Taua i Iuta

I le 1856 ma le 1857 na aafia ai le Au Paia o Aso e Gata Ai i le Teritori o Iuta i se vaitau o le toefaaolaina faaleagaga, po o le “toefaafouina,” na i ai ni lauga malolosi e faasagatau i le liliuese ma faatosinaga i fafo.¹ I le lagonaina o le fefe i nei naunautaiga faateteleina, na faaleo ai e tagata e le o ni Au Paia o Aso e Gata Ai i le teritori o latou popolega i nusipepa lauiloa. I le taimi lava lea, na feupuai ai taitai na tofia e le malo ma taitai o le Ekalesia i aiaiga faalauaitele, ma i le 1857 na faalauiloa ai e le Au Paia o Aso e Gata Ai i le ofisa o le fono i le peresitene fou o le Iunaite Setete, o James Buchanan, faapea o le a latou le toe taliaina ni tofiga “piopio”. O lenei savali ma isi tala feaveai na uunaia Buchanan faapea o le a tupu se vevesi i Iuta, ma na ia auina atu Alfred Cumming ma se vaega tele o le ami a le malo na taua o le “Utah Expedition” o se faafeao e suia Polika Iaga o le kovana o le teritori.

E le itiiti ifo ma le 1,500 fitafita na savavali i sisifo i le ami e sili ona toatele ma taugata i lalo o le Iunaite Setete i le taimi o le va o le Taua a Mekisiko ma Amerika ma le Taua a Amerika.² Na taua e Buchanan faapea o le faamoemoega o le osofai a le ami ia toefuatai ma faatumauina le “pule o le Tulafono Faavae ma tulafono i le Teritori o Iuta.”³ Na ia talitonu o Polika Iaga ma le Au Paia o Aso e Gata Ai na le amanaiaina lena pule. O Kovana Cumming ma isi taitai o le teritori na toe faatuina le pule a le malo i Iuta, o se faatonuga na fefefe le Au Paia e ono oo ai ni sauaga i se tulaga faaleatunuu.

Faatasi ai ma le popolega i le taunuu mai o le ami, na osofaia ai e ni Au Paia o Aso e Gata Ai fefefe i Iuta i Saute se solo o taavale solofanua o tagata malaga mo Kalefonia, ma na fasiotia ai le silia ma le 120 alii, tamaitai, ma tamaiti lea na ta’ua o le Fasiga Tele i Mountain Meadows. Na faamaonia le osofaiga o le mea na tupu na sili ona matautia o se taunuuga mai le siosiomaga o le faateleina o le vevesi ona o taua.⁴

A o savavali atu autau i le Teritori o Iuta, na tali atu Polika Iaga i le tuuina atu o se folafolaga o le tulafono faamiliteri, ma o le Au Paia o Aso e Gata Ai, alii ma tamaitai, ia saunia i latou lava mo le taunuu mai o autau. Na faatulaga e leoleo o le militeri o le teritori alii e faasolo i auala autu e taitai atu i itu o nuu o le Au Paia o Aso e Gata Ai. I se tasi taimi, na agai atu ai tamaitai ia latou uarota e ao mai lavalava mafanafana mo alii o loo pou i auala o mauga. Na tusia e Margaret Clawson faapea o lona tina e “saofai i le tele o po e lalagaina ni totini vulu e puipuia ai [alii] mai aafiaga leaga o le tau malulu. Na ia tuuina atu lona taimi ma soo se mea itiiti na ia maua mo lo latou mafanafana.”⁵

O le ami, na taitaia e Colonel Albert Sidney Johnson, na oo atu i tuaoi o le Teritori o Iuta i le tautoulu o le 1857 ma na vaaia alii militeri o le Au Paia o Aso e Gata Ai na susunuina le nofoaga o fefaatauaiga autu ma le nofoaga o le militeri i Fort Bridger, na faamuina ni afi i vao, faaleagaina taavale solofanua o sapalai, ma faasosolaina manu a le ami. Na vave ona faatuina e le vaega se nofoaga autu o le taumalulu e lata ane, lea na amata ai e Alfred Cumming lana faiga o le kovana o Iuta.

O le oo mai o le ami na faaletonu ai le nuu o le Au Paia o Aso e Gata Ai. Na valaau atu Polika Iaga i le Au Paia ia “see atu i saute” o nuu autu i Iuta i matu. Na faamaonia lenei mea o se aafiaga faigata mo le tele o le Au Paia, o e na teuina na o ni nai meatotino ma meaai i taavale solofanua. O Cynthia Jane Park Stowell, lea na pueina lona toalua e fitafita o le ami i le tautoulu talu ai, na tuua lona aiga i Ogden i le tasi o le vaiaso talu ona fanau ma savali i le silia ma le 50 maila “ma le tasi le taavale solofanua ma le lua amo o pulu” ma le toa 12 tamaiti.⁶

Na auina atu e Buchanan ni komisi o le filemu ia Iuni 1858, ma na faatautaia e Thomas L. Kane se filemu e fai ma sui o le Au Paia o Aso e Gata Ai.⁷ Na faatuina e le ami se nofoaga autu i le 40 maila (65 kilomita) i sautesisifo o le Aai o Sate Leki i Camp Floyd i lena taumafanafana. O le auai tumau o ni leoleo fou o le malo ma le faitau afe o tagata fou na suia ai le tulaga tautupe o le lotoifale ma na aumaia ai i le Au Paia o Aso e Gata Ai ni elemene e le manaomia faaleagafesootai, aganuu, ma faalemalo.

Na taitai atu e le Taua i Iuta le fatuina o se militeri fou o le itu na tā’ua o le “Department of Utah,” ma na tumau pea le vaega na sili ona toatele o le Ami a le Iunaite Setete i Iuta seia oo ina tulai mai le Taua a Amerika. I le va o le 1858 ma le 1861, na faia e le au malaga ni ala fou ma ni auala i Vaimauga i Sisifo a o faapotopotoina ni faamatalaga fou faasaienisi e uiga i le itu. Na auai foi le ami i faalauiloaga e faasaga i tagatanuu o Iuta.⁸

O Le Taua i Iuta sa iloaina i le tele o igoa. Na ta’ua e nisi “e pei-o se taua” ona o le leai o se folafolaga a le Konekeresi o se taua ma le leai o se toto masaa i le va o autau. E tele lava ina iloa e le Au Paia o Aso e Gata Ai o le “Ami a Johnson.” O le igoa aloaia, o le Malaga a Iuta, na faaaogaina i pepa a le malo e faatatau i le ami a le setete na tuuina atu i Iuta. Ae ui i lea, o le faafitauli sa o se taua lava ma na oo mai ma le tele o tau faaletagata, faalemalo, faaagafesootai, ma faaletupe.

Autu Fesootai: Reformation of 1856–57, Mountain Meadows Massacre, Utah, Mexican-American War, American Civil War, Thomas L. and Elizabeth Kane