Sauaga o le Itumalo o Siakisone

Ia Iulai 1831, sa maua ai e Iosefa Samita se faaaliga na folafola mai o le laueleele o siomiaina le aai o Initipene i le Itumalo o Siakisone, Misuri, o le nofoaga lea sa folafolaina o le aai o Siona ma le “nofoaga autu” mo le faapotopotoina o le Au Paia.¹ Mo le lua tausaga na sosoo ai, sa malaga atu ai le Au Paia i le Itumalo o Siakisone e fausia le aai o Siona, ma i le taumafanafana o le 1833, e tusa ma le 1,200 le Au Paia sa nonofo i le itumalo.

Ata na tusia o tagata leaga o loo osofaia se ofisa lomitusi — Mafaufauga a le Tusiata o le aso 20 Iulai, 1833, osofaiga o le ofisa lomitusi a le Ekalesia i Initipene, Misuri.

O nei tagata o le Ekalesia sa fegalegaleai ma tagata nofoia e le o ni Mamona, ma sa faateleina ia eseesega i le va o vaega e lua. Na aumaia e le Au Paia o Aso e Gata Ai ni talitonuga uigaese, e aofia ai se talitonuga o faaaliga faaauau pea, meaalofa faaleagaga, ma le manatu na folafola mai e le Atua le laueleele o siomia ai Initipene ia i latou o se tofi. E faaopoopo i ai, o le toatele o le Au Paia na o mai mai i setete i le matu, lea e faasaina ai le nofo pologa pe ua soloia, ae o le toatele o i latou e le o ni Mamona na o mai mai Saute. Na fefefe Tagata Misuri i le faateleina o le aofai o le Au Paia o le a le pine ae puleaina le itumalo i tulaga faaupufai ma tamaoaiga. O le toatele o i latou na tetee i le Au Paia o tagata lautele ma taitai faalelotu na mananao e aveese tagata o le Ekalesia mai le itumalo.

O se lomiga i le masina o Iulai i totonu o le nusipepa a le Au Paia o Aso e Gata Ai The Evening and the Morning Star sa faateteleina ai le popole o Tagata Misuri e uiga i sauaga. Na talanoaina e le faatonu faʻafitauli faaletulafono e fesoota’i ma le femalagaaiga a tagata uli saoloto liliu mai i Misuri, o se setete o le nofo pologa. E toatele tagatanuu na lagonaina le faatonu--ma, i se faaopoopoga, na faamoemoe le Ekalesia e faamalosia ia femalagaaiga. I le aso 20 o Iulai, na talosagaina ai e se vaega o tagata leaga le Au Paia e o ese ma le Itumalo o Siakisone, ma ina ua teena e taitai o le Ekalesia, sa osofaia e tagata leaga le ofisa lomitusi a le Ekalesia, sa latou togiina le masini lomitusi i fafo le faamalama, faasalalau solo lomiga i le auala, ma talepe i lalo puipui o le ofisa lomitusi. O isi sa valitaina ma faafulumoaina ia Eteuati Paterika, le epikopo o le Ekalesia i Misuri, ma Salesa Aleni, o se isi tagata o le Ekalesia, i le nofoaga faitele. Na taape tagata leaga ina ua maua mai se maliliega mai taitai o le Ekalesia o le afa o le Au Paia o le a tuua le itumalo ia Ianuari 1, 1834, ma le vaega o totoe ia Aperila 1.

I nai masina na sosoo ai, sa suesueina atili ai e taitai o le Ekalesia i Misuri a latou filifiliga faaletulafono e tusa ai ma le fuafuaga o le faate’aina. Sa latou maua se fautuaga mai ia Iosefa Samita e taofi a latou pepa (o fanua) ma nonofo pea ia latou fanua. Ia Oketopa 20, 1833, sa faalauiloa faalauaitele atu ai o le a tumau le Au Paia i le itumalo. O le mea lea sa vave ai lava ona toe potopoto tagata leaga, ma ia Oketopa 31, 1833, sa toe faaauau ai ia vevesiga. Mo aso na sosoo ai, sa osofaia ai e tagata leaga ia nofoaga a le Ekalesia i le Itumalo o Siakisone.

Ia Novema 4, na osofaia ai e tagata leaga mai Misuri ia fale a tagata o le Au Paia o Aso e Gata Ai e latalata i le Big Blue River. I se misa na sosoo ai, na maliliu ai ni tagata e le o ni Mamona e toalua ma se tagata o le Ekalesia e toatasi; e tele nisi tagata mai i itu uma e lua na manunua. I le aso na sosoo ai, na valaau atu ai ia Colonel Tomasi Pitcher i le militeli i le lotoifale e toe faatupuina le filemu, ae nai lo lena sa faamalosia e le militeli le lata i le 150 tagata o le Ekalesia e tuu i lalo a latou auupega, ina ua uma sa falepuipuiina e le militeli nisi o alii Mamona. Tagata o le Ekalesia--tamaloloa, tamaitai ma tamaiti--na amata ona sosola ese mai le itumalo i lena lava aso, o le toatele o latou sa kolosiina le Vaitafe o Misuri agai atu i le Itumalo o Kalei. Sa faaauau ai pea lenei solaaga mo ni nai vaiaso, ma le aafia ai o le Au Paia i le tele o mafatiaga. E tasi le vaega o tamaitai ma tamaiti na feoai solo i le laufanua mo ni nai aso e sosola ese mai le sauaga, ma sa latou tuua ai se auala o le toto ina ua mavae le tuia ai o vae o tamaiti i le vao tuituia.

Sa tauivi le Au Paia e malamalama i le faate’aga mai le Itumalo o Siakisone. Sa tau atu e Iosefa Samita ia Eteuati Paterika e le’i faaalia mai e le Atua ia te ia “po o le a le mafuaaga sili o lenei puapuaga” e le’i faailoa mai foi e le Alii pe faapefea ona toe mauaina e le Au Paia a latou fanua.² Na faaauau pea ona saili e Iosefa se faamatalaga i mafuaaga o le faateaga ma fia iloa po o a tali a le Au Paia. I le po o Tesema 16--17, 1833, na faalau ai e Iosefa Samita se faaaliga na folafola mai ai na faatagaina e le Alii ona faateaina le Au Paia mai le Itumalo o Siakisone ona o “faitioga, ma finauga, ma le manaonao, misaaga, ma tuinanauga ma le matape’ape’a sa iai faatasi ma i” latou.³ Na folafola mai foi e le faaaliga o le faateaga sa o se tofotofoga lea mo le Au Paia e tutusa ma le talosaga a le Atua ia Aperaamo e ositaulaga Isaako. Ona tuuina atu lea o se faataoto o le tamalii lea na faaleagaina lana tovine e se fili ma sa ia faapea atu i lana auauna e valaau atu i le malosiaga o lona aiga e toe faaola le tovine. I se faaaliga ia Fepuari 1834 na ta’ua e faapea o Iosefa Samita o le auauna tamalii ma sa manaomia ona ia valaau atu i le malosiaga o le maota a le Alii.⁴ O faaaliga nei sa avea ma le mafuaaga mo le faigamalaga a le Tolauapiga a Isaraelu (Tolauapiga a Siona) mai ia Me ia Iulai 1834.