Zina Diantha Huntington Young

O Zina Diantha Huntington Jacobs Young sa o se fesoasoani ia Eliza R. Snow i le Au Peresitene Aoao o le Aualofa ma na sui ia te ia i le 1888 ma avea ai ma peresitene lona tolu o le Aualofa. Na manatua e le toatele o le Au Paia o Aso e Gata Ai nei taitai e toalua e tutusa lelei le tasi ma le isi. O Eliza o le ao o le Aualofa, a o Zina o lona fatu.¹ Sa lauiloa o ia o “Zina, le faamafanafana” ona o lona agaga malamalama, agalelei, ma le auaunaga patino.²

Atatosi o Zina D. H. Jacobs Young.

Na soifua i le 1821 i se aiga faaaloalogia ma malolosi i le faalelotu i le pe a ma le 100 maila i matusisifo o Palamaira, Niu Ioka, na lagona lava e Zina le moni o le Tusi a Mamona ina ua ia vaai muamua lava i ai a o avea o se tamaitai talavou. Sa auai o ia i le Ekalesia ma lona aiga i le 1835.³ Ina ua liliu mai o ia, na faamanuiaina Zina i meaalofa faaleagaga, e aofia ai le meaalofa o le tautala i gagana.⁴ Na aoaoina foi e Zina mai lona tina le ala e auauna atu ai i e mama’i, e ala i le tausiga faaletino faapea ma le faamalologa i le faatuatua.⁵ Faatasi ai ma isi Au Paia o Aso e Gata Ai, na nofo o ia i Katelani, na puapuagatia i Misuri i le 1838, maua se sulufaiga i Navu, ma na savali i le malaga sopo a paionia i Iuta.

I Navu, na avea Zina ma se tasi o tagata muamua na aoaoina, na taliaina, ma iu lava ina faatinoina faaipoipoga autaunonofo. O ona aafiaga ua faaalia ai le faigata naua o mafutaga ia na i ai i nisi o taimi i le vaitaimi popofou o lea faiga masani. I le 1840 na aoao faalilolilo ai o ia e Iosefa Samita e uiga i faaipoipoga autaunonofo ma talosagaina o ia [la te] faaipoipo. O le le mautinoa e uiga i lea faatinoga, na teena ai e Zina. I le 1841 na ia faaipoipo ai ia Henry Jacobs, ae i ni nai masina mulimuli ane, ina ua mauaina se faaaliga patino e uiga i faaipoipoga autaunonofo, na ia filifili ai ia faamauina mo le faavavau ia Iosefa Samita.⁶ “Sa ou suesue i tusitusiga paia,” na ia manatua ai, “ma na ala mai i le tatalo ma le lotomaualalo i lou Tama Faalelagi na ou maua ai se molimau mo au lava ia.”⁷

Ina ua maliu Iosefa, o le toatele lava o ona mau faletua na faamauina i isi taitai o le Ekalesia mo na o lenei olaga, e aofia ai Zina, lea na faamauina ia Polika Iaga i le 1846 ao faaipoipoina pea faaletulafono ia Henry. Na faamatalaina mulimuli ane e Zina lana faaipoipoga ia Henry o se [faaipoipoga] faanoanoaga, ma i se taimi na la teteea ai.⁸ I Uinita Kuata, i le taimi muamua na amata ola faalauaitele ai le Au Paia i aiga o autaunonofo, na faatasi atu ai Zina i le aiga o Young. Na latalata lava i lena taimi, na malaga ese ai Henry i se misiona, ma sa le’i leva ae faaipoipo atu i se isi fafine.⁹ I le talanoa ai e uiga i le faigata o nei mafutaga, na ia tusi atu ai ia Zina, “O le a i ai fesuiaiga i le taimi ma toe iloiloga i le faavavau ma o le a faia ia sa’o mea uma i le iuga.”¹⁰

E toalua le fanau tama a Zina ia Henry Jacobs ae toatasi [lana] tama teine ia Polika Iaga. Na ia tausia foi le fanau e toatolu a Clarissa Ross Young, o le isi avā a Polika Iaga, ina ua maliu Clarissa i le 1857.¹¹ Sa auauna atu Zina o le Peresitene Aoao o le Aualofa i le 1890 ina ua faailoa mai e Peresitene Uilifoti Uitilafi le Folafolaga Aloaia, lea na taitai atu i le faamutaina o faaipoipoga autaunonofo i le Ekalesia.¹²

Sa tumalosi Zina i taimi uma i lona nuu. Sa pese o ia i le aufaipese a le malumalu i Katelani.¹³ Na faiaoga o ia i le aoga i Navu, Uinita Kuata, ma le Aai o Sate Leki.¹⁴ I le Aai o Sate Leki, na aoga ai Zina o se faatosaga ma mulimuli ane, sa ia taitaia ai ni kosi e faatatau i fafine maitaga ma failele ma auauna atu i le pulega a le Falemai o Tesareta. Sa ia aoao e tausia anufe fai silika o se vaega o se tofiga e atinae ai se pisinisi gaosi silika i le lotoifale, ma i le 1876 na avea ai o ia ma peresitene o le Asosi Gaosi Silika a Tesareta. Na auai malosi Zina i le faalauiloaina o aia a tamaitai e palota ai, auai i fonotaga faaleatunuu ma auauna atu o se sui peresitene o le Aufono a Tamaitai o le Atunuu.

E ala i isi ana gaoioiga uma lava, sa auai malosi foi Zina i le Aualofa. Na avea o ia ma se sui o le sosaiete i Navu i lana fonotaga lona lua ma, i le amataga o le vaitau o le 1860, sa fesoasoani [o ia] ia Eliza R. Snow i le faatulagaina o Aualofa i le lotoifale, ma malaga i le fiaafe o maila e asiasi i uso i le salafa o Iuta. Sa lagolagoina e le Ekalesia ia Zina o se Peresitene Aoao o le Aualofa i le konafesi aoao ia Aperila 1888. E tasi le tausaga mulimuli ane, ae pulefaamalumalu Zina i le Konefesi Aoao muamua lava a le Aualofa i le Fale Faafiafia i le Lotoa o le Malumalu. “Uso e, ia avea i tatou o se faalapotopotoga toatele ma tutu atu mo le mea sa’o,” na ia aoao atu ai i lena fonotaga. “Ia tatou lotomaualalo ma tutumau, faamamalu i le upumoni, ma ia lototoa i le lagolagoina o le [faalapotopotoga].”¹⁵ Na aoao atu Zina i faataitaiga i le taua o le auauna atu i le malumalu. Na ia auauna atu i le Maota o Faaeega Paia a Sate Leki, i Malumalu o St. George ma Logan, ma avea o se faatina o le Malumalu o Sate Leki ina ua faapaiaina i le 1893.

Sa maliu Zina i le aso 28 o Aokuso, 1901. Sa ta’ua e se tasi o tagata, o ia o se tamaitai “sa fiafia pe a na’o tagata totoa e mafai ona ataata.”¹⁶ O se tasi o tagata na manatuaina o ia o “se agelu o le faamoemoe ma le faatuatua i le afe ma afe o le Au Paia o Aso e Gata Ai.”¹⁷

Punaoa o le Ekalesia

“Zina Diantha Huntington Young: Third General President of the Relief Society, 1888–1901,” ChurchofJesusChrist.org/callings/relief-society/relief-society-presidents/zina-h-young.

Jennifer Reeder and Kate Holbrook, eds., At the Pulpit: 185 Years of Discourses by Latter-day Saint Women (Salt Lake City: Church Historian’s Press, 2017).

Emmeline B. Wells, Letter to Zina D. H. Young, April 24, 1888, i le Jill Mulvay Derr, Carol Cornwall Madsen, Kate Holbrook, and Matthew J. Grow, eds., The First Fifty Years of Relief Society: Key Documents in Latter-day Saint Women’s History (Salt Lake City: Church Historian’s Press, 2016), 535–38.

Zina D. H. Young, Discourse, April 6, 1889, i le The First Fifty Years of Relief Society, 564–69.

Report of Relief Society Jubilee, March 17, 1892, i le The First Fifty Years of Relief Society, 589–617.

Autu Fesootai: Aualofa; Polika Iaga

Faamatalaga

1. Susa Young Gates, History of the Young Ladies Mutual Improvement Association of the Church of Jesus Christ of Latter-day Saints (Salt Lake City: Deseret News, 1911), 21.

2. E. B. Wells, “Zina D. H. Young,” Young Woman’s Journal, vol. 12, no. 6 (June 1901), 254; “A Distinguished Woman: Zina D. H. Young,” Woman’s Exponent, vol. 10, no. 12 (Nov. 15, 1881), 91.

3. Zina D. H. Young, “How I Gained My Testimony of the Truth,” Young Woman’s Journal, vol. 4, no. 7 (Apr. 1893), 318.

4. Young, “How I Gained My Testimony,” 317–19. Tagai i le Autu: Meaalofa o le Tautala i Gagana.

5. May Booth Talmage, “Past Three Score and Ten,” Young Woman’s Journal, vol. 12, no. 6 (June 1901), 256. Tagai i le Autu: Faamalologa.

6. Na iloa e uluai Au Paia o Aso e Gata Ai le eseesega i le va o faamauga mo le olaga nei ma le faavavau ma faamauga sa mo na’o le faavavau. O faamauga mo-na’o le faavavau na tau mai ai sootaga mo na’o le isi olaga. O nei faamauga atonu na tuuina mai ai se auala e fatu ai se sootaga e faavavau po o se sootaga i le va o le aiga o Iosefa ma isi aiga i totonu o le Ekalesia. Tagai “Plural Marriage in Kirtland and Nauvoo,” Gospel Topics Essays, topics.ChurchofJesusChrist.org.

7. Zina Huntington Jacobs, tusitusiga o le talaaga na tusia lava e ia, Zina Card Brown Family Collection, Church History Library, Salt Lake City; ua faafouina le sipelaina.

8. E itiiti ni faamaumauga na tausia e tagata na uluai auai i faaipoipoga autaunonofo e uiga i lea faiga. O punaoa o loo maua o le talafaasolopito e le o tuuina mai ai se malamalamaaga manino o le natura ma taimi o faaipoipoga a Zina. E faatatau i manatu o Zina i le tulaga o lana faaipoipoga ia Henry, tagai “Evidence from Zina D. Huntington-Young,” Saints’ Herald, vol. 52, no. 2 (Jan. 11, 1905), 29.

9. Tagai i Autu: Uinitia Kuata; Faaipoipoga Autaunonofo i Iuta. O Henry Jacobs o se tasi o alii e toatele na umia le tofi o le Fitugafulu na valaauina i ni misiona i lena taimi.

10. Henry B. Jacobs letter to Zina D. Jacobs, Brooklyn, New York, to Camp of Isreael, Grand Isleand [sic], Aug. 19, 1846, Church History Library, Salt Lake City; ua faafaigofieina le sipelaga.

11. “A Distinguished Woman: Zina D. H. Young,” 107.

12. Tagai i le Autu: Folafolaga Aloaia.

13. Talmage, “Past Three Score,” 256.

14. Gates, History of the YLMIA, 24.

15. Zina D. H. Young, discourse, Apr. 6, 1889, i le “First General Conference of the Relief Society,” Woman’s Exponent, vol. 17, no. 22 (Apr. 15, 1889), 172; tagai foi Jill Mulvay Derr, Carol Cornwall Madsen, Kate Holbrook, and Matthew J. Grow, eds., The First Fifty Years of Relief Society: Key Documents in Latter-day Saint Women’s History (Salt Lake City: Church Historian’s Press, 2016), 569.

16. “Passed into the Repose of Death,” Aug. 28, 1901, Deseret Evening News, 8.

17. Gates, History of the YLMIA, 25.