“Ema Hale Samita,” O Autu o le Talafaasolopito o le Ekalesia
“Ema Hale Samita“
Ema Hale Samita
O Ema Samita, le faletua o Iosefa Samita, na faatinoina se matafaioi taua i le toefuataiga o le Ekalesia. O lona tina-faaletulafono, o Lusi Maki Samita, na viia Ema: “Ou te lei vaai lava i se tamaitai i lou olaga o le e onosaia ituaiga uma o vaivaiga ma faigata, mai i lea masina i lea masina, ma mai i lea tausaga i lea tausaga, faatasi ma lena lototele, naunautai, ma le onosai e le maluelue. … Sa felafoaiina o ia i luga o vasa o le le mautonu; … Na ia aafia i afa o sauaga, ma onosaia le ita mai o tagata ma tiapolo, … ia na faatoilaloina toeitiiti lava o isi fafine uma lava.”1
atatosi o Ema Hale Samita.
Na soifua mai i le aso 10 o Iulai, 1804, i Willingsborough (na iloa mulimuli ane o Haramoni), Penisilevania, o Ema Hale o le lona fitu o le fanau e toaiva a Isaako ma Elisapeta Lewis Hale. Sa nonofo le aiga mauoa i se faatoaga e 90-eka i le Vanu o le Vaitafe o Susikuana, lea na auina atu ai e Isaako aano o manu i vaa ma isi oloa i lalo o le vaitafe i Filatelefaia ma Patimoa.
Ao laitiiti, na atiina ae e Ema se fiafia tele i mataupu taulotu ma le tuuto atu i le Atua. Na amata ona lauiloa le Metotisi i le itu o Susikuana i le amataga o le 1800, ma na amata ai e Ema ona auai ma lona tina i le fitu o ona tausaga. O se masani faaleaiga ua taua ai faapea na faalogoina e Isaako Hale lona afafine laitiiti o tatalo mo ia i le togavao e lata ane i lo latou fale ma o lena mea na saofaga i lona liua faaleagaga. Atonu na auai atu foi Ema i le aoga faalelotu a tamaitai i le Taulaga o Great Bend, ma na ia faiaoga mulimuli ane i le aoga.2
Sa 21 tausaga o Ema ina ua ia feiloai i le ia Iosefa Samita e 19-tausaga i le faaiuga o Oketopa i le 1825. Na sau Iosefa i sautesisifo mai Niu Ioka e saili galuega i le Vanu o Susikuana. O le le lava o lana aoga ma punaoa na faafeagai i le tulaga maualuga o Ema, ae na vave lava ona fiafia Ema i lona tagata ma ona uiga lelei. Na la faamasani mo ni nai masina ao galue Iosefa e faaleleia lona tulaga tautupe. Na tetee Isaako ma Elisapeta i le faigauo, ma na le fiafia i sailiga a Iosefa faalelotu ma lona galue ai mo Iosia Stowell, lea na faafaigaluegaina Iosefa e fesoasoani ia te ia i le eliina o ni oa siliva faapea na leiloa i le eria. Na sosola Ema ma Iosefa i le aso 18 o Ianuari, 1827, i South Bainbridge, Niu Ioka, ona o ai lea ma nonofo ma le aiga o Samita. Sa la toe foi mai i Penisilevania ia Tesema ina ia nonofo latalata i lona aiga a o galue i le faaliliuga o le Tusi a Mamona.
Na fanauina e Ema se pepe tama lea na maliu lava ina faatoa fanau mai i le aso 15 o Iuni, 1828, lea na toeitiiti lava a maliu ai foi ma ia. Ia Setema i le 1830, sa la siitia atu ai ma Iosefa i Feiete, Niu Ioka, e nonofo ma le aiga o le au Uitimera. Na toe tuua e Ema le Vanu o Susikuana ma le aiga o Hale mo le taimi mulimuli lava, e lei toe vaai lava i ona matua ma le tele o isi tagata o le aiga. Na ia fanauina mulimuli ane ni fanau se toaiva ma vaetamaina le isi toalua, o le toafa o na fanau na maliliu i le fanau mai pe i le faatoa uma ona fanau mai, ma o le toalua na maliliu o laiti.
Auaunaga faaleEkalesia
Na papatiso Ema i totonu o le Ekalesia a Keriso e Oliva Kaotui i Kolesavile; Niu Ioka, i le aso 28 o Iuni, 1830, ina ua faatoa uma ona faatuina le Ekalesia. Na faapotopoto ane se aofia vevesi, ma na faatuai ai le faamauina o Ema, ma na pueina ma lokaina Iosefa i moliaga o amioga le taupulea. Ina ua toe foi mai Iosefa i Haramoni, na ia mauaina se faaaliga mo Ema, lea ua iloa nei o le Mataupu Faavae ma Feagaiga 25, ma taua ai o ia “o se tamaitai filifilia” ma uunaia ai o ia ina ia faamafanafana ma lagolagoina Iosefa i ona puapuaga. Na tofia foi o ia ina ia avea ma tusiupu ia Iosefa, ia faamalamalama atu tusitusiga paia, ma apoapoai atu i le Ekalesia, ma faamaopoopo le lolomiga o musika paia i se tusipese.
Sa fesoasoani Ema ia Iosefa o se tusiupu mo se taimi i le popofou o le faaliliuga o le Tusi a Mamona. Na vave lava ona ia amata ona filifilia viiga e usuina i sauniga lotu, ma na galulue ma W. W. Phelps e lolomi nisi o na viiga i le 1832 i le nusipepa a le Ekalesia mo se taimi ao masani ona tauaveina e alii failautusi le tiutetauave mo le filifilia o viiga. Na lolomiina le tusipese muamua lava a le Au Paia o Aso e Gata Ai i Katelani i le 1835 i lalo o le suafa o Ema Samita.
Na auauna atu Ema i e matitiva: i Katelani, na la tuufaatasia ai ma Elisapeta Ana Whitney ni taumafataga mo e matitiva, ma i Navu, na ia tatalaina lona fale i e mamai, matua oti, ma leai ni aiga. I le avea ai ma “tamaitai filifillia,” na ia pulefaamalumalu i le Aualofa a Tamaitai o Navu mai i lona faavaeina i le 1842 seia oo i le 1844. O lana auaunaga i le Aualofa, e ui i lea, na ausia ai le sili atu nai lo galuega alofa. I le avea ai ma se peresitene, na aoaoina e Ema tamaitai i aoaoga faavae, puleaina le auai, ma puipuia faalauaitele mataupu faavae o le amio mama. O Ema le tamaitai muamua lava na mauaina sauniga o le malumalu; ona ia faia lea o uluai sauniga mo isi tamaitai i nei sauniga paia. I le avea ai ma faletua o le taitai o Navu, na ia talimalo i taitai o malo i lona fale, auai faatasi ma Iosefa i faapotopotoga lautele i faatasiga faalauaitele ma faalenuu, ma tuuina atu talosaga faalemalo e lagolago ai le Ekalesia ma lana tane.
Sootaga ma Iosefa
E ui lava i faigata o le mativa, faamalosia e tuua lo la fale, ma sauaga, na faatumauina pea e Ema ma Iosefa se alofa loloto ma se sootaga mafana o le tasi ma le isi. Na feagai le la faaipoipoga ma ni luitau uigaese ona o faigata o le faatuina ma le taitaia o le Ekalesia. Na la onosaia faatasi le pau i tulaga tautupe ma taufaafefe e faasaga i le soifua o Iosefa i Katelani, Ohaio; le sauaina o tagata o le Ekalesia i Misuri; ma le tetea ese ona o le faafalepuipuiina o Iosefa i le Falepuipui i Liperate. O a la tusi ua faaalia ai e le gata i o la tulaga faigata ae faapea foi lo la tuuto i le tasi ma le isi. “O ou lagona mo oe e oo i le faavavau faavavau lava,“ Na tusi atu ai Iosefa ia Ema i le 1838.3 Na tusi atu Ema ia te ia i le Falepuipui o Liperate i le 1839: “O loo ou ola pea ma ou te naunau pea ia puapuagatia pea pe afai o le finagalo lea o le Lagi agalelei, ia ou faia mo oe.”4
Na faigata tele ona talia e Ema le mataupu faavae o le autaunonofo. Na faailoa atu e Iosefa le faatinoga ma le faaeteete ma le auauai, ma faaipoipo atu i le tele o isi ava, o i latou uma taitoatasi na tauto mai o le a tausia lo latou auai faalilolilo. E itiiti lava se mea o loo iloaina e uiga i le malamalama ma lagona o Ema e uiga i nei faaipoipoga, o nisi na i ai ni tautinoga i lenei olaga ao isi na aafia ai ni tautinoga mo na o le olaga a sau. Ae ui i lea, ua manino mai na taofia e Iosefa le malamalama i nisi o nei faaipoipoga mai ia Ema. Ina ua ia [Iosefa] faasoa atu se faamatalaga itiiti lava ia te ia, na ia tauivi e talia, ma fesiitai ai lona malamalama ma le lagolagosua mo se taimi. I le amataga o le 1843, e foliga mai na taliaina e Ema le autaunonofo ma na ioe atu lava ia i ai ma molimauina le faaipoipo atu o Iosefa i ni tamaitai se toafa. Ae e oo atu ia Iulai, na toe suia ai ona uiga faaalia i le faatinoga, ma na ia susunuina ai se kopi o tusitusiga o le faaaliga i autaunonofo lea ua maua i le Mataupu Faavae ma Feagaiga 132. E le o i ai se faamaumauga na faia e Iosefa i nisi faaipoipoga ina ua mavae le tautoulu o le 1843.5
E seasea lava ona talanoa Ema e uiga i le faatinoga ina ua maliu Iosefa. Ina ua maliu o ia i le 1879, na lolomiina e lana fanau tama se tusitusiga o se faatalanoaga lea na ia matuai teena ai lava le faia e Iosefa o ni autaunonofo faatagaina.6 E ui lava i faigata faalelotu ma faalelagona i lenei faatinoga, ae na tumau pea le alofa tele o Ema mo Iosefa. Ia Iuni 1844, ao latalata lava i le maliu o lana tane, na tusia ai e Ema, “Ou te manao ma lou loto atoa ina ia faamamaluina ma faaaloalogia lau tane o lou ulu, ia ola pea i lona talitonuina ma e ala i le galue ia ogatusa ma ia e faatumauina le nofoaga na tuuina mai e le Atua ia te au i ona autafa.“7
I Tausaga Mulimuli Ane
O le maliu o Iosefa i le aso 27 o Iuni, 1844, na oo mai ai se tulaga o le le mautonu maoae mo Ema. E faaopoopo atu i le faavauvau i le maliu o lana tane, na maitaga foi o ia i le la tama mulimuli. O le leai o se uili aloaia na tuua ai le Ekalesia faapea foi ma le aiga o Ema i ni tulaga le mautonu faaletupe. Na tulai mai ni feteenaiga i le va o Ema ma Polika Iaga, le Peresitene o le Korama a le Toasefululua, e uiga i le lautele o aia tatau a le aiga o Samita ma le Ekalesia i meatotino o loo i le suafa o Iosefa ia na tatau ona totogi ai ana aitalafu. Ina ua tuua le tele o le Au Paia mo le Vanu Tele i le 1846, na nofo Ema i Navu, ma maua le Maota Tele ma isi lava mea na ia mafai ona maua mo le tausia o lana fanau.
Ema Samita i ona tausaga mulimuli.
I le aso 23 o Tesema, 1847, na faaipoipo ai Ema ia Lewis C. Bidamon, e le o se Mamona na nofo i Navu. I le 1860, na auai Ema i le Ekalesia Toefaatulagaina a Iesu Keriso o le Au Paia o Aso e Gata Ai (na toe faaigoaina mulimuli ane o le Nuu o Keriso). O lana tama tama o Iosefa Samita III na avea ma peresitene o le Ekalesia Toefaatulagaina i lona faatoa faavaeina i le 1860, ma lona uso o Alesana Hale Samita o lona fesoasoani.
E ui ina faatumauina le tetee o Ema ia Polika Iaga ma le Au Paia o Aso e Gata Ai i Iuta, na faatumauina pea lona talitonuga i le matafaioi faaperofeta a Iosefa Samita ma i le moni o le paia o le Tusi a Mamona. “O lo’u talitonuga o le Tusi a Mamona e moni a’ia’i lona paia—e leai ma sina o’u masalosalo i ai,” na ia molimau ai i se faatalanoaga na ia tuuina atu i le matua o lona soifua.8 Na maliu Ema Hale Samita Bidamon i Navu i le aso 30 o Aperila, 1879, ma o loo lagomau i tafatafa o Iosefa. O lona suafa ma lona tagata na faamamaluina ma na malamalama sese i manatu o le Au Paia o Aso e Gata Ai, ae o ana faatinoga ma le faatosinaga e le mafai ona tafieseina.
Autu Fesootai: Joseph and Emma Hale Smith Family [Aiga o Iosefa ma Ema Hale Samita, Hymns [Viiga], Female Relief Society of Nauvoo [Aualofa a Tamaitai o Navu]