“Thomas L. ma Elizabeth Kane,” O Autu o le Talafaasolopito o le Ekalesia
“Thomas L. ma Elizabeth Kane”
Thomas L. ma Elizabeth Kane
I le taumafanafana o le 1846, sa asiasi atu ai Thomas L. Kane, o le atalii 24 tausaga le matua o se faamasino faalemalo lauiloa mai Filatelefia, i nisi o tolauapiga lē tumau a le Au Paia o Aso e Gata Ai i le Teritori o Iowa. Sa faamalosia ona o ese le au paia mai lo latou aai o Navu, Ilinoi, ma sa talitonu Kane sa sauaina ma le le amiotonu i latou mo lo latou tapuaiga i se laueleele sa faamoemoeina e pupuia ai le saolotoga faalelotu. Sa talitonu o ia i le faamaoni o le Au Paia o Aso e Gata Ai ma faanoanoa ai i o latou puapuaga. E ui sa le tutusa [ona talitonuga] ma o latou talitonuga faalelotu, ae sa tonu ia Kane e tu atu mo le Au Paia o Aso e Gata Ai. Mo le isi tolusefulu tausaga na sosoo ai, sa ia tautua ai o se sooupu ma faufautua sili ona faatosina mai fafo mo le Au Paia o Aso e Gata Ai, sa galulue faatasi ma taitai o le malo o le Iunaite Setete ina ia malupuipuia āiā tatau faalelotu ma faaupufai e fai ai ma sui mo le Au Paia. Sa ia galue foi agai i suiga lautele, e aofia ai avanoa tetele ma āiā mo tamaitai ma le faamutaina o faiga faapologa.1
Atatosi o Thomas L. Kane.
Faaaloaloga a le Matagaluega o Talafaasolopito o le Ekalesia
Sa masani Kane ma le Au Paia e ala i lipoti a nusipepa ma e ala i le auai i se fonotaga i Filatelefia, ma sa ia faaaoga ai ana fesootaiga faaupufai e fesoasoani ai e faatalitonu le peresitene o le Iunaite Setete o James K. Polk e faataga se autau a fitafita o le Au Paia o Aso e Gata Ai mo le Taua a Mekisiko ma Amerika. Sa ofo atu e Polika Iaga le tautua a alii o le Au Paia o Aso e Gata Ai ma le faamoemoe o le a mafai e o latou totogi ona fesoasoani e totogi ai le tau o faigamalaga i Sisifo.2 A o nonofo ai ma le Au Paia i tolauapiga, sa matua gasegase lava Kane, ma sa tausi ai e le Au Paia o Aso e Gata Ai ma toe malosi ai. A o le’i alu ese atu o ia, sa maua ai e Kane se faamanuiaga faapeteriaka lea sa folafola atu ai ia te ia o lona igoa o le a “manatuaina ma le mamalu” e le Au Paia “i tupulaga uma.”3 Ina ua toefoi atu i Filatelefia, sa auai ai loa Kane i se faalauiloaga lautele o sootaga ma tagata lautele e fai ma sui o le Au Paia o Aso e Gata Ai.
O le auai ai o Kane sa fesoasoani lea i le Au Paia i le tele o taimi autu. I le 1850, o lana faatosinaga i le peresitene o le Iunaite Setete o Millard Fillmore sa i’u ai ina tofiaina Polika Iaga e avea ma uluai kovana o le teritori o Iuta. E fitu tausaga mulimuli ane ina ua faatupulaia vevesiga i le va o le faigamalo ma tagata o Iuta, sa maua ai e Kane se poloai lē aloaia mai le peresitene o le Iunaite Setete o James L. Buchanan ia malaga atu i Iuta ma faia ni feutagaiga mo se filemu. Sa ia malaga atu i ana lava tupe atoa ai ma se lamatiaga tele ia taunuu ai i Iuta ona talanoaina lea o ni auala faatasi ma Iaga ma taitai o le Ami a le Iunaite Setete e taofia ai fetauaiga i meatau.4
I ni nai tausaga mulimuli ane, i le faaosofia ai e ana taumafaiga e tetee i faiga faapologa, sa tau ai Kane i le Taua Faalemalo a Amerika. Ina ua mavae lena, sa faaauau pea ona ia fautuaina Polika Iaga ma isi taitai o le Ekalesia. I le taimi o le taumalulu o le 1872–73, sa faimalaga atu ai Kane i Iuta faatasi ma lona faletua, o Elizabeth Dennistoun Wood Kane, ma o la atalii e toalua. Sa latou faamoemoe o le a fesoasoani le tau mafanafana o Iuta i saute i le soifua maloloina o Kane, lea sa faaletonu i taimi uma ma faateleina ona faigata ona o manuaga ma faamai i le taimi o le Taua Faalemalo. O Elizabeth, lea sa natia ona masalosaloga i le Au Paia o Aso e Gata Ai ona o lo latou faatinoga o autaunonofo, sa faagaeetiaina e tamaitai o Iuta i saute.5 Sa ia tusia le Twelve Mormon Homes (Aiga Mamona e Sefululua), o se tusi o loo maua ai se vaaiga i totonu e seasea tupu ma se puipuiga o le olaga faaleaiga o le Au Paia o Aso e Gata Ai mai se tagata matau mai fafo. I le isi sefulu tausaga na sosoo ai, sa faaauau pea e Thomas ona puipuia le Au Paia o Aso e Gata Ai mai osofaiga faaupufai, sa tusia le uili a Polika Iaga, ma fautua atu i le Au Paia o Aso e Gata Ai sa nofoia ni nofoaga i Mekisiko, sa oo foi ina malaga atu i lena atunuu i le taimi o se taua faalemalo e saili nofoaga tonu sa i ai. Ina ua maliu o ia i le 1883, o se tasi o ana molimanao mulimuli sa mo Elizabeth ina ia momoli atu se faatofa faamomoiloto i ana “uo Mamona pele.”6
Atapue o Elizabeth Dennistoun Wood Kane.
Faaaloaloga a le Matagaluega o Talafaasolopito o le Ekalesia
Autu Fesootai: Mexican-American War, Mormon Battalion, Utah War