Mataupu 24

O Se Galuega Maoa’e

Fale Faafiafia a le Aualofa

“O faleoloa sosaiete ua faatutu ma ua toeitiiti lava i nofoaga uma o le teritori i mea e manaomia ai se faleoloa,” sa tusia e Siaosi Kainona i le aso 19 Me, 1869, i le faatonu i le Tala o le Afiafi o Tala a le Tesareta. “Ia tuuina atu i tamaitai uma i totonu o le teritori ia i ai se fiafia i nei tala, ma o le a oo mai ia i latou i le natura o mea e faapei o le tafe atu o vai i lalo mai mauga.”¹

O le vaaiga a le faatonu o tusitusiga e faatatau i tamaitai ma lo latou taua i le mafutaga galulue faatasi na faamalieina ai Sera Kimball, o le peresitene o le Aualofa a le Uarota Lona Sefululima a le Aai o Sate Leki. O le galulue faatasi e taua mo le Au Paia ina ia avea ai ma tagata e faalagolago ia i latou lava. Sa gaosia e tamaitai le tele o oloa e faatau atu i ia sosaiete ma na tele lava ina latou faatauina ia oloa i nei fale.

Na aoao atu Polika Iaga e faapea o taumafaiga uma e faatuina Siona, po o le a lava le faatauvaa, o ni vaega ia o le galuega paia a le Alii. Talu ai nei, na ia uunaia ai le Au Paia ina ia faatau ia tau lava i faleoloa o sosaiete ma i isi pisinisi ia o loo iai upu ia “E Paia i le Alii” i soo se mea o le faleoloa o iloa atu ai. E ala i le lagolagoina o nei faleoloa, na galulue ai tina mo le manuia o le Au Paia, a e le o pisinisi i fafo atu.²

O Sara ma lana Aualofa ua galulue i le taimi lea e faalauiloa tulaga lelei o le galulue faatasi. I le tausaga na muamua atu, na latou amata ai ona fausia se fale faafiafia a le Aualofa i le latou uarota. I le mulimuli ai i le mamanu o le faleoloa a Iosefa Samita i totonu o Navu, lea sa faatulaga muamua ai le uluai Aualofa, o le falefaafiafia fou e lua ona fogafale. I le fogafale i luga, o le a i ai se potugalue a tamaitai e faapitoa mo tapuaiga, faatufugaga ma faasaeanisi. I le fogafale i lalo, o le a o latou faagaoioia ai le faaleoloa faasosaiete lea e faatau ma faafesuiai ai ie fulumamoe, taaiga vavae, fasi kapeta, fualaauaina taumafa mata ua faamago, mokasini ma isi oloa na gaosia e le Aualofa.³ Faapei o isi faleoloa faasosaiete, e mafai foi ona avea o se faleoloa faasoa atu mo le faleoloa faasosaiete sili ona tele i totonu o le Aai, Fale o Oloa Faasosaiete o Siona (F.O.F.S. I.).

Pe a ma’ea, o le fale faafiafia a le Aualofa o le ituaiga muamua lea i totonu o le Ekalesia. O Aualofa, e masani lava ona feiloai i totonu o fale o aiga po o i totonu o fale o uarota. A e o Sara, o le sa avea ma se sui faavae muamua o le Aualofa muamua i totonu o Navu, na manao i se nofoaga e mafai e tamaitai o le Uarota Lona Sefululima ona atiina a’e ai ma faamalosia o latou gafatia ma mana na tuuina mai e le Atua.⁴

Sa avea Sara ma se malosi na uunaia atua le fausia o le falefaafiafia i le tausaga ua tuanai. E ui na ofo atu e se alii e foai se fanua i le Aai mo le galuega, sa tumau ia te ia ma isi tamaitai i totonu o le Aualofa e totogi le tasi le selau tala mo le galuega.⁵ Mulimuli ane, ina ua suatia le eleele e le uarota, mo le fale fou, sa faaaoga e Sara se samala ma se meafaigaluega siliva e fesoasoani ai i le faufale e faavae le maatulimanu.

“O le faamoemoe o le fale,” sa ia folafola atu ai, i le tula’i ai i luga o le ma’a, o le, “ia mafai lea e le aualofa ona sili atu le atoatoa ona tuufaatasia a latou galuega, mea latou te mafaia, o mea e latou te fiafia i ai, o a latou taleni, mo le faaleleia--faaletino, faaleagafesootai, faaleamio, faalemafaufau, faaleagaga, ma le faaletupe--ma mo le aoga faalauaitele.”⁶

I le ono masina talu mai le taimi lena, na faafaigaluega ai e tamaitai ni faufale ma latou vaavaaia le galuega faufale, lea ua lata ina mae’a. I le agaga o le galulue faatasi, sa latou sueina ai tupe ma tuufaatasia a latou risosi ia faatotogaina ai le falefaafiafia faatasi ma ie pupuni o faamalama ma kapeta. Ina ua fesili ni isi tagata pe aisea ua sili ai ona manuia le Aualofa a le Uarota Lona Sefululima, aemaise lava pe a manatu e le o se uarota e faapea ua sili le tamaoaiga i le Ekalesia, na tali faigofie atu faapea Sara, “Ua faapena ona o lo matou galulue autasi ma tausia le faasologa o mea na matou maua.”⁷

O le aso na sosoo ai ma le aso na sau ai le tusitusiga i le Tala o le Afiafi a le Tesareta, na faasoa atu ai Sara i le tala lena i lana Aualofa. “I le i ai o tamaitai e fesoasoani i le faamoemoe sili o le toefaatulagaina, e matagofie lava suiga e mafai ona fai!” sa faitauina mai ai. “Tuu atu ia te ia matafaioi, ma o le a ia faamaonia lava e na te mafaia mea sili.”

Sa talitonu Sara, ua fotu mai se aso fou mo tamaitai. “E le’i i ai lava se taimi,” na ia ta’u atu i lana Aualofa, “ua talanoaina ai tamaitai ma ona gafatia ma tiute, i nofoaga faitele faapea le le faalauaiteleina e pei ona i ai i le taimi nei.”⁸

---

A o fau e le Aualofa o le Uarota Sefululima le latou falefaafiafia, na saoasaoa le aveina atu o le au pasese ma uta i vaega o le atunuu e nofoaafi (e alu i le ausa). E ui sa faaeteete i le oo mai o aafiaga a le lalolagi i le teritori, sa talitonu le Au Peresitene Sili o nofoaafi fou sopokonetineta o le a faafaigofie ma taugofie ai le auina atu o alii faifeautalai i nofoaga o misiona ma faapotopotoina ai tagata i Siona. O lea, e tasi le vaiaso talu na maea laina nofoaafi sopokonetineta, na suatia ai e Polika Iaga le eleele mo se ala nofoaafi e umia e le Ekalesia e fesootai ai le Aai o Sate Leki ma Oketeni.⁹

I le taimi lea o galue Iosefa F. Samita o se kalaka i le ofisa o le Tagata Tusi Talafaasolopito o le Ekalesia i totonu o le Aai o Sate Leki. Ua tolusefulu tausaga o lona matua ma ua tele atu ana matafaioi i totonu o le Ekalesia nai lo le mea sa i ai. E tolu tausaga talu ai, e le’i leva na toe foi mai Hawaii, ua valaauina o ia i le tofi aposetolo ma vaetofia o se fesoasoani i le Au Peresitene Sili.¹⁰

I le taimi nei, a o suia le tau toulu o le 1869 i le tau mafanafana, sa saunia ai Iosefa F. mo se luitau fou. O ona tausoga o Alesana ma Tavita Samita o loo talia le oo mai i le teritori. O atalii o le perofeta o Iosefa Samita, e nonofo i Ilinoi ma e auai i le Ekalesia Toefaatulagaina O le Ekalesia a Iesu Keriso o le Au Paia o Aso e Gata Ai. Na lagolagoina e Alesana ma Tavita le la uso matua o Iosefa Samita III o se perofeta ma le suli moni e faaauaua le galuega a lo latou tama.

E pei o Iosefa III, na talitonu Alesana ma Tavita e le’i a’oa’oina lava pe na faatinoina e lo latou tama le sili atu nai lo le tasi le faaipoipoga. Nai lo lena, na latou faapea mai, o Polika Iaga na muai faalauiloaina lenei mataupu faavae ina ua mavae le maliu o lo latou tama.¹¹

E ui, na fetusia’i Iosefa F. ma ona tausoga, e le’i vava lalata i latou. Na gata lana vaai ia Alesana i le tolu tausaga na muamua atu, i totonu o le1866, ina ua malolo Alesana i le Aai o Sate Leki e folafola atu le talalelei a o malaga atu o ia agai i le misiona i Kalefonia. I lona iloa ai o le a teena e le Au Paia lana mau e uiga i lona tama ma le sili atu ma le tasi faaipoipoga, na sau saunia ai Alesana ma aumai faamatalaga a lona tama ma Ailama Samita na lomia i totonu o le Tau ma Taimi, o le niusipepa a le Ekalesia i Navu, lea e foliga mai e faasea i le sili atu ma le tasi faaipoipoga ma teena ai le aafia o le Au Paia i lena mataupu.¹²

I le 1866, na manao ai Iosefa F. e faaleaoga le mau a lona tausoga, a e ua le mau manatu o ia. I le faate’ia o ia, na itiiti ni faamaumauga faamaonia na mafai ona ia maua e ono i ai se fesootaiga o le perofeta o Iosefa ma le mataupu o le sili atu ma le tasi le faaipoipoga. Na ia iloa na aoao atu e Iosefa Samita le mataupu faavae lea i ni isi o le Au Paia faamaoni, e aofia ai Polika Iaga ma isi ua nonofo i totonu o le Teritori o Iuta. A e na ia maua e faapea e le’i faamaumauina e i latou se mea e faatatau i lea aafiaga.

Sa i ai foi faaaliga a le Alii e uiga i faaipoipoga, lea sa faamaumauina e Iosefa Samita i le 1843 ma lomia mo le taimi muamua i le 1852. O loo faamatala e le faaaliga le ala e mafai ai e se alii ma se tamaitai ona faamauina faatasi i le faavavau e ala i le pule o le perisitua. Na faamalamalamaina foi, o le Atua i ni isi o taimi e poloaiina le sili atu ma le tasi le faaipoipoga ia tausia ai tamaiti i totonu o aiga amiotonu ma fesoasoani e faataunuu Ana feagaiga ia faamanuiaina ai Aperaamo i le le mafaitauina o e tupuga mai ia te ia.¹³

O le faaaliga o se faamaoniga malosi lea na aoaoina ma faatinoina e Iosefa Samita lea mataupu o le sili atu ma le tasi le faaipoipoga. Na teena e Alesana e na te le taliaina le moni, peitai, e lei mafai e Iosefa F. ona maua ni faamaumauga faaopoopo tusitusia o faaipoipoga e sili atu ma le tasi a le perofeta.¹⁴ “I le faatatau la i tusi,” na ia faailoa atu ai i lona tausoga, “e lagolagoina e tusi lou itu.”¹⁵

I le iloa ai e faapea e toe foi Alesana i Iuta faatasi ma Tavita, na toe amatalia ai e Iosefa F. ona saili mo faamaoniga o faaipoipoga e sili atu ma le tasi a Iosefa Samita.¹⁶ Ua avea faaipoipoga e sili atu ma le tasi o se vaega patino o le soifuaga o Iosefa F. ma ua naunau e puipuia lea. I nai tausaga muamua atu, na tuua ai e lona toalua muamua, o Levira o ia ma la tete’a ai, o se vaega o le mafuaaga ona o lana faaipoipoga i lana ava lona lua, o Iulina Lamasone, na lagalaga ai ni toatuga sa i ai i le mafutaga. Talu mai lena, na faaipoipo ai Iosefa F. i le ava lona tolu, o Sara Elena Risati.¹⁷ Ia te ia, o se osofaiga i lea faatulagaga, e lamatia ai fesootaiga o feagaiga lea e fausia ai le faavae o lona aiga.

I le aluga o le tolu tausaga ua mavae, na malamalama atili ai foi Iosefa F. e uiga i le ala o loo tali atu ai lona tausoga matua ma lona tama i le lamatia ogaoga o loo latou faafesagai i totonu o Navu. Ina ia puipuia latou ma le Ekalesia mai faitioga, i ni isi o taimi sa latou faase ese ai tala faatupu e le mailoa e faatatau i faaipoipoga e sili atu ma le tasi i totonu o Navu e ala i le lomia o faamatalaga lea e tetee ai i faatinoga le sa’o e aunoa ma le teena ai o le faatinoga faatagaina lava ia. O la latou lapataiga na fesoasoani e faamalamalama le mafuaaga o le toeitiiti lava a leai se faamaoniga tusitusia e fesootai ai le Perofeta ma Ailama i lea faatinoga.¹⁸

Ina ia faaleleia lea avanoa ua i totonu o talafaamaumau faatalafaasolopito, na amata ai e Iosefa F. ona ao ao mai faamatalaga tusitusia ua sainia mai tagata o e sa aafia i le taimi faatoa amata ai faaipoipoga e sili atu ma le tasi, aemaise lava tamaitai o e na faamau atu ia Iosefa Samita, e faapei o Elisa Sinou. Na faamaopoopo mai foi e Iosefa F. faamatalaga e uiga i mea na silafia e lona tausoga matua o Emma e faatatau i faaipoipoga e sili atu ma le tasi. O lona tuafafine matua o Lovina sa nonofo faatasi ma Emma mo se taimi ina ua mavae le faimalaga atu o le toatele o le Au Paia agai atu i sisifo. Sa ia molimau mai na ta’u atu ia te ia e Emma i se tasi o taimi e faapea sa ia malie i ai ma molimauina le faamauga o lona toalua ma ni isi o ana ava e sili atu ma le toatasi.

I le faasologa o nai vaiaso muamua o le taumafanafana, na faaauau ai e Iosefa F. le ao mai o faamatalaga, a o ia faatalitali ai i aso taitasi le o’o mai o lona tausoga.¹⁹

---

Ia Iulai 22, 1869, na amatalia ai e Sara Kimball le fonotaga muamua i totonu o le fale faafiafia fou faatoa mae’a a le Aualofa o le Uarota Lona Sefululima. “Na fausia le fale mo le manuia o tagata uma,” na ia faasilasila atu ai i tamaitai sa i ai i totonu o le potu.²⁰

Lua vaiaso mulimuli ane ai, ia Aokuso 5, na faapaiaina ai e le Au Peresitene Sili le fale. I le sauniga, na lagiina ai e le aufaipese se viiga fou lea na tusia e Elisa Sinou e uiga i le matafaioi a le faalefaafiafia a le aualofa i le puipuia o Siona:

Tau ina ia i ai le faatasia i lenei Falefaafiafia

Faatasi ai ma le malosi ma tomai faale-Atua:

Ma Tama e, tuu atu i Lou atamai e taitai,

Ma ia faatumulia matagaluega taitasi.

Matou faapaiaina lenei Maota i Lau Afioga,

O se alofa ma galuega natia:

Ia avea lava le manuia o Siona

Ma lona faamoemoe malosi.²¹

Sa fiafia le Au Peresitene Sili e faapea o le fale ua na opoina mai tulaga faatauaina o le galulue faatasi tautamaoaiga ma le vaega e gaosia mea i le lotoifale. I lana saunoaga i le aualofa, na faamamafa atu ai e Polika le taua o tamaitai ma alii le galulue faatasi mo Siona. “O le lalolagi e tatau ona suia,” na ia faapea mai ai. “O loo i ai se galuega maoa’e e tatau ona faagaoioia, ma o mea uma e mafai, taleni, ma fesoasoaniga lea e mafai ona tuuina atu o le a manaomia.”

“O le fesoasoani a tamaitai e manaomia e pei lava foi o alii,” na ia faaauau ai. “O a tatou Aualofa e mo le manuia o e matitiva ma faapea foi mo le manuia o e maumea. O latou e mo le manuia o soo se ituaiga o aafiaga ma e mo le manuia atoa o le Au Paia o Aso e Gata Ai i le lotoifale.²²

Na faaopoopo atu i ai e Sara lana molimau o le taua o le galulue faatasi i se tasi o fonotaga o loo mulimuli mai i lena masina. Sa ia aoao atu e faapea, o le galulue faatasi o se vaega o le mamanu a le Alii mo Siona. I lona mafaufau, o le au gaosi oloa i le lotoifale e taua tele mo le soifua manuia o le Au Paia.

“E le tatau lava ona mou ese atu ma le vaai le mataupu,” sa ia naunau atu ai, e oo lava mo se fonotaga se tasi.”²³

---

Ua taunuu Alesana ma Tavita Samita i le Aai o Sate Leki i le taumafanafana ma nonofo ai ma le uso matua o Iosefa F. o Ioane, le peteriaka pulefaamalumalu o le Ekalesia ma lona to’alua o Elena. E lua aso mulimuli ane, na asiasi atu ai Alesana ma Tavita i le ofisa o Polika Iaga, ma le faamoemoe e maua mai le faatagaga e lauga ai i le tapeneko, lea sa i ni isi e faaavanoa mo isi faalapotopotoga faaletapuaiga e faia ai fonotaga. Na manatunatu Polika i le talosaga a le uso, a e o ia ma isi taitai o le Ekalesia sa latou masalosalo i lo latou faamoemoe ma le tuuina atu o le faatagaga.²⁴

I totonu o le ofisa o le Talafaamaumau faaletalafaasolopito, na faaauau e Iosefa F. Samita ona faamaopoopo faamaoniga e faapea o Iosefa Samita sa aoao atu ma faatino le sili atu ma le tasi le faaipoipoga, i le faalauteleina lea o mea na ia iloa faapea le Ekalesia e uiga i le sili atu ma le tasi le faaipoipoga i totonu o Navu. E ese mai le faamaopoopoina o nisi faamatalaga, sa ia suesue i talafaamaumau a Viliamu Keleitone, o le sa avea ma failautusi a le perofeta, uo, ma se faatuatuaina. O le talafaamaumau a Viliamu, o se tasi lea o faamaumauga itiiti mai Navu sa auiliiliina ai po po fou o le sili atu ma le tasi le faaipoipoga, ma na tuuina mai ai faamaoniga o le auai o le perofeta.²⁵

A le i ai Iosefa F. i le ofisa o Talafaasolopito, pe le o i lona aiga, o loo iai o ia i le Maota o Faaeega Paia. I le amataga o Aokuso, na la tuuina atu ai ma Siaosi Kainona faaeega paia i le la uo o Ionatana Napela, o le na malaga mai i le Aai o Sate Leki mai Hawaii i le faatausiusiuga o Iulai, ia maua le sauniga, ma asiasi atu ai i le laumua o le Ekalesia, ma feiloai ai ma Polika Iaga ma isi Au Paia.²⁶

I le taimi lea o loo i ai pea Alesana ma Tavita Samita i totonu o le Aai, ma lolofi atu i ai tagata i taimi e la te lauga atu ai. O le i ai o le faamoemoe e faavaivaia le pule a Polika Iaga, na totogi ai e ni faipisinisi maumea, o e sa tetee i le faatulagaga faasosaiete a le Ekalesia, se fale lotu tele a le Ekalesia Porotesano ia mafai ai e le auuso ona tuuina atu a la aoaoga e faitioina ai le taitaiga a Polika Iaga ma le Ekalesia. E pei na faia e Alesana i le tolu tausaga ua mavae, sa la faalagolago tele lava foi i upusii mai le Taimi ma Tau, e teena ai le auai o le la tama i le sili atu ma le tasi faaipoipoga.

I le taimi lava e tasi, o Iosefa F. Samita ma isi taitai o le Ekalesia sa latou tuuina atu lauga i le sili atu ma le tasi faaipoipoga i Navu i totonu o fale o uarota i le Aai.²⁷ Ia Aokuso 8, na lauga atu ai Iosefa F. i se faalapotopotoga i totonu o le Aai o Sate Leki. Na ia tuuina atu ni isi o faamaoniga na ia faamaopoopo mai e uiga i po po fou o le sili atu ma le tasi le faaipoipoga ma agai i faamatalaga a lona tama ma lona tausoga matua e uiga i lea faatinoga i totonu o le Taimi ma Tau.

“Ua na’o nei faamaumauga sa’o ua ou iloa,” na ia fai atu ai i le faapotopotoga. “Ua iloa e tagata uma o tagata o lena taimi e le’i saunia mo nei mea, ma sa manaomia ona faaeteete,” na ia faapea mai ai. “Sa i ai i latou i le taulotoaiga o fili ma i totonu o se setete, o le i ai o lenei mataupu faavae e ono tuuina atu ai i latou i le falepuipui.”

Na talitonu Iosefa F. na fai e lona tama ma lona tausoga matua le mea na la faia ina ia faasaoina ai o la ola ma puipuia ai isi tane ma fafine o e sa faatinoina foi le sili atu ma le tasi le faaipoipoga. “E le’i sa’oloto le usoga iina e pei ona latou sa’oloto iinei,” na ia faaauau atu ai. “Na aasa le alu a le fili i Navu, ma sa i ai i soo se mea i latou o e na toe faasaga tau i o latou lava tagata.”²⁸

---

Ia Setema, na faifai ai se faatonu e suafa ia Elia Harisone o se Au Paia o Aso e Gata Ai ia Alesana ma Tavita Samita i le la misiona i totonu o le Mekasini a Iuta, o se lomiga tuutaimi na ia lomia faatasi ma le lagolago tautupe a lana uo o Viliamu Atuapea, o se tasi i totonu o le Ekalesia e maumea. Faatasi ai ma se peni e le taofiofia, na faifai ai Elia i le Ekalesia Toefaatulagaina ma faasagatau ai i le auuso Samita i le “le iloa tuutoatasia” o le auaunaga a lo la tama.

“O le la faamamafa faapitoa o loo faaaluina i le taumafai e faamaonia e lei auai pe faatino e lo la tama lea amioga o le sili atu ma le tasi le toalua, faavaeina a la mau i ni faamatalaga i totonu o le Tusi a Mamona, Mataupu Faavae ma Feagaiga, ma i totonu o le Taimi ma Tau,” na tusia e Elia. “A e o le a le taunuuga o lenei mea? E mafai e Tavita ma Alesana ona faamaonia na teena e Iosefa Samita le tele o toalua, ma e mafai ona matou faamaonia na ia faatinoina.”²⁹

E ui na tele lava na puipuia e Elia le Ekalesia i ana tusitusiga, na ia faia ina ia natia ai ana lava faamoemoega moni mo le lomia o le Mekasini Iuta. Talu mai le amataga o le faagaoioiga o le sosaiete, o la’ua ma Viliamu Atuapea sa la teena filemu le fautuaga a le Au Peresitene Sili e lagolago uso a Au Paia ma alo ese mai pisinisi a e le faaaogaina a latou tupe mama e faamalolosia ai le tamaoaiga i le lotoifale.³⁰ Mo Viliamu, o le tetee i le Au Peresitene Sili e manaomia le suia faigofie e aunoa ma se ono iloa. E ese mai le avea ma se faipisinisi manuia, o ia o se fautua a le Aai o Sate Leki ma o se uso o le au epikopo o le Uarota Sefulutolu. Ma o ia o se atalii faaletulafono ma se uo lelei a Polika Iaga.³¹

E pei o Elia, na talitonu Viliamu o le perofeta o se tagata e tautu i uiga tuai ma e na te tuuina atu se aafiaga malosi i luga o soifuaga o le Au Paia. A o le’i amataina le faagaoioiga o le Sosaiete, o le aufaipisinisi e pei o Viliamu, sa fiafia i le i ai o le pule i luga o le maketi i le lotoifale, na faatagaina ai i latou e tuu i luga tau ma latou maumea ai. I lalo o le faatulagaga fou, peitai, sa saili atu le Ekalesia ina ia taofia i lalo tau ina ia manuia ai Au Paia le tagolima ma faapea ai ma faleoloa sosaiete i le lotoifale.

I le tuuitiitia ai o lana pule i luga o le maketi ua faavaivaia, ua amata ona le fiafia Viliamu i le faamamafa a Polika i luga o le paia o le galulue faatasi. Ua faaopoopo ma faaopoopo pea ona la faaaogaina ma Elia le Mekasini Iuta e saunia ai isi tagata e tutusa o latou mafaufau e fausia se tetee i totonu o le Ekalesia.³²

O lo latou loto e tetee na tino mai i le tausaga na muamua atu i se malaga faapisinisi i Niu Ioka. I le taimi lena, ua amata e alii uma ia toalua ona taumafai e fesootai ma e ua maliliu e ala atu i le talanoa i agaga, Faaaliga. O le talanoa ma agaga na amata ona taatele i le mavae ai o le Taua o le Lotoifale a Amerika i le fia fesootai atu lea o tagata i e pele ia i latou o e na maliliu i lea taua. Ua leva ona faafanoina e le Ekalesia nei faatinoga, peitai, o ni faaaliga taufaasese mai le fili.

I le le amanaiaina o nei lapataiga, na faaaafia ai e Viliamu ma Elia i la’ua lava i nei faaaliga ma talitonu ai sa la talanoa atu i agaga o Iosefa Samita, Ipa Kimball, o aposetolo o Peteru, Iakopo ma Ioane, ma ua o’o lava i le Faaola. I lo la talitonu ai ua moni nei fesootaiga, na lagona ai e Viliamu ma Elia ua valaauina i la’ua i se misiona faapitoa e aveese mai le Ekalesia mea uma e la te manatu ua le moni. Ina ua la toe foi atu i Iuta, ua amata ona la lomia faitioga (ia e le faigofie ona iloa) o taitai o le Ekalesia faapea ai ma aiaiga, a e lolomi i autafa o koluma o ni faamatalaga anoa i totonu o le Mekasini Iuta.³³

E le’i leva ona lolomia lana koluma e uiga i le au uso o Samita, a e faasolo ona malosi ana osofaiga e faatatau ia Polika Iaga ma aiaiga a le Ekalesia. Ua faapea mai lana mau, ua aveesea e le galulue faatasi faasosaiete mai le Au Paia le tuleia faafinafinau moomia lea e faamaite olaola ai le tamaoaiga o Iuta, lea na ia manatu ua vaivai tele e faalagolago i ai le gaosiga o oloa i le lotoifale. Na ia manatu foi e faapea ua manatu faapito le Au Paia e ositaulaga o latou manaoga ma mea e fiafia i ai mo le lelei o lo latou lotoifale.³⁴

Ona, oo lea ia Oketopa 16, na lomia ai e Elia le tusi i le faatonu e uunaia le Au Paia ina ia atiinaa’e le tamaoaiga o le minerale i Iuta. I le aluga o tausaga, na faamaonia ai e Polika Iaga le eliina o minerale e taulamua ai le Ekalesia, a e na popole o ia o le mauaina o nei minerale taua, o le a aumaia ai le tele o ni faafitauli faaagafesotai, faapea ma ni fevaevaeaiga tau ituaiga i le teritori. O lenei atugaluga na taitai atu ai o ia e aoao atu malosi e tetee atu i le faapisinisiina o le eliina o minerale i se tulaga faatutoatasi i totonu o le teritori.³⁵

Na vave ona atagia manino mai o loo taumafai ma le faaeteete Elia ma Viliamu e taupulepule e faasagatau atu i le Ekalesia. Ia Oketopa 18, na feiloai ai Osona Palate, Uilifoti Uitilafi, ma Siaosi Kainona faatasi ma alii nei e toalua ma ni isi o la’ua uo. Na faatumulia Elia i le loto tiga, ma e le’i naunau i la’ua uma e lagolago le Au Peresitene Sili. I le lima aso mulimuli ane ai, i le fonotaga a le Aoga a Perofeta i le Aai o Sate Leki, na ta’ua ai e Viliamu e faapea na ia mulimuli i le fautuaga faaletamaoaiga a Polika a e taatia ese lana faamasinoga sa sili atu ma e na te talitonu e le o i le perofeta le aia e taitaia ai le Au Paia i mataupu tau pisinisi. Sa sili atu ona talanoa tetee Elia e faasaga i le taitaiga a Polika. “E sese lea! E sese lea!” na alaga ai.³⁶

I nai aso na sosoo ai, na feiloai ai le fono maualuga a le Aai o Sate Leki faatasi ma Elia ma Viliamu i le falefaafiafia o le aai. Na tuuaia e Elia taitai o le Ekalesia i le faatino ai ua pei latou ma a latou upu e le ono sese. I le teenaina o le fautuaga, na faapea mai ai Viliamu o loo la mulimuli ma Elia i se pule faaleagaga maualuga o se faatatauga i faaaliga a ni agaga ua na’o se mafaufauga.

“E ma te le o tuueseina le perisitua i soo se ala,” na ia tautino ai, “ae e ma te faailoa le i ai o se mana i tua atu o le veli lea o loo oo mai ai aafiaga ma faatonuga ma e oo mai pea lava lea e taitaia ai i le ala agai i luma.

Ina ua mae’a ona saunoa nei alii e toalua, ona saunoa atu lea o Polika i le fono maualuga. “Ou te le’i sailia lava a e na’o le mea e tasi i totonu o lenei malo,” na ia faapea mai ai, “ma o lena mea o le aumaia lea o alii ma tamaitai ia usitai i le Alii o Iesu Keriso i mea uma.”

Na ia faamautuina mai o tagata uma lava e i ai le aia e mafaufau ai mo i latou lava, faapei foi ona i ai i taitai o le Ekalesia le aia e fautuaina ai i latou e tusa ma faaaliga. “E matou te galulue faatasi ma ogatusa ma le Faaola,” na ia folafola atu ai. “E Na te galue faatasi ma ogatusa ma Lona Tama, ma e matou te galulue felagolagoma’i faatasi ma le Alo mo le faaolataga o i matou lava ma aiga o tagata uma.”

Na teena foi e Polika le manatu faapea o taitai o le Ekalesia e le ono faia ni mea sese. “Ou te le faafoliga e le ono sese, a e o le perisitua o loo i o’u luga e le ono sese,” na ia faapea mai ai. “E mai le faavavau e oo atu i le faavavau, ma o le perisitua lava e tasi lea sa i o’u luga lea sa i luga o Iosefa.”

A fai e mananao Viliamu ma Elia e faaauau ona faitioina le Ekalesia i totonu o le Mekasini Iuta, e talitonu Polika e sa’oloto i la’ua e faia lena. E faaauau pea ona ia aoao atu ma faatino le galulue felagolagomai, tusa lava pe o a mea e latou te faia ma fai mai ai, po o a foi mea e fai e le au faipisinisi i fafo atu ma fai mai ai. “O le a ou tuu atu i tagata e faia e pei ona i ai o latou mafaufau e fai,” na ia faapea mai ai. “E ia te a’u le aia e fautuaina ai i latou, ma e ia i latou le aia e faaaoga ai la’u fautuaga pe tuu ai pea.”

Ina ua maea le fonotaga, na fautua atu ai e le peresitene o le siteki le aveeseina o igoa o Viliamu ma Elia mai le Ekalesia mo le liliuese. Na lagolagoina e le fono maualuga le mau, ma o i latou uma sa i totonu o le potu sei vagana ai tagata e toa ono---o e faifai mea faatasi ma Elia ma Viliamu-----na lagolagoina le faaiuga.³⁷

1. [Siaosi Q. Kainona], “Tamaitai ma Lana Misiona,” Tala o le Afiafi a le Tesareta, Me 19, 1869, [2].

2. Uarota Lona Sefululima, Talafaamaumau ma Minute a le Aualofa, voluma 1, Me 20, 1869; Arrington, Fox, ma e, Fausia le Aai o le Atua, 79–110; Wallis, “Sosaiete a Tamaitai i Iuta,” 315–31; Matagaluega o Talafaasolopito, Talafaamaumau a le Ofisa, Oke. 29, 1868; “Lauga,” Tala a Tesareta, Oke. 21, 1868, [2]; “Saunoaga,” Tala a Tesareta, Me 26, 1869, [7]. Autu: Faatulagaga Aufaatasi; Cooperative Movement

3. “Aufaatasi,” Tala o le Afiafi a le Tesareta, Ape. 29, 1869, [3]; Reeder, “Tamaitai Mamona ma le Faatuina o se Tuanai e Faaaogaina,” 155; Sarah M. Kimball, Savali Faaletausaga, circa 1868; Elisa R. Sinou, Ripoti i le Philadelphia Centennial Exposition, Mat. 1876, i totonu o Derr ma isi, Tausaga Muamua e Limasefulu o le Aualofa, 290, 394; Wallis, “Sosaiete a Tamaitai i Iuta,” 315–31; tagai foi Au Paia, voluma 1, mataupu 37.

4. Uarota Lonasefululima, Talafaamaumau ma Minute a le Aualofa, voluma 1, Nov. 12, 1868, ma Iulai 22, 1869; Sarah M. Kimball, Savali Faaletausaga, circa 1868, i totonu o Derr ma isi, Tausaga Muamua e Limasefulu o le, 290; “Ia Pere. Iaga, Tuafafine Sinou, ma isi uma,” itulau taape i totonu o le Uarota Lonasefulima, Talafaamaumau ma Minute a le Aualofa, voluma 5; Derr, Cannon, ma Beecher, Tamaitai o le Feagaiga, 99. Autu: Aualofa

5. Uarota Lonasefululima, Talafaamaumau ma Minute a le Aualofa, voluma 1, Iulai 16, 1868; “Ia Pere. Iaga, Tuafafine Sinou, ma isi uma,” itulau taape i totonu o le Uarota Lonasefululima, Talafaamaumau ma Minute o le Aualofa, voluma 5.

6. Uarota Lonasefululima, Talafaamaumau ma Minute a le Aualofa, voluma 1, Nov. 12, 1868; Sarah M. Kimball, “Talaaga a le Tagata Lava Ia,” Lagolago Tamaitai, Set. 1, 1883, 12:51.

7. Uarota Lonasefululima, Talafaamaumau ma Minute a le Aualofa, voluma 1, Fep. 25 ma Me 13, 1869; Higbee, “Peresitene Mrs. Kimball,” 87. Ua faasa’oina upusii mo le faigofie ona faitauina; o le punavai autu o loo i ai “Na faapea mai Peresitene Kimball e faapea na ia manatu ona na latou faia ia lotogatasi ma faaauau ai ona faagaoioina e pei na latou mauaina.

8. Uarota Lonasefululima, Talafaamaumau ma Minute a le Aualofa, voluma 1, FepThursday, May 20, 1869;’Tina ma Lana Misiona Tala o le Afiafi a le Tesarete Me 19, 1869. [2]. Upusii muamua faasa’oina mo le faigofie ona faitauina; “tamaitai, ma ona gafatia ma tiute” i totonu o le suiga muamua i le “tamaitai, ma ona gafatia ma tiute.”

9. Crofutt, Crofutt’s Taiala Tagata Tafafaomaimoa mai Nofoaafi sopokonatineta, [9]–223; Francaviglia, I Luga o Mauga, 143–45, 151, 163; “Tatalaina o le Galuega i luga o Alanofoaafi Tutotonu i Iuta,” Sate Leki Feaufaauaealesi, Me 18, 1869, [2]; “O Ala o Nofoaafi ma ona Manuia,” Tala a le Tesareta, Iulai 7, 1869, [9]; Polika Iaga, i totonu Talafaamaumau o Saunoaga, Me 26, 1867, 12:54. Autu: Nofoaafi

10. Matagaluega o Talafaasolopito, Talafaamaumau o le Talafaasolopito o le Ekalesia, Iulai 1, 1866; Samita, Soifuaga o Iosefa F. Samita, 226–28. Autu: Iosefa F. Samita

11. Joseph F. Smith to Martha Ann Smith Harris, June 21, 1869, Carole C. King Collection, CHL; “Smith, Alexander Hale,” and “Smith, David Hyrum,” Biographical Entries, Joseph Smith Papers website, josephsmithpapers.org; “True Latter Day Saints’ Herald,” True Latter Day Saints’ Herald, Jan. 1, 1869, 19–20; “Pleasant Chat,” True Latter Day Saints’ Herald, Mar. 15, 1869, 176–77. Autu: Aiga o Iosefa ma Emma Hale Samita

12. Iosefa F. Samita ia Iosefa Samita III, Mat. 18, 1868, Iosefa F. Samita, Pepa, CHL; “Talanoaga Fiafia,” Au Paia o Aso e Gata Ai Moni’ Herald, Tes. 15, 1866, 177; Smith, “Tala Otooto o Alesana H. Samita,” 399–402; tagai foi, mo se faataitaiga, “I Faaipoipoga,” Taimi ma Tau, Oke. 1, 1842, 3:939–40; “Faasilasilaga,” Taimi ma Tau, Fep. 1, 1844, 5:423; ma Ailama Samita, “I le Usoga o le Ekalesia,” Taimi ma Tau, Mat. 15, 1844, 5:474.

13. Mataupu Faavae ma Feagaiga 132:18–20, 30-32, 55, 63 (Faaaliga, Iulai 12, 1843, i le josephsmithpapers.org).

14. Iosefa F. Samita ia Osona Palate, Iulai 19, 1875, Letterpress Copybooks, “Book C. No. 3,” 1–4, Iosefa F. Samita, Pepa, CHL; Mataupu Faavae ma Feagaiga 132 (Faaaliga, Iulai 12, 1843, i le josephsmithpapers.org).

15. Samita, “Tala “otooto a Alesana H. Samita,”402.

16. Iosefa F. Samita ia Mareta Ane Samita Harisi, Iuni 21, 1869, Carole C. King Tuufaatasiga, CHL; Matagaluega o Talafaasolopito, Talafaamaumau o le Ofisa, Ape. 22 ma le Iulai 26, 1869; Faamatalaga faamaonia e uiga i Faaipoipoga Faaselesitila, 1869–1915, CHL.

17. Kenney, “Tofotofoga o le Alii Talavou Iosefa F. Samita,” 33–35; Iosefa F. Samita ia Mareta Ane Harisi, Tes. 1, 1869, Carole C. King Collection, CHL; Beesley, Diary, Ape. 11, 1886; Tusi Alei, Iuni 10, 1867, Iosefa F. Samita, Pepa, CHL; Tait, “Ava a Iosefa F. Samita,” 77, 81; Iosefa F. Samita ia Polika Iaga, Aok. 25, 1867, Faila o le Ofisa o Polika Iaga, CHL.

18. Iosefa F. Samita ia Iosefa Samita III, Mat. 18, 1868, Iosefa F. Samita, Pepa, CHL; Iosefa F. Samita ia Osona Parate, Iulai 19, 1875, Letterpress Copybooks, “Book C. Nu. 3,” 1–4, Iosefa F. Samita, Pepa, CHL; Faaliga, Taimi ma Tau, Set. 1, 1842, 3:909; Ailama Samita, “I le Usoga o le Ekalesia,” Taimi ma Tau, Mat. 15, 1844, 5:474; Tusi i le Faatonu, Taimi ma Tau, Nov. 15, 1844, 5:715.

19. “40 Faamaoniga Tusitusia i Faaipoipoga Faaselesitila,” Tusi nu. 1 (faasologa lona lua), 1869, Faamaoniga Tusitusia e uiga i Faaipoipoga Faaselesitila, CHL; Matagaluega o Talafaasolopito, Talafaamaumau o le Ofisa, Ape. 22 ma le Iulai 26, 1869; tagai foi Au Paia, voluma 1, mataupu 40; ma Hales, Faaipoipoga e sili atu ma le tasi a Iosefa Samita, 1:356–60; faaopoopoga C, 2:343–57. Autu: Iosefa Samita ma Faaipoipoga e Sili atu ma le Tasi

20. Uarota Lona Sefululima, Talafaamaumau ma Minute a le Aualofa, voluma 1, iulai 22, 1869. Ua faasa’oina upusii mo le faigofie ona faitauina; “na iai” i le uluai tusiga ua suia i le “iai.” Autu: Aualofa

21. Uarota Lonasefululima, Talafaamaumau ma Minute a le Aualofa, voluma 1, Iulai 22 ma le Aok. 5, 1869; Elisa R. Sinou, “Viiga o le Faapaiaga,” i totonu o Derr ma Davidson, Elisa R. Sinou, 795–96; “Faapaiga,” Tala a le Tesareta, Aok. 11, 1869, [5].

22. Uarota Lonasefululima, Talafaamaumau ma Minute a le Aualofa, Aok. 5, 1869; “Saunoaga,” Tala a le Tesareta, Aok. 11, 1869, [7].

23. Uarota Lonasefululima, Talafaamaumau ma Minute a le Aualofa, Aok. 26, 1869.

24. Samita, “Tala otooto o Alesana Hale. Samita,” 502–4; “Vaega o Otootoga mai Talafaamaumau a Elder Tavita H. Samita,” Au Paia o Aso e Gata Ai Moni’ Herald, Aok. 15, 1869, 102; Set. 1, 1869, 130; Samita “Tala otooto a Alesana H. Samita,” 260.

25. Matagaluega o Talafaasolopito, Talafaamaumau a le Ofisa, Iulai 19–Set. 2, 1869; Clayton, Talafaamaumau, Me 1, 1843.

26. Matagaluega o Talafaasolopito, Talafaamaumau a le Ofisa, Iulai 21–22, 26, ma le 28–29, 1869; Aok. 2–5 ma le 11, 1869; Ofisa o Talafaamaumau, Talafaasolopito o le Ekalesia, voluma 39, Iulai 25, 1869, 689; “Sauniga o le Sapati,” Tala a le Tesareta, Iulai 28, 1869, [8]; Talafaamaumau a Uitilafi, Iulai 25, 1869.

27. Matagaluega o Talafaasolopito, Talafaamaumau a le Ofisa, Aok. 1, 8, 15, 21, ma le 22, 1869; “Vaega o Otootoga mai le Talafaamaumau a Elder Tavita H. Samita,” Au Paia o Aso e Gata Ai Moni’ Herald, Set. 1, 1869, 130–31; Samita, “Tavita H. Samita i totonu o Iuta,” 508–9; Samita, “Tala otooto o Alesana Hale Samita,” 504–5.

28. Samita, “Tavita H. Samita i totonu o Iuta,” 509; Matagaluega o Talafaasolopito, Talafaamaumau o le Ofisa, Aok. 8, 1869; Iosefa F. Samita ia Mareta Ane Harisi, Aok. 17, 1869, Carole C. King Collection, CHL; tagai foi Avery, Mai le Misiona i le Valea, 103.

29. [Harisone], “Sa Iosefa Platform,” 280–83.

30. Walker, Au Paia Faalogogata, 93, 105, 149–51; Atuapea, “O le Tulaga o i ai Iuta,” 406. Autu: Sa Atuapea

31. “Viliamu S. Atuapea,” 64–65; Walker, “Amataga o le Tetee a le Au Sa Atuapea,” 223–24; Beeton, “Charlotte Ives Cobb Godbe Kirby,” 23–24.

32. “Mafuta Sa Atuapea,” 16; Atuapea, “O le Tulaga o loo i ai Iuta,” 406; Walker, Au Paia Faalogogata, 100–101, 105–6; Harisone ma Atuapea, “Manifesto,” 470. Autu: Mafutaga Sosaiete

33. “Mamona,” Niu Ioka Herald, Ian. 2, 1870, 8; Albanese, Republic o le Mafaufau ma le Agaga, 178–79, 220–24; Nartonis, “Faana’e o le Seneturi Lona 19 i le Faaleagaga FaaleAmerika,” 371; Walker, Au Paia Faalogotata, 112–26; Atuapea, “O le Tulaga o i ai i totonu o Iuta,” 406; Walker, “Amataga o le Tetee a le Au Sa Atuapea,” 237–40; tagai foi Jedediah Grant, i le Talafaamaumau o Saunoaga, Fep. 19, 1854, 2:10–11; ma le Polika Iaga, i le Talafaamaumau o Saunoaga, Me 6, 1855, 3:156–58; Set. 1, 1859, 7:237–44.

34. “Faatoaina o le Va’a,” 295; “Usitai Faamaonia,” 379; “Atiina’eina Moni o le Teritori,” 376–78; “O Totogi o Tatou Tagata Faigaluega,” 262–64; Walker, “Amataga o le Tetee a le Au Sa Atuapea,” 237–38.

35. “Atiinaeina Moni o le Teritori,” 376–78; Walker, “Amataga o le Tetee a le Au Sa Atuapea,” 239; Arrington, Polika Iaga, 299, 348–49; Arrington, O le Li’o o le Malo Sili, 241–44.

36. Uitilafi, Talafaamaumau, Oke. 17, 18, 23, ma le 25, 1869; [Tullidge], “Toefaatulagaga i totonu o Iuta,” 605–6; Iosefa F. Samita, Talafaamaumau, Oke. 23, 1869; tagai foi Walker, “Amataga o le Tetee a le Au Sa Atuapea,” 240–41.

37. Siteki a Sate Leki, Tusi Minute o Faamasinoga a le Fono Maualuga, voluma 3, Oket. 25, 1869, 51, 58–69, 80–94; Utilafi, Talafaamaumau, Oke. 25, 1869; tagai foi Walker, Au Paia Faalogogata, 166; ma le “I le Tatau i Ai,” Tala o le Afiafi a le Tesareta, Oke. 26, 1869, [3].