Fetuunaiga i le Galuega Faalemalumalu

O le malamalama i sauniga o le malumalu sa faaalia ia Iosefa Samita “i lea fuaitau i luga o lea fuaitau, ma lea mataupu i luga o lea mataupu.”¹ I le galue ai i lalo o le taitaiga faalelagi, sa ia faalauiloa atu ai sauniga uma e fesootai ma malumalu i aso nei: papatisoga mo e ua maliliu, sauniga amata ma faaeega paia, ma faamauga i le malumalu. A o ia mauaina nisi faaaliga ma le poto masani, sa faia e Iosefa ni fetuunaiga i le faatautaiga o nei sauniga ina ia aoao lelei ai le Au Paia.

O perofeta na mulimuli mai ua faaauau pea ona suia le ala e faatautaia ai sauniga ma feagaiga o le malumalu. O nei suiga sa faia e tali atu ai i faaaliga, i manaoga fesuisuiai o tagata o le Ekalesia, ma i atugaluga faatino. E ui e tele fetuunaiga na tutupu i le aluga o taimi, ae o le aoaoga faavae autu ma feagaiga tutotonu o sauniga o le malumalu ua tumau pea. I le 1959, na aoao mai ai e Elder Harold B. Lee o le Korama a Aposetolo e Toasefululua lenei mataupu faavae i tagata fai sauniga i le Malumalu o Sate Leki: “O loo i ai ni a tatou metotia fou,” na ia saunoa ai, “ae o upumoni e tutusa lava e tusa lava po o a auala e tuuina atu ai. Atonu tatou te faamoemoe ia tele atu ni metotia fou—ae o faavae o le a le suia lava.”²

O isi Autu o le Talafaasolopito o le Ekalesia o loo talanoaina ai suiga faaletalafaasolopito i papatisoga mo e ua maliliu ma faamauga i le malumalu ma talanoaina le faatomuaga ma le atinaega musuia o le faaeega paia i le taimi o le soifuaga o Iosefa Samita. A o lei maliu o ia, sa faatonuina e Iosefa ia Polika Iaga e “faatulaga ma faapolokalama” le faaeega paia ina ia mafai ona faatautaia i totonu o le malumalu.³ O lea la,na faailoa mai ai e Polika Iaga ia suiga i le faaiuga o le 1845 e faavae ai le “faatulagaga sili atu i le faatautaiga o faaeega paia” e pei ona sa faatautaia ai i se malumalu mo le uluai taimi.⁴

I uluai malumalu, o nisi taimi sa fai ai le faaeega paia mo le tele o itula ma faaalia ai faatonuga uumi. I le aluga o taimi, sa sailia ai e taitai o le Ekalesia le taitaiga faalelagi ina ia mafai ai e tagata o le ekalesia ona faatino le tele o faaeega paia mo e ua maliliu. O se taunuuga, sa latou fetuunaia le gagana o le sauniga ma faaitiitia foi ma faalaugatasia faatonuga na tuuina atu i le taimi o le sauniga. I le faaiuga o le seneturi lona 19 ma le amataga o le seneturi lona 20, sa masani ona tuuina atu faaeega paia o le malumalu i vaega o tagata o le Ekalesia na faatulagaina e uarota, siteki, po o korama. I le vaitau o le 1920, sa le toe faaauauina ai e le Ekalesia ia faamanuiaga faamalolo sa faia i totonu o malumalu, ma gauai atili atu ai i le faateleina o le aofai o Au Paia o Aso e Gata Ai o e na o mai i malumalu e faatino sauniga mo o latou tuaa. Sa faaopoopo e taitai o le Ekalesia isi nofoa e tele i le malumalu, faateleina le aofaiga o sauniga o faaeega paia i aso taitasi, ma sa valaauina se pule e faatulaga ma vaaia tagata faigaluega o le malumalu. Sa latou faavaeina foi sauniga masani o faaeega paia e tatala i tagata taitoatasi o Au Paia o Aso e Gata Ai faapea foi ma vaega o e na malaga faatasi i le malumalu.⁵

O le uluai sefulu tausaga o le seneturi lona 20 sa vaaia ai foi suiga i sitaili o laei ma lavalava i Europa ma le Iunaite Setete. O sitaili o laei o tamaitai na suia ese mai lima uumi ma sakete totoso. O nei suiga i sitaili o laei sa le na o sitaili; sa silasila foi i latou o se faatagaina o gaoioiga saoloto ma taitai atu ai i se olaga maloloina. Na silafia e le Au Peresitene Sili ma le Korama a Aposetolo e Toasefululua, i lalo o le taitaiga a Peresitene Ipa J. Kurene, nei suiga ma sa mananao e fesoasoani i tagata o le Ekalesia ia faamamaluina a latou feagaiga o le malumalu. I le 1923, sa latou faailoa mai ai se mamanu fou, ma fautuaina ai le mafai ona faapuupuu o le ofusa o le malumalu i tulivae ma tulilima, aveesea kola masani, ma faaaoga fusiua faamau nai lo fusiua nonoa.⁶

I le amataga o le 1950, sa faamaonia ai e le Au Peresitene Sili se mamanu fou o le malumalu lea o le a faia ai le faaeega paia i se potu e tasi nai lo le manaomia o tagata ulu o le malumalu e mei atu i se faasologa o potu. O lenei suiga o le a mafai ai ona fausia ni malumalu laiti lea e manaomia ai ni nai tagata faigaluega toalaiti o le malumalu.⁷ Ina ia faafaigofieina le faatautaiga o le faaeega paia i nei malumalu laiti, sa taliaina ai e Peresitene David O. McKay se talosaga mai ia Gordon B. Hinckley ina ia faaaoga se ata e tuuina atu ai vaega o le faaeega paia. O le pu’eina sa faia i le fogafale lima o le Malumalu o Sate Leki, ma sa saunia le ata mo le faapaiaga o le malumalu i Suitiselani ia Setema 1955.

O suiga i nisi taimi i faiga faavae ma laei o le malumalu ua faaauauina i tausaga talu ai nei. I le 1979, mo se faataitaiga, sa folasia mai ofusa e lua vaega o se isi suiga i le sitaili e tasi le vaega na i ai muamua atu.⁸ O le isi fetuunaiga taua na oo mai i le 2019, ina ua faatagaina e le Au Peresitene Sili ia tamaitai e galulue o ni molimau mo papatisoga i le malumalu ma sauniga o faamauga.⁹

Na aoao mai Peresitene Uilifoti Uitilafi e faapea o Iosefa Samita ma Polika Iaga “e le’i mauaina faaaliga uma e faatatau i galuega [malumalu]; e faapena foi ia Peresitene Teila, po o Uilifoti Uitilafi. O le a leai se mutaaga o lenei galuega seia oo ina faaatoatoaina.’”⁸ I soo se tulaga lava, o suiga ua faatagaina e le Peresitene o le Ekalesia, o lē o loo umiaina ki uma e tatau ai mo sauniga o le perisitua. I le 2021, na aoao mai ai Peresitene Russell M. Nelson e faapea, o nei “fetuunaiga i faiga faavae o le malumalu, ma isi o le a mulimuli mai, o ni faamaoniga faifaipea o loo taitaia tonu e le Alii Lana Ekalesia.”¹¹

Punaoa o le Ekalesia

Lisa Olsen Tait and Brent Rogers, “A House for Our God,” i le Matthew McBride and James Goldberg,eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016).

Faasinomaga o Tusi

O lomiga nei o loo tuuina atu ai nisi faamatalaga e uiga i lenei autu. I le faasinoina atu po o le faafesoota’ia o oe i nei punaoa, matou te le faamaonia pe faamautinoa atu le anotusi po o manatu o tusitala.

James E. Talmage, The House of the Lord: A Study of Holy Sanctuaries Ancient and Modern (Salt Lake City: The Church of Jesus Christ of Latter-day Saints, 1912).

Richard E. Bennett, “‘Line upon Line, Precept upon Precept’: Reflections on the 1877 Commencement of the Performance of Endowments and Sealings for the Dead,” BYU Studies, vol.44, no.3 (2005), 39–77.

Autu Fesootai: Papatisoga mo e ua Maliliu, Korama Faauuina (“Faatulagana Paia”), Fale o Faaeega Paia, Malumalusa o Navu, Malumalusa o Sate Leki, Faamauga, Faaeega Paia o le Malumalu, Fale o le Malumalu, Faamalologa, Talafaasolopito o Aiga ma Gafa

1. 2 Nifae 28:30.

2. Harold B. Lee, Remarks, 9 Aug. 1959, Salt Lake Temple Historical Record, Book B, p. N, Church History Library, Salt Lake City.

3. L. John Nuttall, Diary, 7 Feb. 1877, typescript, Church History Library, Salt Lake City.

4. Heber C. Kimball, Journal, 13 Dec. 1845, Church History Library, Salt Lake City.

5. Matthew S. McBride, A House for the Most High: The Story of the Original Nauvoo Temple (Salt Lake City: Greg Kofford Books, 2007), 271–73; Lorenzo Snow, Instructions to Brethren and Sisters of the Salt Lake Temple District, 23 June 1893, reproduced in The Church News, Dec. 5, 1964, 15; Dale C. Mouritsen, “A Symbol of New Directions: George Franklin Richards and the Mormon Church, 1861–1950” (PhD diss., Brigham Young University, 1982), 196–226; Report of Regular Meeting of First Presidency and Council of the Twelve Apostles, Feb. 13, 1913, 11–13, Historical Department Journal History of the Church, 1830–2008, 1910–1919, CR 100 137, Church History Library, Salt Lake City.

6. Mo se faataitaiga, tagai “Temple Garments Greatly Modified: Church Presidency Gives Permission,” Salt Lake Tribune, June 4, 1923, 12.

7. Richard O. Cowan, “The Pivotal Swiss Temple,” i le Donald Q. Cannon and Brent L. Top, eds., Regional Studies in Latter-day Saint Church History: Europe (Provo, Utah: Religious Studies Center, 2003), 129–45.

8. Spencer W. Kimball, N. Eldon Tanner, and Marion G. Romney, Letter to Executive Administrators, Regional Representatives, Stake, Mission, and District Presidents, Bishops, Branch Presidents and Temple Presidents, 15 Dec. 1979, Historical Department Journal History of the Church, 1830–2008, 1970–1979, 1979 November–1980 January, CR 100 137, Church History Library, Salt Lake City.

9. Sarah Jane Weaver, “Women Can Serve as Witnesses for Baptisms, Temple Sealings, President Nelson Announces in Historic Policy Change,” Church News, Oke. 2, 2019, https://www.thechurchnews.com/members/2019-10-02/women-can-serve-as-witnesses-for-baptisms-temple-sealings-first-presidency-announces-in-historic-policy-change-162319.

10. Wilford Woodruff, “Discourse,” The Latter-day Saints’ Millennial Star, vol. 56, no. 21 (May 21, 1894), 321–25, https://catalog.churchofjesuschrist.org/assets/181beee9-55b6-45c5-881e-bac8482e915b/0/0.

11. Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 95, https://www.churchofjesuschrist.org/study/general-conference/2021/10/47nelson.