Talafaasolopito o le Ekalesia
O Le Faamasinoga o Iosefa Samita i le 1826

“O Le Faamasinoga o Iosefa Samita i le 1826,” O Autu o le Talafaasolopito o le Ekalesia

“O Le Faamasinoga o Iosefa Samita i le 1826,”

O Le Faamasinoga o Iosefa Samita i le 1826

I le 1826, sa faafaigaluega ai e Josiah Stowell ia Iosefa Samita e fesoasoani e sue ia siliva Sipaniolo na leiloloa, e latalata i le tuaoi i Niu Ioka ma Penisilivania. Sa tuuaia ai e se tasi i le lotoifale, atonu o se tasi o le aiga potopoto o Stowell ia Iosefa e uiga i le faataupupula i totonu o se maa ia maua ai meatotino na leiloloa. O se taunuuga, sa poloaiina ai Iosefa e tulai i luma o se taitai o le malo, o Albert Neely i le Itumalo o Chenango, e foliga mai o ni tuuaiga e uiga i amioga le talafeagai. O le pueina o ia e foliga mai sa faavae i se tulafono i le setete o Niu Ioka e faasaina ai le “faafoliga . . . ua maua le mea e ono maua ai mea na leiloloa.”1 E fa ni tala na faamatalaina ai lenei faamasinoga, o ia faamatalaga uma na faapea sa leai ni taunuuga matuia faaletulafono na mafatia ai Iosefa ina ua maea. O isi faamatalaga e eseese ma o nisi taimi sa feteenai le tasi faamatalaga ma le isi.2

I lana molimau, sa ioe ai lava Iosefa sa ia faaaogaina i lea taimi ma lea taimi lana maa vaai e sue ai ni meatotino na leiloloa, ae sa ia le toe faia lea faiga—sa tiga ai ona mata, o lana tala lea. Na te lei sailia lava na ituaiga galuega ma “nai lo o lena, sa ia teenaina i taimi uma soo se mea e faatatau i lenei pisinisi.”3 Sa suesue e le faamasino le maa ma fesiligia ai isi molimau, e aofia ai le tama o Iosefa, o Iosefa Samita le Matua., ma le pule o le falefaigaluega a Iosefa, o Josiah Stowell.

Sa molimau Iosefa le Matua, ma Josiah Stowell, sa tali atu Iosefa i talosaga e faaaoga lana maa vaai ia na ona fesoasoani ai i uo po o, i le tulaga o Stowell, e fesoasoani ai ia Stowell ma isi tagata faigaluega faakonakarate i le eliga o se oa. Sa faatuatuaina e Stowell ia Iosefa ma talisapaia ana galuega. Sa faamoemoe Iosefa le Matua, o le a le faaaogaina faatautala e lona atalii le meaalofa i le sailiga o oa faalelalolagi, ma talosia ia faaali mai e le Atua Lona finagalo i le alii talavou. O nisi o molimau sa molimau sa talitonu i le tomai o Iosefa; ae o isi sa lei talitonu.4

O le taunuuga o le faamasinoga o loo tumau pea ona le manino. Fai mai nisi o tagata, o se faamaumauga a le faamasinoga o loo faaalia ai sa tausalaina e le faamasino ia Iosefa. Sa fai mai se tuaoi o Josiah Stowell sa “tausalaina” e le faamasinoga ia Iosefa ae na faataga o ia e sao [mai le faasalaina] ona o lona talavou. Fai mai se uo a le faamasino o le sa faapea mai sa ia tusitusia faamatalaga i le faamasinoga e faapea, sa talia e le faamasino le molimau a Stowell ma faamatuu atu ai Iosefa. Sa taua e Oliva Kaotui, o le sa lei auai i le faamasinoga (sa la feiloai ma Iosefa Samita i le pe a ma le tolu tausaga mulimuli ane), le taunuuga lea atonu sa i ai pe a mafaufau i pepa o faamaumauga sa misi, sa taumamaina Iosefa mai le avea ma se tagata amio le talafeagai.5

Faamatalaga

  1. “An Act for Apprehending and Punishing Disorderly Persons,” i le Laws of the State of New-York, Revised and Passed at the Thirty-Sixth Session of the Legislature, with Marginal Notes and References, Furnished by the Revisors, William P. Van Ness&John Woodworth, Esquires, Pursuant to the Act, Entitled “An Act for Publishing the Laws of this State,” Passed April 13th, 1813, 2 vols. (Albany: H. C. Southwick, 1813), 1:114–17, aemaise lava le vaega I.

  2. O tala e fa o Abram W. Benton, “Mormonites,”Evangelical Magazine and Gospel Advocate, vol. 2, no. 15 (Apr. 9, 1831), 120; William D. Purple, “Joseph Smith, the Originator of Mormonism,”Chenango Union, vol. 30, no. 33 (May 2, 1877), 3; “State of New York v. Joseph Smith,” i le Charles Marshall, “The Original Prophet,”Fraser’s Magazine, vol. 7, no. 38 (Fep. 1873), 229–30; and Oliver Cowdery, “Letter VIII,”Latter Day Saints’ Messenger and Advocate, vol. 2, no. 1 (Oke. 1835), 195–202.

    Sa nofo Abram Benton i talaane o le faatoaga a Josiah Stowell, ae e le o mautinoa pe sa auai o ia i le faamasinoga. Sa faapea mai William Purple, o i laua ma Faamasino Neely sa uo lelei lava, ma sa fai atu le faamasino ia te ia na te tusitusia faamatalaga i le faamasinoga. Fai mai Charles Marshall, sa ia mauaina le faamaumauga a le faamasinoga mai ia Emily Pearsall, o le tei teine a le faamasino. E le o taua le igoa o Pearsall i le faamatalaga a Marshall, ae ua faamaonia mai lona faailoaga i le Utah Christian Advocate, vol. 2, no. 13 (Jan. 1886), 1. O loo faatatau atu le Utah Christian Advocate ia Pearsall lea na saeiina ese itulau mai le tusi o galuega a le faamasino, ae o le faamatalaga a Marshall i le Fraser’s Magazine o loo taua ai na nono atu e Pearsall ia pepa ia Marshall lea sa ia kopiina mai ai taualumaga o le faamasinoga. O le tusi galuega a Faamasino Neely ma itulau ia na faapea na aveesea e Pearsall e le o maua. E lei taua e Oliva Kaotui po o fea sa ia aumaia ai faamatalaga e uiga i le faamasinoga, ae e faigofie lava ona ia iloa faamatalaga auiliili mai se tasi o tagata autu sa aafia ai ma toe tau mai ai mea na latou matauina o le mea na tupu.

    E le o tutusa tala po o ai na faia tuuaiga ma moliaga e faasaga ia Iosefa Samita. Fai mai Benton, sa molia e tagata lautele ia Iosefa o se tagata amio le talafeagai; Fai mai Purple, o atalii o Stowell sa faia ia pueina Iosefa o se tagata maumausolo; fai mai faamaumauga a le faamasinoga, e tusa ai ma le faamatalaga a Marshall, o le tei tama o Stowell o Peter Bridgeman, sa faia ia pueina Iosefa o se tagata amio le talafeagai. O loo eseese foi tala i le po o ai na molimau i le faamasinoga. E nao Josiah Stowell na taua e Benton; na taua e Purple ia Iosefa le Itiiti, Iosefa le Matua, Stowell, ma le Mr. Thompson (na faailoa mai i le Fraser’s Magazine o Jonathan Thompson); o faamaumauga a le faamasinoga e tusa ai ma faamatalaga a Marshall e le o i ai Iosefa le Matua, ae o loo taua ai Iosefa le Itiiti, Stowell, Thompson, ma molimau e toatolu e le o taua i isi tala.

  3. “State of New York v. Joseph Smith,” 229–30.

  4. Purple, “Originator of Mormonism,” 3.

  5. “State of New York v. Joseph Smith,” 229–30; Benton, “Mormonites,” 120; Purple, “Originator of Mormonism,” 3; Cowdery, “Letter VIII,” 201.

    Ana faapea na faaauau ona faia e le faamasino se faamasinoga faasolitulafono pe faia foi se iuga e tausalaina, semanu e manaomia e le tulafono a Niu Ioka lona faia o ni mea se lua: auina atu Iosefa i se “potutaofia” (lea e taua foi o se falemativa) ma faila ai se pepa faamatalaga e faailoa ai le igoa o le tagata tetee ma le moliaga, faatasi ai ma se faamatalaga e uiga i le moliaga ma faamalosia ai le faasalaga. I le tulaga lenei, sa lei faia e le faamasino se tasi o na mea. O le potutaofia aupito lata ane e le o taua ai Iosefa Samita mo le tausaga 1826, ma e leai foi ni faamaumauga a le fale faamasino o i ai le igoa o Iosefa, pe faafesootaia ma soo se moliaga faasaga ia te ia, pe fetaui foi i ai se moliaga po o se faasalaga ia te ia (Gordon A. Madsen, “Being Acquitted of a ‘Disorderly Person’ Charge in 1826,” i le Gordon A. Madsen, Jeffrey N. Walker, and John W. Welch, eds.,Sustaining the Law: Joseph Smith’s Legal Encounters [Provo, Utah: Brigham Young University Studies, 2014], 89–90).