Howard W. Hunter

Sa avea Howard W. Hunter ma Peresitene lona 14 o le Ekalesia mo le iva masina i le va o le 1994 ma lona maliu i le 1995. Sa soifua mai o ia i le 1907 i Boise, Idaho, ia Nellie ma Will Hunter, le ulumatua o le fanau e toalua. I le taimi o le faaipoipoga a Nellie ma Uili, e lei aafia Uili ma se isi lotu e ui lava ina sa ola ae o ia o se Polotesano. I le taimi o le tamaitiiti o Howard, sa le’i tetee ai Uili i le auai o le aiga atoa i sauniga lotu ae sa ia finau atu i lana fanau seia oo ina matutua faatoa papatisoina. I le 12 o ona tausaga, na finau atu ai Howard i lona tama mo se faatagaga e papatiso ai ma faamanuiaina ai. Sa amata ona ia auauna atu i lana korama a tiakono a o ia faia foi ni galuega i fale faigaluega eseese, mai le tapolo i faleoloa.

O le gaoioiga sili ona fiafia a Howard i le taimi o le aoga maualuga o le taitaiina lea o lana lava vaega faamusika, o le Hunter’s Croonaders, lea sa tata mo siva i le itulagi atoa o Boise. Sa ia atamai i mea faimusika e tele, e aofia ai tagipalau, ilipu, ma le clarinet, ma ina ua uma le aoga maualuga, sa ia mauaina se konekarate e tata ai i se vaa lau pasese. Ina ua toe foi atu i le fale, sa suesue lifi atu Howard i Kalefonia e asiasi i se uo sa avea muamua ma se tagata o le vaega o le faaili ma filifili ai e nofo tumau iina. E le’i umi ae feiloa’i o ia ma Clara May Jeffs (o lē na igoa ia Claire), ma na la tafafao faamasani mo le tolu tausaga a o le’i faaipoipo i le 1931. I le fa o aso a o lumanai le la faaipoipoga, na filifili ai Howard e lafoai musika faapolofesa. O le la tama muamua, o Howard William Hunter Jr., na fanau i le 1934 ae na maliu faafuasei a o pepe, ma tuua ai le ulugalii “ua faanoanoa ma faavauvau.” O le tausaga na sosoo ai, na ulufale atu ai Howard i le Aoga Faaloia a Sautesisifo e tulitulimatagauina se galuega i le tulafono faapisinisi. Ina ua uma ona faauu i le 1939, sa ia galue faaloia ma iu ai ina auauna i fono faatonu o kamupani e lua sefulu.

Howard W. Hunter ma lana faaili — Howard W. Hunter, ogatotonu, o loo uuina se saxophone ma lana faaili, o le Hunter’s Croonaders.

I le 1940, i le 32 o ona tausaga, na valaauina ai Howard e avea ma epikopo o le Uarota fou a El Sereno, o se tiutetauave na fai mai Howard sa “fou uma ia te au” ma atonu foi o se ituaiga misiona sa ia mafaufauina e auauna atu ai i se aso faatasi ma Claire. I le ono tausaga o lona avea ai ma epikopo, sa taumafai ai Howard e fausia ni faauoga i le uarota atoa, lea na manatuaina ma le fiafia e tagata o le ekalesia i tausaga mulimuli ane. I le 1950, sa valaauina ai o ia e avea ma peresitene o le Siteki a Pasadena Kalefonia, o se eria ua i ai i le faaiuga o se faatupulaia tele o le faitau aofai o tagata i le Itumalo o Los Angeles. I totonu o le sefulu tausaga, na sili atu ma le faaluaina le faitau aofai o le itumalo, ma aumaia ai le toatele o le Au Paia o Aso e Gata Ai i le eria. I le 1959, sa ofo o ia ina ua tuuina atu e Peresitene Tavita O. MaKei le valaauga mo ia e auauna atu o se Aposetolo. Sa ia taliaina le valaauga, tuua lana galuega faaloia, ma tuuto atu o ia lava i le auaunaga i le taimi atoa i le Ekalesia.

I lana galuega faaaposetolo atoa, sa malaga tele ai Elder Hunter e vaaia nisi o taumafaiga faavaomalo a le Ekalesia. Sa ia pulefaamalumalu i le Sosaiete o Gafa (mulimuli ane o le Matagaluega o Talafaasolopito o Aiga a le Ekalesia) ma fautuaina mai ni fetuunaiga i tulaga faatonuina o faamauga, aemaise lava i le auala e mafai ai e tagata o le Ekalesia ona faia faamauga mo aiga ua maliliu. I le fautuaga a Elder Hunter, na faamaonia ai e Peresitene Tavita O. MaKei se suiga o aiaiga faavae lea na mafai ai e tagata o le ekalesia ona faamauina tamaitai o aiga ua maliliu i tane uma sa latou faaipoipo i ai i le taimi o o latou olaga. Sa faataunuuina foi e Elder Hunter ni tofiga e pulefaamalumalu ai i le Nofoaga Autu o Aganuu a le Polenisia i Hawaii ma mulimuli ane i le Matagaluega o Talafaasolopito o le Ekalesia o se Tusitalafaasolopito ma se Tusitalafaamaumau a le Ekalesia. O se tasi o ana mea mata’ina na ausia o le faamautuina lea o le fanua i luga o le Mauga o Olive i Isaraelu mo le fausiaina o le Nofoaga Autu o le Iunivesite o Polika Iaga i Ierusalema mo Suesuega i Sasae Lata Atu ma le Togalaau Faamanatu o Orson Hyde. O lana faauoga vavalalata ma le pulenuu o Ierusalema o Teddy Kollek na faamaonia le taua i le aoina mai o le lagolago mo galuega faatino.

Elder Howard W. Hunter ma le Pulenuu o Teddy Kollek — O Elder Howard W. Hunter i le faapaiaga o le Orson Hyde Memorial Garden i Ierusalema, 1979, faatasi ai ma le Pulenuu o Teddy Kollek.

Mai le 1972 na mafatia ai Claire Hunter i se ma’i faifai pea o le neura lea e masani ona lē toe mafai ai ona ia toe fealuai. Ina ua māe’a se ma’i o le mafaufau i le 1982, na faaalia ai e Claire faailoga o le faaleagaina tumau o le fai’ai ma maliu ai i le 18 masina mulimuli ane. I le taimi lea, na oo ai Elder Hunter i luitau o le soifua maloloina lea na aofia ai se mai o le puta, se mai fatu, ma tiga ogaoga o le patua. O le tele o taotoga ma togafitiga faaletino i le vaitau o le 1980 na toe faafoi atu ai o ia i se soifua maloloina lelei, e ui ina sa faaauau pea ona ia tauivi ma luitau faifai pea mo lona olaga atoa. I le 1990, na la faaipoipo ai ma Inis Stanton, o se tasi na la masani muamua mai Kalefonia. Sa masani ona malaga faatasi Inis ma Peresitene Hunter i le taimi o totoe o lana galuega o se Peresitene o le Korama a le Toasefululua ma mulimuli ane avea ma Peresitene o le Ekalesia.

I le ono o aso talu ona maliu Peresitene Ezra Taft Benson ia Me 1994, na vaetofia ai Peresitene Howard W. Hunter e avea ma Peresitene o le Ekalesia. I le taimi o lana au peresitene puupuu, sa valaau atu ai Peresitene Hunter i tagata o le Ekalesia ina ia auai atoatoa atili i tapuaiga i le malumalu ma taulai atu o latou olaga ia Iesu Keriso. Sa ia faamamafaina le faatasitasi o aiga ma faatonuina le Ekalesia e aua nei faatulagaina ni sauniga po o ni polokalama i po o Aso Gafua ina ia mafai ai ona faia afiafi faaleaiga. Sa ia valaau atu mo le faateleaiina o galuega o talafaasolopito o aiga ma le malumalu.

Na maliu Peresitene Hunter ia Mati 1995. E ui lava i le puupuu o lona taimi o se Peresitene o le Ekalesia, ae o lona uiga agamalu ma le molimau le maluelue na pele ai o ia i le Au Paia. O le na suitulaga ia te ia, o Peresitene Gordon B. Hinckley, na saafi i le talatuu o Peresitene Hunter, ma faamamafa atu lona tuuto i le talalelei ma le agaalofa na ia faaalia i isi. “Ina ua ia saunoa, sa matou faalogologo uma lava,” o le tala lea a Peresitene Hinckley i lona falelauasiga. “Sa ia fofogaina ma le talitonuga maumaututu lana molimau i le paia o le Alii o Iesu Keriso.”

Mo nisi faamatalaga e uiga i le soifuaga o Spencer W. Kimball, tagai i vitio Prophets of the Restoration i luga o le history.ChurchofJesusChrist.org poo luga o le polokalama o le Gospel Library.

Autu Fesootai: Afiafi Faaleaiga, Fausia o Malumalu, Talafaasolopito o Aiga ma Gafa