Faapaiaga o Malumalu ma Tatalo o Faapaiaga

O le Tusi Paia o loo i ai tala auiliili o le ala na tuuto atu ai e Isaraelu anamua o latou falefetafai ma malumalu e vaetofia o ni nofoaga paia.¹ Sa faapena foi ona tuuto e le Au Paia o Aso e Gata Ai ia malumalu ma isi avanoa paia mo le faaaogaina i le galuega a le Alii, e amata i le Malumalu o Katelani.

E faaopoopo i sauniga aloaia o faapaiaga na faia i malumalu ua maea, sa faavae ai e uluai Au Paia o Aso e Gata Ai se mamanu faasauniga mo le faapaiaina o tulaga o malumalu. I se tulaga mataituina, sa faia ai e uluai Au Paia ni sauniga faapitoa i le tuuina ifo o maatulimanu mo malumalu i Initipene, Misuri i le 1831; Katelani, Ohaio, i le 1833; Fa Uesi, Misuri, i le 1838; Navuo, Ilinoi, i le 1841; ma le Aai o Sate Leki, Iuta, i le 1853.² O sauninga sa aofia ai pesepesega, lauga, soloaiga o sauniga, ma tatalo, ma, i Navu, o se savali faaaloalo a le militeli ma se faaili pu. Na amata i Navu, o se tasi o maatulimanu sa faia se ava ina ia mafai ai ona teu ai i totonu tusiga faamaumau ma isi measina e fesootai i le malumalu. O loo faia pea lava lea faiga i ona po nei, e ui ua le toe faia ni sauniga iloga o maatulimanu. Mo nisi malumalu, e aofia ai Navu ma le Aai o Sate Laki, o le tuuina o le maataualuga o le malumalu sa faailogaina foi i se sauniga, e aofia ai musika, tatalo, ma alaga o le “Osana.”

Pe a maea le fauga, o faapaiaga e saunia ai malumalu mo o latou faamoemoega paia. O le faapaiaga o le Maota o le Alii i Katelani i le aso 27 o Mati, 1836 ua faatu ai se mamanu mo faapaiaga o malumalu i le lumanai. O le sauniga i le aso atoa sa aofia ai lauga, musika, o le faatautaiga o le faamanatuga, o se tatalo o le faapaiaga, ma le Alaga Osana. E toatele le Au Paia o Aso e Gata Ai o e sa auai ai i lenei faapaiaga muamua o le malumalu sa tusifaamaumauina ni faaaliga maoae faaleagaga, e aofia ai le leo o se matagi malosi ua agi tele mai, o le tautatala i gagana, o faaaliga ma le asiasiga a agelu. Sa faia se isi sauniga o le faapaiaga i le fa aso mulimuli ane, na faia mo i latou sa le mafai ona maua se faatagana i le faapaiaga sa matuai tumu naua. I Katelani, sa tatala ia sauniga i tagata lautele. I Navu, sa faia ai sauniga patino o le faapaiaga ma mo le lautele. Mo malumalu mulimuli ane, e na o tagata o le Ekalesia sa tuuina atu i ai pepa ulu po o pepa faataga sa faataga i sauniga o faapaiaga. O le faiga o sauniga e ta’i faafia ona fai o le faapaiaga o le malumalu ua faifai pea, ia mafai ai e se aofaiga tele o tagata o le ekalesia ona auai ai.

Na fofogaina e Iosefa Samita le tatalo o le faapaiaga mo le Malumalu o Katelani, na faitauina mai se anotusi ua uma ona saunia. Sa tusifaamaumauina le tatalo musuia e Iosefa Samita, Oliva Kaotui, ma isi i le aso i luma mai o le faapaiaga.³ Mo malumalu na mulimuli mai, o tatalo o faapaiaga na tusia e se taitai pulefaamalumalu o le Ekalesia, e tofu sauniaina mo lona lava malumalu. O tatalo e ole atu ai i le Alii ia talia le taulaga o le malumalu ma talosagaina ai o Ia mo le faapaiaga o le malumalu ma le puipuiga. E tele taimi, aemaise i malumalu i le amataga, o tatalo sa faamanuiaina ai elemene sa faaaoga i le fauga---o maa, sima, oneone, palasa, po o faamalama. O le tele o tatalo o faapaiaga sa faaaofia ai le atofaina o potu patino i le malumalu, ma faamamafaina o latou faaaogaaga patino. O nei tatalo e talosagaina ai le afio ai o le Alii ma atofa ai le malumalu o Lona maota, ma faailoga ai o se nofoaga o le sootaga ma le lagi.

O i latou o e auai i se faapaiaga o le malumalu e auai i le faatinoina o le Alaga Osana. O lenei alaga o se faatusa o le faaneetaga na ofo atu e i latou na mulimuli ia Iesu Keriso i Lona afio faatupu atu i Ierusalema.⁴ E laulaututu le potopotoga, talotalo solosolo papae, ma aufaatasi i le alagaina faatolu o upu, “Osana, Osana, Osana i le Atua ma le Tamai Mamoe.”⁵ E faaiu le alaga i le “Amene, Amene, ma Amene.” I le Malumalu o Katelani, o le tatalo sa sosoo ma le lagiina o le viiga “Osana i le Atua ma le Tamai Mamoe,” lea ua lauiloa i ona po nei “Le Agaga Paia.” O lenei viiga sa lagiina i faapaiaga o malumalu uma talu mai lena taimi.

I le va o le 1999 ma le 2002, o sauniga o faapaiaga o ni nai malumalu fou faatoa fauina i nofoaga faasolopito iloga, e aofia ai Palamaira, Niu Ioka, Winter Quarters Nebraska, ma Navu, Ilinoi, sa faasalalau i luga o se polokalama malupuipuia faasatelite, sa faatagaina ai tagata o le Ekalesia i nofoaga maotua e auai ai. O iina na faavae ai se mamanu o le faasalalauina o faapaiaga o malumalu i nofoaga tutotonu o siteki i le lotoifale ina ia mafai ai e tagata agavaa uma i itulagi o malumalu ma o nisi taimi o eria i fafo atu ona auai ai.⁶

Sa faapena foi ona tuuto e le Au Paia o Aso e Gata Ai le tele o isi nofoaga mo le galuega a le Atua. Ua aofia ai i na nofoaga ia tapeneko, faletapuai, falefetafai o le Aualofa, ma fale o aiga. O atunuu po o eria o le lalolagi ua faapaiaina foi mo le talaiina o le talalelei.

Punaoa o le Ekalesia

Gordon B. Hinckley, “Why These Temples?” Ensign, Aug. 1974, 37–47.

“Minutes and Prayer of Dedication, 27 March 1836 [DC 109],” in Brent M. Rogers, Elizabeth A. Kuehn, Christian K. Heimburger, Max H Parkin, Alexander L. Baugh, and Steven C. Harper, eds., Documents, Volume 5: October 1835–January 1838. Vol. 5 of the Documents series of The Joseph Smith Papers, edited by Ronald K. Esplin, Matthew J. Grow, and Matthew C. Godfrey (Salt Lake City: Church Historian’s Press, 2017), 188–209.

Talaaga o le Soifuaga

O loo tuuina atu i lomiga nei nisi faamatalaga e uiga i lenei autu. O le faasino po o lou fesootai atu i lenei punaoa, matou te le faamaonia pe faamautinoaina ia anomea po o manatu o le tusitala.

D. Arthur Haycock, “Temples: LDS Temple Dedications,” in Daniel H. Ludlow, ed., Encyclopedia of Mormonism (New York: MacMillan, 1992), 4:1455–56.

Autu Fesootai: Kirtland Temple, Solemn Assemblies, Temple Endowment, Dedication of the Holy Land

Faamatalaga

1. Tagai Numera 7; 1 Tupu 8

2. E ui ina e lei maea ia uluai malumalu i Misuri, ae o loo tumau pea maatulimanu i nofoaga e fai ma faamanatu.

3. Tagai i le Faatomuaga Faasolopito i “Minute ma le Tatalo o le Faapaiaga, 27 Mati 1836 [DC 109],” in Brent M. Rogers, Elizabeth A. Kuehn, Christian K. Heimburger, Max H Parkin, Alexander L. Baugh, and Steven C. Harper, eds., Documents, Volume 5: October 1835–January 1838. Vol. 5 of the Documents series of The Joseph Smith Papers, edited by Ronald K. Esplin, Matthew J. Grow, and Matthew C. Godfrey (Salt Lake City: Church Historian’s Press, 2017), 188–91.

4. Tagai Mataio 21:1, 8–9; Mareko 11:8–10; Ioane 12:12–13.

5. Tagai 2 Nofoaiga a Tupu 5:11–14; Iopu 38:7; Mataio 21:1–11; 3 Nifae 11:17; Mataupu Faavae ma Feagaiga 19:37; 36:3; 39:19; 124:101.

6. Gordon B.Hinckley, “O Lenei Tausaga Maoae Faameleniuma,”; Liahona, Ian. 2001, 80–84. I le atinaeina faasolopito o le alaga, tagai Jacob W. Olmstead, “From Pentecost to Administration: A Reappraisal of the History of the Hosanna Shout,” Mormon Historical Studies, vol. 2, no. 2 (Tautoulu 2001),, 7–37.