O Uarota ma Siteki

Ina ua faatulagaina le Ekalesia ia Aperila 1830, sa leai se mea na manaomia ai se faatulagaga lautele, aua na mafai ona feiloai faatasi le toatele o le Au Paia i le nofoaga lava e tasi. A o auai tagata ma aiga i le Ekalesia i nofoaga sili ona mamao, sa faatulagaina i latou o ni faalapotopotoga eseese, po o ni “paranesi.” O totonu la o le tausaga talu mai le faavaeina o le Ekalesia, na taitaiina ai e se faaaliga nei vaega o tagata talitonu ina ia potopoto i se nofoaga e tasi.¹ E lei mamao ae ua faatulagaina nofoaga autu mo le faapotopotoina i Katelani, Ohaio, ma i le Itumalo o Siakisone, Misuri. Na faamoemoe le Au Paia i Misuri e fausia le aai o Siona e sauniuni ai mo le Afio Mai Faalua. Na atofaina katelani e avea ma se “siteki o Siona,” e faasino lea i le talafaatusa a Isaia e uiga i se faleie lapoa lea o le a avea ma se nofoaga e aumau ai tagata o le feagaiga a le Atua.² O tagata o le Ekalesia i nofoaga uma e lua o le faapotopotoga sa taitaia e se au peresitene, epikopo, ma se fautua maualuga.³

Na auina atu faifeautalai mai nei nofoaga na faapotopoto ai e tala’i atu le talalelei i le Iunaite Setete, Kanata, ma, i le 1837, i Peretania Tele. O tagata na liliu mai na faamoemoe ia potopoto i Misuri po o Ohaio faatasi ai ma isi tagata o le Au Paia o Aso e Gata Ai pe a talafeagai ai. Ae ui i lea, o le tele o paranesi laiti o le Ekalesia na faatuina i eria lea na faamanuiaina ai faifeautalai. O nei paranesi na faatautaia e le Korama a Aposetolo e Toasefululua, lea na tuuina atu i ai le tiutetauave e galue ai o se “fautua maualuga femalagaai” mo paranesi i fafo atu o nofoaga autu o le faapotopotoga.⁴

O isi siteki, e faaopoopo atu i na sa i Katelani, na faatuina ina ua mavae ona tutulieseina le Au Paia mai le Itumalo o Siakisone ma mulimuli ane mai le setete atoa o Misuri. O le siteki i Navu, Ilinoi, ma matuai telē lava ma sa avea ma se nofoaga autu o le faapotopotoga i le amataga o le vaitau o le 1840. Na faatupulaia le aai i se tulaga lea na vaevaeina ai i totonu o ni uarota, o se auala taatele o le faafoeina o ni aai tetele i lena taimi. Na avea nei uarota ma se auala taua i le faafoeina o pisinisi a le Ekalesia faapea foi ma mataupu faalemalo, lea e masani ona tuufaatasia i le aai e toatele ai le Au Paia o Aso e Gata Ai.⁵ I le 1842, na faatuina e le fautua maualuga a Navu ni uarota se 10 ma valaauina ni epikopo mo uarota taitasi. O epikopo na nafa faapitoa lava i le tausiga o e matitiva i o latou lava uarota, ma na faaaoga ia uarota o se auala e faatulaga ai le aoina mai ma le tufatufaina atu o sefulua’i ma tagata e galulue o le malumalu. Na faaauau pea ona faatulaga korama a perisitua i tulaga faalesiteki, ma sa tele lava ina tapuai faatasi le Au Paia i Navu o se siteki.⁶

Ina ua uma ona masii atu le vaega autu o le Ekalesia i se isi nofoaga autu mo le faapotopotoga i Iuta i le faaiuga o le vaitau o le 1840, sa faaauau pea nei lava faatulagaga faalapotopotoga. O le Aai o Sate Leki na faafuasei lava ona faatuina o se siteki ma vaevaeina i ni uarota se 19. I le va o le 1847 ma lona maliu i le 1877, na faatuina ai e Polika Iaga le aofai o siteki e 20 i Iuta ma Aitaho, na aofia ai taitasi ai se eria faafaafanua tetele na siomia ai le tele o nuu. O aai ma nuu laiti na tofu lava ma a latou lava epikopo, ma a pe a latou tuputupu ae, e vaevaeina foi i latou i ni uarota, e taitasi ma lana lava epikopo. Na faasolosolo lava, o le toatele o tagata o le ekalesia na amata ona tapuai faatasi o ni uarota nai lo ni aai po o ni siteki.⁷

I le 1877, na faatonuina ai e Polika Iaga se faalautelega o le faalauiloaina o faalapotopotoga a le Ekalesia, faatuina po o le faamalosia o le tele o lea lava fausaga o faavae e tasi o loo i ai i le Ekalesia i aso nei: o vaega toalaiti e avea ma ni paranesi faatasi ai ma ni peresitene o paranesi, o vaega tetele e avea ma ni uarota faatasi ai ma ni epikopo, o loo i ai uma lava i totonu ma faatautaia e siteki, lea e pulefaamalumalu ai ia peresitene o siteki.⁸

I eria i fafo atu o nei siteki, aemaise lava i misiona a le Ekalesia, e faaauau pea ona faafaileleina e tamai paranesi ia tagata fou e liliu mai ma i latou ua le mafai ona potopoto. O vaega o paranesi o le a potopoto faatasi i konafesi masani, ma sa amata ona faaaoga e taitai ma tagata o le Ekalesia le upu konafesi e faamatala ai nei vaega o paranesi. O konafesi na taitaiina e se persitene o le konafesi, e masani lava o se faifeautalai.

I le amataga o le seneturi 20, na faia ai e le Peresitene o le Ekalesia o Lorenzo Snow ma Iosefa F. Samita ni suiga i siteki i Iuta, vaevaeina ai ni siteki tetele e fua lea i le toatele o a latou tagata nai lo lo latou mamao mai le tasi ma le isi. Mo se faataitaiga, o le Siteki a Sate Leki na 40,000 tagata o le ekalesia ma sa vaevaeina i ni siteki laiti e ono. O nei fetuutuunaiga na taitai atu ai i ni uarota o se aofaiga sili e faatautaia ai ma uunaia ai le auai atili i totonu o tagata o le ekalesia i le lotoifale. Na auai uarota ma siteki i le fausiaina o polokalama lea na taitai atu ai i le fausia o le fia afe o faletatalo. Na saunia e uarota ia avanoa i punavai o le pule o le perisitua ina ia mafai ai ona faatautaia sauniga o le talalelei, faataunuu ma le atoatoa ia polokalama o ausilali a le Ekalesia, ma faafetaiaia manaoga faaletino a le Au Paia.⁹

I fafo atu o le eria faataamilo ia Iuta, o misiona, na pulefaamalumalu ai peresitene o misiona, vaaia le faagaoioiga o le Ekalesia. O le fia selau o paranesi i misiona, lea ua salalau nei i le toeitiiti o konetineta uma, na faaauau pea ona tuputupu ae ao uunaia malosi tagata liliu mai ina ia tumau i o latou atunuu nai lo le faapotopoto i Iuta. O konafesi (vaega o paranesi) i misiona na toefaaigoaina i itu. Na amata i le vaitau o le 1920, na faatuina ai e taitai o le Ekalesia ni siteki i fafo atu o le Iunaite Setete i sisifo. O [siteki] muamua na faatuina i Kalefonia, Mekisiko i matu, ma le Iunaite Setete i sasae, ma se vaega toalaiti i le Pasefika ma Europa. I le vaitau o le 1970, na amata ai e taitai o le Ekalesia ona faatuina ni siteki i le lalolagi atoa, faatasi ai ma le vaavaaia e siteki taitasi o le tele o uarota po o paranesi.¹⁰

E ofoina atu e siteki ma uarota se lagona malosi o nuu ma alalafaga ma le auai i tagata o le ekalesia, o le toatele o i latou o loo nonofo nei i nofoaga pisi ma tu taulaga po o i eria lea e toalaiti ai ni tagata o le Au Paia o Aso e Gata Ai. I tulaga i le lotoifale, e tausia e epikopo ma tagata o uarota ma auauna atu i le tasi ma le isi ao latou taumafai ia ola e tusa ai ma mataupu faavae o le talalelei. O le toatele o korama a le perisitua ma ausilali a le Ekalesia ua faatulagaina i tulaga faaleuarota. O faasologa o le pulega faalelotu e faafesootaia uarota e ala atu i au peresitene o siteki i le Pulega Aoao ma Taitai aoao o le Ekalesia.

Punaoa o le Ekalesia

“How the Church Is Organized,” Gospel Topics, topics.lds.org.

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina po o le fesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Brandon S. Plewe, ed., Mapping Mormonism: An Atlas of Latter-day Saint History, 2nd ed. (Provo, Utah: Brigham Young University Press, 2014).

Faamatalaga

1. “Revelation, 30 December 1830 [DC 37],” in Revelation Book 1, 49, josephsmithpapers.org; “Revelation, 2 January 1831 [DC 38],” in Revelation Book 1, 51–52, josephsmithpapers.org.

2. Isaia 54:2; “Revelation, 26 April 1832 [DC 82],” in Revelation Book 1, 128, josephsmithpapers.org.

3. Tagai “Ecclesiastical Organization Charts,” josephsmithpapers.org.

4. “Minutes and Discourses, 27 February 1835, as Reported by Oliver Cowdery,” in Minute Book 1, 88, josephsmithpapers.org; see Topic: Quorum of the Twelve.

5. Tagai Autu: Nauvoo (Commerce), Illinois.

6. Tagai William G. Hartley, “Nauvoo Stake, Priesthood Quorums, and the Church’s First Wards,” in My Fellow Servants: Essays on the History of the Priesthood (Provo, Utah: BYU Studies, 2010), 361–85.

7. Brandon S. Plewe, “The Emergence of Modern Stakes and Wards: 1834–1909,” in Brandon S. Plewe, ed., Mapping Mormonism: An Atlas of Latter-day Saint History, 2nd ed. (Provo, Utah: Brigham Young University Press, 2014), 128–29.

8. Plewe, “The Emergence of Modern Stakes and Wards,” in Plewe, Mapping Mormonism, 128–29.

9. Richard O. Cowan, “Stakes: 1910–present,” in Plewe, Mapping Mormonism, 184.

10. Cowan, “Stakes,” in Plewe, Mapping Mormonism, 185.