Faatapulaaga o le Perisitua ma le Malumalu

I suesuega ma faatinoga o mea tau tapuaiga, e talia e Le Ekalesia a Iesu Keriso o le Au Paia o Aso e Gata Ai le aiga o tagata soifua i le lalolagi atoa. O tusitusiga paia ma aoaoga a le Au Paia o Aso e Gata Ai ua faamaonia ai, e alofa le Atua i Ana fanau uma ma ua avanoa le faaolataga i tagata uma. Na foafoaina e le Atua le tele o ituaiga eseese o tagata ma aganuu ma e faamemelo tutusa ia i latou uma lava. E pei ona taua e le Tusi a Mamona, “ua tutusa tagata uma i le Atua.”¹ O le fausaga ma le faatulagaga o le Ekalesia ua faamalosia ai le tuufaatasia o ituaiga o tagata. O tagata o le Ekalesia o ituaiga ma aganuu eseese, e masani ona auauna atu i aiga o le tasi ma le isi ma feauaunaai faatasi o ni faiaoga, o ni taitai o autalavou, ma i le anoano o isi tofiga i a latou aulotu i le lotoifale. O na faiga masani ua avea ai Le Ekalesia a Iesu Keriso o le Au Paia o Aso e Gata Ai o se faatuatuaga e matuai fefiloi lava.

E ui i lenei mea moni i ona po nei, mo le tele o lona talafaasolopito—mai le ogatotonu o le vaitau o le 1800 seia oo i le 1978—sa lei faauuina e le Ekalesia ia alii e tupuga mai i tagata Aferika uli i le perisitua pe faatagaina alii po o tamaitai uli ia maua faaeega paia o le malumalu po o sauniga o faamauga.

I le vaitau o le uluai lua sefulu tausaga o le Ekalesia, e toaitiitii ni nai alii uli na faauuina i le perisitua. O se tasi o nei alii, o Elijah Able, sa auai foi i sauniga o le malumalu i Katelani, Ohaio, ma na mulimuli ane papatiso e sui mo ona tuaa na maliliu i Navu, Ilinoi. E le o i ai se faamaoniga faatuatuaina e faapea na teena le perisitua i ni alii uli i le vaitaimi na soifua ai Iosefa Samita.

I le 1852 na faasilasila faalauaiteleina ai e Polika Iaga e faapea, o alii uli e tupuga mai Aferika ua le toe mafai ona faauuina i le perisitua, e ui i le mavae ai o lena taimi, sa faaauau pea ona auai tagata uli i le Ekalesia e ala i le papatisoga ma le mauaina o le meaalofa o le Agaga Paia. I le mavae ai o le maliu o Polika Iaga, o isi Peresitene o le Ekalesia na sosoo ai na faatapulaaina tagata uli o le ekalesia mai le mauaina o faaeega paia po o le faaipoipo i le malumalu. I le aluga o taimi, na tuuina mai ai e taitai ma tagata o le Ekalesia le tele o manatu e faamalamalama ai faatapulaaga o le perisitua ma le malumalu. E leai se tasi o nei faamatalaga ua taliaina i le asō o se aoaoga faavae aloaia a le Ekalesia.

A o faatupulaia le ola o le Ekalesia i le lalolagi atoa, o lana misiona atoa lava o le “ia outou o atu e fai nuu uma lava ma soo”² e foliga mai ua faateteleina le le fetaui ma faatapulaaga o le perisitua ma le malumalu. Na mafaufau loloto taitai o le Ekalesia i folafolaga na faia e perofeta e pei o Polika Iaga e faapea, o le a i ai se aso e maua ai e tagata uli faamanuiaga o le perisitua ma le malumalu. Ia Iuni 1978, na maua ai e le Peresitene o le Ekalesia o Spencer W. Kimball, ona fesoasoani i le Au Peresitene Sili, ma sui o le Korama a Aposetolo e Toasefululua, se faaaliga na faaleaogaina ai le taofiga o le faauuina i le perisitua ma faasafua atu faamanuiaga o le malumalu i tagata agavaa uma o le Au Paia o Aso e Gata Ai, o alii ma tamaitai. O le saunoaga a le Au Peresitene Sili e faatatau i le faaaliga na tuuina i le Mataupu Faavae ma Feagaiga o le Tautinoga Aloaia 2.

O aso nei, e teena e le Ekalesia manatu na faasalalauina i le taimi ua mavae e faapea, o le pa’u uliuli o se faailoga o le le fiafia o le lagi po o se fetuu, pe faapea foi e atagia ai ni faatinoga amioletonu i se muai olaga; e faapea o faaipoipoga e fefiloi lanu po o ituaiga tagata o se agasala lea; pe faapea foi, o tagata uli po o tagata o soo se isi ituaiga po o lanu ua maualalo ifo i soo se itu i se isi lava tagata. O taitai o le Ekalesia i aso nei ua tausalaina ma le manino faailoga lanu uma lava, i taimi ua tuanai ma le taimi nei, o soo se ituaiga. O aoaoga a le Ekalesia e faatatau i fanau a le Atua o loo manino lava i se fuaiupu i le tusi e lua a Nifae “E le teena e [le Alii] se tasi e sau ia te ia, e uliuli pe pa’epa’e, e pologa pe saoloto, o tane ma fafine; … ua tutusa tagata uma i le Atua, o le Iutaia ma le Nuuese.”³

Mo nisi faamatalaga i lenei autu, tagai “Race and the Priesthood.”

Punaoa o le Ekalesia

“Race and the Priesthood,” Gospel Topics Essays, topics.ChurchofJesusChrist.org.

James Goldberg, “Witnessing the Faithfulness: Official Declaration 2,” i le Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 332–41.

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina atu po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Quincy D. Newell, Your Sister in the Gospel: The Life of Jane Manning James, a Nineteenth-Century Black Mormon (New York: Oxford University Press, 2019).

Edward L. Kimball, “Spencer W. Kimball and the Revelation on Priesthood,” BYU Studies, vol. 47, no. 2 (Spring 2008), 4–78.

Autu Fesootai: Jane Elizabeth Manning James, Elijah Able

Faamatalaga

1. 2 Nifae 26:33.

2. Mataio 28:19.

3. 2 Nifae 26:33.