Mataupu 41

Umi Lava o Lilofia

I le aoauli o le aso 25 o Fepuari, 1891, a o sauni Jane Risati, le fesoasoani muamua i le au peresitene aoao a le Aualofa e lauga i Uosigitone, DC, i le konafesi muamua a le Aufono a le Mafutaga Aoao a Tina. Mo le lua ma le afa aso ua mavae o le konafesi, sa fiafia lava o ia e faalogologo i tamaitai mai le salafa o le Iunaite Setete e uiga i a latou taumafaiga i aoaoga, galuega alofa, toefaatulaga, ma le aganuu. Ua oo nei i le taimi o lana lauga, ma sa tumu lava le fale i le selau ma selau o tagata o e na o mai e faalogologo i se mea o le a fai mai ai lea Au Paia o Aso e Gata Ai¹

Mo le toeitiiti lava atoa le limasefulu o lona talafaasolopito, sa taula’i atu ai le Aualofa i le auai atu i manaoga o le Au Paia. Na malosi lava lagona o Sina Iaga, le Peresitene Aoao o le Aualofa, peita’i o le mafutaga a tamaitai i totonu o le Ekalesia e tatau ona galulue faatasi ma isi vaega e uunaia mafuaaga e pei o le saolotoga mo tamaitai e palota ai. O le auai i le Fono a Tamaitai o le Malo, o se avanoa mo taitai o le Aualofa ma Tamaitai Laiti i le Mafutaga o le Alualu i Luma e latou te galulue faatasi ai ma isi o e taitutusa mea latou te faatauaina ma sini.²

Na filifilia Jane e auai i le konafesi ona sa manao Emeline Uele e ave atu tamaitai o e tulaga lelei i aoaoga ma lelei ona faaaafiaina o ia i mataupu tau tamaitai i Iuta. Sa ia manao foi e ave atu nisi e lototetele, o se uiga patino sa ia talitonu o loo ia Jane ma e tele tele ia te ia.

Na faatasi atu ma Jane i Uosigitone ia Emeline, Sara Kimball, ma isi taitai tamaitai i totonu o le Ekalesia. A o le’i o ese, na faamanuiaina ma vaetofia nei tamaitai e se aposetolo po o se uso o le Au Peresitene Sili e avea i latou ma sui o a latou faalapotopotoga.

I le faatusatusa ai i asiasiga i Uosigitone muamua a ni tamaitai o le Au Paia o Aso e Gata Ai iloga, e latou te le o o e faatauanau mo le Au Paia. O loo latou o o ni taitai o faalapotopotoga a tamaitai o e mananao e tautatala atu e uiga i a latou galuega, e le gata i totonu o Iuta, a e faapea foi i isi nofoaga uma o loo iai le Aualofa ma le T.L.M.I.A. ua faavaeina.³

A o le’i auai Jane ma isi sui mai Iuta o ni sui auai o le fono, na moomia ona iloiloina e le komiti pe taliaina i latou. O le toatele o tamaitai i le komiti, na latou iloa taumafaiga a le Aualofa e uunaia aia tatau a tamaitai e palota ai, faatulaga, faamaopoopo tamaitai i tulaga faalemalo faapea faalevaomalo, ma faavae fesootaiga lelei ma taitai iloga o le mafutaga a tamaitai i tulaga faalemalo.⁴ Ae e toatasi le tamaitai sa tetee i lo latou ulufale mai, sa talitonu ua latou o mai e talai atu e uiga i autaunonofo.

O isi sui o le komiti ua latou ‘au i le puipuia o le Au Paia, ma faailoa mai o le Manifeso o le faamaonia lea o sui mai Iuta e mafai ona faatuatuaina. I le faaiuga, na fulisia le palota e faafeiloai atu i le Aualofa ma le Y.L.M.I.A. i totonu o la latou mafutaga.⁵

Ina ua oo i le taimi o Jane e lauga ai, sa ia faapu’upu’uina lana saunoaga. Sa ia tau atu i le faapotopotoga e faapea e talitonu le Aualofa i le faasoa atu o le alofa, feavatai, filemu ma le fiafia i tagata uma. Sa ia faailoa atu foi le loto faafetai mo tamaitai i soo se mea o e talitonu foi faapea.

“Atonu tatou te eseese i manatu ni isi mea,” sa ia faapea mai ai, “a e o lo tatou faamoemoe sili o le faia o le lelei i tagata uma.”⁶

A o i ai i Uosigitone, sa talanoa atu Jane i le toatele o tagata e uiga i le Aualofa ma le Au Paia. Na ia faafetaia tamaitai sa ia feiloai i ai ma galuega o loo latou faia, ma sa ia mo’omo’o pe ana ia te ia ni kopi e limaselau o le Manifeso e faasoa atu i tagata o e o i ai fesili e uiga i le tele o faaipoipoga. A o le’i foi i le aiga, sa ia valaaulia le toatele o ana uo fou e asiasi atu i Iuta.

Afai e latou te mananao ia iloa lelei le Au Paia o Aso e Gata Ai, na ia faapea mai ai, o le mea sili e fai o le faaalu lea o se taimi e mafuta ai ma i latou.⁷

---

I le tau malulu lena, na iloa ai e Emili Kurene le faaopoopoina o le faigata o le lavatia na’o ia o matagi u u tutu’a a Kolorato.⁸ Talu le tuuina atu e le Ekalesia o le Manifeso, o ana fesootaiga ma le malo o le Iunaite Setete ua amata ona alualu i luma. O tagata o le malo i Uosigitone, e aofia ai le Peresitene, ua le o toe manatu e ave ese aia palota a le Au Paia pe ave faamalosi malumalu. Ma ua fai e le Faamasinoga maualuga a le Iunaite Setete le faaiuga e faapea ua toe mafai e fanau mai faaipoipoga a autaunonofo ona maua mea totino.

A e sa tumau pea tulafono a le malo e faasolitulafono ai autaunonofo. Sa molia ma ave faamalosi e leoleo tagata mo autaunonofo ma le nonofo faatasi faasolitulafono, tainane ua faaitiitia le numera.⁹ Afai e tuua e Emili le saogalemu o Manasa, o lana faaipoipoga autaunonofo ia Ipa Kurene o le a mafai ona iloa faalauaitele, ma lamatia ai le la aiga.¹⁰

O le tama o Emili, o Tanielu Uele, na maliu ia Mati, 1891. O ia ma lana fanau teine, o Tesi ma Alofatunoa, ua toe foi atu i le Aai o Sate Leki mo le maliu, ma na loto i ai Ipa e faapea e mafai ona ia toe foi atu i le aai. Sa ia talitonu o le umi e mafai ai e ia ma Emili ona le faalauaiteleina le la faaipoipoga, nonofo ai i fale eseese ma le vaaia faatasi i laua i nofoaga faitele, o le a mafai e le aiga ona nonofo felatai.¹¹

Na mananao aiga ma uo e fai se pati e faailoa ai le fiafia i le toe foi mai o Emili i le Aai o Sate Leki, a e na sili ia te ia le tausia o le aua nei iloa o ia. “O lo’u manao ia tau lava o le asiasi faatasi ma o’u aiga ma uo e aunoa ma le faailoaina o a’u i soo se mea,” na ia fai atu ai ia Ipa.¹² Na alu atu ma nonofo faatasi ma lona tina, e va i nai fale mai ia Ipa, ma faaauau ona ia fesootai ma ia e tele lava e ala i tusi. O sea ituaiga olaga e le o le mea tonu lea na manao i ai Emili, a e ua sili atu lea nai lo le nofo i le fia selau maila le mamao.¹³

I le tau e sosoo ma le tau mafanafana lena, na atoa ai le lima tausaga o Tesi, le afafine o Emili ma Ipa. E ese mai ai i lona valaauina o ia lava o “Maria Harisi” ma Ipa, “Eli, Tausoga Matua,” na valaau ai e Emili ia Tesi, o “Peti Harisi” ina ia tausia ai o ia ma lona aiga i le saogalemu mai leoleo. Lea la ua suia mo le lelei lo latou tulaga, ua tele lava ina tuu ese e Emili ma Ipa le faaaoga o igoa ese ma faaaoga loa o la igoa moni i tusi e tusi e le tasi i le isi.

I le aso fanau o Tesi, na faaofu ai e Emili o ia i se ofu fou, teu tavio lona lauulu, ma faamau faatasi i se lipine lanumoana. “Le na ua amata ona avea oe ma teine lapo’a.” na faapea atu ai Emili. O le a ou ta’u atu ia te oe se mea sili e le’i iloa.” Sa ia faailoa atu le igoa moni o Tesi ma fai atu ia te ia, o Eli, le Tausoga Matua, o lona tama mo’i.¹⁴

E le’i leva miulimuli ane, na iloa ai e Tesi e faapea o le toalua o ana uo fou, o Rasela ma Luti, o ona uso, o afafine o le latou tama ma lona toalua o Lusi. I se tasi aso, na taunuu atu ai Luti, e sefulu tausaga le matua faatasi ma lana solofanua lanusamasama, o Fesi, o loo pipii i se taavale solofanua laitiiti, i le fale o Emili. Sa ia manao e ave ona uso e faatietie. Sa le mautinoa e Emili e saogalemu le tuu atu o teineiti e o, ae sa ia tuu atua. Ua feaei i totonu o le tamai taavale solofanua ia Tesi ma Alofatunoa, ma e le’i pine ae alu ese atu le taavale a nei tamaitai.¹⁵

Ua fiafia Emili ua toe foi mai i le aiga i le Aai o Sate Leki. Sa ia le fiafia i le nanaina o lana fesootaiga ma Ipa, ma sa ia mo’omo’o e faapea e sa’oloto lona aiga e o i soo se mea o le aai e latou te fia o i ai. A e sa mafai ona ia vaaia le aao o le Atua i le la toe faatasi ma lona toalua, ma ia iloa e faapea, sa la fiafia i le alofa o le tasi i le isi.

“O le mea moni e faapea, ua ou mafaia, o se mea mataina lea ia te a’u,” sa ia tusia ai, “ma ou te tatalo mo le malosi ina ia ou gafatia ai mea o loo i lo’u lumanai,”¹⁶

---

I lena tau i luma atu o le tau mafanafana, na faia ai le fiafia a Ioane Widtsoe, e sefuluiva tausaga le matua i lona faauuga mai le Kolisi o Polika Iaga i Logan. I le sauniga o le faauuga, na ia maua ai le faalauiloa faapitoa mo lona tulaga sili i le tautala, Siamani, kemisi, algebra, ma le geometry.¹⁷

I lona taimi i le kolisi, sa fiafia Ioane i taimi uma e na te mauaina ai mo le uluai taimi se vaega o le malamalamaaga fou. O loo fou lava le kolisi, ma e le i ai ni tusi se tele i totonu i ana faletusi po o meafaitino i totonu o ona potu faasaeanisi suesue. Ma e le’i i ai foi i ona faiaoga ni faailoga sili o tomai faalemafaufau, tainane o faiaoga o ni faiaoga sili na lelei o e na iloa le ala e faafaigofie ai se mataupu ma aoao ai a latou tamaiti aoga.

O le puleaoga, o Iosefa Tena, o se tagata sa aoga ia Karl Maeser, le puleaoga logologoa o le Aoga a Polika Iaga i Provo o le o loo galue nei o se faatonusili ua silia ma le tolu tasene o aoga a le Ekalesia. O se faifeautalai sa auauna atu i Europa ma Tutotonu i Sasae, sa faiaoga foi Iosefa i vasega o mataupu faalelotu, na aoaoina Ioane ma ana tamaiti aoga i le ata o le faaolataga ma le Toefuataiga o le talalelei. Na avea mataupu faalelotu o se tasi o mataupu e fiafia i ai Ioane. Na fausia ai ona uiga patino ma lana vaaiga faatatau i le olaga ma maaleale ai lona mataala i le eseesega i le va o le sa’o ma le sese.¹⁸

I le siosiomaga o le taimi o le faauuga, na valaaulia ai e Iosefa ia Ioane e auai atu ma ia ma se vaega o talavou atamamai o le Au Paia o Aso e Gata Ai e tusia o latou igoa i lena tau mafanafana i le Iunivesite o Harvard, le iunivesite aupito matua ma sili ona faaaloalogia i totonu o le Iunaite Setete. Na manao Iosefa i le au atamamai ia maua se aoaoina tulaga muamua, o le a mafai ona latou faaaogaina e faaalualuina ai i luma le ituaiga o aoaoga i totonu o aoga i Iuta.¹⁹

O Havard le ituaiga o nofoaga na manao lava i ai le tina o Ioane, o Ana e auai atu i ai o ia, ma sa ia lagolagoina lana faaiuga e alu iina, i le mautu ai o le a alualu i luma ana suesuega. Ina ia totogiina pili, sa ave ai i tua e Ioane se tupe nono mai se faletupe i le lotoifale. O uo e toalima a le aiga—e aofia ai Anetone Sekati, le faifeautalai na papatisoina Ana i Nouei—na tuu atu foi ia te ia se fesoasoani tautupe.

Na tuua e Ioane mo Havard i le lei atoa se masina talu lona faauuga. I se taimi puupuu mulimuli ane, na fetuunaia ai e Ana se tupe nono i lona fale, tuuina atu mo le mautotogi, ma alu atu i le Aaai o Sate Leki, lea e mafai ai e ia ma lana tama laitiiti o Osepone, ona maua ni galuega sili atu e lagolagoina ai le aiga ma totogi ai le aoga a Ioane.

Sa tusi soo atu Ana ia Ioane. “Atonu o le a tele ni faafitauli laiti e oo mai ia te oe ma o le a e faafesagai ma ni faanoanoaga laiti muamua,” na ia fai atu ai ia te ia i se tasi o tusi, “ae e mafai e na mea uma ona aoga ia te oe i le lumanai.”

“E faatasi le Atua ma oe, ma o le a Ia faamanuiaina oe e faaluaina mea e te ono mafaufauina pe tatalo ai,” sa ia folafola atu ai. “Ia punou i luma o le Alii i le tatalo i lou taimi faatulagaina, ma soo se taimi e te lagona ai, ma ia faia ma le faafetai ma le maualalo o le loto.”²⁰

---

I le Aai o Sate Leki, sa faaauau ona nofo ai Iosefa F. Samita i lalo o le eleele e aunoa ma le iloa, e ui o le lamatia i le ave faamalosi ma le faasalaina ua faaitiitia. I le le faapei ai o faaipoipoga e tele a Ipa Kurene, o faaipoipoga a Iosefa sa iloa e le lautele, ma o lona tofiga i le Au Peresitene Sili sa umi ai o makaina o ia e leoleo o le malo.

I aso o le vaiaso, e asiasi atu ai Iosefa i ona toalua ma fanau i le pogisa ma toe foi i lona ofisa i le fale ua igoa o Gardo House e moe ai. I faaiuga o vaiaso, e na te faateleina ai le lamatia, i le nofo ai i po faatasi ma lona aiga, i faaiuga o vaiaso taitasi e faasolosolo ai i fale o ona toalua e toalima.²¹ O le ola e pei o se tagata o loo sola mai le tulafono sa faalotovaivai ai. “Sei vagana ua aumai e le Alii ia te a’u se faamama avega i se ala e le o vaaia i le taimi nei,” na ia tusi atu ai i lona tausoga matua o Alofamutimutivale Tomasisone, “E faatumau pea ia te a’u le lafi ai mo se taimi o loo faasolo mai.”²²

Ia Iuni 1891, sa tusia ai e Iosefa se tusi i le peresitene o le Iunaite Setete, o Peniamina Harisone, e talosaga ai se faamagaloga, po o le ave ese atoa ai o mau solitulafono faasaga ia te ia. Faatasi ma le faatupulaia o le lelei o le lagolago i le va o le Ekalesia ma le malo o le Iunaite Setete, na talitonu Iosefa e mafai ona ia maua se faamagaloga.²³

Peitai, i le saili ai o se faamagaloga, e le’o folafola atu e Iosefa le tuulafoaiina o ona toalua. E le’i tuuina atu i le Manifeso se faatonuga i ni auala e tatau ona faatino ai e le Au Paia faaipoipoga e tele, ae sa fautuaina e Uilifoti Uitilafi i se tulaga e le faalauaiteleina au peresitene o siteki ma au pulega aoao le ala e latou te faaliliuina ai le savali a le Manifeso. “O lenei Manifeso, o loo faatatau tau lava o faaipoipoga i le lumanai ma e leai sona aafiaga i tulaga tuai,” na ia faapea mai ai. ‘Ou te lei fai atu, e le mafai ona ou fai atu, ma o le a ou le folafola atu lava faapea o le a outou tuulafoaiina a outou ava ma fanau. O lenei mea e le mafai ona outou faia i le amio sa’o.”²⁴

E i ai nisi tagata na latou filifili e faauma a latou faaipoipoga e tele, ae o le toatele sa saili ia mulimuli i le Manifeso i ala le malosi. O nisi tamaloloa sa faaauau i le ala sili latou te mafai ai e lagolago o latou aiga mai faaipoipoiga e tele, tulaga tautupe, faalemafaufau, e aunoa ma le nonofo faatasi ma i latou. O nisi sa faaauau ona nonofo faatasi ma o latou aiga e pei a e leai se mea ua suia, e ui o lo latou faia e ono tuuina atu ai i latou i le faamasinoga ma faafalepuipuiina.

Mo lana vaega, na filifili Iosefa e faaauau ona tausia lona aiga e pei ona masani ai, i le talitonu e faapea o loo ia mulimuli i le Manifeso ao usitaia i le taimi lava e tasi le tulafono e faasaina ai le nonofo faatasi.²⁵

I le amataga o Setema, na iloa ai e Iosefa mai se ripoti a se niusipepa o loo faailoa mai ai e faapea ua tuuina mai e Peresitene Harisone le faamagaloga ia te ia. E le’i manao o ia e faia se fiafia pe alu atu i nofoaga lautele, peita’i, se’ia o’o mai i ona lima faamaumauga. “Sa umi lava o o’u lilofia i lalo o lologa o le fafati mai o mea tutupu,” na ia tusi ai i se tusi i se uo. “Pe a fai ou te maua se saolotoga i soo se tulaga lava, o le a pei a’u o se tasi ua faatu mai le oti, po o le toe fanauina, faatasi ma ni aafiaga fou o le a maua ma mea uma fou e aoao.”²⁶

Na taunuu i se taimi e lei umi mulimuli ane le tusi o le faamagaloga. I le faatumulia i le loto faafetai, na faamoemoe ai Iosefa o le faamagaloina o ia o le a taitai atu ai i se faamagaloga aoao mo Au Paia uma o e na oo atu i faaipoipoga e tele a o le’i i ai le Manifeso. A e na ia iloa foi, o sea faamagaloga e ono le taofia ai le malo mai le aumaia o mau fou faasaga i tamaloloa o e o loo faaauau ona nonofo ma taitoalua na latou faaipoipo atu i ai i le leva talu ai. Ina ia saogalemu, na ia filifili ai e nofo i po i le ofisa o le Au Peresitene Sili ao ia aoaoina pea lana fanau ma lagolagoina lona aiga toatele. Na faaauau pea e ia ma ana ava e toalima ona maua fanau.²⁷

I le Aso Sa ina ua maea ona maua le faamagaloga, na auai ai Iosefa i le Aoga Sa a le Uarota Lona Sefulu Ono i le Aai o Sate Leki. Na ia saunoa atu i tamaiti o le vasega ma talanoa mulimuli ane faatasi ma uo tuai ma e masani. Mulimuli ane i lena aso, na ia auai ai i se sauniga i le tapeneko, lea na valaaulia o ia e saunoa ai.

A o vaai atu Iosefa i le Au Paia, na toe itiiti a toilalo o ia i lagona loloto o le loto. “Ua silia ma le fitu tausaga talu le taimi mulimuli na ou maua ai le avanoa e tulai atu i luma o se faapotopotoga o tagata i totonu o lenei tapeneko,” na ia faapea mai ai. Ua tele mea ua suia ao ia toesea ai ma ua lagona e pei o se tamaitiiti ua umi se taimi o toesea mai le aiga.

Na ia molimau atu i le Toefuataiga, molimau atu o le galuega a le Alii. “Ou te faafetai i le Atua le Tama e Faavavau i le tuuina o lenei molimau i totonu o lo’u loto ma le agaga,” na ia folafola atu ai, “ e na te aumaia ia te a’u le malamalama, faamoemoe, olioli ma le faamafanafanaga e le mafai e se tagata ona ia aumaia pe ave ese atu.”

Na ia tatalo foi ina ia fesoasoani le Atua i le Au Paia e fai le mea ua sa’o ma mamalu i luma o le Alii ma luma o le tulafono. “E ao ona tatou ola i totonu o le lalolagi e pei ona tatou faia,” na ia faapea mai ai. “E tatau ona tatou faia le mea sili e tusa ma le siosiomaga ua tuuina i ai i tatou. O le mea lena o loo manaomia mai e le Alii mai lima o le Au Paia o Aso e Gata Ai.”²⁸

---

E lei umi talu na maua e Iosefa F. Samita le faamagaloga, na folafola atu ai e Uilifoti Uitilafi e faapea, o le mafaufau ma le finagalo lea o le Atua ia faamaea e le Au Paia le malumalu. Na tuuina e le aufaigaluega le taualuga i luga o le fale i le lua tausaga na muamua atu, na mafai ai e kamuta ma isi tagata tomai ona galulue ai i le gasologa o le tausaga. Ae sa tele lava galuega sa totoe i le tino i fafo o le fale, e aofia ai le fausia o le faatagata tele o se agelu i luga o le tila aupito maualuga ogatotonu o le malumalu. O le faatagata o le a fausia e le tusiata tautaua o Sairasi Talini o se na soifua a’e i Iuta ma maua le aoaoina tele tau tusi ata i le Iunaite Setete i Sasae ma Paris.

I le amataga o Oketopa, e toatele le au faitofi o le Ekalesia na malilie e fesoasoani e saili le $100,000 mo le fausiaina, e ui lava o le tau e faamaea ai le fale e ono sili atu.²⁹ I le gasologa o lea taimi, ma toe apili atu ai le Au Peresitene Sili ma nisi o aposetolo mo le toe faafoi mai o meatotino a le Ekalesia o le tau e pe a ma le $400,000 na ave faamalosi e le malo i lalo o le Tulafono sa ta’ua o le Etimani-Taka.³⁰

O le toe maua mai o meatotino a le Ekalesia na taofia e mafai ona faamamaina ai le avega tautupe a le Au Paia, ae o le a manaomia ai nisi o le Au Peresitene ma le Toasefululua e auai i le iloiloga ma tali fesili mai loia a le malo e uiga i le tautinoga a le Ekalesia ia usitaia tulafono e taofia ai autaunonofo.³¹

I vaiaso a o muamua le iloiloga, na tuuina atu ai e loia a le Ekalesia i le Au Peresitene Sili ma uso o le Toasefululua fesili e ono fesiligia ai latou e loia a le malo. O nisi o aposetolo sa popole e uiga i le ala e tali ai fesili e uiga i le lumanai o faaipoipoga autaunonofo i le Ekalesia. Pe ua muta moni ea lea faiga, pe o le Manifeso o se taumafaiga le tumau? Ma o le a le ala e tatau ona latou talia ai fesili e uiga pe tatau i tane ona faaauau ona nonofo faatasi ma lagolago o latou taitoalua e tele?

Faalagolago i le ala e latou te tali atu ai, e ono aafia taitai o le Ekalesia i le lamatia ai o le aveeseina o le va lelei ma le malo ma le le —po o le —i le Au Paia.³²

I le aso o le iloiloga, Oketopa 19, 1891, na fesiligia ai e Salesa Valia, o le loia mo le malo o le Iunaite Setete, ia Uilifoti mo ni nai itula.³³ O ana fesili na fuafua e tali mai ai Uilifoti e faamalamalama le tulaga o le Ekalesia i faaipoipoga e tele ma le faamoemoe o le Manifeso. Ia Uilifoti i lona taimi, sa saili e tali faamaoni i loia e aunoa ma le tautala i se tulaga patino e uiga i faaipoipoga o loo i ai i lea taimi.

Ina ua amata fesili, sa fesili atu Salesa ia Uilifoti pe o le a le uiga o le Manifeso i tagata la ua i ai nei i faaipoipoga e tele. Pe ua tatau ia i latou ona taofia loa ona latou fesootai o le tasi ma le isi o le tane ma le ava?

E lei taliina sa’o e Uilifoti le fesili. “Na ou faamoemoeina le folafolaga e aofia ai mea uma,” na ia faapea mai ai, “ia usitaia atoatoa tulafono o le laueleele.” Na ia iloa o le Au Paia o loo i faaipoipoga e tele na osia feagaiga paia faatasi ma le Atua, ma e na te le mafai lava ona fai atu ia i latou e solia a latou feagaiga faalefaaipoipoga. A e o tagata taitoatasi e tali mo i latou lava mo le usitaia o tulafono o le laueleele e tusa ma lana faitalia.³⁴

“Pe o le mafuaaga patino mo lenei folafolaga ona o nei tulafono?” Na fesili atu ai Salesa, o le taumafai e maua le faamaoni o taitai o le Ekalesia i le tuuina atu o le Manifeso.

“Ina ua tofia a’u o le peresitene o le Ekalesia, sa ou vaai ma le auiliili i lenei fesili,” na tali atu ai Uilifoti, “ma mo le umi o le taimi, na faamalieina ai lo’u mafaufau e faapea o faaipoipoga e tele e tatau ona taofia nei i le Ekalesia.”

Ona faamatalaina lea e Uilifoti le ala o loo sauaina ai e le gata o se pasene laitiiti o le Au Paia o e o loo faatinoa le tele o faaipoipoga, a e faapea foi le fia sefuluafe o Au Paia o e e leo faia. “O luga o lena faavae na ou tuuina atu ai le Manifeso —ou te faapea atu, e ala i musumusuga,”³⁵

“Aisea na e le folafola atu ai lenei Manifeso i lau Ekalesia o se faaaliga nai lo o le ala mai o sau lava fesoasoani ma fautuaga?” Na fesili atu ai Salesa Charles.

“I la’u vaai e faapea, o musumusuga o se faaaliga,” na tali atu ai Uilifoti. “E mai le punavai e tasi. E le o manaomia lava ona faapea mai se tagata, ou te manatu, “Ua faapea mai le Alii.”

Na fesili atu lea o Salesa ia Uilifoti pe o le Manifeso o le taunuuga tonu o puapuaga ua aumaia i le Au Paia e le tulafono.

“E manaomia e le Alii, ma manaomia i le tele o taimi, Ona tagata ia faia le galuega lea e le mafai ona faataunuuina i lalo o aafiaga patino ua taofia ai i latou mai le faia lea,” na folafola atu ai Uilifoti. “O luga o lena —pe a fai e mafai ona malamalama mai ia te a’u—o le tulaga lena o loo matau i ai i le aso.”³⁶

---

I le aso ina ua mavae le iloiloga, o le Tala a Tesareta ma isi niusipepa o le lotoifale ua latou lolomiina vaega o le molimau a Uilifoti i le faamasinoga.³⁷ O nisi tagata, e le o mauaina taumafaiga puipuia a le perofeta e faamanino le Manifeso, ave sese ana upu e faapea ua ia manatu e lafoai e tane a latou taitoalua e tele.³⁸

“O lenei faasalalauga o ia o se peresitene o le Ekalesia ua mafua ai ni lagona le mautonu i tagata,” na faamaumauina e se tasi o alii mai St. George, “ma o nisi ua manatu ua ia toe foi ma faaleaogaina le faaaliga i faaipoipoga e tele ma ana feagaiga ma tiute.” O nisi o alii i totonu o le taulaga ua latou faaaogaina le molimau o se ‘alofaga e tiai o latou aiga e toatele.³⁹

I fonotaga e le faalauaiteleina, na faailoa ai e Uilifoti le lautele o ana tali, a e na ia faamautuina e faapea, e le mafai ona ia talia le fesili a le loia i se isi lava ala. Na ia faamanatu i le Toasefululua e faapea, o soo se tagata o se e tuutiai pe lafoaia ona toalua po o fanau ona o le manifeso e le agavaa o ia e avea o se tagata o le Ekalesia.⁴⁰

E lei fetuuina e Uilifoti tamaloloa e pei o Iosefa F. Samita ma Siaosi Q. Cannon o e na faaauau ona maua fanau faatasi ma a latou taitoalua e tele. A e na ia talitonu foi e mafai e tamaloloa ona usitaia le tulafono ma tausia a latou feagaiga e ala i le nonofo eseese ai mai o latou aiga e tele, a o loo saunia mea mo lo latou soifua manuia. I totonu o lona lava aiga, sa nonofo ai Uilifoti faatasi ma lona toalua o Ema, faalauaitele, a e sa faaauau ona ia lagolagoina ma tausia isi ona toalua, o Sara ma Fiafia, ma a la fanau.⁴¹

Ina ua iloa e Uilifoti e faapea o loo i ai nisi tagata o loo manatunatu pe o ia taitai seseina le Ekalesia, lea na tonu ai ia te ia e tautala atili i le mataupu. I le konafesi a se siteki i Logan, na ia faailoa ai e faapea e toatele le Au Paia o e o tauivi e talia le suiga. Na ia fai atu le fesili: Pe atamai le faaauau o le faia o faaipoipoga autaunonofo, e tusa lava po o a taunuuga? Pe o le ola e tusa ma tulafono a le atunuu, ia mafai ai e Au Paia ona fiafia i faamanuiaga o le malumalu ma alo ese mai i le falepuipui?

“Afai e tatou te le taofia lenei tu,” na ia faapea mai ai, “o sauniga uma o le a taofia mai eleele o Siona. O le a nofotupu le fenumiaʼi ia Isaraelu atoa, ma e toatele alii o le a ave faapagota. Na oo mai lenei faalavelave i luga o le Ekalesia atoa, ma sa tatau ona faamalosia i tatou e taofi lenei tu masani.”

“Ae ou te manao e fai atu,” na faaopoopo atu ai Uilifoti. “Sa tatau ona ou tuuina atu malumalu uma e ave ese atu ma o tatou lima; sa tatau ona ou alu atu aʼu lava i le falepuipui, ma tuu atu i isi alii uma e o atu iina, pe a na lē poloaiina aʼu e le Atua o le lagi e fai le mea na ou faia; ma ina ua oo mai le itula na poloaiina ai aʼu e faia lena mea, sa manino atoa ia te aʼu. Sa ou alu atu i luma o le Alii, ma sa ou tusia le mea na fetalai mai le Alii ia te aʼu ia tusia.”⁴²

1. “Ripoti a le A.A.,” Lagolago a Tamaitai, Me 15, 1891, 19:174; Eeline B. Uele, “O Se Vaaiga i Uosigitone,” Me. 1, 1891, i totonu o le Derr ma isi, Tausaga e Limasefulu Muamua o le Aualofa, 579–88; Uele, Talafaamaumau, voluma 14, Ian. 23–25, 1891; tagai foi i le Avery, O mea na faataunuuina o le Fono a Tamaitai a le Atunuu o le Iunaite Setete, 5–8, 258.

2. “Fonotaga i Aia Tatau a Tamaitai e Palota ai,” Lagolago i Tamaitai, Me 1, 1889, 17:182; Ryan, “Au Paia o Aso e Gata Ai i totonu o le Fono a Tamaitai a le Atunuu,” 132–35. Autu: Aualofa

3. Uele, Talafaamaumau, voluma 14, Ian. 19–23, 1891; Ryan, “Au Paia o Aso e Gata Ai i totonu o le Fono a Tamaitai o le Atunuu,” 134–35; Avery, O mea na faataunuuina o le Fono a Tamaitai a le Atunuu, o le Iunaite Setete, 256–60.

4. Emeline B. Uele, “O se Vaaiga i Uosigitone” Mat. 1, 1891, i totonu o le Derr ma isi, O Tausaga e Limasefulu Muamua o le Aualofa, 579–81; Robbins, Talafaasolopito ma Minute o le Fono a Tamaitai o le Atunuu o le Iunaite Setete, 25–26; Ryan, “Au Paia i le Fono a Tamaitai o le Atunuu,” 131–32. Autu: Aia Tatau a Tamaitai e Palota ai

5. Tomasi, “Ripoti o le Y.L.M.I. Sui i le Fono a Tamaitai o le Atunuu i Uosigitone, D. C.,” 381–82; Emeline B. Uele, “O se Vaaiga i Uosigitone,” Mat. 1, 1891, i totonu o le Derr ma isi, Tausaga e Limasefulu Muamua o le Aualofa, 579–88; Uele, Talafaamaumau, voluma 14, Fep. 21, 1891.

6. Avery, O mea na faataunuuina o le Fono a Tamaitai a le Atunuu, o le Iunaite Setete, 258.

7. “Ripoti a le A.A.,” Lagolago a Tamaitai, Me 15, 1891, 19:174.

8. Emili Uele Kurene ia Ipa J. Kurene, Fep. 11, 1891; Mat. 18, 1891, Faamaopoopoga a Ipa J. Kurene, CHL.

9. Siaosi Q. Kanona, Tusi o Talaaga, Tes. 2, 1890, ma Fep. 13, 1891; Aperaamo H. Kanona, Talafaamaumau, Matr. 8–9 ma 11, 1892; Iosefa F. Samita, Tusi o Talaaga, Tes. 5, 1890; “Faamasinoga Muamua Faaleitumalo,” Tala o le Afiafi a Tesareta, Ian. 7, 1891, [3]; “O le a Usitaia le Tulafono,” Sate Leki Herald, Fep. 18, 1891, 8; “Faamasinoga Maualuga a le I.S.,” Tala o le Afiafi a Tesareta, Ian. 20, 1891, 1; Eveni, “Faamasinoga o Tagatafalepuipui mo Autaunonofo a le Au Paia o Aso e Gata Ai,” 73, 117–32; “O le Manifeso ma le Mutaaga o Autaunonofo,” Autu o le Talalelei, topics.ChurchofJesusChrist.org.

10. Emili Uele Kurene ia Ipa J. Kurene, Oke. 27, 1890; Mat. 18, 1891, Faamaopoopoga a Ipa J. Kurene, CHL.

11. Emili Uele Kurene ia Ipa J. Kurene, Mat. 18, 1891; Mat. 20 , 1891 ; Ape. 5, 1891, Faamaopoopoga a Iba J. Kurene, CHL.

12. Boyle, “Faafetai,” 672; Emili Uele Kurene ia Ipa J. Kurene, Mat 20, 1891, Faamaopoopo a Ipa J. Kurene, CHL; tagai foi i le Walker, “Fafine Mamona i Colorado,” 189–90.

13. Emili Uele Kurene ia Ipa J. Kurene, Ape. 5, 1891 ; Me 7, 1891; Me 27, 1891; Iuni 6, [1892], Faamaopoopoga a Ipa J. Kurene, CHL. Kurene, Tusi o Talaaga, Iuni 18, 1889, ma Me 29--31, 1891.

14. Emili Uele Kurene ia Ipa J. Kurene, vaega e le’i tusia le aso [circa 1887]; Mat. 20, 1891, Faamaopoopoga a Ipa J. Kurene, CHL; Boyle, “Faafetai,” 672; “O le Manifeso ma le Mutaaga o Autaunonofo,” Autu o le Talalelei, topics.ChurchofJesusChrist.org. Atonu sa iloa e Tesi a’o le’i o’o i lona aso fanau e faapea o le Tausoga Matua o Eli o lona tama. (Emili Uele Kurene ia Ipa J. Kurene, Ian. 23,1891, Faamaopoopoga a Ipa J. Kurene, CHL.)

15. Kanona, Tusi Talaaga, 10–11; Emili Uele Kurene ia Ipa Kurene, Mat. 18, 1891, Faamaopoopoga a Ipa J. Kurene, CHL.

16. Emili Uele Kurene ia Ipa J. Kurene, Me 5, 1891; Nov. 1, 1891; Iuni 6, 1892, Faamaopoopoga a Ipa J. Kurene, CHL. Ua faasa’oina le upusii mo le manino; ‘ma tatalo” i le uluai tusiga ua suia i le “ma na ou tatalo.”

17. Widtsoe, I totonu o le Neti o le Talalelei, 94; Widtsoe, I le Laueleele e Faamalamalamaina e le La, 26; “Aso o le Faauuga,” Tusi o Talaaga a Logan, Me 20, 1891, 8.

18. Widtsoe, I le Laueleele e Faamalamalamaina e le La, 21–22, 24–25; “Aoga a le Ekalesia,” Suesuega o Aso Taitasi, Ian. 17, 1891, [4]; Uarota, O Se Olaga Vaeluaina, 22–29; Tanner, “Matagaluega o le Sa’o o le Gagana. Galuega Faaletalafaasolopito,” 339–40; Risati, “O le Talatuu Faaleaoaoga o Karl G. Maeser,” 27. Autu: Aoga a le Ekalesia

19. Widtsoe, I le Laueleele e Faamalamalamaina e le La, 26–27; Widtsoe, I le Neti o le Talalelei, 94–95; Simpson, Iunivesite o Amerika ma le Fanau Mai o Tulaga Taumamona o Aso Nei, 41–42.

20. Widtsoe, I le Laueleele e Faamalamalamaina e le La, 26–27; Widtsoe, I le Neti o le Talalelei, 94–95; “Widtsoe, Ana Karine Kateni,” i le Jenson, Tusiga o Tala Tusia a le Au Paia o Aso e Gata Ai, 3:735; Ana Katena Widtsoe ia Ioane A. Widtsoe, Iuni 24, 1891, Pepa a Anna K. Katena, Pepa o le Aiga o Widtsoe, CHL.

21. Iosefa F. Samita, Tusi o Talaaga, Nov. 7, 9, 14, 18, 23, ma le 30, 1890; Tes. 6, 14, 21, 28, ma le 31, 1890; Aperaamo H. Kanona, Tusiga Faamaumau, Iuni 4, 1891; Setefano L. Risati, i le Valu-Iva Konafesi Faaletausaga, 56; tagai foi i le Iosefa F. Samita ia Alofatunoa Filitia Tomasone, Iulai 21, 1891, Tusikopi o Tusilolomi, 65–70, Pepa a Iosefa F. Samita, CHL; ma “Le Manifeso ma le Iuga o Faaipoipoga e Sili atu ma le Tasi,” Autu o le Talalelei, topics.ChurchofJesusChrist.org. Autu: Iosefa F. Samita

22. Iosefa F. Samita ia Alofatunoa Filitia Tomasone, Nov. 18, 1890, Tusilolomi o Tusikopi, 313–14, Pepa, Iosefa F. Samita, CHL.

23. Iosefa F. Samita ia Peniamina Harisona, Iuni 22, 1891, Pepa a Iosefa F. Samita, CHL; Iosefa F. Samita, Tusitalaaga, Tes. 5, 1890.

24. Aperaamo H. Kanona, Tusifaamaumau, Oke. 7, 1890; Siaosi Q. Kanona, Tusi o Talaaga, Oke. 7, 1890.

25. Uilifoti Uitilafi ma Iosefa F. Samita ia H. S. Palmer, Me 10, 1890; Iosefa F. Samita ia J. E. D. Sunidele, Tes. 21, 1891, Tusilolomi o Tusikopi, 86--87, 210--11, Iosefa F. Samita, Pepa, CHL; Kurene, Talafaamaumau, Oke. 7, 1891; Merile, Tusi o Talaaga, Oke. 25, 1891; Shipps, “Faaleaogaina Mataupu Faavae,” 113–24; “O le Manifeso ma le Mutaaga o Autaunonofo,” Autu o le Talalelei, topics.ChurchofJesusChrist.org.

26. Iosefa F. Samita, Tusi o Talaaga, Sete. 7, 1891; Iosefa F. Samita ia Salesa W. Nibley, Sete. 14, 1891, Tusikopi a le Tusilolomi, 132--33, Pepa, Iosefa F. Samita, CHL. Siaosi Q. Kanona, Tusitalaaga, Set. 2, 1891.

27. Iosefa F. Samita, Tusitalaaga, Sete. 21 ma le 29, 1891; Oke. 8, 1891; Peniamina Harisona ia Iosefa F. Samita, Sete. 10, 1891, Pepa, Iosefa F. Samita, CHL; Iosefa F. Samita ia Siaosi F. Risati, Sete 22, 1891; Iosefa F. Samita ia Harvey Cluff, Sete. 22, 1891, Tusikopi Tusilolomi, 143–46, Iosefa F. Samita, Pepa, CHL; Holzapfel ma Shupe, Iosefa F. Samita, 36–40, 44, 47–56, 64–67; tagai foi ia Iosefa F. Samita, Tusi o Talaaga, Sete. 18–Oke. 13, 1891; ma Uilifoti Uitilafu ma Iosefa F. Samita ia H. S. Palmer, Me 10, 1890, Tusikopi Tusilolomi, 86–87, Iosefa F. Samita, Pepa, CHL.

28. “Sauniga o Aso Sa,“ Tala Afiafi a le Tesareta, Sete. 28, 1891, 5. O fuaiupu muamua e lua o le upusii ua faaleleia mo le manino o le faitauina; o le amataga o loo i ai le “Ua o se mea ua silia ma le fitu tausaga talu na ia maua le avanoa mulimuli e tulai ai i luma o le faalapotopotoga o tagata i totonu o lena Tapeneko. … Na ia faafetai i le Atua le Tama e Faavavau i le aumaia o lenei molimau i totonu o lona loto ma le agaga, lea na aumaia ia te ia le malamalama, faamoemoe, olioli ma le faamafanafanaga e faapea e le mafai e se tagata ona ia aumaia pe ave ese atu.”

29. Aperaamo H. Kanona, Talafaamaumau, Oke. 7, 1891; Kurene, Tusi o Talaaga, Oke. 7, 1891; Merile, Tusi o Talaaga, Oke. 7, 1891; Siaosi Q. Kanona, Iulai 21 ma le Oke. 7, 1891; “O le Malumalu,” Sate Leki Herald, Oke. 4, 1891, 23; “O le Tile Mulimuli,” Tala Afiafi a le Tesareta, Aok 15, 1889, [3]; Sairasi E. Talini ia Keleni S. Iaga, Iulai 30, 1938, CHL; Hone, “Sairusi Eteuini Talini,” 491–97. Autu: Malumalu o Sate Leki

30. Faranisisi Marion Laimani, Tusi o Talafaamaumau, Aok. 20, 1891; “O Meatotino Faaletagata lava Ia.,” Tala o le Afiafi a Tesareta, Oke. 19, 1891, 4. Autu: Tulafono e Tetee ai i le mau lea e tetee ai i autaunonofo

31. Siaosi Q. Kanona, Tusi o Talaaga, Aok. 6, 1891; Aperaamo H. Kanona, Tusifaamaumau, Aok. 20, 1891; Faranisisi Mariona Laimani, Tusi o Talaaga, Aok. 20, 1891; “O Meatotino Patino a le Ekalesia,” Tala o le Afiafi a Tesareta, Oke. 19, 1891, 4; tagai foi i le Alesana, Mea o i le Lagi ma le Lalolagi, 271.

32. Uitilafi, Tusi o Talaaga, Oke. 12, 1891; Siaosi Q. Kanona, Tusi o Talaaga, Iulai 13, 1891; Oke. 2, 7, 12, ma17, 1891; Aperaamo H. Kanona, Tusifaamaumau, Oke 7 ma le 12, 1891; Faranisisi Mariona Laimani, Tusi o Talaaga, Aok. 23 ma le Oke. 12, 1891; tagai foi i le Alesana, Mea o i le Lagi ma le Lalolagi, 271–72.

33. Uitilafi, Tusi o Talaaga, Oke. 19, 1891; “O Mataupu a le Ekalesia,” Tala Afiafi a le Tesareta, Oke. 19, 1891, 4; Siaosi Q. Kanona, Tusi o Talaaga, Oke. 19, 1891; tagai foi i le Laimani, “Siosiomaga Faapolikiki o le Manifeso a Uitilafi,” 31.

34. “Aveina o le Molimau,” Tala Afiafi a le Tesareta, Oke. 20, 1891, 4–5; tagai foi “Meatotino na ave i se ala Le Talafeagai,” Sate Leki Tribune, Oke. 20, 1891, 6; Siaosi Q. Kanona, Tusi o Talaaga, Nov. 12, 1891; ma Aperaamo H. Kanona, Tusifaamaumau, Ape. 1, 1892.

35. “O Meatotino na Aveeina i se Auala Le Talafeagai,” Sate Leki, Oke. 20, 1891, 6; tagai foi “Aveina o le Molimau,” Tala Afiafi a le Tesareta, Oke. 20, 1891, 5. Autu: Manifeso

36. “Aveina o le Molimau,” Tala Afiafi a le Tesareta, Oke. 20, 1891, 5; “O Meatotino na Aveina i se Auala Le Talafeagai,” Sate Leki Tribune, Oke. 20, 1891, 6. Ua faasa’oina fuaiupu muamua o le upusii mo le faamaninoga; “folafola atu lenei i la tou ekalesia” i le uluai tusiga ua suia i le “folafola atu le Manifeso i la tou Ekalesia.”

37. “Aveina o le Molimau,” Tala Afiafi a le Tesareta, Oke. 20, 1891, 4–5; tagai foi “Meatotino na ave i se ala Le Talafeagai,” Sate Leki Tribune, Oke. 20, 1891, 5--6; O ai e Ana Ia?,” Sate Leki Herald, ; Oke. 20, 1891, 6.

38. Siaosi Q. Kanona, Tusi o Talaaga, Oke. 21, 1891; Uitilafi, Tusi o Talaaga, Oke. 25, 1891; “Tautalaga,” Tala Afiafi a le Tesareta, Nov. 7, 1891, 4.

39. Salesa L. Uoka, Tusi o Talaaga, Oke. 20, 1891.

40. Siaosi Q. Kanona, Tusi o Talaaga, Oke. 21, 1891; “Tautalaga,” Tala Afiafi a le Tesareta, Nov. 7, 1891, 4; Aperaamo H. Kanona, Tusifaamaumau, Nov. 12, 1891.

41. Merile, Tusi o Talaaga, Nov. 1, 1891; Alesana, “Faigamalaga a se Perofeta o Aso e Gata Ai” [2011], 63–64, 73–74; tagai foi “Konafesi Aoao,” Tesareta Faalevaiaso, Ape. 11, 1891, [27].

42. Siaosi Q. Kanona, Tusi o Talaaga, Oke. 21, 1891; “Tautalaga,” Tesareta Faalevaiaso, Nov. 14, 1891, 659–60, i totonu o “Upusii mai Tautalaga e Tolu a Peresitene Uilifoti Uitilafi faatatau i le Manifeso,” i totonu o le Mataupu Faavae ma Feagaiga, Folafolaga Aloaia 1; tagai foi i le “Konafesi Faalekuata,” Tusi o Talaaga, Logan, Nov. 4, 1891, 1. O le fuaiupu muamua o le upusii ua faasa’oina mo le faamaninoga; “Ana tatou le taofia lena” i le uluai tusiga ua suia i le “Ana tatou le taofia lenei tu masani.”