O Alisi ma Gogosina

O uluai tagata o le Au Paia o Aso e Gata Ai na ulufale atu i le Vanu o Sate Leki i le taumafanafana o le 1847 na vave ona amata galulue e saunia le faato’aina o le eleele matutu mo se seleselega i le tautotogo. Ae ui i lea, sa matautia le lava o meaai i lena taumalulu, na tuua ai le Au Paia e tulimatai atu ma le naunautai i a latou seleselega o le tautotogo. A o ola a’e fua o faatoaga i lena tautoulu, sa foliga mafiafia ma lanu meamata, ma na faamoemoe fai faatoaga mo se seleselega tele. Ae ui i lea, o le mea e faanoanoa ai, na o mai ni vaega o alisi i luga o laufanua i le faaiuga o Me 1848, ma taufaamatau e faaumatia le tele o sapalai o meaai faamoemoeina a le au paionia. Mo le itiiti ifo ma le tasi le masina, na tauivi ai le Au Paia e faasagatau atu i alisi i le mea sa taua o le Taua o Alisi o le 1848.¹

I le taimi o le taumafanafana, na matautia le faateteleina o lea tulaga. Na matamata le au faifaatoaga ao faatamaiaina e alisi le tele o saito ma fualaau faisua.² O Polika Iaga, o le sa taitaia i lena taimi se kamupani tele i laufanua valevalenoa, na mauaina ni lipoti e faapea ua mafaufau nisi o tagata e tuua le vanu mo Kalefonia po o Oregon. O isi na fautua atu ia Iaga ina ia taofia le malaga faifai pea a paionia i le eria mo le fefefe ina nei matelaina le au malaga. I lea taimi, na tau faasagatau atu aiga i alisi i salu, pulumu, laau, ma maea, ae sa leai se mea na foliga e taofia ai le “ami o le oge ma le faanoanoa.” Sa tatalo le toatele ina ia faasaoina i latou e le Alii mai le osofaiga.³

I le amataga o Iuni, o se lafu tele o gogosina a Kalefonia na oo mai i le vanu, ma ‘aia alisi. O le tele naua o gogosina sa faafefeina ai le au faifaatoaga i le taimi muamua, o e na popole nei avea ma se isi mala e ono faaleagaina ai a latou faatoaga. Ae na vave ona latou vaavaai atu i le ‘aina e gogosina o alisi, feinu i vai, toe puai mai vaega sa le mafai ona ‘aia, ma toe foi mai mo nisi [meaai].⁴ E ui lava sa i ai pea le mala o alisi mo ni nai vaiaso, ae o le tele o alisi na ‘aina e gogosina na faaitiitia ai le faaleagaina.

Ata o le taunuu o gogosina e ‘aia alisi na saunia e Minerva Teichert.

O alisi sa na o le tasi lea o nai faafitauli na feagai ma le au paionia na nonofo i le Vanu o Sate Leki a o latou tauivi e totoina se faatoaga i lena taumafanafana. O le tele o uluai punavai e uiga i lena tausaga na fautua mai na popole le au faifaatoaga ma taitai o le Ekalesia e uiga i aisa ma le itiiti o le vai e pei foi ona latou popole i alisi, masalo ona sa osofaia e alisi na o ni fua faapitoa o faatoaga, e le o le faatoaga atoa.

O le feagai ai o le Au Paia ma alisi ma gogosina i le 1848 na avea ma na o le muamua o le tele o na ituaiga aafiaga. Na toe foi mai alisi i le taimi o vaitau o le seleselega i isi tausaga, ma i nisi o eria o Iuta, i fuainumera tetele atu nai lo le 1848. I le toetoe lava o tulaga uma, na o mai gogosina ma toe ‘aia vaega o alisi.⁵

E ui lava i mea e tutupu soo, o le sosola ese i le 1848 mai le osofaiga a alisi na malosi i le manatuaga o le au paionia. Na vaaia e le Au Paia le aao puipuia a le Alii i le taunuu ai o manulele. O le “Vavega o Gogosina” na musuia ai uluai tagata Iuta e faaaloalo i le manu, ma na toetoe o le taimi lava lena na latou faamalosia ai faiga faavae ma tulafono e faasala soo se tasi e sauaina pe tapeina gogosina. O le sao a gogosina ua faamanatuina i le asō e ala i se faatagata i le Lotoa o le Malumalu i le Aai o Sate Leki.

O Le Maa Faamanatu o le Gogosina i le Lotoa o le Malumalu i le Aai o Sate Leki.

Punaoa o le Ekalesia

“The Grasshopper War of 1855 and the Provo Sugar Miracle,” Ensign, Feb. 1986, 60–61.

Autu e Fesootai i ai: Salt Lake Valley, Pioneer Economy

1. Leonard J. Arrington, Great Basin Kingdom: An Economic History of the Latter-day Saints, 1830–1900, new ed. (Urbana: University of Illinois Press, 2005), 45–50.

2. Na faatulagaina e tagata e suesueina iniseti nei inseti e le o ni alisi, ae o se se faapitoa lanu meamata, na faamaumauina o ni ituaiga o le Anabrus simplex, lea na taua o le “alisi Mamona” mo lenei tala i le 1848. (Howard Stansbury, Exploration and Survey of the Valley of the Great Salt Lake of Utah, Including a Reconnoissance of a New Route through the Rocky Mountains [Philadelphia: Lippincott, Grambo & Co., 1852], 372.)

3. Orson F. Whitney, History of Utah, 4 vols. (Salt Lake City: George Q. Cannon & Sons, 1892), 1:377–78; William G. Hartley, “Mormons, Crickets, and Gulls: A New Look at an Old Story,” Utah Historical Quarterly, vol. 38, no. 3 (Taumafanafana 1970), 227–30.

4. Hartley, “Mormons, Crickets, and Gulls,” 224–39. O le amio o manu e puai mai ia alisi sa avea o se tu masani o le ‘ai e le na o gogosina, ae o isi foi ituaiga o manu. Tagai i le John K. Terres, The Audubon Society Encyclopedia of North American Birds (New York: Wings Books, 1991), 153–54.

5. O nisi o tala mulimuli ane na faateleina le tala, na fautua mai ai le tulaga ese o foliga o gogosina i le talafaasolopito o le eria po le ta’uaina ai e le o se mea masani mo i latou le puai mai ma toe ai foi isi meaai. Tagai i le Orson Hyde, discourse, Sept. 24, 1854, in Deseret News, vol. 4, no. 30 (Oct. 5, 1854), 1–2; George Q. Cannon, “The Mormon Land System in Utah,” Irrigation Age, vol. 7, no. 4 (Oct. 1894), 188–89. Mo nisi faamatalaga i tala e uiga i alisi ma gogosina, tagai i le Hartley, “Mormons, Crickets, and Gulls,” 224–39.