Faamaopoopoga

I totonu O Le Ekalesia a Iesu Keriso o le Au Paia o Aso e Gata Ai, o le Matagaluega o Faamaopoopoga e nafa ma le faamautinoaga ua ogatasi galuega uma ma le aoaoga faavae a Iesu Keriso ma aiaiga musuia a le Ekalesia. O lenei matagaluega na tupu ae mai se gaoioiga toefuatai i le senituri 20 i totonu o le Ekalesia, na taitaia e Peresitene Iosefa F. Samita, lea na taulai atu i le faafaigofieina ma le faatutotonugalemuina o le galuega i faalapotopotoga uma a le Ekalesia.

O le tele o faalapotopotoga a le Ekalesia i le seneturi 19, e aofia ai le Aoga Sa, vaega o le autalavou, ma le faalapotopotoga a tamaiti, na amata i lotoifale. I le iloa atu o tulaga manaomia i totonu o o latou nuu, na atinaeina ai e le toatele o tagata o le Ekalesia ni mafutaga ma ni auaunaga ia na faia foi e korama, uarota, ma siteki ae sa peiseai e tutoatasi mai ia i latou. E oo atu i le faaiuga o le seneturi, ua faia e le tele o faalapotopotoga a le Ekalesia, o korama, ma misiona a latou lava anomea faaaoaoga, na iu ai i le matua tele o ituaiga o tusitusiga.¹ Na silafia e le Peresitene o le Ekalesia o Iosefa F. Samita le manaomia ona “faamaopoopo” ia polokalama a ausilali eseese i ni mataupu aoaoina tuufaatasi, e tuueseesea ai taumatematega ma aoaoga aloaia ma fausia ai tulaga ogatasi o savali i le Ekalesia atoa.

O lenei faamaopoopoga na amata o se faasologa o komiti faapitoa e tusa ma le manaomia. I le 1908, na tofia ai e Peresitene Samita ia Elder Tavita O. Makei i le taimi lena o le Korama a Aposetolo e Toasefululua e avea ma taitaifono o le Komiti fou o Otootoga a le Perisitua Aoao ma le galuega o le tusia o mataupu aoaoina mo korama a le perisitua.² I le isi fa tausaga na sosoo ai, na lolomiina ai e le komiti lenei ia tusi faaleaoaoga mo korama taitasi a le Perisitua Arona ma le Mekisateko. Faatasi ai ma taumafaiga tuufaatasi faaleaoaoga, na fesoasoani nei tusi e faafaigofie ai le faiga o faauuga ma le auai i korama. I le 1912, na faatulaga ai foi se isi Komiti Faamaopoopo ina ia aumaia faatasi ai taitai o ausilali ma faamaopoopo a latou galuega. Toetoe i le taimi lava lena, na faateleina ai le auai ma na faafiafiaina taitai o korama i le lotoifale i le faateleina o le manino ma le lagolago i o latou valaauga. I le 1918, na faatulaga ai e Peresitene Samita se Komiti Faamaopoopo fou tumau, ma toe avea ai foi Elder Makei o le taitaifono.

E oo atu i le 1940, o le tupu ae o le Ekalesia i Iuta ma le lalolagi atoa na uunaia atili ai taitai ina ia tuufaatasia anomea ma gaoioiga, ma sa faatuina ai loa e le Au Peresitene Sili ni faalapotopotoga e faafetaiaia nei manaoga. I le 1940, na faatuina ai e le Au Peresitene Sili le Iuni a le Aufono a Ausilali, e aofia ai taitai aoao o faalapotopotoga taitasi a le Ekalesia, ma faatonuina i latou e atinaeina ni anomea faatulagaina mo mataupu aoaoina. I le 1944, na aumaia faatasi e le Au Peresitene Sili ia komiti e vaavaaia ma iloiloina tusitusiga na saunia e le Ekalesia.

I le 1947, na tofia ai e le Au Peresitene Sili ma le Korama a le Toasefululua le faia o se iloiloga faaaposetolo o faalapotopotoga uma lava a korama o le Perisitua Mekisateko ma ausilali, na taitaita e Elder Harold B. Lee. Na tofia i latou e faaitiitia le tele o taimi e i ai se mataupu e tasi ma faamautinoa le taitaia o faalapotopotoga uma a le Ekalesia e ala i le perisitua.³ Na faia e lenei komiti le tele o talosaga sa iloiloina e le Au Peresitene Sili ae sa le i faatinoina i lena taimi.⁴ Mo le tele o tausaga sa faaauau pea ona fautua atu Elder Lee mo le faamaopoopoina atili ma le faamalosia o le aiga e ala i le perisitua, ma i le 1961 na faailoa mai ai e le Au Peresitene Sili le Polokalama Faamaopoopo Faaleperisitua.⁵

I lalo o lenei polokalama, na palasi ai tiuteauave faaleperisitua i vaega e fa: galuega faifeautalai, gafa, uelefea, ma le aoaoina o aiga. Na faatulagaina komiti aoao mo nei vaega taitasi, ma sa faatulagaina komiti faaleperisitua i le lotoifale i totonu o uarota. O le Puletini o le Perisitua, o se mekasini mo taitai perisitua uma, sa faalauiloaina i le 1965, faatasi ai ma aoaoga sa atinaeina e komiti faamaopoopo eseese, le Korama a le Toasefululua, ma le Au Peresitene Sili. Ae, o le faatumauina o le tulaga lelei i totonu o faalapotopotoga a le Ekalesia o loo tupu ma ola pea na tulai mai ai ni luitau mo faatonu o polokalama.⁶

Sa tauaveina e taitai sinia o le Ekalesia, i le taimi lea, se avega mamafa o galuega faalepulega ia na amata loa ona faamatuu atu ma tufatufa atu e ala atu i vaega faamaopoopo. Na tuuina atu e faufautua agavaa uma i le 1971 ni iloiloga o gaoioiga e faapea o le tele o faagasologa faalepulega na mamafatu i le Au Pulega Aoao ma fautuaina ai le mafai ona tuuina atu o galuega i ni pule faapolofesa faigaluega tumau. O le fausiaina o matagaluega fou a le Ekalesia na aumaia ai le tulaga lelei ae faapea foi le faaauau pea ona manaomia se faalapotopotoga e aoina ma tufa atu faamatalaga mo fesootaiga i totonu lava o le lotoifale. E oo mai i le amataga o le 1970, o le uluai manatu e faamaopoopoina ia tusitusiga faasalalau a faalapotopotoga na tele lava ina avea ma galuega a le Matagaluega o Fesootaiga Faalotoifale, lea na vave tuufaatasia ma isi vaega o aufaigaluega i totonu o le Matagaluega o le Faamaopoopoga. E oo mai i le 1980, ua iloiloina e le matagaluega lenei ia fesootaiga uma lava a le Ekalesia.⁷

E amata atu i le tausaga 1970 ma le 1980, na taitaia ai le Matagaluega o Faamaopoopoga e se komiti faafoe o Au Pulega Aoao ma Au Ofisa Aoao ma fesoasoani i ai nisi o tagata faigaluega faapolofesa. O le Komiti Faamaopoopo a le Ekalesia, e aofia ai le Au Peresitene Sili ma le Korama a Aposetolo e Toasefululua, sa vaaia ma faamaonia taumafaiga a lenei matagaluega. I le vaitaimi lea, na oo ai i le Ekalesia le faatupulaia tele o le ola o le au paia, ma iu ai i le matua faateleina o siteki i le lalolagi atoa. Faatasi ai ma isi mea, sa galulue le komiti faafoe e faaitiitia ni eseesega i le Ekalesia ua tupu lautele. O polokalama ma gaoioiga a le Ekalesia sa faamamafaina ai le totonugalemu o le fale ma le aiga ma sa faateleina pea le taitaiina e taitai perisitua.⁸

A o tupu tele pea le Ekalesia i le seneturi 21 ma a o aumaia e tekinolosi avanoa fou mo le galuega faifeautalai, talafaasolopito o aiga, aoaoga, ma fesootaiga, ua faalauteleina foi le Matagaluega o Faamaopoopoga ina ia aofia ai isi vaega eseese. O nei vaega e ausia ai le galuega o le iloiloina o mea uma a le Ekalesia ma mea totino tau atamai, faaleleia atili o fuafuaga ma faiga, ma le faia o suesuega i totonu lava. O le galuega o le faamaopoopoina na faalautele atu foi i tala atu o le laumua o le Ekalesia e aofia ai Au Peresitene Eria i le lalolagi atoa. O nei faalautelega sa fuafuaina e fesoasoani i le Ekalesia i le lalolagi atoa e taumafai mo le lotogatasi i le lotolotoi o eseesega faateteleina faalegagana ma faaleaganuu.

Faasinomaga o Tusi

O lomiga nei o loo tuuina atu ai nisi faamatalaga e uiga i lenei autu. I le faasinoina atu po o le faafesoota’ia o oe i nei punaoa, matou te le faamaonia pe faamautinoa atu le anotusi po o manatu o tusitala.

Michael A. Goodman, “Correlation: The Early Years,” in David J. Whittaker and Arnold K. Garr, eds., A Firm Foundation: Church Organization and Administration (Provo: Religious Studies Center, 2011), 319–38.

Michael A. Goodman, “Correlation: The Turning Point (1960s),” i le Scott C. Esplin and Kenneth L. Alford, eds., Salt Lake City: The Place Which God Prepared (Provo: Religious Studies Center, 2011), 259–84.

James B. Allen and Glen M. Leonard, “Correlating the International Church, 1960–1973,” i le The Story of the Latter-day Saints, lomiga lona 2 (Salt Lake City: Deseret Book, 1992), 593–623.

Autu Fesootai: Laumua o le Ekalesia