O Le Mana o le Malosiaga Faaleagaga

Saunia e Peresitene Russell M. Nelson

Peresitene o Le Ekalesia a Iesu Keriso o le Au Paia o Aso e Gata Ai

Ou te fia fautuaina atu ni faatinoga patino se lima e mafai ona tatou faia e fesoasoani ai ia i tatou ia faatumauina le malosiaga lelei faaleagaga.

Uso e ma tuafafine, ou te alofa ia te outou. Ou te talisapaia lenei avanoa e talanoa ai ma outou i le asō. Ou te tatalo lava i aso taitasi ina ia puipuia outou mai osofaiga taufaamatau a le fili ma maua le malosi e tulei ai i luma e ui atu i soo se luitau tou te feagai ai.

O nisi tofotofoga e matua patino lava avega e leai se tasi e mafai ona vaai i ai. O isi tofotofoga o loo feagai ai le lautele o le lalolagi. O fetauaiga a vaegaau i Europa i sasae o se tasi o nei tofotofoga. E tele taimi ua ou oo ai i Iukureini ma Rusia. Ou te alofa i na nuu, o tagata, ma a latou gagana. Ou te tagi ma tatalo mo tagata uma ua aafia i lenei taua. I le avea ai ma se ekalesia o loo tatou faia mea uma tatou te mafaia e fesoasoani ai ia i latou o loo mafatia ma tauivi ia ola. Matou te valaaulia tagata uma ia faaauau pea ona anapopogi ma tatalo mo tagata uma ua manunua i lenei mala. O soo se taua lava o se soliga matautia o mea uma, o loo tu atu ai le Alii o Iesu Keriso ma aoao atu.

E leai ma se tasi o i tatou e mafai ona puleaina malo po o amioga a isi e oo lava i tagata o o tatou lava aiga. Ae e mafai e i tatou ona puleaina i tatou lava. O la’u valaau i le asō, o’u uso e ma tuafafine pele, o le faamutaina lea o fetauaiga o loo sasao i totonu o lou loto, lou aiga, ma lou olaga. Tanu soo se faufauga ma faufauga uma e faamanua isi—pe o na faufauga o se maitaitagofie, se laulaufaiva maai, po o se lototiga i se tasi ua ia faatiga ia te oe. Sa poloaiina i tatou e le Faaola ia liliu atu le isi alafau,¹ ia alolofa i o tatou fili, ma ia tatalo mo i latou e tuaifuaina i tatou.²

E ono faigata matuitui le lafoaia o se ita lea e lagonaina le matua faamaoniaina. E foliga mai e ono le mafai ona faamagalo i latou o a latou amioga faataumaoi ua manunua ai e ta’umamaina. Ae, sa apoapoai mai le Faaola ia i tatou ia “faamagalo i tagata uma.”³

O i tatou o soo o le Aloalii o le Filemu. E sili atu nai lo se isi lava taimi, ua tatou manaomia ai le filemu ua na o Ia lava e mafai ona aumaia. E mafai faapefea ona tatou faamoemoe ia i ai le filemu i le lalolagi ae, tatou te le o sailia taitoatasi le filemu ma le fealofani? Uso e ma tuafafine, ou te iloa o le mea o loo ou fautuaina atu e le faigofie. Ae o soo o Iesu Keriso e tatau ona setiina le faataitaiga mo tagata uma i le lalolagi e mulimuli ai. Ou te augani atu ia te outou ia faia mea uma tou te mafaia e faamuta ai fetauaiga patino o loo sasao i le taimi nei i o outou loto ma i o outou olaga.

Se’i o’u faamamafa atua lenei valaau ia faatino e ala i le talanoaina o se manatu faavae sa ou manatua talu ai nei a o matamata ai i se taaloga paseketipolo.

I lena taaloga, o le afa muamua o se finauga taufao i tua ma luma. Ae, i le lima sekone mulimuli o le afa muamua, sa togi ai e se tama o le tasi au se togi manaia e tolu ‘ai. Ae i le toe tasi le sekone na totoe, sa gaoi ai e lesi tama o lana au le pasi na sau i totonu ma toe ini ai le isi ato i le tatagi ai o le faailo! O lea na o atu ai le au lena i le potu loka ma ai e fa o loo i luma ai faatasi ma se lagona fiafia tele ma le malosiaga faaopoopo. Sa mafai ona latou tauaveina lena malosiaga i le afa lona lua ma manumalo ai i le taaloga.

O le saoasaoa o se manatu faavae mamana. Ua tatou oo uma lava i ai i soo se tulaga faapea—mo se faataitaiga, i se taavale e faasolo ina saoasaoa po o se eseesega o manatu na faafuasei lava ona tupu ai se finauga.

O lea ou te fesili ai, “o le a le mea na te faaosofiaina le malosiaga faaleagaga? Ua tatou vaai i faataitaiga uma o le malosiaga lelei ma le leaga. Ua tatou iloa soo o Iesu Keriso na liuaina ma tuputupu ae i lo latou faatuatua. Ae ua tatou iloa foi tagata talitonu na tuuto muamua o ē na pa’ū’ū ese. O le malosiaga e mafai ona suigi i soo se itu.

E leai se isi taimi ua matua sili ai ona tatou manaomiaina le malosiaga lelei faaleagaga e sili atu i lo lenei taimi, e faafetaiai ai le saoasaoa ua faateteleina o mea leaga ma faailoga pouliuli o taimi. O le malosiaga faaleagaga lelei o le a faatumauina lo tatou agai i luma i le lotolotoi o le fefe ma le lē mautonu ua mafua mai ona o le faama’ioti, sunami, maugamu, ma fetaua’iga faafitafita. O le malosiaga faaleagaga e mafai ona fesoasoani ia i tatou ia tetee atu i osofaiga leaga ma fouvale a le fili ma taofia ana taumafaiga e faatamaia lo tatou faavae patino faaleagaga.

E tele uiga e mafai ona faaosofiaina le malosiaga lelei faaleagaga. Usiusitai, alofa, lotomaualalo, auaunaga, ma le lotofaafetai⁴ ua na o ni nai uiga ia o uiga e tele.

O le asō ou te fia fautuaina atu ni faatinoga patino se lima e mafai ona tatou faia e fesoasoani ai ia i tatou ia faatumauina le malosiaga lelei faaleagaga.

Muamua: Oso i luga o le ala o feagaiga ma tumau ai iina.

E lei mamao atu, sa ou faia ai se miti manino lea sa ou feiloai ai i se vaega toatele o tagata. Sa latou fesili mai ia te au i le tele o fesili, o le fesili sa sili ona fai soo sa faatatau i le ala o feagaiga ma pe aisea e taua tele ai.

I la’u miti, sa ou faamalamalama atu i ai tatou te ulu atu i le ala o feagaiga e ala i le papatisoina ma osia la tatou uluai feagaiga ma le Atua.⁵ O taimi taitasi tatou te aai ai i le faamanatuga, tatou te toe folafola atu ai e tauave i o tatou luga le suafa o le Faaola, ia manatua pea o Ia, ma tausi Ana poloaiga.⁶ I le isi itu, ua faamautinoa mai e le Atua ia i tatou o le a tatou maua pea le Agaga o le Alii e faatasi ma i tatou.

Mulimuli ane tatou te osia nisi feagaiga i le malumalu, le nofoaga tatou te maua ai ni folafolaga sili atu. O sauniga ma feagaiga tatou te maua ai le avanoa i le mana faaleatua. O le ala o feagaiga ua na o le pau lea o le ala e tau atu i le faaeaga ma le ola e faavavau.

I la’u miti, sa fesili mai ai se tamaitai pe faapefea la e se tasi ua solia ana feagaiga ona toefoi mai i luga o lena ala. O la’u tali i lana fesili e tau atu i la’u fautuaga lona lua:

Ia maua le olioli o le salamo i aso taitasi.

O le a le taua o le salamo? Sa aoao mai Alema e tatau ona tatou “lē aoao atu se mea, vagana ai le salamo ma le faatuatua i le Alii.”⁷ E manaomia le salamo e tagata uma e mafai ona tali atu mo ia lava pe a manao i le mamalu e faavavau.⁸ E leai ni ‘alofaga. I se faaaliga i le Perofeta o Iosefa Samita, na a‘oa‘i ai e le Alii ia taitai anamua o le Ekalesia ona o le lē aoaoina o le talalelei i a latou fanau.⁹ O le salamo o le ki lea i le alualu i luma. O le faatuatua mama e faatumauina lo tatou agai i luma i luga o le ala o feagaiga.

Faamolemole, aua ne’i fefe pe faatuai ona salamo. E fiafia tele Satani i lou pagatia. Pe a faapuupuu. Lafoai ese ana faatosinaga mai lou olaga! Amata i le asō ona lagonaina le olioli o le tuueseina o le tagata natura.¹⁰ E alofa le Faaola ia i tatou e le aunoa ae maise lava pe a tatou salamo. Sa Ia folafola mai e ui “o le a o ese mauga ma sii ese maupuepue … ae o le a le alu ese lava lo’u agalelei mai ia te oe.”¹¹

Afai e te lagona ua e se ese mamao tele pe ua umi tele foi mai le ala o feagaiga ma ua leai se ala e toefoi mai ai, e le moni lena mea.¹² Faamolemole faafesootai lou epikopo po o le peresitene o le paranesi. O ia o le sui o le Alii ma o le a fesoasoani ia te oe ia lagonaina le olioli ma le toomaga o le salamo.

Ia, o se lapataiga: O le toefoi i le ala o feagaiga e lē faapea ai o le a faigofie le olaga. O lenei ala e faigata ma e i ai taimi o le a lagona ai e pei o a’e i se mea maualuga.¹³ Peitai, o lenei a’e ua mamanuina e tofotofo ai ma aoao i tatou, faaleleia o tatou natura, ma fesoasoani ia i tatou ia avea ma ni tagata paia. Ua na o le pau lea o le ala e tau atu i le faaeaga. Sa faamatala e le tasi perofeta¹⁴ le “tulaga manuia ma le fiafia o i latou e tausi poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga; ma afai latou te tutumau i le faamaoni e oo i le iuga, e talia i latou i le lagi, ina ia mafai ona latou mau faatasi ma le Atua i se tulaga o le fiafia e lē gata.”¹⁵

O le savavali i le ala o feagaiga, e vaavaalua ma le salamo i aso taitasi, e sasao ai le malosiaga lelei faaleagaga.

O la’u fautuaga lona tolu: Aoao e uiga i le Atua ma le auala e galue ai o Ia.

O se tasi o o tatou luitau aupito sili o nei aso o le iloaina o le eseesega i le va o upumoni a le Atua ma meataufaasese a Satani. O le pogai lena na lapataiina ai i tatou e le Alii ia “tatalo e le aunoa, … ina ia mafai ona [tatou] manumalo ia Satani, ma … sao ese mai lima o auauna a Satani ua sapasapaia lana galuega.”¹⁶

Sa tuu mai e Mose se faataitaiga o le auala e iloatino ai le va o le Atua ma Satani. Ina ua sau Satani e faaosooso Mose, sa iloa e ia le taufaasese ona faato’a uma lava ona la talanoa faafesaga’i ma le Atua. Sa vave lava ona iloa e Mose po o ai Satani ma poloaiina ai o ia e aluese.¹⁷ Ina ua finau Satani, sa iloa e Mose le auala e valaau atu ai i le Atua mo se isi fesoasoani. Sa maua e Mose le malosiaga faalelagi ma toe, aoai ai le leaga e toatasi, ma fai atu, “Satani, alu ese ia mai ia te aʼu, aua ua nao le Atua lenei e tasi o le a ou ifo atu i ai.”¹⁸

E tatau ona tatou mulimuli i lena faataitaiga. Lafoai ese faatosinaga a Satani mai lou olaga! Faamolemole ʼaua neʼi e mulimuli atu ia te ia i lalo i lana “to o le pagatia ma le malaia e le gata.”¹⁹

I le saoasaoa taufaamatau, o se molimau e le faafaileleina i aso taitasi “i le afioga lelei a le Atua”²⁰ e mafai ona solofa i lalo. O lea, o le vaifofo i togafiti a Satani ua manino: tatou te manaomia i aso taitasi aafiaga o le tapuai atu i le Alii ma le suesueina o Lana talalelei. Ou te augani atu ia te outou ia faamuamua le Atua i lou olaga. Avatu ia te Ia se vaega talafeagai o lou taimi. A e faia lenei mea, ia matau le mea o loo tupu i lou malosiaga lelei faaleagaga.

Fautuaga numera 4: Saili ma faamoemoeina ni vavega.

Sa faamautinoa mai e Moronae ia i tatou e faapea “ua lei taofia lava le avea o le Atua ma se Atua o vavega.”²¹ O tusi uma o tusitusiga paia o loo faaalia ai le naunau o le Alii e faauilavea i olaga o i latou o e talitonu ia te Ia.²² Sa Ia vaeluaina le Sami Ulaula mo Mose, fesoasoani ia Nifae e toe maua mai papatusi apamemea, ma toefuatai mai Lana Ekalesia e ala i le Perofeta o Iosefa Samita. O nei vavega taitasi sa alu ai le taimi ma atonu e le o mea tonu ia sa uluai talosagaina e na tagata taitoatasi mai le Alii.

I le ala lava e tasi, o le a faamanuia ai e le Alii oe i vavega pe afai e te talitonu ia te Ia, “ma lē masalosalo i se mea.”²³ Fai le galuega faaleagaga e saili ai vavega. Ia ōle atu ma le agaga tatalo i le Atua e fesoasoani mai ia te oe ia faatino lena ituaiga o faatuatua. Ou te folafola atu e mafai ona e lagonaina mo oe lava ia o Iesu Keriso “Na te avatua le malosi i e ua vaivai; a o e ua leai se malosi na te faatuputele i ai le malosi.”²⁴ E i ai nai mea o le a faatelevaveina lou malosiaga faaleagaga e sili atu nai lo le iloaina o loo fesoasoani le Alii ia te oe e aveese se mauga i lou olaga.

Fautuaga numera 5: Faamuta fetauaiga i lou lava olaga patino.

Ou te toe fai atu la’u valaau ia faamuta fetauaiga i lou olaga. Faaaoga le lotomaualalo, lototele, ma le malosi e manaomia uma e faamagalo atu ai ma saili ai le faamagaloga. Ua folafola mai le Faaola “afai [tatou te] faamagalo atu i isi i a latou agasala, o le a faamagaloina foi i [tatou] e lo [tatou] Tama Faalelagi].”²⁵

I le lua vaiaso mai le asō tatou te faamanatuina ai le Eseta. I le va o lenei taimi ma lena taimi, ou te valaaulia outou ia saili e faamuta se fetauaiga faaletagata lava ia ua mamafatu ia te oe. Mata e i ai se faatinoga sili atu ona talafeagai o le lotofaafetai ia Iesu Keriso mo Lana Togiola? Afai e foliga mai e le mafai ona faamagalo atu, aioi atu mo le mana e ala i le toto togiola o Iesu Keriso e fesoasoani ia te oe. A e faia lenei mea, ou te folafola atu le filemu patino ma se puna tele o le malosiaga faaleagaga.

Ina ua togiola le Faaola mo tagata uma, sa Ia tatalaina se ala ina ia mafai ai e i latou o ē mulimuli ia te Ia ona maua Lona mana faamalolo, faamalosiau, ma le togiola. O nei faamanuiaga faaleagaga ua avanoa i tagata uma o ē saili e faalogo ia te Ia ma mulimuli ia te Ia.

O’u uso e ma tuafafine pele, faatasi ai ma aioiga uma o lo’u loto, ou te augani atu ia te outou ia o mai i luga o le ala o feagaiga ma tumau ai iina. Ia lagonaina le olioli o le salamo i aso taitasi. Aoao e uiga i le Atua ma le auala e galue ai o Ia. Saili ma faamoemoeina vavega. Tinoū e faamuta fetaua’iga i lou olaga.

A o outou faatinoina nei sailiga, ou te folafola atu ia te outou le tomai e agai ai i luma i luga o le ala o feagaiga faatasi ma se malosiaga faateleina, e ui i soo se faafitauli tou te fetaiai. Ma ou te folafola atu ia te outou le malosi sili atu e tetee ai i faaosoosoga, filemu atili o le mafaufau, saolotoga mai le fefe, ma le lotogatasi sili atu i o outou aiga.

O loo soifua le Atua! O Iesu o le Keriso! O loo soifua o Ia! E alofa o Ia ia i tatou ma o le a fesoasoani ia i tatou. O nei mea ou te molimau atu ai i le suafa paia o lo tatou Togiola, o Iesu Keriso, amene.