O I Tatou O Le Ekalesia a Iesu Keriso o le Au Paia o Aso e Gata Ai

Saunia e Reyna I. Aburto

Fesoasoani Lua i le Au Peresitene Aoao o le Aualofa

O le Ekalesia ua le na o ni fale ma se fausaga faaleekalesia; o i tatou o le Ekalesia, o tagata auai ai, ma o Keriso o loo i le ulu, a o le perofeta o Lana fofoga fetalai.

I le mavae ai o le valaaulia e “sau ia, ina vaai,”¹ sa ou auai i Le Ekalesia a Iesu Keriso o le Au Paia o Aso e Gata Ai mo le uluai taimi i le 26 o o’u tausaga. E le’i leva ona ma tete’a ma lo’u toalua muamua. Sa i ai la’u tama tama e tolu-tausaga-le matua. Ma sa ou lagonaina le leai o se malosi i le fefe. Ina ua ou ulufale atu i le fale, sa tumu a’u i le mafanafana a o ou vaaia le faatuatua ma le olioli o tagata na siosiomiaina au. Sa avea moni lava “o se sulufaiga mai le afā.”² Tolu vaiaso mulimuli ane, sa ou osia ai se feagaiga i le faamanatuga ma le Tama Faalelagi ma sa amata ai la’u malaga o se so’o o Keriso, e ui ina sa le’i atoatoa lo’u olaga i lena malaga.

Mo a’u ina ia maua na faamanuiaga e faavavau, sa tele ni elemene faaletino ma faaleagaga sa tatau ona faatulaga tonu. Sa toefutai mai le talalelei a Iesu Keriso ma folafola atu; sa fausia lena falelotu ma tausia lelei; sa i ai se fausaga faaleekalesia, mai le perofeta e oo mai i taitai faalelotoifale; ma sa saunia se paranesi na faatumulia i tagata o le feagaiga e opoina a’u ma la’u tama a o aumaia i ma’ua i le Faaola, “ma tausia i le afioga lelei a le Atua.”³ ma tuuina mai avanoa e galue auauna ai.⁴

Mai lava i le amataga, sa saili le Atua e faapotopoto ma faatulaga Ana fanau⁵ “aumaia lo [tatou] tino ola pea ma le ola e faavavau.”⁶. Faatasi ai ma lena faamoemoega i le mafaufau, sa Ia faatonuina ai i tatou e fau ni nofoaga e tapuai ai,⁷ lea tatou te maua ai le malamalama ma sauniga o le faaolataga ma le faaeaga; e osia ma tausia ai feagaiga ia e noatia ai i tatou ia Iesu Keriso;⁸ e faaeeina ai i “mana o le faaleatua”;⁹ ma potopoto soo e manatua ma fefaamalosia’i ai le tasi ma le isi ia te Ia.¹⁰ Ua i ai le faalapotopotoga a le Ekalesia ma ona fale mo lo tatou manuia faaleagaga. “O le Ekalesia … o le fatamanu lea tatou te fauina ai aiga e faavavau.”¹¹

A o ou talanoa atu i se uo sa feagai ma se taimi faigata, sa ou fesili pe o faapefea ona ola i mea tautupe. A o tagi, sa ia tali mai sa fesoasoani lona epikopo ia te ia e faaaoga ai tupe o taulaga anapogi. Na ia toe fai mai, “Ou te le iloa pe o fea se mea o o’u i ai ma lo’u aiga, pe ana leai le Ekalesia.” Sa ou tali atu, “O le Ekalesia o tagata auai. O i latou na o e foa’i atu ma le loto i ai ma le fiafia i taulaga anapogi e fesoasoani ai ia i tatou o e manaomia le fesoasoani. Ua outou mauaina fua o lo latou faatuatua ma le naunautaiga e mulimuli ia Iesu Keriso.”

A’u so’o faapaaga o Keriso, aua tatou te vaai maualalo i le galuega ofoofogia o loo faia e le Alii e ala atu ia i tatou, Lana Ekalesia, e ui i o tatou vaivaiga. O nisi taimi o i tatou o e foa’i atu a o nisi foi taimi o i tatou o e mauaina, ae o i tatou uma o se aiga e tasi ia Keriso. O Lana Ekalesia o le fausaga lea na Ia tuuina mai e taiala ma faamanuiaina ai i tatou a o tatou tapuai atu ia te Ia ma fe’au’aunaa’i le tasi ma le isi.

Sa faamalie mai nisi uso ia te a’u, ona ua latou mafaufau ua le o ni sui auai malolosi i le Aualofa ona o la e galulue i le Peraimeri po o Tamaitai Talavou. O na uso o nisi o sui auai aupito malolosi o le Aualofa aua o loo latou fesoasoani i a tatou fanau faapelepele ma autalavou ia faamalolosia lo latou faatuatua ia Iesu Keriso.

Ua le gata le Aualofa i se potu i totonu o se fale, se lesona o le Aso Sa, se gaoioiga, po o se au peresitene i le tulaga faalelotoifale po o le tulaga aoao. O le Aualofa o tamaitai o le feagaiga o le Ekalesia; o i tatou ia—tatou taitoatasi ma i tatou uma. O lo tatou “nuu faaleatulaulau o le mutimuti alofa ma auaunaga.”¹² Soo se mea ma po o fea lava tatou te o i ai, o i tatou lava o se itutino o le Aualofa a o tatou tauivi e faataunuu lona faamoemoega paia, lea e faataunuu ai e tamaitai le galuega a le Atua i ni auala taitoatasi faapea foi i le soofaatasi¹³ e ala i le tuuina atu o toomaga: “toomaga o le mativa, toomaga o ma’i; toomaga o le le mautonu, toomaga o le ogemafaufau—toomaga mai mea uma e faalavefauina ai … le olioli ma le alualu i luma.”¹⁴

E tali faapena foi le faasinomaga e tulai mai i korama a toeaina ma faalapotopotoga a le Ekalesia mo vaitausaga uma, e aofia ai a tatou fanau ma le autalavou. O le Ekalesia ua le na o ni fale ma se fausaga faaleekalesia; o i tatou, o le Ekalesia, o tagata auai ai. O i tatou o Le Ekalesia a Iesu Keriso o le Au Paia o Aso e Gata Ai, ma Keriso i le ulu, a o le perofeta o Lana fofoga fetalai. Ua fetalai mai le Alii:

“Faauta, o laʼu mataupu faavae lenei—ai se e salamo ma sau ia te aʼu, o ia lava lea o laʼu ekalesia. …

“Ma … ai se ua auai i la’u ekalesia, ma tumau i laʼu ekalesia e oo i le gataaga, o ia lea o le a Ou faatuina i luga o laʼu papa.”¹⁵

Uso e ma tuagane, ia tatou iloa le faamanuiaina tele o i tatou i le avea ai ma ni o o le Ekalesia a Iesu Keriso, lea e mafai ai ona tuufaatasia lo tatou faatuatua, loto, malosiaga, mafaufau, ma lima mo Ia e faatino ai Ana vavega silisili ese. “Auā foi o le tino e le se itu tino e tasi lea, a e peitai o itu tino e lasi.”¹⁶

Sa faamatala e se tama talavou i lona tina, “A o ou laitiiti, o taimi uma sa ou aveina ai se tala se tasi i le sefuluai, sa ou mafaufau faapea o lena tala e tasi o le a fauina ai se falelotu atoa. E le o se manatu faavalea ea lena mea?”

Ma se loto ua tuia, sa ia tali atu, “Manaia tele! Pe na e vaai ai faalemafaufau?”

“Ioe!” sa ia alaga atu ai. “Ese le matagofie, ma e faitau miliona na fale!”¹⁷

A’u uo pele, ia tatou maua le faatuatua o se tamaitiiti ma fiafia i le iloa ai e oo lava i nai a tatou taumafaiga aupito iti, e faia ai lava se eseesega maoae i le malo o le Atua.

O lo tatou faamoemoega i Lona malo o le aumaia lea o le tasi ma le isi ia Keriso. E pei ona tatou faitauina i le tusitusiga paia, sa tuuina atu e le Faaola lenei valaaulia ia sa Nifae:

“E i ai ea ni isi o ia te outou ua mama’i? Ia aumai i latou iinei. E i ai ea ni isi o ia te outou … ua puapuagatia i soo se ala? Ia aumai i latou iinei ma o le a ou faamaloloina i latou, ona ua ou agaalofa tele ia te outou; ua tumu ou loto i le alofa mutimutivale.

“… Ua ou iloa ua lava lo outou faatuatua ou te faamaloloina ai outou.”¹⁸

Pe ua le tofu ea i tatou ma puapuaga e mafai ona aumai i aao o le Faaola? E ui o nisi o i tatou e i ai luitau faaletino, e toatele atu o tauivi ma feteenaiga faalelagona, o isi o tauivi e tapu’e sootaga faaleagafesootai, ma tatou te taufai sailia uma se fesoasoani pe a lu’itauina o tatou agaga. E i ai lava se ala tatou te pagatia uma ai.

Ua tatou faitauina faapea “sa o atu faatasi uma le motu o tagata … ma i latou uma o e na puapuagatia i soo se ala; ma sa ia faamaloloina i latou taitoatasi ina ua aumaia i latou ia te ia.

“Ma o i latou uma, i latou uma o e na faamaloloina ma i latou o e na malolosi, sa latou punonou i lalo i ona vae, ma tapuai atu ia te ia.”¹⁹

Mai se tama itiiti o le e totogi ma le faatuatua le sefuluai, i se tina nofotoatasi e manaomia le alofatunoa o le Alii e faamanaina ai, i se tamā o tauivi e saunia mea moomia mo lona aiga, i o tatou augatama o loo moomia sauniga o le faaolataga ma le faaeaga, ia i tatou taitoatasi o e e faafouina feagaiga ma le Atua i vaiaso taitasi, tatou te manaomia le tasi ma le isi, ma e mafai ona tatou aumaia le tasi ma le isi i le faamalologa togiola a le Faaola.

O’u uso e ma tuagane pele, ia tatou mulimuli i le valaaulia a Iesu Keriso e aumaia i tatou lava ma o tatou puapuaga ia te Ia. Pe a oo ina tatou o mai ia te Ia ma aumaia i latou tatou te alolofa i ai ia te Ia, Na te silasila mai i lo tatou faatuatua. O le a Ia faaatoatoaina i latou, ma o le a Ia faaatoatoaina foi i tatou.

I le avea ai ma “soo fifilemu o Keriso,”²⁰ o loo tatou taumafai malosi e avea ma “e tasi o tatou loto ma tasi le mafaufau”²¹ ma ia lotomaualalo, augofie; agamalu, faigofie ona faaoleoleina; tumu i le onosai ma le tali-tiga; ma faautauta i mea uma; ma filiga i le tausiga o poloaiga a le Atua i taimi uma; tumu i le faatuatua, faamoemoe, ma le alofa mama; ma tumu i galuega lelei.²² O loo tatou taumafai malosi ia avea e faapei o Iesu Keriso.

Ou te molimau atu o le avea ai ma Ekalesia a Keriso, o i tatou o auala, e pei ona aoao mai e Peresitene Russell M. Nelson, ia e mafai ai e lo “tatou Faaola ma le Togiola, o Iesu Keriso, ona faatinoina nisi o Ana galuega aupito mamana i le va o le taimi nei ma le taimi e toe afio mai ai o Ia.”²³

Ua fetalai mai le Alii:

“Faauta, o le a Ou faanatinatiina laʼu galuega i lona taimi.

“Ma Ou te tuu atu ia te outou, … se poloaiga ia outou faapotopoto faatasi outou lava, ma faatulaga outou lava, ma saunia outou lava, ma faapaia outou lava; ioe, ia faamamā o outou loto, ma faamamā o outou lima ma o outou vae i oʼu luma, ina ia mafai ona Ou faamamāina outou.”²⁴

Ina tatou tali atu ia i lenei valaaulia paia ma faapotopoto ma le fiafia; faatulaga, sauniuni, ma ia faapaiaina outou lava, o la’u tatalo faamaualalo lea, i le suafa o Iesu Keriso, amene.