Autau Mamona

Ina ua faamalosia le Au Paia e o ese ma Navu i le 1846, o se tasi o luitau sili lava na latou feagai o le faatupeina lea o le malaga. Sa mananao taitai o le Ekalesia e fesoasoani atu e lagolago tagata uma o le Au Paia o Aso e Gata Ai, aemaise lava ē matitiva, o ē na mananao e potopoto faatasi.¹ Ina ua faaletonu taumafaiga e faatau atu le Malumalu o Navu ma isi meatotino a le Ekalesia, sa auina atu e taitai o le Ekalesia Jesse Little, o se taitai o paranesi o le Ekalesia i le itu i sasae o le Iunaite Setete, e talosagaina se fesoasoani a le malo. Sa feiloai Little ma Thomas L. Kane, o se tagata faaupufai sa faanoanoa i faafitauli o le Au Paia ma fesoasoani e faatulaga se faatalanoaga ma le peresitene o le Iunaite Setete o James K. Polk.²

I ni nai aso a o le’i taunuu atu Little ma Kane i Uosigitone, D.C.,Sa tautino mai ai e le Konekaresi a le Iunaite Setete le taua e faasaga ia Mekisiko, ma sa faatonuina ai e Peresitene Polk autau a le ami sa faamautu i le itu i Sautesisifo o Amerika e osofai loa.³ I le la fonotaga ma Polk, sa faatauanau ai e Little le peresitene e faaaofia atu vaega mai le Au Paia o Aso e Gata Ai, o e sa latalata atu i le nofoaga o le taua nai lo le toatele o isi tagata Amerika. O le totogi o fitafita, sa iloa e Little, e mafai ona fesoasoani e faatupe le malaga a le Au Paia.⁴

Ia Iuni 1846, sa o atu ai taitai o le vaegaau i le Au Paia o Aso e Gata Ai i le Teritori o Iowa, e saili ni fitafita se 500 e auai mo le tausaga e tasi o tiute. Sa foliga masalomia e le toatele o le Au Paia lea ofa, o e sa lei leva atu na faamalosia e o ese mai o latou aiga e aunoa ma se puipuiga a le malo. “Sa ou lagonaina le ita i le Malo na faatagaina le osofaia o a’u ma le tulieseina mai lo’u aiga,” sa lipotia ai e Daniel B. Rawson. Sa le’i pine ae taunuu Polika Iaga ma isi taitai o le Ekalesia i le tolauapiga. “Sa latou fai mai o le faaolataga o Isaraelu na faalagolago lea i le faatuina o se autau,” sa faaauau ai le tala a Rawson. “Ina ua ou faalogo i lenei mea, sa suia ai lo‘u mafaufau. Sa ou lagonaina o lo‘u tiute o le alu.”⁵

O le faapotopotoina o le Autau Mamona.

Faaaloaloga a le Matagaluega o Talafaasolopito o le Ekalesia

O le taimi lava na mafai ai ona faatumuina e taitai o le vaegaau ia vaega e fa e ta’i selau alii, sa faasilasila mai ai loa e Kapeteni James Allen le faapotopotoina o le Autau Mamona, o le Ami a le Iunaite Setete o Sisifo. Sa faamalosiau atu Polika Iaga i fitafita ia tausia a latou feagaiga faalelotu ma ia taulimaina tagata Mekisiko ma isi latou te fetaiai ma le faaaloalo. Sa ia folafola atu o le a tausia o latou aiga ma o le a latou le fetaiai ma se taua. I le aso 20 o Iulai, sa tuua ai loa ia vaega mo le Fort Leavenworth i le Teritori o Kansas, faatasi ai ma fafine pe tusa ma le 34 ma tamaiti e 44 na auai i le savali.⁶ Lua aso mulimuli ane, sa malaga ese atu ai le isi vaega faaopoopo o alii e 100. Sa tusia e Zacheus Cheney e faapea “sa pei o se timuto le maligi o loimata” a o faatofa atu aiga i fitafita.⁷

O le savali a le autau na mulimuli atu i le solo a isi iunite a le vaegaau, e faamautinoa ai o loo savavali toatele atu fitafita o le autau e ui atu i nofoaga o loo i lalo o le pulega a le Iunaite Setete. E ui na valaauina ia toe maua mai le aai o Tucson (ua i ai nei i Arisona) ma ia puipuia Initia Pauma i Temecula (ua i ai nei i Kalefonia), ae sa latou lei auai lava i se fetauaiga.⁸ O le faalavelave sili ona leaga na oo mai o le taimi na osofaia ai e se lafu pulu aivao ia fitafita a o latou malolo ai mo se vai i le Vaitafe o San Pedro. O le fetaiaiga faafuasei lea sa mamate ai miula e tolu ma manunua ai ni alii se toatolu, ae leai se fitafita na fasiotia ai.

Faatasi ma lona taunuu ai i San Diego pe tusa ma le ono masina talu ona tuua Iowa, sa kavaina ai e le autau le toeitiiti 2,000 maila, ma avea ai le savaliga o se tasi o savaliga aupito sili ona umi i le talafaasolopito faamiliteli a le Iunaite Setete. O le taimi tonu lea na maea lelei ai le taua i Kalefonia, o lea sa tofia ai fitafita o le autau i tiute o le puipuiga i San Diego, San Luis Rey, ma Los Angeles. Sa faamaonia le taua o o latou totogi i le faatupeina o le malaga a o latou aiga ma isi i le Vanu o Sate Leki.

Ata o le Autau Mamona i le taimi o lana savali, tusia e le tusiata o George Ottinger.

Faaaloaloga a le Matagaluega o Talafaasolopito o le Ekalesia

Sa sopoia e fitafita o le autau nisi o auala agai i sasae ia toefaatasia ai ma o latou aiga i Iuta. O nisi o nei fitafita sa faigaluega mo se taimi puupuu i le Fale Vilisaito a Sutter ma latou maua ai le auro i le 1848, lea sa avea ma nofoaga eli auro sili ona telē i le talafaasolopito o Amerika na vave ona faananati atu i ai le toatele o tagata.⁹ O le isi vaega na tau mai i tino maliliu o le vaega malaga na mama’i ma maliliu sa igoa o le Vaega a Donner ma latou tanuina. Ae o isi sa latou taina se auala fou e oso atu i atumauga o Siera Nevada. O le toatele o fitafita sa taunuu atu i le Teritori o Iuta i le faaiuga o le vaitau 1840 ma le amataga o le vaitau 1850.

O le Lotoa Faasolopito o le Autau Mamona a le Ekalesia i San Diego ua faamanatu ai le tautua ma osigataulaga a fitafita ma o latou aiga.

Punaoa o le Ekalesia

Brandon J. Metcalf, “Four Things to Know about the Journey of the Mormon Battalion: An Expedition of Faith and Sacrifice,” Historic Sites, Jan. 24, 2018, history.lds.org.

Lance B. Wickman, “From Iowa to Immortality: A Tribute to the Mormon Battalion,” Ensign, July 2007, 22–27.

“What to Expect When You Visit the Mormon Battalion Historic Site in San Diego,” Historic Sites, Sept. 13, 2017, history.lds.org.

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Norma Baldwin Ricketts, The Mormon Battalion: U.S. Army of the West, 1846–1848 (Logan: Utah State University Press, 1996).

Sherman L. Fleek, History May Be Searched in Vain: A Military History of the Mormon Battalion (Spokane, Washington: Arthur H. Clark, 2006).

Autu Fesootai: Thomas L. ma Elizabeth Kane, Eligā Auro Tele i Kalefonia, Malaga Ese mai Navu, Taua a Mekisiko ma Amerika

Faamatalaga

1. Tagai i le Autu: Malaga Ese mai Navu

2. Tagai i le Autu: Thomas L. ma Elizabeth Kane.

3. Tagai i le Autu: Taua a Mekisiko ma Amerika.

4. Matthew J. Grow, “Liberty to the Downtrodden”: Thomas L. Kane, Romantic Reformer (New Haven: Yale University Press, 2009), 47–59.

5. Daniel B. Rawson, ta’ua i le Norma Baldwin Ricketts, The Mormon Battalion: U.S. Army of the West, 1846–1848 (Logan: Utah State University Press, 1996), 13; Daniel B. Rawson, ta’ua i le Samantha Dalena Rawson Rose, “A Copy of a History of Daniel Berry Rawson,” 7–8, Rawson Family Histories, circa 1950, Church History Library, Salt Lake City.

6. O le vaega lona lima na tuua mo Fort Leavenworth i le lua aso mulimuli ane, sa tauivi ia faalava ni fitafita e auai e faaatoa ai le autau.

7. Zacheus Cheney, ta’ua i le Ricketts, The Mormon Battalion, 17.

8. O Tucson sa i lalo o le pulega a Mekisiko ina ua taunuu atu le autau, ae sa solomuli fitafita Mekisiko ma faamatuu mai le nofoaga e aunoa ma se fia tau. O tagata o le nuu Mekisiko ma Amerika Mao’i sa saunia meaai mo fitafita o le Au Paia o Aso e Gata Ai.

9. Tagai i le Autu: Eligā Auro Tele i Kalefonia.