Tumaoti Faaupufai

Talu mai le vaitau o le 1830, sa tautua lava e le aunoa le Au Paia o Aso e Gata Ai i faigamalo ma sa umia foi tofi i tulaga lautele. I le vaitaimi o le seneturi lona sefuluiva, o le Ekalesia i le avea ai o se faalapotopotoga sa aofia tele ai i tulaga faaupufai i faigapalota i le setete, itumalo, ma le atunuu. Sa umia e taitai o le Ekalesia i lea vaitaimi ia tofi, lagolagoina pati ma faamoemoega faavae, uunaia taitai o le malo ma tulagatofi, ma faatulagaina faigapaaga.¹ Na amata i le vaitau o le 1890, e taitai ona faapafala mai lo latou tautua i tofi faaupufai. I le faaiuiuga o le seneturi lona 20, sa faaaoga ai e le Ekalesia se tulaga tumaoti faaupufai agai i faigapalota. E tusa ai ma aiaiga faavae, sa lei lagolagoina e le Ekalesia pe tetee foi i pati faaupufai, sui tauva, po o faamoemoega faavae, ma sa faasaina ona fale ma lisi o tagata auai o le ekalesia ona faaaogaina mo faiga faaupufai. Peitai, o tagata taitoatasi o le Au Paia o Aso e Gata Ai, sa faamalosiauina ina ia auai i le faagasologa faaupufai o ni tagata palota, sui tauva, ma taitai filifilia.² O le tulaga o le Ekalesia i le tumaoti faaupufai sa matuai tosina malosi e le tuatuagia o le Ekalesia ma tulaga faaupufai i le Iunaite Setete.

O Iosefa Samita ma Aiaiga Faavae o Faiga Palota

Na muai fetaiai le Ekalesia ma faiga malo i totonu o faiga faatemokarasi a le Iunaite Setete. A o faateteleina sauaga e faasaga i le Au Paia o Aso e Gata Ai i le vaitau o le 1830, sa uunaia e le Alii le Au Paia i se faaaliga e faaaoga le ala faaletulafono mo le toefaasa’oina ma le puipuiga.³ Sa taitai e Iosefa se taumafaiga e talosagaina ai le malo tutotonu o le Iunaite Setete mo le toefaasa’oina i le 1839, ae peitai ina ua toe faasino atu e le Konekeresi le mataupu i taitai lava e tasi o le setete, o e na tutulieseina le Au Paia mai Misuri, sa vaavaai atu Iosefa i le palota e fausia ai se paaga soofaatasi mo le lagolagoina. O nisi o sui tauva sa vaaia le Au Paia o se faiganuu palota ma tauva i lo latou aai tele tuaoi o Navu, Ilinoi.⁴ Ona o le popole nei le mafai ona faalagolagoina ia taitai filifilia e puipuia ia manaoga o le Au Paia, o lea sa talo ai e Iosefa se Fono a le Toalimasefulu e sailiili le toe fesiita’i le nofoaga o le Au Paia ma mafaufau i se avanoa o se faigamalo faaleositaulaga. Sa ia faalauiloa foi lana lava tauvaga mo le tofi peresitene o le Iunaite Setete.⁵

O Le Pati a Tagata o Iuta ma le Manifeso Faaupufai

I le Itumalo o Iuta, sa auai ai paionia o le Au Paia o Aso e Gata Ai i faiga palota faalenuu, ma itumalo.⁶ Talu ai ona sa tulai mai le maoae o le toatele o tagatanuu i Iuta o le Au Paia, o lea sa latou fuaao ai le tele o palota. Sa tele ina lagolagoina e Polika Iaga ma isi taitai o le Ekalesia ia sui tauva ma o nisi foi taimi e saili ai ia umia tofi faaupufai. O le toatele o sui faaupufai o le Au Paia o Aso e Gata Ai e tauva mo tofi o le aai po o le itumalo e le faia’ina lava. Peitai, a o faateleina le faitau aofai o e le o ni Au Paia o Aso e Gata Ai e ala i tagata fai mai ma pisinisi, sa iloa e le Au Paia e tatau ona latou faapalenia a latou mataupu faavae faalefaitaulaga ma le tulaga moni faaupufai i le lotoifale. Sa faatulagaina e tagatanuu Iutaia, Katoliko, Porotesano, ma le au Godbeit, le Pati Lotofoai i le 1870 e lu’i ai le paaga soofaatasi a le Au Paia o Aso e Gata Ai.⁷ O le tetee malosi o le Pati Taupulegalasi faaleatunuu i le faaautaunonofo na uunaia ai le toatele o le Au Paia o Aso e Gata Ai i lea taimi ia ogatusa ma le Pati Temokarasi. Peitai ina ua faatupulaia le tosinaga a le Pati Lotofoai, sa faavaeina e le toatele o le Au Paia iloga le Pati mo Tagata e lagolago ai faamoemoega e taua i tagata o le Ekalesia.⁸ Mo le isi luasefulu tausaga na sosoo ai, sa manumalo ai lava sui tauva o le Pati mo Tagata ia latou tauvaga uma ma sa toetoe o nofoa uma o le fono faitulafono a le itumalo sa latou nofoia.

O tulafono a le Malo tutotonu e faasaga i faaipoipoga faaautaunonofo ma le faatupulaia o le faitau aofai o e le o ni Au Paia o Aso e Gata Ai, na afua ai ona faataape taitai o le Pati mo Tagata ina ia mafai ai ona fausia sootaga ma vaega soofaatasi faaleatunuu, uunaia le tulaga faalesetete o Iuta, ma iu ai ina filifilia tagata o le Ekalesia i le Konekeresi. I le 1891 na tonu ai i le Au Peresitene Sili ma taitai o le Pati mo Tagata e soloia le pati ma uunai o latou tagata e “vaevae tutusa i pati a le [Temokarasi faaleatunuu ma le Taupulegalasi].”⁹ E toatele Aposetolo na auai atu i le Pati Temokarasi, ae ina ua mavae le faia’ina o se tasi Aposetolo o se sui tauva mo le Taupulegalasi, sa amata loa ona popole taitai e pei o Peresitene Uilifoti Uitilafi ma Siaosi Q. Cannon, i toe alia’e mai fevaevaeaiga tuai. Sa fofogaina mai e Cannon ma isi taitai iloga o le a latou opoopoina le Pati Taupulegalasi, ae sa latou fautuaina le tautuagalue o tagata o le Ekalesia.¹⁰

Ina ua faamaonia le avea o Iuta ma setete i le 1896, sa fofogaina mai e le Au Peresitene Sili ma isi Au Pulega Aoao le “Tulafono Faaupufai a le Ekalesia” (sa faaigoaina foi o le “Manifeso Faaupufai”) O lea aiaiga faavae na manaomia ai soo se Pulega Aoao e tulitulimatagau i se tofi i tulaga faitele, ia maua mai se faatagaga mai le Au Peresitene Sili.¹¹ O Mose Thatcher, o se Aposetolo, o le sa tautua i le tele o aufaatonu o fefaatauaiga i Iuta ma sa mafaufau e tauva mo se tofi faaupufai, sa musu e saini le pepa tusitusia. Ona o lea mea faatasi ai ma isi mafuaaga, na iu ai ina soloia mai le Korama a le Toasefululua. Na faatumauina lava e Thatcher lona avea ai ma tagata o le Ekalesia, ma sa ia lagolagoina mulimuli ane le aiaiga faavae.¹²

I le mavae ai o tausaga talu mai le Manifeso Faaupufai, e toalua le Au Pulega Aoao na filifilia i le Konekeresi faatasi ai ma le faatagaga mai le Peresitene o le Ekalesia: O B. H. Roberts o le Aufono Muamua o Fitugafulu i le 1898 ma Reed Smoot o le Korama a Aposetolo e Toasefululua i le 1903. Sa filifilia Roberts i le Maota o Sui ae sa le i nofoia lona nofoa ina ua aea se felafolafoaiga e faatatau i lona faia o faaipoipoga faaautaunonofo. Sa filifilia Smoot i le Senate ae sa fetaiai foi o ia ma se felafolafoaiga faaKonekeresi i le umiaina o lona nofoa. Sa molimauina e taitai o le Ekalesia, e aofia ai ma Peresitene Iosefa F. Samita i le Senate ia tolaulauga e lagolago ai le tautua a Smoot. Ina ua mavae le tolu tausaga o suesuega a le komiti i le ono tofia o Smoot, sa le mafai e le Senate ona aveesea o ia mai lona tofi, ma tautua Smoot i le Senate seia oo i le 1933.

Agai Atu i le Tumaoti Faaupufai

Sa aloaia e taitai o le Ekalesia le taua o le tuueseese o le Ekalesia ma le setete sa otooto mai i le Faavae o le I.S. Ae sa i ai ni mataupu faaupufai sa fesilia’i ma le misiona, aoaoga, ma naunauga o le Ekalesia. Ina ia tausisia se leo i le lio lautele, sa faamamafaina ai e taitai o le Ekalesia ina ua mavae pe tusa o le 1900 se eseesega maoti i le va o upufai ma le utafetala’i. Sa tuu atu mataupu faaupufai i le lotofuatiaifo o le tagata lava ia, o mataupu tau i le agatonu e aofia ai mea e faasalaveia sa’o ai aoaoga faavae po o faiga a le Ekalesia. Mai lea taimi i lea taimi, sa tautalagia ai e taitai o le Ekalesia mataupu tau i le agatonu. Mo se faataitaiga, i le 1933, na uunaia ai e Peresitene Heber J. Grant i le au palota i Iuta, e faasaga i le faaleaogaina o le Suiga Lona Sefuluvalu o le Faavae o le Iunaite Setete, lea sa faasaina ai le gaosia, faatauina atu, ma le fela’ua’iga o meainu oona.¹³

O le tupuolaola faavaomalo o le Ekalesia na alia’e mai ai lu’itau fou i le taitaiga o le Ekalesia i matalalaga eseese faaupufai. A o galulue ia taitai o le Ekalesia ia aloaia e atunuu eseese, sa latou faamamafaina lo latou tumaoti ma sa faamalosiauina ia tagata o le Ekalesia ina avea ma tagatanuu tausi-tulafono, ma ia tautua i faigamalo i lotoifale i mea e mafai ai.

Na faaauau pea e taitai Aoao o le Ekalesia ona tuuitiitia lo latou aofia ai i faigapalota. O Ezra Taft Benson, o le sa avea ma failautusi o Faatoaga i le I.S. mai le 1953 e oo atu i le 1961, o le toe tagata lea sa umia se tofi i le malo a o avea ai o ia ma sui auai o le Korama a le Toasefululua po o le Au Peresitene Sili. Sa faaauau foi e Peresitene o le Ekalesia ona tautalagia ia fuataga o palota po o isi fesili faaupufai e uiga i popolega tau i le agatonu, i le Iunaite Setete ma isi atunuu. I le 1980 sa tusia ai e le Au Peresitene Sili se faamatalaga aupito patino e uiga i le tumaoti, i taitai i le lotoifale ma le lautele o tagata auai ma o loo tumau pea le laugatasia i aso nei.¹⁴

Punaoa o le Ekalesia

“Tumaoti Faaupufai,” Newsroom, newsroom.ChurchofJesusChrist.org.

Lisi o Tusi

Edward Leo Lyman, Political Deliverance: The Quest for Utah Statehood (Urbana: University of Illinois Press, 1986).

Kathleen Flake, The Politics of American Religious Identity: The Seating of Senator Reed Smoot, Mormon Apostle (Chapel Hill: University of North Carolina Press, 2004).

Gustive O. Larson, “Federal Government Efforts to ‘Americanize’ Utah before Admission to Statehood,” BYU Studies, vol. 10, no. 2 (1970), 218–32.

Jean Bickmore White, “The Right to Be Different: Ogden and Weber County Politics, 1850–1924,” Utah Historical Quarterly, vol. 47 (1979), 254–72.

Autu Fesootai: American Legal and Political Institutions [Faalapotopotoga Aloaia ma Faalemalo a Amerika], Utah, Godbeites

Faamatalaga

1. Mo se faataitaiga, tagai Autu: Faalauiloaga a Iosefa Samita i le 1844 mo le Peresitene o le Iunaite Setete, Council of Fifty, Women’s Suffrage, Relief Society, Brigham Young, Utah.

2. “Church Policies and Announcements,” Ensign, Aug. 1980, 79; “Political Neutrality,” Newsroom, newsroom.ChurchofJesusChrist.org.

3. Mataupu Faavae ma Feagaiga 101:76–89; tagai foi Mataupu Faavae ma Feagaiga 98:4–6.

4. Andrew H. Hedges, “Extradition, the Mormons, and the Election of 1843,” Journal of the Illinois State Historical Society, vol. 109, no. 2 (2016), 127–47.

5. Tagai Autu: Faalauiloaga o Iosefa Samita i le 1844 mo le Peresitene o le Iunaite Setete, Council of Fifty.

6. Tagai Autu: Iuta.

7. Tagai Autu: Godbeites.

8. Thomas G. Alexander, Utah: The Right Place; The Official Centennial History (Salt Lake City: Gibbs-Smith, 1995), 173–74.

9. Alexander, Utah, 201–2.

10. Alexander, Utah, 202–3.

11. Wilford Woodruff, et al., “To the Saints [I Le Au Paia],” The Deseret Weekly, Apr. 11, 1896, 532–34.

12. Kenneth W. Godfrey, “Moses Thatcher in the Dock: His Trials, the Aftermath, and His Last Days,” Journal of Mormon History, vol. 24, no. 1 (1998): 54–88.

13. Brent G. Thompson, “‘Standing between Two Fires’: Mormons and Prohibition, 1908–1917,” Journal of Mormon History, vol. 10 (1983), 35–52.

14. “Church Policies and Announcements,” Ensign, Aug. 1980, 79; “Political Neutrality,” Newsroom, newsroom.ChurchofJesusChrist.org.