Uilifoti Uitilafi

Sa auauna atu Uilifoti Uitilafi o le Peresitene lona fa O Le Ekalesia a Iesu Keriso o le Au Paia o Aso e Gata Ai, i le va o le 1889 ma lona maliu i le 1898. O se tagatanuu o Connecticut ma sa papatisoina o ia i le 1833. Sa auai o ia le malaga a le Tolauapiga a Isaraelu ma sa auauna atu i ni misiona se tele.¹ Ina ua uma ona faauuina o ia o se Aposetolo i le 1839, sa auauna o ia o se sui o le Korama a Aposetolo e Toasefululua mo le silia ma le 50 tausaga. O ana apitalaaga sa tusia e le aunoa ma auiliili o loo tumau ona avea ma se tasi o punavai autu o le talafaasolopito muamua o le Ekalesia.

Ata o Uilifoti Uitilafi i le talaaga otooto.

Faaaloaloga a le Matagaluega o Talafaasolopito o le Ekalesia

Sa faaipoipo atu Uitilafi ia Phebe Whittemore Carter i le 1837. I le vaitaimi o le 1840 sa ia taliaina ai le faiga o faaipoipoga autaunonofo na aoao atu e Iosefa Samita, i le va o le 1846 ma le 1877, pe a ma le toafitu isi tamaitai sa faaipoipo i ai o ia. O ia o le tamā o se fanau e 34.²

I le 1877 na avea ai Uitilafi ma tagata muamua e auauna o se peresitene o le malumalu ina ua mae’a le Malumalu o St. George Iuta. Sa auauna o ia o se peresitene o lena malumalu seia oo i le 1884. Ina ua maliu Ioane Teila i le 1887, sa taitai e Uitilafi le Ekalesia i le avea ai ma Peresitene o le Korama a Aposetolo e Toasefululua, ma pe tusa ma le lua tausaga mulimuli ane, sa ia toe faatulagaina ai le Au Peresitene Sili ma na lagolagoina ai o le Peresitene o le Ekalesia.³

Ina ua uma ona sailia se faaaliga i le lumanai o le Ekalesia i le 1890, na maua ai e Uitilafi se taitaiga musuia e tuuina atu se pepa o faamatalaga na ta’ua o le Manifeso, lea na amatalia ai se suiga e o ese ai mai le faiga o faaipoipoga autaunonofo.⁴ O le mulimuli ai i se faaaliga i le 1894, sa ia faalauiloa atu ai ni suiga i le faiga o faamauga a le Ekalesia, aoao atu i le Au Paia e faamau i latou lava i o latou tuaa e tusa lava pe sa le’i auai o latou tuaa i le Ekalesia. O lenei faiga na suitulaga i le faiga masani o le faamauina o se tagata po o ni tuaa o se tagata i faifeautalai po o taitai o le Ekalesia e ala i faamauga vaetama. Ina ia lagolago i lenei galuega, sa amatalia ai e Uitilafi ni taumafaiga e fesoasoani i le alualu i luma o le suega o gafa, e aofia ai le faavaeina o le Sosaiete o Mea Tau Gafa a Iuta. Sa taitaia foi e Peresitene Uitilafi ia uluai valaauga o misiona i tamaitai nofofua, na amatalia ai se periota fou o auauna a tuafafine faifeautalai.

Mo nisi faamatalaga e uiga i le soifuaga o Uilifoti Uitilafi, tagai i vitio Prophets of the Restoration i le history.ChurchofJesusChrist.org ma i le polokalama o le Gospel Library.

Punaoa o le Ekalesia

Aoaoga a Peresitene o le Ekalesia: Wilford Woodruff (2004).

Wilford Woodruff, Journals and papers, 1828–1898, Church History Library, Salt Lake City.

“Wilford Woodruff,” Joseph Smith Papers, josephsmithpapers.org.

Talaaga o le Soifuaga

O loo tuuina atu i lomiga nei nisi faamatalaga e uiga i lenei autu. O le faasino po o lou fesootai atu i lenei punaoa, matou te le faamaonia pe faamautinoaina ia anomea po o manatu o le tusitala.

Alexander L. Baugh and Susan Easton Black, eds., Banner of the Gospel: Wilford Woodruff (Provo, Utah: Religious Studies Center, 2010).

Autu e Faatatau i Ai: Manifeso, Faamauga

Faamatalaga

1. Tagai i le Autu: Tolauapiga a Siona (Tolauapiga a Isaraelu).

2. Reid L. Neilson, ed., In the Whirlpool: The Pre-Manifesto Letters of President Wilford Woodruff to the William Atkin Family, 1885–1890 (Norman, OK: Arthur H. Clark, 2011), 204–206. I nisi o faitauga, na silia i le valu ni tamaitai sa faaipoipo i ai Uitilafi, e ui ina feteenai le au tusitalafaasolopito i le aofaiga sa’o. E tusa ma le toatolu o ana faaipoipoga autaunonofo na iu i le tetea. Tagai Laurel Thatcher Ulrich, A House Full of Females: Plural Marriage and Women’s Rights in Early Mormonism, 1835–1870 (New York: Knopf, 2017), 156–57, 266.

3. Tagai i le Autu: Au Peresitene Sili.

4. Tagai Folafolaga Aloaia 1.