Spencer W. Kimball
O Spencer W. Kimball sa auauna o le Peresitene lona 12 o le Ekalesia i le va o Tesema 1973 ma lona maliu ia Novema 1985. Sa soifua mai o ia i le 1895 ia Olive ma Andrew Kimball ma siitia atu ma lona aiga a o laitiiti i Arisona, lea na valaauina ai lona tama e auauna atu o se peresitene o le siteki. Sa faauu Spencer i le aoga maualuga i le 1914 ma, ina ua mae‘a ona auauna atu i se misiona i le Iunaite Setete tutotonu, sa faaipoipo atu ia Camilla Eyring ma amata ona galue o se talatupe i le faletupe ma mulimuli ane avea o se paaga i se inisiua ma se pisinisi o fanua. E valu tausaga talu ona maua e Camilla ma Spencer le la tama lona fa, ae valaauina Spencer o se peresitene o le siteki i se eria tele i sautesisifo o le Iunaite Setete. Ina ua pa le Vaitafe o Gila i le 1941 ma faaleagaina ai fale ma faatoaga, sa faamaopoopoina e Spencer le galuega fesoasoani ma galulue faatasi ma Elder Harold B. Lee, o se uso o le Korama a Aposetolo e Toasefululua ma le Peresitene o le Ekalesia i le lumanai, o le sa taitaia le polokalama uelefea a le Ekalesia i lena taimi.
I le 1943, i le 48 o ona tausaga, sa valaauina ai Spencer i le Korama a Aposetolo e Toasefululua. Mo le isi 30 tausaga na sosoo ai, sa ia auauna atu i se Ekalesia faavaomalo ua faateleina ma sa ia fiafia faapitoa i vaega o le televave o le tuputupu a‘e ma le maualuga o le talia o le savali o le talalelei. I le 1946, na tuuina atu ai e le Peresitene o le Ekalesia George Albert Smith ia Elder Kimball le tofiga faapitoa e “leoleo i Initia i le lalolagi atoa,” o e na faailoa e le Au Paia o Aso e Gata Ai i lena taimi o e tupuga mai i tagata o le Tusi a Mamona. I le tele o lauga, sa faamanatuina ai e Elder Kimball “le aso o le sa Lamana,” ma faamautu ai le ala na faataunuuina ai folafolaga o feagaiga anamua i le perofeta o le Tusi a Mamona o Liae i tagata iloga o Amerika ma Atumotu o le Pasefika. A o faia ni ana malaga taamilo a le misiona i Amerika i Matu, Tutotonu, ma Saute, sa ia sailia ni fegalegaleaiga e mafai ona aumaia ai le lagolago faalelotu, aoaoga, ma meafaitino mo Au Paia o Aso e Gata Ai na taliaina le faasinomaga o sa Lamana. O lana auaunaga sa aofia ai foi le fautuaina o tagata o le Ekalesia o e na ta‘uta’u atu solitulafono matuia, ma i le 1969, sa ia lolomiina ai le O Le Vavega o le Faamagalo Atu, o se tusi e faitauina e le toatele e uiga i le mataupu o le salamo.
O Elder Spencer W. Kimball ma Camilla Kimball o loo malaga i se vaalele mo se tasi o le tele o malaga sa la faia i Amerika i Saute i le vaitau o le 1960.
Mo le tele o taimi sa ia auauna atu ai o se Pulega Aoao, sa vaaia ai e tagata lautele le oo ai o Elder Kimball i luitau o le soifua maloloina. O se taotoga i le 1957 mo le kanesa o le faai na aveesea ai se tasi o ala leo, ma tuua ai o ia ma se leo ua suia, loloto, ma filemu. Sa puapuagatia foi o ia i se faasologa o osofaiga o le fatu ma, a o auauna ai o se Peresitene o le Korama a Aposetolo e Toasefululua i le 1972, sa faia ai se taotoga e togafiti ai le fatu na faatinoina e le Aposetolo ma le Peresitene o le Ekalesia i le lumanai Dr. Russell M. Nelson. O le faamatalaina ma le mausali o le galuega a Kimball e ui lava ina faaalia ai le maofa faaletino ma le musuia o taitai o le Ekalesia ma le toatele o le Au Paia o Aso e Gata Ai.
O le maliu faafuasei o Peresitene Harold B. Lee i le 1973 na faateia ai Peresitene Kimball, o le sa lagonaina le lotomaualalo i le manatu o le mulimuli i “se tamalii maoae” o se Peresitene o le Ekalesia. “O a‘u o se alii laitiiti,” sa ia fai atu ai ia Elder Boyd K. Packer i se taimi e le’i leva ona faauuina o ia e avea ma Peresitene o le Ekalesia, “mo se tiutetauave tele!”” Ae peitai, sa tausisia e Peresitene Kimball se tulaga televave e manatua ai o ia o se taitai naunautai o le sa faamamafaina le faatinoga ma le taumafaiga. I se semina faaleaoaoga mo sui risone, sa ia tuuina atu ai se saunoaga maoae lea na vave ai ona gauai atu tagata o le Ekalesia i soo se mea. “Pe o tatou manatu māmā ea i lo tatou auala e aoao atu ai le lalolagi atoa?” sa ia fesili mai ai. “Pe ua tatou saunia ea e faauumi a tatou la‘a? Pe faamamao la tatou vaai?” Sa ia valaau atu i “alii agavaa uma” e auauna atu o se faifeautalai, mo taitai ina ia faateleina le galuega o le faagaoioiga o le Ekalesia, ma mo tagata o le Ekalesia ina ia taulamua i le ola ai i le talalelei. Na faatuputeleina le galuega faafaifeautalai ma sosoo ai ma le faateleina o aulotu ma malumalu
O Peresitene Spencer W. Kimball ma Camilla Eyring Kimball a o le‘i faia le faasalalauga o le selau limasefulu tausaga o le konafesi aoao mai le fale ogalaau o Peter Uitimera, Feiete, Niu Ioka, Aperila 1980.
I le taimi o se faatalanoaga ma ofisa faasalalau i le 1973, sa fesiligia ai Peresitene Kimball e uiga i le tapuiaiga i lena taimi lea na taofia ai tagata o le Ekalesia e tupuga mai Aferika uli mai le faauuina i le perisitua pe mai le auai i faaeega paia o le malumalu po o faamauga i le malumalu. Sa ia fai mai na ia tuuina atu i le mataupu se “mafaufauga tele lava, se tatalo tele lava” ma sa faamautu mai ai o soo se suiga lava o le a oo mai e ala i faaaliga mai le Alii. Mo le isi lima tausaga na sosoo ai, sa faaauau pea ona ia sailia le fesoasoani a le Alii, ma asiasi soo atu i le malumalu na o ia ma fefautuaai ma isi taitai o le Ekalesia. I le aso 1 Iuni, 1978, i se fonotaga i le Malumalu o Sate Leki faatasi ai ma uso o le Au Peresitene Sili ma le Korama a le Toasefululua, sa tatalo ai Peresitene Kimball mo le finagalo o le Alii e tusa ai ma le tapulaa, ma sa oo mai faaaliga i le perofeta. Sa saunoa Gordon B. Hinckley peresitene Gordon B. Hinckley, o le sa i ai, mulimuli ane, “sa peiseai na tatalaina se auala i le va o le nofoalii faalelagi ma le perofeta o loo tootuli ma aioi atu.” I le lotogatasi, sa vave ona faasilasila mai e le Au Peresitene Sili e mafai ona faauuina alii agavaa uma i le perisitua ma tagata agavaa o le Ekalesia e mafai ona auai i sauniga uma o le malumalu. O le faaaliga i le 1978 sa i ai se aafiaga vave i le Ekalesia o ni faauuga i le perisitua mo alii e tupuga mai i Aferika uli, na ulu atu tamaitai ma alii uli i malumalu, ma ua faalauteleina misiona i eria fou.
Ina ua mavae lona aso fanau lona 90, sa amata ona faateteleina le faaletonu o le soifua maloloina o Peresitene Kimball. I ona aso mulimuli, sa ia talanoa ai e uiga i lona tina, lea na maliu i le 11 o ona tausaga. “Ua uma nei lo’u olaga,” sa ia fai atu ai i se tausima’i. “Ua matua fiafia lava o ia, oi e matua fiafia lava.” Na maliu o ia ia Novema 1985. I le sasaa mai o faamaisega, e toatele tagata na faasoa mai le ala na latou faatauaina ai le agamalu, lotomaualalo, galue malosi, ma le agaalofa o Peresitene Kimball.
Mo nisi faamatalaga e uiga i le soifuaga o Spencer W. Kimball, tagai i le vitio Prophets of the Restoration i luga o le history.ChurchofJesusChrist.org poo luga o le polokalama o le Gospel Library.
Autu Fesootai: Priesthood and Temple Restriction (Faatapulaaga o le Perisitua ma le Malumalu), Growth of Missionary Work (Tuputupu A‘e o le Galuega Faafaifeautalai), Temple Building (Fausiaina o Malumalu) , Lamanite Identity (Faasinomaga o sa Lamana), Indian Student Placement Program (Polokalame Faatulagaina mo Tamaitai Aoga Initia), Sacrament Meetings (Sauniga Faamanatuga), Broadcast Media (Faasalalauga Faalauaitele)