Fai Le Mea e Sili Ona Taua

Saunia e Rebecca L. Craven

Fesoasoani Lua i le Au Peresitene Aoao o Tamaitai Talavou

A tatou faatotonugalemuina o tatou olaga ia Iesu Keriso, o le a faamanuiaina i tatou i le malosi faaleagaga, faamalieina, ma le olioli.

E lei leva talu ai, sa maua e se uo pele se uunaiga e asiasi i se tamaitai i lana uarota. Sa ia faatuatuana’i i le uunaiga ona na te le’i iloa lelei lea tamaitai—e matuai le fetaui lava. Ae talu ai le oo ane pea ia te ia o lea mafaufauga, sa tonu ai loa e faatino le uunaiga. Ona o lea ua ia lagona le lē toamalie i le asiasiga ua lupe, sa naunau ai loa o ia faapea o le aveina atu o se mea i le uso o le a faatoafilemuina ai lona popole. Ioe, sa le mafai ona alu e aunoa ma se mea! O lea sa ia faatauina ai se koneteina aisa kulimi, ma sa alu loa e amata le mea sa ia popole ne’i mea ane o se asiasiga e lē logoleleia.

Sa ia tu’itu’i i le faitotoa o le tamaitai, ma e le’i pine ae tali mai o ia. Sa tuu atu e la’u uo ia te ia le aisa kulimi i se tagapepa lanuenaena, ma sa amata ai le talatalanoaga. E le’i umi ae iloa e la’u uo le mafuaaga na manaomia ai lana asiasiga. A o la nonofo faatasi i luma o le poletito, sa faasoa ane e le tamaitai le mau lu’itau sa feagai ma ia. Ina ua mavae se itula o la talanoa i le manaia o le taumafanafana, sa matauina e la’u uo ua liusuavaia le aisa kulimi i le tagapepa enaena.

Sa ia fai atu, “Faamalie atu lava i le liusuavaia o lau aisa kulimi!”

Sa tali filemu atu le tamaitai, “E le afaina! Ou te ‘ilitata i mea e gaosi mai le susu.

I se miti, sa ta’u atu ai e le Alii i le perofeta o Liae, “Amuia oe Liae, ona o mea ua e faia.”¹

O le avea ai ma soo o Iesu Keriso, e aofia ai le tele o isi mea nai lo le na ona faamoemoe pe talitonu. E manaomia ai taumafaiga, gaoioiga, ma le tuuto. E moomia ai lo tatou faia o se mea, avea ma “ē anaana i le upu ae le na o le faalogo i ai.”²

I le tulaga o le aisa kulimi ua liusuavaia, o le a le mea sa sili ona taua? O le aisa kulimi? Pe sa na ona faia e la’u uo se mea?

E i ai so’u aafiaga manaia ma se tamaitai talavou pele, o le sa fai maia se fesili faamaoni: “Sister Craven, e faapefea ona e iloa e i ai se mea e moni e uiga i le Ekalesia? Aua ou te lē lagonaina lava se mea.”

Ae ou te le’i oso atu i se tali, sa muamua ona ou fai atu ia te ia ni nai fesili. “Faamatala mai ia te a’u e uiga i au lava suesuega o tusitusiga paia.”

Sa ia tali mai, “Ou te lē faitauina ni tusitusiga paia.”

Sa ou fesili atu, “Ae a lou aiga? Pe tou te suesueina faatasi le Sau, Mulimuli Mai ia te A’u ?”

Sa fai mai o ia, “E leai.”

Sa ou fesili e uiga i ana tatalo: “O a ou lagona pe a e tatalo?”

Sa ia tali mai, “Ou te lē tatalo.”

O la’u tali ia te ia, sa faigofie, “Afai e te manao e iloa se mea, o le a tatau ona e faia se mea.”

Pe le moni ea lena mea i soo se mea tatou te mananao e aoao pe iloa? Sa ou valaaulia la’u uo fou e amata ona fai le talalelei a Iesu Keriso: tatalo, suesue, auauna atu i isi, ma faalagolago i le Alii. E le oo mai le liua a o leai se mea e fai. E oo mai e ala i le mana o le Agaga Paia a o tatou faia se taumafaiga ma le loto ia i ia iloa e ala i le fesili, saili, ma le tu’itu’i. E oo mai i le faia.³

I le Mataupu Faavae ma Feagaiga, e fetalai mai ai le Alii i nisi taimi, “E le afaina.”⁴ E afua ai ona ou mafaufau faapea afai e i ai ni mea e lē afaina, pe lē afaina tele, o lona uiga e tatau ona i ai ni mea e sili ona taua. Ia tatou taumafaiga e fai se mea pe fai soo se mea, atonu tatou te fesili ifo ia i tatou lava, “O le a le mea e sili ona taua?”

E tele ina faaaoga e le au faasalalau ia faaupuga faaosofia e pei o le “E Tatau Ai” po o le “E Tatau Ona I Ai” ma le faamoemoe e tosina ai i tatou ia talitonu o le oloa o loo latou faatauina atu e tatau ai mo lo tatou fiafia po o le soifua manuia. Ae pe moni ea o mea o latou faatauina atu o ni mea e tatau ai? Pe tatau moni ea ona tatou maua? Pe taua moni ea?

O ni nai manatu nei e mafaufau i ai. O le a le mea e sili ona taua?

E fia ni “likes” tatou te maua i mea tatou te tuu i luga o faasalalauga faaagafesootai? Pe o le a le tele o le alofagia ma le faatauaina o i tatou e lo tatou Tama Faalelagi?
Ofuina o tifiga aupito lata mai o lavalava? Po o le faaalia o le faaaloalo i o tatou tino e ala i le faia o lavalava talafeagai?
Sueina o tali e ala i se sailiga i le initoneti? Po o le mauaina o tali mai le Atua e ala mai i le Agaga Paia?
Manao lasi? Po o le faamalieina i mea ua tuuina mai ia i tatou?

Ua aoao mai Peresitene Russell M. Nelson:

“Faatasi ai ma le Agaga Paia o lau soa, ua mafai ai ona e iloa atu e ala i le aganuu ua lauiloa ma ua taia ai o tatou tagata. E mafai ona sili atu lou atamai nai lo le mea sa i a i tupulaga ua mavae atu. …

“Faatu se tagavai mo le lalolagi uma!”⁵

E manaomia ai se taumafaiga e taulai atu i mea e matuai tatau ai mo le olioli tumau. E leai se isi mea e fiafia ai Satani nai lo mo i tatou ia tu’u sese o tatou tulaga taua o le faavavau, e taitai atu ai i tatou e faamaimau le taimi taua, taleni, po o le malosi faaleagaga i mea e le taua. Ou te valaaulia i tatou taitoatasi ia mafaufau ma le agaga tatalo i na mea e tata’iese ai i tatou mai le faia o mea e sili ona taua.

Sa aoao e le faiaoga a le ma atalii ulumatua tausaga tolu lana vasega ia “pulea lou fai’ai.” O se faamanatu i ana tamaiti a’oga talavou faapea, o i latou e puleaina o latou mafaufauga ma o lea e mafai ai ona pulea mea latou te fai. Ou te faamanatu ia te a’u lava ia “pulea lo’u fai’ai” pe a ou iloa ua ou faatafetafea atu i mea e lē taua tele.

Sa fai mai talu ai nei se tamaitiiti aoga maualuga ia te a’u faapea, ua amata ona taatele i nisi o talavou o le Ekalesia le faatuatuanai i poloaiga ma se faamoemoe e salamo mulimuli ane. “Ua pei o se pine taualoa,” o le tala mai lea. O le mea moni, o le a faamagalo pea e le Alii i latou o e salamo ma le lotomaualalo “ma le faamoemoe faamaoni.”⁶ Ae e le tatau lava ona faaaogaina le Togiola mutimutialofa o le Faaola i se ala ulagia faapena. Ua tatou iloa le faataoto i le mamoe e tasi na leiloa. Ioe, o le a tuua e se leoleo mamoe le isi 99 o mamoe ae saili le tasi ua se. Ae mata e mafai ona e mafaufau i le olioli o le Leoleo Mamoe Lelei ia i latou o e filifili e avea ma le to’a 99? O e nonofo faatasi ma fesoasoani le tasi i le isi ia ola ia latou feagaiga? Pe mafai ona e vaai faalemafaufau i foliga o le lalolagi, po o lau a’oga, po o lau galuega po o lou aiga pe a faapea o le usiusita’i o le mea taatele lea e fai ai? E le faapea o le faia atoatoa o le olaga—ae o le maua o le olioli a o tatou faia le mea aupito sili ia ola i feagaiga na tatou osia ma le Alii.

O le faaalia atili e le lalolagi o le masalosalo e uiga i le Atua, ma le faateleina o le faaluafesasi ma le lotopopole, o le taimi lenei e tatau ai ona tatou aupito latalata ai i le perofeta. I le avea ai o ia ma fofoga fetalai o le Alii, e mafai ona tatou talitonuina o mea o ia uuna’i maia, fautuaga, ma augani mai ai tatou te faia, o mea na e sili ona taua.

E ui atonu e le faigofie, e i ai pea lava le ala e fai ai le mea tonu. A o talanoa ma se vaega o uo i le a’oga, sa faanoanoa se tamaitai talavou ina ua liliu atu le talanoaga i le faitioina o tulaga faatonuina o le Ekalesia. Ma sa ia iloaina e le tatau ona gūgū—sa tatau ona ia faia se mea. Ma le faaaloalo, sa ia tautala atu e uiga i le alofa o le Tama Faalelagi ma le ala e faamanuiaina ai ma puipuia Ana fanau i poloaiga na Ia tuu maia. Semanu e sili atu ona faigofie mo ia le le faia o se mea. Ae o le a le mea e sili ona taua? Talia ma avea ma so o lea vaega? Po o le tu matila o se molimau a le Atua i “taimi uma ma i mea uma ma i nofoaga uma”?⁷

Afai ua tatau ona oo mai i fafo mai le lē māiloa le Ekalesia toefuataiina a Iesu Keriso, ua tatau la ona tatou o mai i fafo mai le lē māiloa. I le avea ai ma tamaitai tausi-feagaiga, e tatau ona tatou faasusulu atu lo tatou malamalama o le talalelei i le lalolagi uma e ala i le la’a i luga ma tumatila. Tatou te faia faatasi lenei mea o ni afafine o le Atua—se au a tamaitai e 8.2 miliona ua ta’i 11 tausaga ma luga atu, e tutusa lelei la latou galuega. O loo tatou faapotopotoina Isaraelu a o tatou auai i le galuega o le faaolataga ma le faaeaga: o loo taumafai malosi e ola i le talalelei a Iesu Keriso, tausi i latou o e le tagolima, valaaulia tagata uma ia talia le talalelei, ma tuufaatasia aiga mo le faavavau.⁸ O le talalelei a Iesu Keriso o se talalelei o faatinoga ma o se talalelei o le olioli! Aua tatou te manatu faatauvaa i lo tatou gafatia e faia na mea e sili ona taua. E aumaia e lo tatou tupuaga paia le lototoa ma le talitonu mautinoa e faia ma avea ma tagata uma ua silafia e lo tatou Tama Faalelagi alofa e mafai ona avea ai i tatou.

O le autu a le autalavou mo lenei tausaga e mai le Faataoto 3:5–6:

“Ia e faatuatua i le Alii ma lou loto atoa; ae aua le faalagolago i lou lava atamai.

“Ia e manatua o ia i ou ala uma, ona faatonuina ai lea e ia lava ou ala.”

O se vaega autu o le faalagolago i le Alii o le agai atu lea i luma, ma le talitonu o le a Ia taialaina i tatou tusa lava pe tatou te lē o maua uma tali.

Uso e, e lē o le aisa kulimi. Ma e lē o le faia foi o nisi mau mea. O le faia o le mea e taua. O le faaaogaina o le mataupu a Keriso i o tatou olaga a o tatou tauivi ia avea atili e faapei o Ia.

O le tele o mea tatou te faia ia tumau mausali ai i luga o le ala o feagaiga, o le tele foi lena o le faatupula’ia o lo tatou faatuatua ia Iesu Keriso. O le tele o le faatupula’ia o lo tatou faatuatua, o le tele foi lena o lo tatou mana’o e salamo. O le tele foi o lo tatou salamo, o le tele foi lena o le a faamalolosia ai a tatou sootaga faalefeagaiga ma le Atua. O lena sootaga faalefeagaiga e tata’i atu ai i tatou i le malumalu aua o le tausia o feagaiga o le malumalu o le ala lena tatou te tumau ai e oo i le iuga.

A tatou faatotonugalemuina o tatou olaga ia Iesu Keriso, o le a taialaina i tatou e fai le mea e sili ona taua. Ma o le a faamanuiaina i tatou i le malosi faaleagaga, ma le olioli! I le suafa o Iesu Keriso, amene.