Tulafono e Tetee i Autaunonofo

I se konafesi faapitoa ia Aokuso 1852, na faailoa faalauaitele ai e taitai o le Ekalesia mo le taimi muamua faapea o le tele o le Au Paia o Aso e Gata Ai i le Teritori o Iuta na faatinoina le mea latou te taua o le faaipoipoga faaautaunonofo, le faaipoipoga a le alii e toatasi i le sili atu ma le tasi le tamaitai, e masani ona taua o le autaunonofo.¹ O le faaaliga lautele na faamaonia ai tala feaveai ma faaosofia ai le ofo tele ma le ita o tagata e toatele Amerika.

Na agai loa le malo e tuu atu se taofiga i le faatinoga. Na finau le Au Paia o Aso e Gata Ai faapea o le Suia Muamua a le Tulafono a le Iunaite Setete na puipuia faaipoipoga faaautaunonofo ma le faatumauina o le avanoa o le “saolotoga o faatinoga” faalelotu.² Na faavevesi e failipoti ma tusitala manatu e faasagatau i le faia o ava e toatele faatasi ma tala ua faateleina o fafine Mamona ua faapologaina ma sauaina.³

I le 1856 na faaopoopo ai e le Pati Repaperika i lana folasaga le faasaina o “uiga e lua o le le aoaoina,” o le faapologa ma le autaunonofo.⁴ I le ono tausaga mulimuli ane, na pasia ai e le Konekeresi o le Iunaite Setete le Morrill Act mo le Faamutaina o Autaunonofo, o se tulafono e faasala ai le faitoalua e tele (e faamatalaina o le faaipoipo ao ola pea se toalua e lei tatalaina le faaipoipoga) i se sala ma le lima tausaga i le falepuipui. O le Taua a Amerika na aofia ai le tele o Amerika mo isi nai tausaga na sosoo ai, o lea, na le faamalosia ai le tulafono fou. Na faaauau ona finau le Au Paia o Aso e Gata Ai faapea o tulafono e faasagatau i autaunonofo na faaleaogaina ai a latou aia tatau faalelotu.

Na pasia e le Konekeresi le Poland Act i le 1874, lea na faamalosia ai le tausia o le Morrill Act e ala i le tuuina atu i faamasino a le setete o le pule i le faasalaga i le tulafono e faasagatau i autaunonofo i Iuta ma faatagaina na faamasino e filifili le au faamasino. I le 1879 na fesoasoani ai le Au Peresitene Sili e aumai le moliaga a le Au Paia o Aso e Gata Ai o George Reynolds o le na faaipoipo faaautaunonofo i le Faamasinoga Maualuga o le Iunaite Setete e sue ai le talafeagai o le tulafono e faasagatau i autaunonofo ma le tulafono a le Iunaite Setete. Sa toatele le Au Paia na faaleoina le talitonuga faapea o le a lagolagoina e le Suiga Muamua le saolotoga o talitonuga faalelotu. Ae na teena e le faamasino ia Reynolds, ma folafola mai e ui lava na puipuia e le Suiga Muamua talitonuga faalelotu, na te le puipuia faatinoga faalelotu.⁵

O le tele o le Au Paia o Aso e Gata Ai na faatinoina le le usitai faalauaitele, ma le manatu o la latou faatinoga o le faaipoipoga faaautaunonofo na mulimuli i se poloaiga mai le Atua. E ala mai i se tulafono fou, na faamalosia ai e le malo a le setete lona tetee: i le Edmunds Act o le 1882 e faasalaina tagata e nonofo faatasi faasolitulafono i le sala tupe pe ono masina i le faalepuipui, mai isi mea; o le Edmunds-Tucker Act o le 1887 na faateleina faasalaga i tagata na nonofo faatasi i faaipoipoga faaautaunonofo ma e faasagatau foi i le Ekalesia lava ia, na aveesea foi le aia tatau e palota ai ma tamaitai i Iuta, ma aveesea mai le Ekalesia ana meatotino e silila ma le $50,000.⁶

O le Osofaiga

I le vaitau o le 1880 na faateleina ai e leoleo o le Iunaite Setete a latou taumafaiga e faamalosia tulafono e faasagatau i autaunonofo. O aiga na tulitulia e leoleo o le setete na taua lea vaitau o le faamalosia malosi “o le osofaiga” ma na sailia ni malutaga i ni “lafitaga,” o se upegatafailagi o ni fale na saogalemu na fesoasoani ia i latou na tulimataia e le tulafono ia osofaia ma lokaina.

O le osofaiga na oo ai se vevesi tele i aiga na faatinoina le faaautaunonofo faapea foi ma le nuu lautele o Iuta. O le tele o tane na falepuipui pe faamalosia ia sosola ese, ma tuua ai a latou ava ma fanau e vaaia faatoaga ma pisinisi. Na amata se pau i mea tautupe i le teritori atoa lava. O ava fou o autaunonofo sa tatau ona nonofo valavala mai a latou tane, ma sa na oni nai tagata sa iloa a latou faaipoipoga. O fafine maitaga sa tele ina filifili e lalafi, i nisi taimi i nofoaga tuufua, nai lo le tuua o i latou i ni tulaga e ono samania faaletulafono ai i le faamasinoga e molimau faasaga ia latou tane. Sa nonofo fanau i le fefefe faapea o le a malepelepe o latou aiga pe atonu o le a faamalolosia i latou e molimau faasaga i o latou matua. O nisi fanau sa lalafi ma sa faaaoga nisi igoa fatu. O isi na lei vaai lava i o latou matua po o aiga mo le tele o masina. O le tele o aiga na siitia atu i Kanata po o Mekisiko e nonofo faatasi ai.⁷

O le osofaiga foi na faalavelave i le taitaiga o le Ekalesia. I le va o le 1885 ma le 1889, o le tele o Aposetolo, peresitene o siteki, ma isi taitai o le Ekalesia sa lalafi pe na i ai i falepuipui, ma o le tele o vaega o le taitaiga o le Ekalesia na matuai faatapulaaina lava. O le Manifeso na tuuina atu e Uilifoti Uitilafi i le 1890 na faamuta aloaia ai nei luitau ma na iu loa ina faauma ai faaipoipoga faaautaunonofo.⁸

Autu Fesootai: Plural Marriage in Utah, American Legal and Political Institutions