Iosefa Samita le Matua

O le atalii o Asael ma Mary Duty Samita, o Iosefa Samita le Matua, sa soifua mai i le aso 12 Iulai,1771, i Masatusa. I le 24 o tausaga le matua, sa faaipoipo ai ia Lusi Maka ma nonofo ai i Veromota. Na avea le ulugalii ma matua o fanau e toa 11 ma sa auai ma le tulaga ese i galuega muamua o le faatulagaina o le ekalesia e lo la atalii o Iosefa Samita le Itiiti.

E tusa o le 1802, na faatauina ai e Iosefa le Matua ‘a’a o le ginseng i se tulaga faapisinisi, o se oloa taua, ae sa gaoi e se faipaaga ia tupe maua, na tuua ai le aiga o Samita e toetoe lava a leai ni tupe. Sa faatau atu e Iosefa le Matua lana faatoaga ma totogi isi aitalafu i meaalofa tau tupe a Lusi. I le mavae ai o le faaauau ai pea ona tauivi o se faifaatoaga i Veromota ma New Hampshire, sa i’u lava ina ia masii atu lona aiga i Palamaira, Niu Ioka, ma faatauina se faatoaga i tafatafa o Manaseta i le 1818.

Mo le tele tausaga, na teena ai e Iosefa le Matua le auai atu i lotu faatulagaina. I le1797, sa auai atu o ia ma lona tama ma lona uso i se sosaiete o Tagata Atamamai i Tunbridge, Veromota. Sa talitonu tagata atamamai i le faaolataga mo tagata uma, e tusa lava poo a fesootaiga tau lotu, ma sa masani ona fatuina sosaiete nai lo ekalesia.

O Iosefa Samita le Matua o se tasi na lagolagoina le galuega faaperofeta a lona atalii. Ina ua asiasi mai muamua le agelu o Moronae ia Iosefa le Itiiti, sa ia ta’u atu i le alii talavou e talanoa i lona tama. Na avea Iosefa le Matua ma se tasi o Molimau e Toavalu o le Tusi a Mamona, ma sa papatiso i le aso na faatulaga ai le Ekalesia.¹ Ina ua maea lona papatisoga, sa ia talai atu i ona aiga i Niu Ioka. Ina ua maea ona siitia atu i Katelani, Ohaio, i le 1831, sa galue Iosefa Samita le Matua i le maota o le Alii, sa auai i le Aoga a Perofeta, auauna atu o se sui o fautua maualuga, faia se misiona i Iunaite Setete i sasae, ma sa lagolagoina o se fesoasoani lagolago i le Au Peresitene Sili.²

I le 1834, sa valaauina e Iosefa le Itiiti lona tama e avea ma Peteriaka o le Ekalesia, ma mo le vaega na totoe o le soifuaga o Iosefa le Matua, sa ia faamanuiaina le Au Paia, sa masani ona faia fonotaga lea e 15 le toatele o tagata e mauaina faamanuiaga i lalo o ona aao. O tagata auai o nei sauniga e masani ona lagona se faateleina o le Agaga. Sa auai le Peresitene o le Ekalesia i le lumanai o Lorenzo Snow i lea sauniga ao lei auai i le Ekalesia. Sa ia lagona le faagaeetia tele i le matamata i peteriaka o tuuina atu faamanuiaga lea na ia filifili ai e faia se suesuega taua e uiga i talitonuga o le Au Paia o Aso e Gata Ai.³

I le 1838, sa masii atu ai Iosefa le Matua ma lona aiga i Fa Uesi, Misuri. Ao aumau ai iina, sa ia faalogo i ni tala pepelo feaveai faapea o ona atalii o Iosefa le Itiiti ma Ailama ua fasiotia. O le faateia ai i lenei tala sa mafua ai ona ia pa’u, ma o le mamafa na oo ina aafia ai Iosefa le Matua mo lona olaga atoa.⁴ I le itiiti ifo ma le tausaga talu ona mavae le masii atu i Fa Uesi, o osofaiga a le au faatupu faalavelave na faamalosia ai le aiga o Samita e sosola atu i Ilinoi. Sa taunuu Iosefa le Matua i Komese (mulimuli o Navu), Ilinoi, i le amataga o le1839. E ui lava i se olaga toafimalie i Navu, sa faaauau pea ona fai ifo le soifua maloloina o Iosefa le Matua seia oo ina maliu filemu o ia i le aso 14 Setema, 1840. O lona moomooga ao lei maliu e mo Iosefa Samita le itiiti, ina ia mautinoa e faia se sui papatisoga mo e ua maliliu e fai ma sui mo lona atalii ua maliu, o Alavini, o le na maliu ao lei faatulagaina le Ekalesia.⁵

Punaoa o le Ekalesia

“Joseph Smith Sr.,” josephsmithpapers.org.

“Family of Joseph Smith Sr. and Lucy Mack Smith: The First Family of the Restoration,” Ensign, Dec. 2005, 7–9.

M. Russell Ballard, “The Family of the Prophet Joseph Smith,” Ensign, Nov. 1991, 5–7.

Related Topics: Joseph Sr. and Lucy Mack Smith Family, Patriarch

Faamatalaga

1. “Testimony of Eight Witnesses, Late June 1829,” in the Book of Mormon, 1830, 590, josephsmithpapers.org; Mark L. McConkie, “Joseph Smith Sr.,” in United by Faith: The Joseph Sr. and Lucy Mack Smith Family, ed. Kyle R. Walker (American Fork, Utah: Covenant Communications, 2005), 4–5, 7–11.

2. Minute Book 1, 6–8, 29, 192–93, 234–35, josephsmithpapers.org; Lucy Mack Smith, Biographical Sketches of Joseph Smith, the Prophet, and His Progenitors for Many Generations (Liverpool: S. W. Richards, 1853), 213–14.

3. “Blessing to Joseph Smith Sr. and Lucy Mack Smith, between circa 15 and 28 September 1835,” in Patriarchal Blessing Book 1, page 9, Church History Library, Salt Lake City, josephsmithpapers.org; McConkie, “Joseph Smith Sr.,” 14–17; Joseph Smith, “History, 1834–1836,” 20, josephsmithpapers.org.

4. Lucy Mack Smith, Biographical Sketches, 249; McConkie, “Joseph Smith Sr.,” 22–23.

5. Joseph Smith, “History, 1838–1856, volume C-1 [2 November 1838–31 July 1842],” 885, josephsmithpapers.org; Lucy Mack Smith, Biographical Sketches, 249–57, 261–70; Eliza R. Snow, “Elegy,” Times and Seasons, vol. 1, no. 12 (Oct. 1840), 190–91.