Liua i le Finagalo o le Atua

Saunia e Elder Quentin L. Cook

O Le Korama a Aposetolo e Toasefululua

O lo tatou liua patino e aofia ai le tiutetauave e faasoa atu le talalelei a Iesu Keriso i le lalolagi.

Ou te faafetai mo le valaau mamana faaperofeta a Peresitene Russell M. Nelson ia o atu i le galuega faafaifeautalai ma le savali musuia faafaifeautalai a Peresitene M. Russell Ballard ma Elder Marcos A. Aidukaitis i lenei aso.

O se tofiga faafaifeautalai i Peretania Tele i le tausiusiuga o le tausaga ua tea na mafai ai ona ou manatunatu i mea taua faaleagaga na tutupu ia na taua tele i la’u faai’uga e auauna atu o se faifeautalai.¹ Ina ua 15 o’u tausaga sa 20 tausaga o lo’u uso matua, o Joe—o le tausaga lena e agavaa ai e auauna atu i se misiona i lena taimi. I le Iunaite Setete, ona o le taua i Korea, sa toalaiti lava na faatagaina e auauna atu. Sa na o le toatasi na mafai ona valaauina mai uarota taitasi i le tausaga.² O se mea na faate’ia ai ina ua talosagaina e lo matou epikopo ia Joe ia iloiloina lenei avanoa faatasi ma lo matou tamā. Sa tapena e Joe ni tusi talosaga mo le a’oga faafomai. Sa le i toaga lo matou tamā i le Lotu ma sa ia faia ni tapenaga tautupe e fesoasoani ai ia te ia ma sa le i fiafia e alu Joe i se misiona. Sa fautua mai tamā e sili atu ona faia e Joe ni mea lelei atu i le alu i le a’oga faafomai. O se faafitauli telē lea i le matou aiga.

I se talanoaga matagofie ma lo’u uso matua atamai ma tausaafia, na ma faaiuina ai e faapea, o lana faaiuga pe alu i se misiona ae tolopo lana a’oga sa faalagolago lea i ni fesili se tolu: (1) E paia ea Iesu Keriso? (2) O le Tusi a Mamona ea o le afioga a le Atua? ma le (3) O Iosefa Samita ea o le Perofeta o le Toefuataiga? Afai o le tali i nei fesili o le ioe, sa manino la e sili atu mea lelei e mafai ona faia e Joe i le avatuina o le talalelei a Iesu Keriso i le lalolagi nai lo le avea ma se fomai i le talavou o le soifuaga.³

O le po lena sa ou tatalo faatauanau ai faatasi ma se faamoemoega moni. Sa faamautu mai e le Agaga ia te a’u i se ala mamana lēmafaafitia faapea o tali i fesili uma nei e tolu o le ioe. O se mea taua tele lenei mo a’u. Sa ou iloaina o faaiuga uma o le a ou faia mo lo’u olaga atoa o le a uunaia e nei upumoni. Sa ou iloa ai foi o le a ou auauna atu i se misiona pe a tuuina mai le avanoa. I le gasologa o se olaga atoa o auaunaga ma aafiaga faaleagaga, ua ou malamalama ai o le liua moni o le taunuuga lea o le taliaina ma le mautinoa o le finagalo o le Atua, ma e mafai ona taialaina e le Agaga Paia i tatou i a tatou amioga.

Ua i ai sa’u molimau o le paia o Iesu Keriso i le avea ai ma Faaola o le lalolagi. O lena po sa ou maua ai se molimau faaleagaga e uiga i le Tusi a Mamona⁴ ma le Perofeta o Iosefa Samita.

Sa avea Iosefa Samita ma se Tufugaaao i Aao o le Alii

O le a faamalosia lau molimau pe a e iloaina i lou loto e ala i au tatalo sa avea le Perofeta o Iosefa Samita ma se tufugaaao i aao o le Alii. I le gasologa o tausaga e valu ua tuanai o se tasi o o’u tofiga i Aposetolo e Toasefululua o le toe iloiloina ma le faitauina o pepa ofoofogia uma a Iosefa Samita ma pepa o faamatalaga atoa ai ma sailiiliga ia na taitai atu i le lomiga [o le] Au Paia.⁵ Sa matua faamalosia ma faaleleia tele la’u molimau ma le faamemelo i le Perofeta o Iosefa Samita i le maea ai o le faitauina o faatamalaga auiliili musuia o lona soifuaga ma lana galuega faaperofeta na muai faauuina ai.

O le faaliliuga a Iosefa Samita o le Tusi a Mamona e ala i le meaalofa ma le mana o le Atua sa matuā taua i le Toefuataiga.⁶ I totonu o le Tusi a Mamona e ogatusa atoa, matagofie lona tusiaina, ma o loo i ai tali i fesili maoae o le olaga. O se tasi molimau ia Iesu Keriso. Ou te molimau atu o Iosefa Samita sa amiotonu, tumu i le faatuatua, ma o se tufugaaao i aao o le Alii i le aumaiga o le Tusi a Mamona.

O faaaliga ma mea na tutupu o loo tusia i le Mataupu Faavae ma Feagaiga ua maua ai ki, sauniga, ma feagaiga e tatau ai mo le faaolataga ma le faaeaga. Ua latou aumaia e le gata i mea taua e manaomia e faavae ai le Ekalesia ae faapena foi ona maua ai aoaoga faavae loloto ua faatagaina ai i tatou ia malamalama i le faamoemoega o le olaga ma tatou maua ai se vaaiga e faavavau.

O se tasi o le anoano o faataitaiga o le matafaioi faaperofeta a Iosefa Samita o loo maua i le vaega 76 o le Mataupu Faavae ma Feagaiga. O se faamaumauga manino lava o le faaaliga o le lagi, e aofia ai malo o le mamalu, lea na faamanuiaina le Perofeta o Iosefa Samita ma Sini Rikitone e mauaina i le aso 16 Fepuari, 1832. I lena taimi, o le tele o ekalesia sa latou aoao atu e faapea e le maua i le Togiola a le Faaola le faaolataga mo le toatele o tagata. Sa talitonu tagata e faapea e na o ni nai tagata toaitiiti o le a faaolaina ae o le toatele lava o le a faasalaina i seoli ma le malaia, e aofia ai sauaga e le muta “e sili ona leaga ma lē mafaamatalaina le ogaoga.”⁷

O le faaaliga o loo i ai i le vaega 76 o loo i ai se faaaliga mamalu o tikeri o le mamalu lea e matua faamanuiaina ai le toatele o fanau a le Tama Faalelagi o ē na totoa i lo latou muai olaga pe a maea le faamasinoga mulimuli.⁸ O le faaaliga e uiga i tikeri e tolu o le mamalu, o le mamalu sili ona maualalo lea e “sili mamao atu i malamalamaaga uma,”⁹ o se faasa’oga tonu o le aoaoga faavae sese na malosi i lena taimi e faapea o le toatele o tagata o le a faasalaina i seoli ma le malaia.

Pe a e iloaina sa na o le 26 tausaga le matua o Iosefa Samita, sa tapulaa lona a’otauina, sa itiiti pe leai foi se malamalama i gagana masani lea sa faaliliu mai ai le Tusi Paia, sa avea moni lava o ia ma tufugaaao i aao o le Alii. I le fuaiupu 17 o le vaega 76, sa musuia o ia e faaaoga le upu amioletonu i lo le malaia sa faaaogaina i le Evagelia a Ioane.¹⁰

E mata’ina i le 45 tausaga mulimuli ane sa tautino mai ai se taitai o le ekalesia Enelekana ma o se sikola atamai faamamaluina,¹¹ o Frederic W. Farrar, sa tusiaina O Le Soifuaga o Keriso,¹² e faapea o le faauigaga o le malaia i le Lomiga a King James o le Tusi Paia o le taunuuga lea o mea sese o le faaliliuga mai le FaaEperu ma le FaaEleni i le FaaPeretania.¹³

I o tatou aso e toatele ua faaaogaina le manatu faavae e faapea e tatau ona leai ni taunuuga mo le agasala. Latou te lagolagoina le taliaina le faatuaoia o le agasala e aunoa ma le salamo. O le tatou aoaoga faavae ua faaalia e le gata ua faasa’o ai le manatu sese e faapea o le toatele o tagata o le a faasalaina e faavavau i seoli ma le malaia ae ua faapena foi ona faamautu ai e faapea o le salamo o le tagata lava ia o se mea e manaomia ua poloaiina e maua ai i le Togiola a le Faaola ma mautofi ai i le malo selesitila.¹⁴ Ou te molimau atu o Iosefa Samita sa avea moni ma tufugaaao i aao o le Alii i le aumaiga o le Toefuataiga o Lana talalelei!

Ona o le Toefuataiga o le talalelei a Iesu Keriso, ua tatou malamalama ai i le taua o le salamo ma le “galuega o le amiotonu.”¹⁵ Ua tatou malamalama i le taua faagaeetiaina o le Togiola a le Faaola faapea ai ma Ana sauniga faaola ma feagaiga, e aofia ai ma na sauniga o loo faatinoina i totonu o le malumalu.

O “galuega o le amiotonu” e afua mai ma o fua o le liuaina. O le liua moni e aumaia e le taliaina ma le lotofuatiaifo ma le tuuto atu e mulimuli i le finagalo o le Atua.¹⁶ O le anoanoai o taunuuga ma faamanuiaga e tafe mai le liuaina e moni faapea ai ma le filemu tumau ma le faamautinoaga faaletagata lava ia o le fiafia silisili¹⁷—e ui i faigata o lenei olaga.

O le liuaina i le Faaola e suia ai se tagata natura i se tagata faapaiaina, toefanauina, ma faamamaina—o se tagata fou ia Keriso Iesu.¹⁸

E Toatele Ua Taofia mai le Upumoni Ona Ua Latou Le Iloa le Mea e Maua Ai

O a ni matafaioi e tafe mai le liuaina? I le Falepuipui i Liperate sa matauina ai e le Perofeta o Iosefa e toatele “ua taofia mai le upumoni ona ua latou lē iloa le mea e maua ai.”¹⁹

I le faatomuaga a le Alii i le Mataupu Faavae ma Feagaiga, sa tuu mai ai se ata lautele o le tautinoga o le faamoemoega o le Alii mo i tatou. Sa Ia tautino mai,“O le mea lea, o Aʼu o le Alii, ona ua Ou iloa le malaia o le a oo mai i luga o e o nonofo i le lalolagi, na Ou valaʼau atu ai i luga o laʼu auauna o Iosefa Samita, Laitiiti, ma tautala atu ia te ia mai le lagi, ma tuu atu ia te ia poloaiga.” Na Ia toe aoao mai foi, “Ina ia mafai ona folafola atu le atoatoaga o la’u talalelei e e vaivai ma e faatauvaa i tuluiga o le lalolagi.”²⁰ Ua aofia ai i lena mea faifeautalai faamisiona. Ua aofia ai i lena mea i tatou taitoatasi. O se taulaiga tuusao lea e tatau ona i ai i tagata uma ua faamanuiaina i se liua i le finagalo o le Atua. Ua valaaulia ma le alofatunoa e le Faaola i tatou ina ia avea ma Ona siufofoga ma Ona aao.²¹ O le alofa o le Faaola o le a avea ma o tatou sulu taiala. Sa aoao e le Faaola Ona soo, “Ia outou o atu e fai nuu uma lava ma soo.”²² Ma ia Iosefa Samita, sa Ia tautino atu, “Talai atu laʼu talalelei i tagata uma o e e lei mauaina.”²³

I le mavae o le vaiaso e tasi talu ona maea le faapaiaga o le Malumalu i Katelani i le aso 3 Aperila, 1836, o le Aso Sa o le Eseta ma o le Paseka foi, na faaali mai ai le Alii i se faaaliga ofoofogia ia Iosefa ma Oliva Kaotui. Sa talia e le Alii le malumalu ma tautino mai, “O le amataga lenei o le faamanuiaga o le a sasaa mai i luga o ulu o loʼu nuu.”²⁴

Ina ua tapunia lenei faaaliga, na faaali mai Mose “ma tuuina mai … ki o le faapotopotoina o Isaraelu mai itu e fa o le lalolagi, ma le taitaiga o ituaiga e sefulu mai le laueleele i matu.”²⁵

Na aoao mai Peresitene Russell M. Nelson, lo tatou perofeta pele i aso nei o loo umiaina nei lava ki e tasi, i lenei taeao: “O outou alii talavou ua faapolopoloina mo lenei taimi pe a faataunuuina le faapotopotoina folafolaina o Isaraelu. Pe a outou auauna atu i misiona, ua outou faia se matafaioi taua tele i le faapotopotoina o Isaraelu!”²⁶

Mo le poloaiga a le Faaola e faasoa atu le talalelei ina ia avea ai ma se vaega o tagata e i ai i tatou, e manaomia ona tatou liua i le finagalo o le Atua; e manaomia ona tatou alolofa i o tatou tuaoi, faasoa atu le talalelei toefuataiina a Iesu Keriso, ma valaaulia tagata uma ia o mai ma vaai. I le avea ai ma tagata o le Ekalesia, tatou te faamemelo i le tali a le Perofeta o Iosefa ia John Wentworth, le faatonu o le Chicago Democrat, i le 1842. Sa ia talosagaina faamatalaga e uiga i le Ekalesia. Sa faaiuina e Iosefa lana tali e ala i le faaaogaina o le “Tagavai o le Upumoni” e fai ma faatomua i Mataupu Faavae o le Faatuatua e sefulutolu. Ua faamatalaina e le tagavai i se ala maoti, mea e tatau ona tatou ausiaina:

“E leai se lima eleelea e mafai ona taofia le galuega mai le alualu i luma; e ono tula’i mai sauaga, e ono tuufaatasia tagata faatupu faalavelave, e ono faapotopotoina vaega’au, e ono taufaasese tuua’iga, ae o le upumoni a le Atua o le a agai pea i luma ma le manino, mamalu, ma tutoatasi, seia oo ina ulufia ai konetineta uma, asiasi atu i atunuu uma, tafia ai malo uma, ma lagonaina e taliga uma seia oo ina faataunuuina faamoemoega o le Atua, ma oo ina fetalai mai le Ieova Silisili, ua mae’a le galuega.”²⁷

O le valaau manino lava lenei ua leva mo augatupulaga o le Au Paia o Aso e Gata Ai, aemaise lava faifeautalai. I le agaga o le “Tagavai o le Upumoni,” tatou te faafetai ai ona i le lotolotoi ai o se faamai oti i le lalolagi atoa o loo faasoa atu pea e faifeautalai faatuatua le talalelei. Faifeautalai, matou te alolofa ia te outou! Ua faatonuina e le Alii i tatou uma taitoatasi e faasoa atu Lana talalelei i upu ma galuega. O lo tatou liua patino e aofia ai le tiutetauave e faasoa atu le talalelei a Iesu Keriso i le lalolagi.

O faamanuiaga o le faasoaina atu o le talalelei ua aofia ai lo tatou liua i le finagalo o le Atua ma tuu le Atua e faamuamua i o tatou olaga.²⁸ Ua tatou faamanuiaina isi ia lagonaina se “liuga tele” o le loto.²⁹ O loo i ai moni le olioli e faavavau i le fesoasoani ai e aumai agaga ia Keriso.³⁰ O le galulue mo le liuaina o se tasi ma isi o le galuega mamalu lea.³¹ Ou te molimau atu ai i le suafa o Iesu Keriso, amene.