Mataupu 1

Faapotopoto Mai se Vaega

“Ou te fia talanoa e uiga i tagata ua maliliu.”

E faitau afe le Au Paia o Aso e Gata Ai na fifilemu a o lagona atu le leo o Lusi Maki Samita i le fale tele o potopotoga i le fogafale muamua o le malumalu i Navu lea na toeitiiti lava a mae’a le fausiaina.

O le taeao lea o le aso 8 o Oketopa, 1845, o le aso lona tolu ma o le aso mulimuli foi lea o le konafesi o le tautoulu a Le Ekalesia a Iesu Keriso o le Au Paia o Aso e Gata Ai. I le iloaina o le a na le toe mauaina nisi avanoa se tele e lauga atu ai i le Au Paia—aemaise o lea ua latou fuafua e tuua Navu mo se aiga fou i se mea mamao i sisifo—sa lauga atu ai Lusi ma se mana sili atu ma lona tino auvaivai ua fitusefulu tausaga le matua.

“Ua sefuluvalu tausaga talu ai i le aso lua sefululua o Setema i le tausaga ua te’a, sa aveese mai ai i fafo e Iosefa ia papatusi mai le palapala,” sa ia molimau atu ai, “ma o Iosefa Samita, le perofeta a le Alii, ua sefuluvalu nei tausaga i le Aso Gafua ua te’a—”¹

Sa tu o ia, ma manatua Iosefa, lana tama na maliu faamaturo. Sa iloa lava e le Au Paia na i totonu o le potu le auala na taitai atu ai e se agelu a le Alii o ia i se seti o papatusi auro na tanumia i se mauga na ta’ua o Kumora. Na latou iloa sa faaliliuina e Iosefa papatusi e ala i le meaalofa ma le mana o le Atua ma lolomiina le faamaumauga o le Tusi a Mamona. Ae e toafia ni tagata o le Au Paia na i ai i le fale tele o potopotoga na iloa moni o ia?

Sa mafai ona manatua pea e Lusi le taimi na muai ta’u atu ai e Iosefa ia te ia, ae faatoa luasefulu tasi ona tausaga i lena taimi, ua faatuatuaina e le Atua o ia i papatusi. Sa popolevale o ia i le taeao atoa, sa fefe ne’i toe foi ane o ia mai le mauga e leai se mea, e pei ona sa tupu i le fa tausaga na muamua atu. Ae ina ua taunuu ane o ia, sa vave lava ona ia faatoafilemuina lona popole. “Aua e te popole,” sa ia fai mai ai. “Ua lelei mea uma.” Ona ia tuu atu lea ia te ia o mea faaliliu na tuuina mai e le Alii mo le faaliliuga o papatusi, sa afifi i se solosolo, e fai ma faamaoniga ua faamanuiaina o ia i le mauaina o faamaumauga.

Sa toalaiti lava nisi sa talitonu i lena taimi, o le toatele lava o i latou o tagata o le aiga o Samita. O le taimi lea ua silia ma le sefulutasi afe le Au Paia mai Amerika i Matu ma Europa sa nonofo i Navu, Ilinoi, i le mea sa faapotopoto i ai le Ekalesia mo le ono tausaga talu ai. O nisi o i latou sa fou i le Ekalesia ma sa le’i maua se avanoa e feiloai ai ia Iosefa po o lona uso o Ailama a o le’i tafanaina nei alii e toalua e se vaega leaga ia Iuni 1844.² O le mafuaaga lena na manao ai Lusi e lauga e uiga i ē ua maliliu. Sa manao o ia e molimau atu i le valaauga faaperofeta o Iosefa ma le matafaioi a lona aiga i le Toefuataiga o le talalelei a o le’i malaga ese atu le Au Paia.

Mo le silia ma le masina, sa susunu ai e vaega faatupu faalavelave fale ma pisinisi a le Au Paia i nuu lata ane. O le popole mo o latou ola, e toatele aiga sa sosola ese atu i le tulaga saogalemu o Navu. Ae sa faateleina le malolosi ma le faatulagaina lelei o vaega leaga a o gasolo pea vaiaso, ma sa le’i pine ae tulai a’e ni fetaua’iga faaaupegaina i le va o i latou ma le Au Paia. O le taimi lea, sa leai ma se mea na faia e le setete ma le faigamalo o le atunuu e puipuia ai aiā tatau o le Au Paia.³

I le talitonu ai sa na’o sina taimi itiiti lava ona osofaia loa lea e vaega leaga ia Navu, sa faia ai e taitai o le Ekalesia se feutagaiga mo se filemu maaleale e ala i le malilie ia oo atu i le tautotogo ua aveese mai le Au Paia mai le itumalo.⁴

I le taialaina ai i faaaliga faalelagi, sa fuafua ai e Polika Iaga ma isi uso o le Korama a Aposetolo e Toasefululua e faame’i atu le Au Paia ia sili atu ma le afe maila i sisifo, i tala atu o Mauga Papa, i fafo atu lava o le tuaoi o le Iunaite Setete. I le avea ai ma korama pule faamalumalu o le Ekalesia, sa faasilasila mai ai e le Toasefululua lenei faaiuga i le Au Paia i le aso muamua o le konafesi o le tautoulu.

“Ua mamanuina e le Alii e taitai ese atu i tatou i se laufanua lautele atu o faatinoga,” sa folafola atu ai e le aposetolo o Pale Palate, “i le mea e mafai ona tatou olioli ai i mataupu faavae mama o le saolotoga ma aia tutusa.”⁵

Sa iloa e Lusi o le a fesoasoani atu le Au Paia ia te ia i lenei faigamalaga pe afai e filifili o ia e alu. O faaaliga na poloaiina ai le Au Paia ia potopoto faatasi i se nofoaga e tasi, ma sa naunau le Toasefululua e faatino le finagalo o le Alii. Ae sa olomatua Lusi ma talitonu o le a le toe umi lona soifua. Ina ua maliu o ia, sa manao e tanu o ia i Navu i talane o Iosefa, Ailama, ma isi tagata o le aiga o ē ua maliliu, e aofia ai lana tane, o Iosefa Samita le Matua.

Ma le isi, o le toatele o lona aiga sa soifua pea na nonofo i Navu. Sa na o lana tama tama e toatasi na totoe, o Viliamu, sa avea ma se uso o le Korama a le Toasefululua, ae sa ia teenaina le latou taitaiga ma musu ai e alu i sisifō. O lana fanau teine e toatolu—Sofarania, Kataraina, ma Lusi—sa nonofo foi. Sa faapena foi lana tama teine faaletulafono o Ema, le faletua o le perofeta ua maliu.

A o saunoa atu Lusi i le faapotopotoga, sa ia uunaia lana au faaloglogo e aua le popole i le malaga o loo loma. “Aua ne’i tou loto vaivai ma faapea e le mafai ona outou maua ni taavale toso ma ni mea,” sa ia saunoa ai. E ui i le mativa ma sauaga, ua faataunuuina e lona lava aiga le poloaiga a le Alii ia lolomi le Tusi a Mamona. Sa ia uunaia i latou ia faalogo i o latou taitai ma taulima faalelei le tasi ma le isi.

“E pei ona saunoa Polika, e tatau ona outou faamaoni uma a leai tou te le oo iina,” sa ia saunoa atu ai. “Afai tou te lagona le ita, o le a iai faafitauli ia te outou.”

Sa matele ina talanoa Lusi e uiga i lona aiga, o sauaga matautia na latou mafatia ai i Misuri ma Ilinoi, atoa ma tofotofoga o loo taoto mai luma atu mo le Au Paia. “Ou te tatalo ia faamanuia e le Alii faauluuluga o le Ekalesia, le Tuagane o Polika ma taitai uma,” sa ia saunoa ai. “A ou alu atu i se isi lalolagi, ou te fia feiloai ia te outou uma.”⁶

---

E sili teisi atu ma le tasi le masina mulimuli ane, na maua ai e Uilifoti Uitilafi, o se aposetolo ma o le peresitene o le misiona a le Ekalesia i Peretania, se tusi mai ia Polika Iaga na faatalitali mo ia i lona ofisa i Livapulu, Egelani. Sa ta’u mai e Polika i lana uo, “Na tele naua le faanoanoa ma faafitauli na oo ia i matou iinei i lenei tautoulu. “O le mea lea na fautuaina ai i matou e o ese, ona pau lea o se tuutuuga mo le filemu.”⁷

Sa popole Uilifoti ae sa le faateia ai. Sa faitau o ia i lipoti a nusipepa e uiga i osofaiga a vaega leaga i eria o Navu. Ana le oo nei lava na te le iloa le leaga o le tulaga. “O se vaitaimi ese lava lenei ua tatou ola ai,” o mafaufauga ia o Uilifoti ina ua uma ona faitau i le tusi. Sa fai mai le malo o le Iunaite Setete e puipui tagata puapuagatia ma malutia tagata ua faatafea, ae na le manatua e Uilifoti se taimi na fesoasoani ai [le malo] i le Au Paia.

“Ua taumasuasua ipu o le agasala a le setete o Ilinoi ma le Iunaite Setete atoa,” sa ia tusia ai i lana apitalaaga, “ae e sili ai i le Au Paia ona o ese atu mai ogatotonu [o le Iunaite Setete].”⁸

O le mea na laki ai, o le toatele o le aiga o Uilifoti sa i ai i se nofoaga saogalemu. O lona faletua o Phebe, ma le la fanau laiti o Susana ma Iosefa, sa i ai faatasi ma ia i Egelani. O le isi la afafine o Phebe Amelia, sa nofo i ona tauaiga i le Iunaite Setete i sasae, na silia ma le afe maila le mamao mai lamatiaga.

Ae peitai, o le la atalii ulumatua o Uili, sa i ai lava i Navu i le tausiga a ni uo mamae. I lana tusi, sa ta’ua ai e Polika e faapea, na saogalemu lava le tama, ae sa lagona lava le popole o Uilifoti e toe faatasia lona aiga.⁹

I le avea ai ma peresitene o le korama, na tuuina atu ai e Polika ni faatonuga ia Uilifoti o le mea e sosoo ai e tatau ona fai. “Aua le toe aumaia ni tagata malaga mai iinei,” sa ia fautua atu ai, “ae tuu i latou e faatalitali i Egelani seia oo ina mafai ona folau atu mo le Vasa Pasefika.” Ae mo faifeautalai Amerika o loo i Egelani, sa manao o ia ia i latou e le’i mauaina o latou sauniga o le malumalu e toe foi vave mai i Navu ia maua ai [o latou sauniga o le malumalu].¹⁰

I aso na sosoo ane ai, na auina atu ai e Uilifoti ni tusi i toeaiina Amerika sa talai i Egelani, e logo ai i latou e tusa ma sauaga i Navu. E ui ina na uma ona maua o laua sauniga ma Phebe, ae sa laua filifili lava e toe foi atu foi.

“E iai se vaega o lo’u aiga o loo taape solo pe tusa ma le lua afe maila o loo valavala ai i le Setete,” na faamalamalama atu ai e Uilitofi i se savali e faatōfā atu ai i le Au Paia i Peretania. “E foliga mai i le taimi lenei, ua i o’u luga se tiute o le toe foi atu iina ma faapotopoto faatasi la’u fanau ina ia mafai ona latou o atu faatasi ma le tolauapiga a Siona.”

Sa tofia e Uilifoti ia Reupena Hedlock, o le sa avea muamua ma peresitene, e toe pule faamalumalu i Peretania. E ui ina sa le’i iai le talitonuina atoa o Uilifoti ia Reupena, o lē sa faaaogaina sese tupe a le Ekalesia i taimi ua tuanai, ae na leai se isi i Egelani na tele atu se poto masani i tulaga faaleautaitai i le misiona. Ma sa laititi se taimi na iai ia Uilifoti e su’e ai se tagata lelei atu e suitulaga ai. A uma ona toe faatasia ma le Korama a le Toasefululua, o le a ia fautuaina atu le valaauina o se isi tagata e suitulaga ia Reupena.¹¹

---

A o tapena Uilifoti ma Phebe e toe foi atu i Navu, na faalogo Samuelu Brannan, o le toeaina pule faamalumalu o le Ekalesia i le Aai o Niu Ioka, i se talaave e faapea, o le a sili atu i le faigamalo a le Iunaite Setete ona aveese aupega ae fasioti le Au Paia nai lo le faataga o i latou e tuua le atunuu ma ono au ai ma Mekisiko po o Peretania Tele, o malo e lua na mauaina ni itu tetele i Sisifo. O le popole tele, na tusi vave atu ai Sam ia Polika Iaga e lipoti i ai le lamatiaga.

Na oo atu le tusi a Sam i Navu i le taimi o ni lamatiaga fou. Sa momoli atu ia Polika ma isi au aposetolo ni pepa faamatalaga faaletulafono na molia sese ai i latou i le taufaavalea, ma o lea na sue ai e leoleo ia pueina i latou.¹² Ina ua uma ona faitau i le tusi a Sam, sa tatalo le au aposetolo mo le puipuiga, ma ole atu i le Alii ia taitai saogalemu le Au Paia i fafo atu o le aai.¹³

I se taimi e le’i mamao mulimuli ane, na foliga ai na faamautu ai e Kovana Tomasi Ford ia le lipoti a Sam. E masalo lava o le a faalavelave le faigamalo i Uosigitone, DC, e taofia Mamona mai le o atu i sisifo i Mauga Papa,” sa ia lapatai mai ai. “E toatele tagata atamamai e talitonu faamaoni o le a latou au ma Peretania pe afai latou te o atu iina, ma o le a faateteleina ai faafitauli nai lo se isi lava taimi.”¹⁴

Ia Ianuari 1846, sa fono soo ai Polika ma le Korama a le Toasefululua ma le Aufono a le Toalimagafulu, o se faalapotopotoga na vaavaaia ia atugaluga faaletino o le malo o le Atua i le lalolagi, e fuafua ai le auala sili ona lelei ma sili ona vave e aveese ai tagata mai Navu ma faatu se nofoaga fou e potopoto i ai le Au Paia. O Heber Kimball, o se uso a aposetolo, sa fautua mai latou te taitaia se vaega toaititi o le Au Paia i sisifo i se vave e mafai ai.

“Faapotopoto mai se vaega e mafai ona saunia i latou lava,” sa ia fautua atu ai, “ia saunia i soo se taimi pe a valaauina e o atu i luma ma saunia se nofoaga mo o latou aiga ma ē matitiva.”

“Afai o iai se vaega e muamua atu ma toto laau i lenei tautotogo,” sa faailoa atu ai e aposetolo Orson Palate, “o le a talafeagai pe a amata i le aso muamua o Fepuari.” Sa ia tomanatu pe o le a atamai atu le faamautu i soo se mea e latalata ane, lea o le a mafai ai ona latou vave totoina ni laau.

Sa le’i fiafia Polika i lena manatu. Ua uma ona faatonuina e le Alii le Au Paia ia faato’a se nofoaga e latalata i le Vaituloto Tele o Sate Leki. O le vaituloto o se vaega o le Faaofuofu Tele, o se laufanua telē faataali’oli’o e si’omia e atumauga. O le telē o le faaofuofu o se eleele toafa matutu ma o se luitau le toto ai o ni mea toto, sa mafua ai ona le fia malaga atu le toatele o tagata Amerika i sisifo.

“Afai tatou te o i va o mauga i le nofoaga e le fia manatu i ai se tasi,” sa faasoa atu ai Polika, “o le a leai se lotoleaga mai soo se malo.” Sa malamalama Polika o lea laufanua ua ‘aināina e tagata Amerika moni. Ae sa faamoemoe o ia o le a mafai e le Au Paia ona nonofo ai i latou lava ma le filemu.¹⁵

I le aluga o tausaga, sa taumafai ai le Au Paia e faasoa atu le talalelei i Initia Amerika i le Iunaite Setete, ma sa latou fuafua foi e fai lena mea e tasi i tagatanuu Moni o Sisifō. E pei o le toatele o tagata papa’e i le Iunaite Setete, e toatele le Au Paia papa’e na manatu i lo latou aganuu e faapea e sili atu i lo o aganuu a Initia, ma e laititi se mea na latou iloa e uiga i a latou gagana ma agaifanua. Ae sa latou manatu foi i Initia o ni uso a tagata auai o le aiga o Isaraelu ma o ni paaga faaolioli, ma sa latou faamoemoe e faia se faigauo ma le au Ute, Shoshone, ma isi ituaiga i sisifo.¹⁶

I le aso 13 o Ianuari, na toe fono ai Polika ma le aufono ina ia iloa ai pe toafia ni tagata o le Au Paia ua sauni e tuua Navu i totonu o se faaaliga i le ono itula. Sa talitonu o ia o le a saogalemu le toatele o le Au Paia i totonu o le aai seia oo i le aso o le tautotogo lea e faagata ai [le o ese atu ma Navu]. Ina ia mautinoa le vave o le faigamalaga, sa manao o ia ia toalaiti lava ni aiga e mafai ona o ese atu faatasi ma le vaega e o muamua.

“O alii uma lava o loo lamatia ma ē atonu e ono su’eina mai i ni pepa faamatalaga faaletulafono,” sa ia saunoa atu ai, “o ma ave o outou aiga.” O isi tagata uma e tatau ona faatali le o atu i sisifo seia oo i le tautotogo, pe a taunuu le vaega muamua i mauga ma atinaeina se nofoaga fou.¹⁷

---

I le aoauli o le aso 4 o Fepuari, 1846, na susulu mai le la i le Uafu o Niu Ioka a o faaputuputu le motu o tagata i le uafu e faatofa atu i le Brooklyn, o se vaa e 450-tone na agai atu mo le Faga o San Francisco i le talafatai o Kalefonia, o se eria e i matusisifo o Mekisiko lea na tau leai ni isi na nofoia. I luga o le taumua o le vaa, na talotalo mai ai i o latou aiga ma uo sa i lalo, ia le silia ma le lua selau o le Au Paia, o le toatele o i latou na matitiva tele na le malaga atu ai i sisifo e ala i taavale toso.¹⁸

O le sa taitaia i latou o le alii e luasefulu ono tausaga le matua o Sam Brannan. Ina ua mae’a le konafesi ia Oketopa, na faatonuina ai e le Toasefululua ia Sam e totogipau se vaa ma ave atu ai se vaega o le Au Paia mai sasae i Kalefonia, lea o le a latou faatalitali ai e faatasia ma le tino autu o le Ekalesia i se mea i Sisifo.

“Sosola ese ma Papelonia!” sa lapatai atu ai le aposetolo o Orson Palate. “Matou te le mananao e tuu se Au Paia se toatasi i le Iunaite Setete.”¹⁹

Sa le’i leva ae totogipau e Sam le Brooklyn i se tau taugofie, ma na fau e tagata faigaluega ni tamai potu e tolusefulu lua e faafogafalelua moega, ina ia faamautu ai le pasese. Sa ia faatonuina le Au Paia e tapena ni palau, suo, suotipi, tui, ma isi meafaigaluega o le a latou manaomia e toto ai laautoto ma fau ai fale. O le le mautinoa ai po o a ni mea o i luma atu, na latou tapena ni meaai ma sapalai ia lava, o ni povi, o ni vili saito se tolu, maa olo, masini mamanu laau ma uamea, fao, ma se masini lomitusi, ma ni fana. Sa foai mai foi e se sosaiete o galuega alofa ni tusi se tele i le vaa e fai ai se potutusi lelei.²⁰

A o tapena Sam mo le malaga i le vaa, sa lapataia o ia e se tagata faipolokiki e masani ai i Uosigitone e faapea, o loo naunau lava pea le Iunaite Setete e taofi le Au Paia mai le o ese ma Navu. Sa ta’u atu foi e le tagata faipolokiki ia Sam e faapea, o i laua ma se tagata faipisinisi e fiafia i Kalefonia sa la naunau e talosaga i le malo e fai ma sui o le Ekalesia ae faafesuiai mo le afa o fanua o le a maua e le Au Paia i Sisifo.

Sa iloa lava e Sam sa le lelei tuutuuga o le maliega, ae sa talitonu o ia o nei alii o ana uo ma e mafai ona puipuia le Au Paia. O ni nai aso a’o lei alu o ia i luga o le Brooklyn, sa faia ai e Sam ia tusia se konokarate ma auina atu ia Polika, ma uunaia o ia e saini ai. “O le a manuia mea uma,” sa ia folafola atu ai.²¹

Sa ia logoina foi Polika e uiga i lana fuafuaga e faatu se aai i le Faga o San Francisco, atonu e avea o se nofoaga fou e faapotopoto i ai le Au Paia. “O le a ou filifilia le tulaga e aupito sili ona talafeagai,” sa ia tusi atu ai. “Ae e te le’i taunuu atu iina, pe afai o le finagalo lea o le Alii, o le a ou saunia mea uma mo oe.”²²

E oo ane i le taimi na alu ese ai le Brooklyn mai ona taula, ua mautinoa e Sam na ia faamautinoaina le saogalemu o le Au Paia e tuua Navu, ma se malaga malū mo lana vaega. O le alāvaa o le a mulimuli i āu o le sami e faataamilo i le tumutumu matagia i saute o Amerika i Saute ma i le totonugalemu o le Pasefika. A latou oo atu i Kalefonia, o le a latou maua ai lo latou aai ma amata ai se olaga fou i Sisifo.

A o tatai ese atu e se vaasuauu le Brooklyn mai le uafu, sa faia e le motu o aiga peleina sa i luga o le uafu ni faamanuia se tolu i le Au Paia, o e na tali atu i ni a latou lava foi faamanuia se tolu. Ona agai atu ai lea o le vaa i lona ala i le ava vaiti o le uafu, na tatala ona la pito i luga, ma maua ai se savili lea na faapea ona aveina atu ai o ia i totonu o le Vasa Atalani.²³

---

O le aso lava lea na folau atu ai le Brooklyn mo Kalefonia, na sopoia ai e taavale toso e sefululima o le vaega na muamua o le Au Paia le Vaitafe o le Misisipi e ui atu i le Teritori o Iowa, i sisifo mai o Navu, ma faatulaga ai se tolauapiga i talane o le Sugar Creek.

O le fa o aso mulimuli ane, sa fono ai Polika Iaga ma le au aposetolo mo le taimi mulimuli i totonu o le malumalu o Navu.²⁴ E ui ina sa le’i faapaiaina le malumalu atoa, ae na uma ona latou faapaiaina lona afeafe pito i luga ma fai ai iina faaeega paia mo le silia ma le lima afe o le Au Paia naunautai. Na latou faamauina foi le tusa ma le afe toluselau o ulugalii mo le taimi nei ma le faavavau.²⁵ O ni isi o nei faamauga o ni faaipoipoga autaunonofo, lea na toalaiti ni Au Paia faamaoni na amata faia faalilolilo i Navu e mulimuli ai i se mataupu faavae na faaali mai e le Alii ia Iosefa Samita i le amataga o le vaitau o le 1830.²⁶

Sa fuafuaina e Polika e taofi le faia o sauniga i le aso 3 o Fepuari, o le aso e i luma mai o le aso na tuua ai e uluai taavale toso le aai, ae peitai, sa tumutumu atu le Au Paia i le malumalu i le aso atoa, ma le naunau ia maua sauniga ae latou te le’i o ese atu. O le taimi muamua, sa faataape i latou e Polika. “O le a tatou fausia nisi malumalu ma maua isi avanoa e maua ai faamanuiaga a le Alii,” sa ia finau atu ai. “Afai tatou te le toe mauaina ni faamanuiaga, ua anoanoai ona tauia i tatou i totonu o lenei malumalu.”

Na amata ona savali Polika i le fale, ma le manatu o le a taape ai le motu o tagata. Peitai sa le’i mamao ona aluese atu ae toe foi mai ma tau mai i le malumalu ua tumu saisai i tagata na fia aai ma fia feinu i le afioga a le Alii. O le aso lena, e toa 295 isi tagata o le Au Paia na maua o latou faamanuiaga o le malumalu.²⁷

O lea la, o le mae’a ai o galuega o sauniga o le malumalu, na tootutuli faataamilo ai le au aposetolo i le fata faitaulaga o le malumalu ma tatalo mo se malaga saogalemu i sisifo. E leai se tasi e mafai ona iloa ituaiga tofotofoga latou te ono fetaiai i vaiaso ma masina o lumanai. O tusitaiala ma faafanua na faamatalaina ala sopo e le’i faailogaina mo le vaega tele o le auala i mauga. Sa matuai tele vaitafe ma auvai i le ala, ma le anoano o pafalo ma manu e tutuli mo meaai na feoai i laufanua valevalenoa. Peitai o le laueleele sa le mafaatusalia i soo se mea lava na malaga muamua ai le Au Paia.²⁸

O le le mananao ai e tuua se tasi ia lamatiaina, na osifeagaiga faatasi ai le Au Paia e fesoasoani i soo se tasi na fia alu i sisifo—ae maise lava i e matitiva, mama’i, po o fafine ua oti a latou tane. “Afai o le a outou faamaoni i la outou feagaiga,” na folafola atu ai Polika i le Au Paia i totonu o le malumalu i le konafesi o Oketopa, “o le a sasaa mai i lalo e le Atua mea uma i lenei nuu ia faataunuuina ai ona faamatalaga auiliili uma.”²⁹

I le aso 15 o Fepuari, sa mamafatu le avega o lenei feagaiga i luga o Polika a o ia sopoia le Misisipi. O lena aoauli, sa ia tosoina ma tuleiina ia taavale toso i luga o mauga aisa ma palapala i le fa o maila i sisifo o le vaitafe. Ina ua na’o ni nai itula o le ao na totoe a’o lei oo i le afiafi e pogisa ai le auala na i luma atu, sa tumau le naunautai o Polika ia le malolo sei iloga e taunuu saogalemu ia taavale toso taitasi a le Au Paia o Aso e Gata Ai na i sisifo o le vaitafe i le Sugar Creek.³⁰

E oo ane i le taimi lea, ua tuai le fuafuaga e auina atu i lena tausaga se vaega toaitiiti e muamua atu i luma i mauga. Na tuai ona tuua e Polika ma isi taitai o le Ekalesia le aai nai lo o le mea na fuafuaina, ma o nisi o le Au Paia—na le amanaiaina le fautuaga e nonofo i Navu—na sopoia le vaitafe ma tolauapi faatasi ai ma le vaega na muamua i Sugar Creek. Ina ua mavae le vave sosola ese mai le aai, e toatele aiga na uia le ala sopo sa le’i maopoopo, le lava tapena, ma sa le’i saunia.

Sa le’i iloa e Polika i le taimi lea po o le a le mea a fai. E mautinoa lava o nei tagata o le Au Paia o le a tuai ai isi tagata. Ae o le a ia le toe faafoia nei Au Paia i le aai ae o lea ua latou o ese mai. I lona manatu, ua avea Navu ma se falepuipui, e le o se nofoaga lea mo le nuu o le Atua. O le auala i sisifo o le saolotoga lea.

O lona uiga, o le a tau lava o le latou fetaomi atu i luma ma le Toasefululua, ma le faatuatua o le a fesoasoani mai le Alii ia latou maua se fofo.³¹

1. Historian’s Office, General Church Minutes, Oct. 8, 1845; “Conference Minutes,” Times and Seasons, Nov. 1, 1845, 6:1013–14. O se lipoti atoa o le lauga a Lusi i le konafesi ia Oketopa 1845, faatasi ma faamatalaga faaopoopo, o loo maua i le Reeder and Holbrook, At the Pulpit, 21–26. Autu: Lucy Mack Smith

2. Lucy Mack Smith, History, 1844–45, book 5, [7]; Au Paia, voluma 1, mataupu 4 ma le 44; Black, “How Large Was the Population of Nauvoo?,” 92–93. Autu: Deaths of Joseph And Hyrum Smith [Maliu o Iosefa ma Ailama Samita]

3. Solomon Hancock and Alanson Ripley to Brigham Young, Sept. 11, 1845, Brigham Young Office Files, CHL; “Mobbing Again in Hancock!,” ma le “Proclamation,” Nauvoo Neighbor, Sept. 10, 1845, [2]; Gates, Journal, volume 2, Sept. 13, 1845; Glines, Reminiscences and Diary, Sept. 12, 1845; “The Crisis,” ma le “The War,” Warsaw Signal, Sept. 17, 1845, [2]; “The Mormon War,” American Penny Magazine, Oct. 11, 1845, 570–71; Jacob B. Backenstos to Brigham Young, Sept. 18, 1845, Brigham Young Office Files, CHL; Orson Spencer to Thomas Ford, Oct. 23, 1845; Thomas Ford to George Miller, Oct. 30, 1845, Brigham Young History Documents, CHL; see also Leonard, Nauvoo, 525–42.

4. To the Anti-Mormon Citizens of Hancock and Surrounding Counties (Warsaw, IL: Oct. 4, 1845), Chicago Historical Society, Collection of Manuscripts about Mormons, CHL; tagai foi i le Leonard, Nauvoo, 536–42.

5. Council of Fifty, “Record,” Sept. 9, 1845, in JSP, CFM:471–72; “Conference Minutes,” Times and Seasons, Nov. 1, 1845, 6:1008–11.

6. Mataupu Faavae ma Feagaiga 29:8 (Revelation, Sept. 1830–A, i le josephsmithpapers.org); Mataupu Faavae ma Feagaiga 125:2 (Revelation, circa Early Mar. 1841, at josephsmithpapers.org); Historian’s Office, General Church Minutes, Oct. 8, 1845; “Conference Minutes,” Times and Seasons, Nov. 1, 1845, 6:1013–14.

7. Brigham Young to Wilford Woodruff, Oct. 16, 1845, Wilford Woodruff, Journals and Papers, CHL; Woodruff, Journal, Nov. 18, 1845. Autu: Wilford Woodruff

8. Woodruff, Journal, Nov. 18, 1845; “Address to the Saints in the British Islands,” Latter-day Saints’ Millennial Star, Dec. 1, 1845, 6:177.

9. Brigham Young to Wilford Woodruff, Oct. 16, 1845, Wilford Woodruff, Journals and Papers, CHL; “Important Notice,” Latter-day Saints’ Millennial Star, Dec. 1, 1845, 6:202; Woodruff, Journal, Nov. 20–21, 1844, and July 18, 1845. Autu: Wilford Woodruff

10. Brigham Young to Wilford Woodruff, Oct. 16, 1845, Wilford Woodruff, Journals and Papers, CHL

11. Woodruff, Journal, Nov. 19–29, 1845, ma le July 15, 1846; “Important Notice,” Latter-day Saints’ Millennial Star, Dec. 1, 1845, 6:202; “To the Saints in Great Britain, Greeting,” Latter-day Saints’ Millennial Star, Jan. 1, 1846, 7:10.

12. Historian’s Office, History of the Church, volume 14, Dec. 11, 1845, 9; Samuel Brannan to Brigham Young, Jan. 12, 1846, Brigham Young Office Files, CHL; Reports of the U.S. District Attorneys, 1845–50, Report of Suits Pending, Circuit Court of the District of Illinois, Dec. 1845 term, Dec. 17–18, 1845, microfilm, Records of the Solicitor of the Treasury, copy at CHL; Oaks and Hill, Carthage Conspiracy, 202.

13. Kimball, Journal, Dec. 11, 1845; Historical Department, Journal History of the Church, Dec. 11, 1845.

14. Thomas Ford to Jacob B. Backenstos, Dec. 29, 1845, Brigham Young Office Files, CHL. Ua faasa’oina le upusii mo le manino; “Uosigitone” i le uluai tusia ua suia i le “Uosigitone, DC.”

15. Council of Fifty, “Record,” Jan. 11, 1846, i le JSP, CFM:514, 515, 518. Autu: Council of Fifty [Aufono a le Limagafulu]

16. “The Council of Fifty in Nauvoo, Illinois,” i le JSP, CFM:xxvi–xxviii; Au Paia, voluma 1, mataupu 11; Book of Mormon Title Page; Helamana 15:12–13; Mataupu Faavae ma Feagaiga 3:16–20; Reeve, Religion of a Different Color, 75–82. Autu: American Indians [Initia Amerika]

17. Council of Fifty, “Record,” Jan. 13, 1846, i le JSP, CFM:521–25. Autu: Departure from Nauvoo; Pioneer Trek

18. [Edward Kemble], “‘Brooklyn Mormons’ in California,” Sacramento Daily Union, Sept. 11, 1866, 6; “To Our Brethren and Friends Scattered Abroad,” Times and Seasons, Feb. 15, 1846, 6:1126–27; “News from America,” Latter-day Saints’ Millennial Star, Mar. 1, 1846, 7:77; “Farewell Message of Orson Pratt,” Times and Seasons, Dec. 1, 1845, 6:1043. Autu: Mexico

19. “Farewell Message of Orson Pratt,” Times and Seasons, Dec. 1, 1845, 6:1042–43; Brigham Young to Samuel Brannan, Sept. 15, 1845, Brigham Young Office Files, CHL. Topic: Samuel Brannan

20. “Come on Oh Israel, It Is Time to Go!,” New-York Messenger, Extra, Dec. 13, 1845; “To Our Brethren and Friends Scattered Abroad,” Times and Seasons, Feb. 15, 1846, 6:1127; [Edward Kemble], “‘Brooklyn Mormons’ in California,” Sacramento Daily Union, Sept. 11, 1866, 6.

21. Samuel Brannan to Brigham Young, Jan. 12, 26, ma le 27, 1846, Brigham Young Office Files, CHL.

22. Samuel Brannan to Brigham Young, Jan. 26, 1846, Brigham Young Office Files, CHL.

23. Plewe, Mapping Mormonism, 72; Hansen, “Voyage of the Brooklyn,” 48, 54–58; “To Our Brethren and Friends Scattered Abroad,” Times and Seasons, Feb. 15, 1846, 6:1127.

24. Historian’s Office, History of the Church, volume 15, Feb. 4–8, 1846, 3–4; Plewe, Mapping Mormonism, 72.

25. Tagai Nauvoo Sealing Record A, Sealings and Adoptions of the Living, 1846–57, microfilm 183,374, U.S. ma le Canada Record Collection, Family History Library; Bennett, “Line upon Line,” 47; ma le McBride, House for the Most High, 272. Autu: Temple Endowment [Faaeega Paia o le Malumalu]; Sealing [Faamauga]

26. Tagai “Plural Marriage in Kirtland and Nauvoo,” Gospel Topics, topics.lds.org. Autu: Joseph Smith and Plural Marriage

27. Historian’s Office, History of the Church, volume 15, Feb. 3, 1846, 2–3. O le fuaiupu muamua o le upusii na faasa’oina mo le faigofie ona faitauina; o le puna autu o loo iai le “Sa ou logoina le usoga e le o se mea atamai lenei mea, ma e tatau ona tatou fausia nisi Malumalu, ma maua nisi avanoa e maua ai faamanuiaga a le Alii.”

28. Historian’s Office, History of the Church, volume 15, Feb. 8, 1846, 4; Frémont, Report of the Exploring Expedition, 47–48; Council of Fifty, “Record,” Sept. 9, 1845, i le JSP, CFM:472–75.

29. “Conference Minutes,” Times and Seasons, Nov.1, 1845, 6:1008–11.

30. Historian’s Office, History of the Church, volume 15, Feb. 15, 1846, 8–9.

31. “History of Brigham Young,” Feb. 16, 1846, in Historian’s Office, History of the Church, draft, CHL; Historian’s Office, History of the Church, volume 15, Feb. 16–17, 1846, 9–11; Brigham Young to Joseph Young, Mar. 9, 1846, Brigham Young Office Files, CHL.