le masalosalo e uiga i le Faaola ma Lana Ekalesia. Sa ia faamatala mai na te le o mauaina faamanuiaga sa ia faamoemoeina mai le talalelei toefuataiina. Na te le o lagonaina se aoga o le fuafuaga o le fiafia i lona olaga.
O la‘u savali i le asō e mo i latou uma o e atonu e tutusa o latou lagona. Ou te talanoa atu ia i latou o e sa i ai se taimi na “lagona [ai] le fia pepese i le pese o le alofa togiola” ae ua le “lagonaina nei.”1
Ua saunia e lo tatou Tama Faalelagi mo i tatou se fuafuaga matagofie mo lo tatou fiafia e faavavau. Ae pe a le ogatusa le olaga ma auala na faamoemoe i ai, atonu e foliga mai e le o aoga le fuafuaga.
Ou te mafaufau pe tatou te lagonaina ai lagona o soo o Iesu a o latou i ai i totonu o se vaa, “i totonu o le vasa ua felafoaiina i le sou: aua ua ‘agi mai i luma le matagi.”2
Ona, oo lea i le taeao po lava:
“Ua maliu atu Iesu ia i latou, … ua savali i luga o le vai.
“Ua iloa mai e le au soo o ia ua savali i luga o le vai, ona latou atuatuvale ai lea, … ona latou uio ai lea i le matatau.
“Ona fetalai atu loa lea o Iesu ia te i latou, ua faapea atu, Ia outou loto tetele; o a’u lava, aua tou te matatau.
“Ma ua tali mai Peteru ia te ia, “Le Alii e, afai o oe, ia e fetalai mai ia te au, ou te alu atu ia te oe i luga o le vai.
“Ona fetalai atu ai lea o ia, Ina sau ia. Ona alu ifo ai lea o Peteru nai le vaa, ua savali i luga o le vai e alu ia Iesu.
“Ua vaai ia i le matagi ua tetele, ona fefe ai lea; ona afua ai lea ona goto, ua alaga, … Le Alii e, ia e faaola mai ia te au.
“Ona aapa atu loa lea e Iesu o lona aao, ua tago ia te ia, ua faapea atu ia te ia, O oe na lē faatuatua itiiti, se a le mea ua e masalosalo vale ai?”3
Pe mafai ona ou faasoa atu ia te outou ni mataupu faavae se tolu ua ou aoaoina mai ia Peteru? Ou te tatalo ina ia fesoasoani nei mataupu faavae i soo se tasi o lagonaina e le o aoga le fuafuaga o le fiafia i o latou olaga.
Muamua, faatino i le faatuatua ia Iesu Keriso.
Ua ou maofa i le faatuatua o Peteru. I le valaaulia faigofie a Iesu e “sau,” sa ia tuua ai lana vaa ua felafoaiina e le matagi. Sa foliga mai sa ia iloa afai na valaaulia o ia e Iesu Keriso e faia se mea, e mafai ona ia faia.4 Sa sili atu le faatuatuaina e Peteru o le Faaola nai lo lona faatuatuaina o lona vaa. Ma o lena faatuatua na tuuina atu ai ia te ia le mana e galue ai ma le lototele i se tulaga atuatuvale ma taufaafefe.
O le faatuatua o Peteru ua faamanatu mai ai ia te a’u se aafiaga na ou faalogo i ai mai ia Elder José L. Alonso. E lei leva ona maliu le atalii o Elder Alonso, ma tuua ai se aiga ma se fanau laiti, ae faalogo atu Elder Alonso i tamaiti o talanoa.
“O le a le tatou mea o le a fai?” sa latou fesili ai.
Sa tali mai se afafine e iva tausaga le matua, “O la e lelei a Tama. O loo ia talaiina le talalelei a Iesu Keriso.”
E pei o Peteru, na vaai lenei afafine laitiiti i talaatu o ona luitau ma faalagolago ia Iesu Keriso ma Lana Togiola. O le faatuatua i le Faaola e aumaia ai le filemu ma le malosi e agai ai i luma.
Afai e te toe tepa i tua i lou olaga, ou te talitonu o le a e vaaia sa e faatinoina le faatuatua i le tele o taimi. O le auai i le Ekalesia o se faatinoga o le faatuatua. O le talanoa ma le Tama Faalelagi i le tatalo o se faatinoga o le faatuatua. O le faitauina o tusitusiga paia o se faatinoga o le faatuatua. O le faalogologo i la’u savali o lenei konafesi aoao o se faatinoga o le faatuatua. E pei ona saunoa Peresitene Russell M. Nelson, “Aua nei faaitiitia le faatuatua ua uma ona e maua.”5
O le isi lesona lenei ua ou aoao mai ia Peteru:
I taimi o faigata, liliu atu loa ia Iesu Keriso.
A o ia savali agai atu i le Faaola, sa fefe Peteru i le matagi, ma sa amata ona ia magoto. Ae ina ua iloa e Peteru le mea o loo tupu, na te lei taumafai lava e savalia na o ia le vai pe toe aau i le vaa. Nai lo le lafoa’i ese o lona faatuatua ia Keriso, sa ia pipiimau atili, ma alaga atu, “Le Alii e, ia e faaola mai ia te a’u.”
“Ona aapa atu loa lea e Iesu o lona aao, ua tago ia te ia.”6
Tatou te fetaiai uma lava ma matagi malolosi lea e mafai ona luluina ai lo tatou faatuatua ma mafua ai ona tatou magoto. A tupu lenei mea, faamolemole ia manatua o le fuafuaga o le fiafia a le Tama Faalelagi e i ai se isi igoa—o le fuafuaga o le togiola. O le fuafuaga e le mo i tatou ina ia faasee gofie ai i le olaga, e lē tautevateva lava, e lē magoto, ae ia matafiafia i taimi uma. Na silafia e le Tama Faalelagi o le a manaomia ona togiolaina i tatou. O le mafuaaga lea na Ia saunia ai le fuafuaga o le faaolataga.7 O le mafuaaga lea na Ia auina mai ai se Togiola. Pe a tatou tauivi—mo soo se mafuaaga—e le faapea ai la e le aoga le fuafuaga. O le taimi lena e sili ona tatou manaomia ai le fuafuaga!
I na taimi, mulimuli i le faataitaiga a Peteru. Liliu atu loa lava i le Faaola.
“O le taimi ma le aso lenei o lo outou olataga. … Aua le faatuai le aso o lo outou salamo.”8
Po o fea lava o tatou i ai ma le mea sa tatou i ai, o le salamo o le ala lea i luma. E pei ona aoao mai Peresitene Nelson:
“E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani i aso taitasi i le salamo. …
“Pe o e malaga ma le filiga i luga o le ala o feagaiga, pe ua see ese pe laa ese mai le ala o feagaiga, pe ua lē mafai ona vaai atu i le ala mai le mea o e i ai i le taimi nei, ou te aioi atu ia te oe ia salamo. O le lagonaina o le mana faamalosiau o le salamo i aso taitasi—o le faia ma le avea ma se tagata lelei teisi atu i aso taitasi.”9
O le o mai ia Keriso o lona uiga e sili atu nai lo na o le mafaufau e uiga ia te Ia pe talanoa e uiga ia te Ia pe alofa foi ia te Ia. O lona uiga o le mulimuli ia te Ia. O lona uiga o le ola i le ala Na te aoao ai i tatou ia ola ai. Ma mo i tatou uma, o lona uiga o le salamo, e aunoa ma le faatuai.
O se tasi o o‘u afafine sa masani ona faigaluega i le nofoaga autu e aoao ai faifeautalai. Sa ia faamatala mai ia te a’u e uiga i se alii faifeautalai sa ia aoaoina o lē sa ta’uina atu ia te ia na te le o mautinoa pe moni le Tusi a Mamona. Sa ia tatalo ma tatalo mo se molimau faaleagaga, ae na te lei mauaina se tali.
Sa tatalo lo’u afafine ia iloa le mea e tatau ona ia faia e fesoasoani ai i lenei faifeautalai. O le uunaiga na ia maua e faapea, sa le gata ina tuuina mai tusitusiga paia ina ia mafai ai ona tatou faitauina ma maua ai se molimau; ae sa tuuina mai foi e aoao ai i tatou e tausi i poloaiga a le Atua. Sa faasoa atu e lo‘u afafine lenei manatu i le faifeautalai.
Mulimuli ane, sa ia toe vaai i lenei faifeautalai, ma sa sili atu ona fiafia. Sa ia ta‘u atu ia te ia ua iu lava ina ia mauaina se molimau e moni le Tusi a Mamona. Sa ia iloa na oo mai lenei molimau ona sa ia faia se taumafaiga sili atu ia faia mea o loo aoao mai e le Tusi a Mamona.
Sei o tatou mulimuli i le faataitaiga a Peteru o le liliu atu i le Faaola i taimi o o tatou puapuaga. Mulimuli ia Iesu Keriso nai lo le faalagolago i lou lava atamai ma le malosi. Po o le a lava le umi na e taumafai ai e savalia le vai e aunoa ma Ia, e le o tuai lava ona aapa atu ia te Ia. E aoga le fuafuaga!
O se mataupu faavae lona tolu ua ou aoao mai le aafiaga o Peteru o le:
Ia faamaualalo oe lava i luma o le Alii, ma o le a Ia siitia oe i luga i mea silisili atu.
Sa faaalia e Peteru le faatuatua, i le savali i luga o le vai ma i le aapa atu i le Faaola ina ua ia manaomia se fesoasoani. E ui i lea, na silafia e le Faaola sa ia Peteru le gafatia mo le tele o isi mea. “O oe na lē faatuatua itiiti,” na Ia fetalai ai, “se a le mea ua e masalosalo vale ai?”10
Atonu na mafai lava ona ita Peteru i lenei aoaiga. Peitai sa ia taliaina ma le lotomaualalo. Sa faaauau pea ona ia saili atu i se faatuatua sili atu ia Iesu Keriso. E ala i le tele o aafiaga faaopoopo e fausia ai le faatuatua—o nisi o na mea e faigata tele—na iu lava ina avea Peteru ma taitai mausali sa manaomia ai e le Alii ona avea ai o ia. Sa ia ausia ni mea maoae i le galuega a le Alii.
O a mea silisili e finagalo le Alii e te faataunuuina? I Lana Ekalesia ma le malo, e tele avanoa e auauna atu ai ma auauna atu ai i isi e pei ona sa faia e le Faaola. E finagalo o Ia ia avea oe ma se vaega o Lana galuega tele. O le a le avea lava le fuafuaga o le fiafia ma mea sili ona moni ia te oe nai lo le taimi o loo e fesoasoani ai i isi ia ola ai.
I le fausiaina o lo’u lava faatuatua, o upu nei a Alema sa suia ai olaga: “Amuia i latou o e latou te faalotomaualalaloina i latou lava e aunoa ma le faamalosia ia lotomaualalo.”11 Ia tatou tuu atu ma le lotomaualalo i tatou lava i se tulaga e mafai ai e Iesu ona siitia i tatou, taitai i tatou, ma faaaoga le tele o o tatou tomai.12
Ou te molimau atu e aoga le fuafuaga o le fiafia. Sa foafoaina e lou Tama Faalelagi, o lē e alofa ia te oe. E aoga aua na manumalo Iesu Keriso i le agasala ma le oti e ala i Lana Togiola. O mai ia te Ia, mulimuli ia te Ia, ma “o le taimi nei lava o le a faataunuu ai le fuafuaga tele o le togiolaina ia te outou.”13 I le suafa o Iesu Keriso, amene.