Fetuunaiga i le Faatulagaga o le Perisitua

I le talafaasolopito atoa o le Ekalesia, o loo fofogaina mai ai e Peresitene o le Ekalesia ia manaoga ma avanoa o le Ekalesia ua tupuolaola e ala i le fetuutuuna’i o le faatulagaga o le perisitua. I le avea ai o se tasi o toefetuunaiga iloga o korama o le perisitua i le taitaiga a Polika Iaga, na amata faamamaluina i le 1877. Na faamautinoa mai e le Aposetolo o Osona Palate ia le Au Paia o Aso e Gata Ai e faapea, o le fetuunaiga o se vaega e tatau ai o le faatulagaga o le perisitua. “O le faatulagaga e tatau ona faasolosolo i lea sitepu ma lea sitepu,” na ia aoao mai ai,“mai lea tikeri i le isi, e faapei lava ona faateleina tagata ma tuputupu ae i le malamalama i mataupu faavae ma tulafono o le malo o le Atua, ma a o faalauteteleina foi o latou tuaoi.”¹ Pe na afua mai i faaaliga o i le Mataupu Faavae ma Feagaiga pe tauala mai i faatonuga musuia mai taitai o le Ekalesia o loo fofogaina mai i saunoaga o konafesi aoao po o tusitaulima, o fetuunaiga faifaipea i le mamanu faalelotu o le Ekalesia o loo atagia mai ai le taua tele o le perisitua.

O Uluai Tofi ma Korama

Mo le Ekalesia sa faatoa faatulagaina a Keriso i le 1830, o Mataupu ma Feagaiga (na faalautele mulimuli ane i le Mataupu Faavae ma Feagaiga 20) o faavae ia o le faatulagaga o le perisitua. O le pepa tusitusia na otooto mai ai sauniga (e pei o le papatisoga), o tofi eseese (e pei o le ositaulaga ma le toeaina), ma se faiga mo le faatautaia o pisinisi (konafesi faalekuata). A o faatupulaia le faitau aofai o le Ekalesia ma ua suia foi manaoga, na folasia mai ai e faaaliga mulimuli ane ia sauniga faaopoopo, o tofi, ma faiga faalefaalapotopotoga. Na fesuia’i faaupuga ma manatu faavae e uiga i le perisitua i totonu o le lima tausaga o le Ekalesia.²

Na tulai mai fetuunaiga tetele i Katelani, Ohaio, ma i Navu, Ilinoi, ina ua tali atu Iosefa Samita i le faaaliga lea na faatonuina ai o ia i le toefuataiga o le perisitua i lona atoatoaga. I le 1835, a o sauniuni atu mo le faapaiaina o le Malumalu i Katelani, sa faatuina ai e Iosefa ia korama ma le faagasologa o korama e tusa ai ma le faaaliga ma le fautuaga. Sa ia faaalia le faamalieina faapea ua “maea [le] faatulagaga o le ekalesia” ina ua mavae le faaaliga sa ia taulimaina ma ua mafai e korama o le perisitua ona faaauau e fausia le malo o le Atua.³ I le 1842, sa ia fautuaina ai le faatulagaina o le Sosaiete a Tamaitai o le Aualofa i Navu “e mulimuli i le mamanu, po o le faatulagaga, o le perisitua” ma folasia mai ai sauniga faaopoopo o le malumalu.

Sa ogatasi lava ia pulelaa i le Malumalu o Katelani ma tofi eseese o le perisitua i le 1835–1836.

Toefaatulagaina o Korama, Uarota, ma Siteki

Ina ua mavae atu Iosefa Samita, sa tulai mai nisi o fesuiaiga aupito sili ona ogaoga i le faatulagaga o le perisitua i lalo o le taitaiga a Polika Iaga i le taufaaiuiuga o le 1870 ma Iosefa F. Samita i le popofou o le 1900. I le 1876 ma le 1877, sa tautalagia ai e Polika Iaga ia tulaga faaletonu i lotoifale o uarota ma siteki faatasi ai ma se fuafuaga e faalaugatasia ai le mamanu ma le faavasegaga o siteki, uarota, korama, ma tofi o le perisitua. Sa le toe faaaogaina le tulaga o se ”siteki tutotonu”, ma ogatusa lelei ai siteki uma.⁴ O ‘auga fou ua auiliili ai le ala e faatulaga ai se siteki po o se korama. O le a le toe galulue auauna ia Aposetolo i au peresitene i lotoifale, ma epikopo, ae le o peresitene o uarota, o le a pulefaamalumalu i uarota. Sa i ai se filifili sa’otu o le tiutetauave o peresitene o siteki ma epikopo, e aumaia ai le ogatusa lelei i uarota uma ma siteki ma taitaia ai korama i luga o laina manino o le pule. Sa tauaofia fonotaga a Korama i vaitaimi laugatasia.⁵

Pe tusa o le 1906 sa faamamafaina ai e Iosefa F. Samita le faauuina o alii talavou i le Perisitua Arona ma sa fautuaina ai vaitausaga o le matutua mo le faauuina i tofi taitasi, e faapei foi o le vaevaega o vasega e fua i le matutua lea sa folasia mai talu ai e taitai o Tamaitai Talavou. Sa ia faatinoina se suesuega maioio o le pulega o le Ekalesia, ma saili ia faatuina se tulaga ogatusa lelei faale-faavae i le auala e faatino ai e tofi o le perisitua o latou tiute. Sa ia faamamafaina mai e faapea o le pule e pulefaamalumalu ai i se korama po o se faalapotopotoga, e moomia ai se faatagaga faapitoa e faaaoga ia “ki o le perisitua”:

“O le Perisitua i lona aotelega o le pule ua tuuina mai i tagata latou te galulue ai mo le Atua. O alii taitasi ua faauuina i soo se vaega o le Perisitua, ua i ai lenei pule ua faasafuaina atu ia te ia. Peitai e manaomia, o gaoioiga uma e faia i lalo o lenei pule, e ao ona faia … i le taimi auala e tatau ai, ma mulimuli i le faatulagaga e tatau ai. O le mana e taitaia ai ia galuega, ua i ai ki o le Perisitua.”⁶

Sa faamamafaina e Peresitene Samita e faapea o le faatinoga o tiute o korama uma sa pulea e ala i le faaaogaina o ki ua faasafua atu i peresitene o korama i lalo o le taitaiga a le Peresitene o le Ekalesia, o le o loo umia ki uma na maua mai i le Alii mo le Ekalesia.⁷

Sootaga Maopoopo o le Perisitua ma le Ekalesia Aoao

Ua uuna’ia e le tupuolaola o le Ekalesia le tele o faavasegaga o le lelei na’ua faalefaalapotopotoga o uarota, siteki, ma polokalama i le gasologa o le seneturi lona 20. I le 1923 sa faatulagaina ai e Peresitene Heber J. Grant se siteki i Los Angeles, i Kalefonia—o se aai sa toalaiti ai le Au Paia.⁸ O i na se’e ese mai ai le mamanu mai le soloa’iga i le seneturi lona 19 o le faatutuina o siteki i na o nuu sa toatele ai le Au Paia o Aso e Gata Ai. Sa faatuina foi e Peresitene Grant se tofiga fou, Fesoasoani i le Au Toasefululua, e faamama avega ai i tulaga manaomia ua faateleina i luga o le Korama a Aposetolo e Toasefululua. I le va o le 1941 ma le 1976, e 38 alii na galulue auauna o ni Fesoasoani i le Toasefululua, seia oo ina valaauina i latou e Peresitene Spencer W. Kimball i le Korama Muamua a Fitugafulu ma faamutaina ai le tofiga.

O Le Au Peresitene Sili ma le Korama a Aposetolo e Toasefululua na faaauauina pea ona faafaigofieina ausilali i vaega o tulaga o taitaiga a le Ekalesia e pei ona taua ai “sootaga maopoopo.” Na mulimuli ane faatautaia o le Sootaga Maopoopo o le Perisitua, o lea faiga sa faaaoga ai ituaiga eseese i taimi eseese: mai taumafaiga a Tavita O. MaKei o se Aposetolo i le vaitau o le 1910 ina ia tuufaatasia ai mataupu aoaoina a le Ekalesia i se toefaatulagaga o ausilali i lalo o komiti e taitai-faaleperisitua i le taimi o au peresitene a Tavita O.MaKei, Iosefa Filitia Samita, ma Harold B Lee.

Sa sosoo mai ai e le aunoa ia fetuunaiga, e ui o le tele sa i ai aafiaga faasoloatoa i tulaga aoao faapea le lotoifale. Sa faatulagaina e Peresitene Spencer W. Kimball se korama a Fitugafulu Pulega Aoao, ae faamuta le valaauga o le Peteriaka Aoao o le Ekalesia, ma sa mauaina le faaaliga e tuuina atu le faauuga o le perisitua i tamatane o e tupuga mai Aferika, mo le uluai taimi talu mai le vaitaimi o le 1840.⁹ I le 1986 sa fofogaina mai ai e Peresitene Ezra Taft Benson le faamutaina o korama a Fitugafulu i siteki.¹⁰ I le taufaaiuiuga o le 1980, sa folasia mai ai e Peresitene Gordon B. Hinckley ia Pule eria (na mulimuli ane ua toefaavasegaina o Fitugafulu Eria) ina ia atili faafetaia’ia ai manaoga o se Ekalesia ua tupuolaola i le lalolagi atoa.¹¹

Na faaauau nisi fetuunaiga o le faatulagaga o le perisitua i le popofou o le seneturi lona 21. I le 2018, sa le toe faaauauina ai vaega o faitaulaga sili i uarota, a o i latou uma e umia le perisitua Mekisateko ua avea o ni o le korama a toeaina, ae peitai, o korama a faitaulaga sili o le siteki (ua na o i latou e i ai valaauga o ni peteriaka o siteki po o e o i le au peresitene o le siteki, fautua maualuga, po o le au epikopo) e tumau lava. I le 2019, sa fofogaina mai ai e le Au Peresitene Sili e faapea o alii talavou o le a agavaa mo le faauuga i le Perisitua Arona i le amataga o le tausaga faalekalena o le a atoa ai lo latou ta’i 12 tausaga le matutua, nai lo le faatalitali mo o latou aso fanau, e pei o le faiga sa i ai talu ai.¹²

Punaoa o le Ekalesia

Barbara Jean Jones, “O Se Seneturi o le Perisitua Arona,” New Era, Jan. 2000, 30–31.

Lisi o Tusi

William--G. Hartley, My Fellow Servants: Essays on the History of the Priesthood (Provo, Utah: BYU Studies, 2010).

David J. Whittaker ma Arnold K. Garr, eds., A Firm Foundation: Church Organization and Administration [O Se Faavae Mautu: Faatulagaga o le Ekalesia ma le Taitaiga] (Provo, Utah: Religious Studies Center, 2011).

Thomas G. Alexander, Mormonism in Transition: A History of the Latter-day Saints, 1890–1930, 3rd ed. (Salt Lake City: Greg Kofford Books, 2012).

Autu Fesootai: Toefuataiga o le Perisitua Arona, Toefuataiga o le Perisitua Mekisateko, Female Relief Society of Nauvoo

Faamatalaga

1. Orson Pratt, Discourse, May 20, 1877, i le Deseret News (July 18, 1877), 370.

2. Tagai Autu: Toefuataiga o le Perisitua Mekisateko, Toefuataiga o le Perisitua Arona.

3. Tagai Autu: Kirtland Temple, Temple Endowment, Anointed Quorum (“Holy Order”), Female Relief Society of Nauvoo; tagai foi “Joseph Smith’s Teachings about Priesthood, Temple, and Women,” Gospel Topics Essays, topics.ChurchofJesusChrist.org; Joseph Smith, “Journal, 1835–1836,” 12 Nov. 1835, 32, josephsmithpapers.org; Joseph Smith, “Journal, 1835–1836,” 30 Mar. 1836, 189, josephsmithpapers.org; Iosefa Samita, “Tusi i le Ekalesia, 7 Setema 1842 [D&C 128],” josephsmithpapers.org.

4. I le va o le 1847 ma le 1876, o nisi taimi sa faatino ai e le Siteki a Sate Leki le pule i isi siteki i Iuta, ae sa matuai tele naua foi le eseesega o mamanu faalelotoifale o faalapotopotoga i le taimi lea. Tagai Autu: Uarota ma Siteki; Brandon S. Plewe, “The Emergence of Modern Stakes and Wards: 1834–1909,” in Brandon S. Plewe, ed., Mapping Mormonism: An Atlas of Latter-day Saint History, 2nd ed. (Provo, Utah: Brigham Young University Press, 2014), 128–29; William G. Hartley, “The Priesthood Reorganization of 1877: Brigham Young’s Last Achievement,” BYU Studies, vol. 20, no. 1 (1979), 5.

5. Hartley, “The Priesthood Reorganization of 1877,” 3–36.

6. Iosefa F. Samita, “Editor’s Table: Answers to Questions,” Improvement Era, Jan. 1901, 230; faatusilima i le uluai kopi.

7. Craig James Ostler, “Joseph F. Smith on Priesthood and Church Government,” i le Joseph F. Smith: Reflections on the Man and His Times, ed. Craig K. Manscill, Brian D. Reeves, Guy L. Dorius, and J. B. Haws (Provo, Utah: Religious Studies Center; Salt Lake City: Deseret Book, 2013), 199–220; tagai foi Iosefa F. Samita, Lauga, October 6, 1904, Conference Report, October 1904, 1–6.

8. Richard O. Cowan and William E. Homer, California Saints: A 150-Year Legacy in the Golden State (Provo, Utah: Religious Studies Center, 1996), 263–82.

9. Tagai Mataupu Faavae ma Feagaiga, Tautinoga Aloaia 2.

10. Tagai Autu: Korama a Fitugafulu; Ezra Taft Benson, “Uiga FaaleAtua o le Matai,” Liahona, Ian. 1987, 48.

11. Earl C. Tingey, “Fitugafulu Pule Eria: ‘E Molimau Atu i Lo’u Igoa i le Lalolagi Uma.’” Liahona, Ian. 2003, 50–56.

12. “Suiga Ua Fofogaina Mai i Korama o le Perisitua Matutua a le Ekalesia,” Mat. 31, 2018; “Ua Fofogaina Mai Suiga o Tausaga o le Matutua mo le Alualu i Luma ma Faauuga o Talavou,” Dec. 14, 2018.