O Le Faaaliga ( MFF 76)

I le tautoulu o le 1831, sa tatala ai le fale o Elsa ma Ioane Johnson i Hairama, Ohaio ia Iosefa ma Ema Samita, na faaavanoa ai se potu i luga e fai ma ofisa e mafai ona galulue ai Iosefa ma ana tusiupu i le faaliliuga musuia o le Tusi Paia.¹ I le aso 16 Fepuari, 1832, a o mafaufau loloto ia Iosefa Samita ma Sini Rikitone i le Ioane 5:29, o se fuaitau e faatatau i le toetu, sa la maua ai se faaaliga ofoofogia o le olaga pe a mavae le olaga faitino. “Sa tatalaina o ma’ua mata ma faapupulaina o ma’ua malamalamaaga e le mana o le Agaga,” na la tusia ai, “ina ia mafai ona vaai ma malamalama i mea a le Atua.”² Sa manatua e Philo Dibble, o le sa i ai foi i le potu faaliliu i le aso lena, faapea sa ia “lagonaina le mana, ae e lei vaai i le faaaliga.”³ Sa lei pine ae tusia le tala a Iosefa ma Sini o lo la’ua aafiaga i le tusi o faaaliga a le Ekalesia, sa faia kopi e faifeautalai ina ia faasoa atu ai i paranesi o le Ekalesia, ma lolomi ai i le nusipepa a le Ekalesia.

“O Le Faaaliga,” e pei ona faaigoa ai e le Au Paia o le faaaliga fou, sa faamatala ai lagi po o tikeri eseese o le mamalu ia e mafai e tagata soifua ona maua i le olaga a sau. Sa faaalia ai foi faapea e na o ni nai fanau toaitiiti a le Tama Faalelagi o le a maua se malo o le mamalu. Sa naunau ni nai Au Paia e faasalalau le tala fou. O William W. Phelps, mo se faataitaiga, sa ta’uaina o “le talafou aupito sili ua lolomiina mo le tagata.”⁴ O isi na manatu o le Faaaliga sa faapopoleina ai. Sa latou manatu atonu na aoao mai ai mataupu faavae e faapei o na mea o le Atulaulau, o se mau faalelotu sa talitonu o le a faasaoina tagata uma, tusa lava po o a a latou taga e fai. O lea aoaoga sa manatu i ai e sosolo i le toto i le tele o Kerisiano o e sa malamalama faapea o le ola pe a mavae le oti sa vaeluaina na o se lagi ma se seoli. “Sa avea o se tofotofoga i le toatele,” na toe ta’ua ai e Polika Iaga, o le sa papatiso a o lei leva ona maua le Faaaliga.⁵ “Na faapena foi a’u agaifanua, o lea ina ua oo mai le Faaaliga i le taimi muamua ia te a’u, sa matua faafeagai lava ma feteenai ma mea na aotauina ai a’u muamua.” Peitai, sa onosai Iaga, a o ia saili ia malamalama i le uiga o lenei faaaliga. “Sa masani ona ou mafaufau ma tatalo, e faitau ma mafaufau” sa ia tomanatu ai, “seia oo ina ou iloa ma malamalama atoatoa ai mo a’u lava ia.”⁶

Sa faaauau Iosefa ona sailia le malamalama e ala i faaaliga e uiga i le natura o le faaolataga, o tikeri o le mamalu, ma le toetu.⁷ I Navu, o ana lauga i le natura paia o tagata soifua ma o latou agavaa, faapea faaaliga faaopoopo i le natura e faavavau o sootaga faaleaiga, sa fesoasoani i le Au Paia e malamalama ai i le taua o le faaeaga ma le mamalu selesitila ma faamanuiaga ua folafola mai ia i latou o e mulimuli ia Iesu Keriso. Faapei o Polika Iaga, sa faateleina le o mai o le Au Paia e talia ia aoaoga sa faaalia i le Faaaliga, ma o aso nei ua faamanatuina o talitonuga iloga o le Au Paia o Aso e Gata Ai.

Punaoa o le Ekalesia

J. Spencer Fluhman, “The Triumph and Glory of the Lamb: Doctrine and Covenants 76,” Ensign, Oct. 2017, 64–71.

Matthew McBride,“‘The Vision’: DC 76,” in Matthew McBride and James Goldberg, eds., Faaaliga i le Matalalga: O Tala i tua atu o Vaega o le Mataupu Faavae ma Feagaiga (Salt Lake City: The Church of Jesus Christ of Latter-day Saints, 2016), 148–54.

“Vision, 16 February 1832 [DC 76],” in Revelation Book 2, 1–10, josephsmithpapers.org.

Autu Fesootai: Revelations of Joseph Smith, Joseph Smith Translation of the Bible

Faamatalaga

1. Tagai Autu: Faaliliuga a Iosefa Samita o le Tusi Paia

2. “Vision, 16 February 1832 [DC 76],” in Revelation Book 2, 2, josephsmithpapers.org.

3. Philo Dibble, “Recollections of the Prophet Joseph Smith,” Juvenile Instructor, vol. 27, no. 10 (May 15, 1892), 303.

4. “Items for the Public,” The Evening and the Morning Star, vol. 1, no. 2 (Iulai 1832 ), 25.

5. Brigham Young, in Journal of Discourses, 26 vols. (London: Latter-Day Saints’ Book Depot, 1854–86), 16:42.

6. Brigham Young, in Journal of Discourses, 6:281.

7. Tagai “Faaaliga, 27--28 Tesema 1832 [MFF 88:1--126],” josephsmithpapers.org; “Instruction, 16 May 1843, as Reported by William Clayton,” josephsmithpapers.org; tagai foi Mataupu Faavae ma Feagaiga 88; 130.