Vitio: “O Outou o Tamaitai na Ia Muai Vaai I Ai”
I le 1979 sa i ai Peresitene Spencer W. Kimball i le maota gasegase ma talosagaina lona faletua, o Camilla, ia faitau atu lana lauga i se sauniga aoao a tamaitai.
Sister Camilla Kimball: “O le tele lava o le tuputupu a’e autu o loo sau i le Ekalesia i aso amulī, o le a oo mai ona o le toatele o tamaitai lelei o le lalolagi (lea e tele ina i ai se lagona loloto o le faaleagaga) o le a ta’aina maia i le Ekalesia le anoano o tagata. O le a tupu lenei mea i se maualuga e atagia mai ai i tamaitai o le Ekalesia le amiotonu ma le tulaga lelei i o latou olaga, atoa foi ma le maualuga o loo vaaia ai tamaitai o le Ekalesia o ni tamaitai iloga ma le tulaga ese—i ni tulaga fiafia—mai tamaitai o le lalolagi.”1
Peresitene Russell M. Nelson: “O’u tuafafine pele, o outou o ā matou paaga taua i lenei toe taimi, o le aso na muai vaaia e Peresitene Kimball, o le taimi nei. O outou o tamaitai na ia muai vaai i ai! O lo outou amioatua, malamalama, alofa, poto, lotototoa, uiga, faatuatua, ma olaga amiotonu o le a tosina mai ai tamaitai lelei o le lalolagi faatasi ai ma o latou aiga, i le Ekalesia i ni aofaiga e le mafaitaulia!
“Matou te manaomia lo outou malosi, lo outou liua, lo outou talitonuga maumaututu, lo outou tomai e taitai, lo outou atamai, ma o outou leo. E le mafai ona atoa le malo o le Atua ma e le mafai lava ona atoa e aunoa ma tamaitai o e osia feagaiga paia ona tausia lea, o tamaitai o ē e mafai ona tautatala atu ma le mana ma le pule a le Atua! …
“ … Po o le a lava lou valaauga, po o a lava ou tulaga, matou te manaomia ou manatu, o lou silafia, ma au musumusuga. Matou te manaomia oe e te saunoa mai i aufono a uarota ma siteki. Matou te manaomia tuafafine taitoatasi ua faaipoipo e saunoa mai ‘o se soa e saofaga ma auai atoa’ a o oulua tutu faatasi ma lau tane i le puleaina o lo oulua aiga. Pe faaipoipo pe nofofua, ua ia te outou tuafafine ni gafatia iloga ma uunaiga faapitoa ua outou mauaina o ni meaalofa mai le Atua. E le mafai e i matou o le itupa o alii ona suitulaga i la outou faatosinaga tulaga ese.
“Ua tatou iloa e faapea o le galuega faaiu ma le silisili o le foafoaga uma, o le foafoaina lea o le fafine! Matou te manaomia lo outou malosi! …
“… Ou te faafetai atu ia te outou, o’u tuafafine pele, ma faamanuia atu ia te outou ia outou tulai ae ia ausia lo outou gafatia atoa, ina ia faataunuu ai le fuataga atoa o lou foafoaga, a o tatou savavali soosoo tauau ai i lenei galuega paia. Tatou tutu faatasi, e fesoasoani i le tapenaina o le lalolagi mo le Afio Mai Faalua o le Alii.”2