Elisa R. Senoa

Sa soifua mai Elisa R. Senoa i Massachusetts i le 1804 ma ola ae i Ohaio. Sa faaaloalogia tele lona aiga ma aoao ai o ia i lona lava lotopulea faatasi ai ma le iloa tusitusi ma faitautusi ma le lotu. Sa ia aoao e tusi ni solo, tausi tusi mo lona tama, ma suisui ma teu le fale ma lona tina.

Atapue o Elisa R. Senoa.

Faaaloaloga a le Matagaluega o Talafaasolopito o le Ekalesia

O Sini Rikitone, o se faifeau o le Lotu Papatiso Toefaatulagaina ma o se uo a le aiga, na ia faalauiloa atu le au Senoa ia Iosefa Samita i le 1831, ma sa vave lava ona liliu ai le tina o Elisa ma lona uso.¹ E silia ma le fa tausaga mulimuli ane, i le mavae ai o le tele o manatunatuga ma suesuega, sa papatisoina ai loa Elisa 31 tausaga le matua. Sa ia masii atu i Katelani, lea sa ia faiaoga ai i se a’oga mo le aiga o Samita, sa ia tusia se viiga mo le uluai tusi pese a le Au Paia o Aso e Gata Ai, ma foai atu le tele o ana meatotino i le fausiaina o le malumalu.² Faatasi ai ma isi o le Au Paia i Katelani, sa ia molimauina le faaaliga faaleagaga lea sa i ai i le faapaiaga o le malumalu.³

I le lotolotoi ai o sauaga i Misuri i le faaiuiuga o le 1830, sa valaauina ai e Iosefa Samita ia Elisa ia tusitusi e fai ma sui o ona tagata ma i lo latou puipuiga.⁴ Sa ia taliaina le lu’i, ma e oo ifo i le vaitau o le 1850, ua lauiloa o ia o le “Tamaitai Tusitala o Siona.” Sa ia tusia le silia ma le 500 solo lea sa ia tusifaasolo ai le talafaasolopito ma talitonuga o le Au Paia. O le tele o ana solo na avea ma viiga faapelepele ma sa lagiina i tolauapiga a paionia, i potu o fonotaga, ma i totonu o malumalu. O ana solo o loo faasaoina ai aoaoga taua mai ia Iosefa Samita (e aofia ai le aoaoga faavae o se Tina i le Lagi), uunaiaina o le Au Paia o Aso e Gata Ai i o latou tiute, ma le aoaoina o fanau i mataupu faavae o le talalelei.⁵

O tomai faaletaitaiga a Elisa na manino i Navu i le 1842, i lalo o le taitaiga a Iosefa Samita, ina ua faavaeina e ia, faatasi ma Ema Samita, Sarah Kimball, ma isi tamaitai le Aualofa a Tamaitai o Navu. I le avea ai ma se failautusi, sa faamaumau ai e Elisa i le api o minute a le faalapotopotoga ia aoaoga taua e uiga i le matafaioi tupito a tamaitai i le Toefuataiga. Sa ia feavea’ia nei minute i laufanua valevalenoa, ma mulimuli ane na faaaoga e fai ma taiala ma mamanu mo le faatulagaina o Aualofa i le lotoifale i Iuta atoa i lalo o le taitaiga a Polika Iaga.⁶ Sa auauna atu Elisa o le Peresitene Aoao lona lua o le Aualofa, na mulimuli i le poloai na tuuina atu i le na muamua ia te ia, o Ema Samita, ia faamalamalama atu tusitusiga paia ma apoapoai atu i tagata o le Ekalesia. Sa galulue Elisa ma isi tamaitai e faatulaga ma vaavaai le Faalapotopotoga o le MIA a Tamaitai Talavou (sa faatuina i le 1870) ma le Faalapotopotoga o le Peraimeri a tamaiti (sa faatuina i le 1878).

I le avea ai ma sē na faatuina ma se uluai taitai muamua o faalapotopotoga uma e tolu a tamaitai i totonu o le Ekalesia, sa malaga ai Elisa R. Senoa i le tele o malaga mamao ma lauga atu i tamaitai o le Ekalesia. “Ua tatou tutu i se tulaga e ese mai tamaitai o le lalolagi,” sa ia aoao atu ai i latou. “Ua tatou osia feagaiga ma le Atua, ua tatou malamalama i lana faatulagaga.”⁷ O ana lauga sa le gata na taulai atu i vaaiga moni o le olaga faapaionia, ae sa taulai atu foi i aoaoga faavae o le talalelei, le toefuataiga o le perisitua, le tali atu o le tagata lava ia i le fausiaina o le malo, ma le manaomia e tamaitai ona faalautele o latou vaaiga mamao i o latou gafatia. “E te iloaina se isi lava nofoaga i luga o le lalolagi,” sa ia fesili ai i le 1870, “lea e tele ai le saolotoga o tamaitai, ma o loo ia olioli ai i ni avanoa maualuluga ma mamalu e pei ona ia maua iinei, i le avea ai ma se tasi o le Au Paia o Aso e Gata Ai?”⁸

Sa lauiloa foi Elisa i ana auaunaga i totonu o le malumalu. Sa ia maua ona faaeega paia i Navu ma auauna atu o se tagata fai sauniga mo le tele o tausaga i le Maota o Faaeega Paia i le Aai o Sate Leki, i le taitaiina o tamaitai i sauniga o le malumalu.⁹ I se vaitau lea na faafesootai ai e autaunonofo le tele o le Au Paia o Aso e Gata Ai i le tele o galuega felavesai a aiga, sa faia ai e Elisa se matafaioi mataalia i aiga e toatele.¹⁰ O ia o se ava faaautaunonofo a Iosefa Samita ona sosoo ai lea ma Polika Iaga. E ui sa leai sana lava ia fanau, ae sa avea ma se faufautua i fanau a le aiga o Iaga ma faafaileleina sootaga i le va o le au Iaga ma isi aiga paionia. O le lona lua o fanau e toafitu a le au Senoa, sa ia faatumauina pea sootaga vavalalata ma ona uso ma tuagane ma o latou aiga, e aofia ai lona tuagane laitiiti o Lorenisio, lea sa mulimuli ane avea ma Peresitene o le Ekalesia.

Sa maliu Elisa i le aso 5 o Tesema, 1887. I lona falelauasiga i le Maota Potopoto i le Lotoa o le Malumalu, sa usuina ai e se aufaipese lana viiga lauiloa “Lo’u Tama e.” Sa faamamaluina o ia e aposetolo, aiga, ma uo i solo, lauga, manatuaga a le tagata lava ia, ma molimau maumaututu.¹¹ O le faasalalauina o lona maliu i le New York Times sa faamatalaina ai o ia o se “tasi o tagata autu o le aniva Mamona.”¹²

Punaoa o le Ekalesia

“After the Order of Heaven,” i le Jennifer Reeder and Kate Holbrook, eds., At the Pulpit: 185 Years of Discourses by Latter-day Saint Women (Salt Lake City: Church Historian’s Press, 2017), 15–19.

Eliza R. Snow, “Let Us Cultivate Ourselves,” i le At the Pulpit, 41–45.

Eliza R. Snow, “An Elevation So High above the Ordinary,” i le At the Pulpit, 55–59.

“Eliza R. Snow, ‘My Father in Heaven,’ October 1845,” i le Jill Mulvay Derr, Carol Cornwall Madsen, Kate Holbrook, and Matthew J. Grow, eds., The First Fifty Years of Relief Society: Key Documents in Latter-day Saint Women’s History (Salt Lake City: Church Historian’s Press, 2016), 173–75.

“Eliza R. Snow, Discourse, August 14, 1873,” i le The First Fifty Years of Relief Society, 380–88.

“Eliza R. Snow, Report to Philadelphia Centennial Exposition, March 1876,” i le The First Fifty Years of Relief Society, 389–98.

O Afafine i Lo’u Malo: O Le Talafaasolopito ma le Galuega a le Aualofa (2011).

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Karen Lynn Davidson and Jill Mulvay Derr, Eliza: The Life and Faith of Eliza R. Snow (Salt Lake City: Deseret Book, 2013).

Jill Mulvay Derr, “‘Cheerfully Respond to Every Call’: Eliza Roxcy Snow,” i le Richard E. Turley Jr. and Brittany A. Chapman, eds., Women of Faith in the Latter Days, Volume 1, 1775–1820 (Salt Lake City: Deseret Book, 2011), 389–406.

Jill Mulvay Derr and Karen Lynn Davidson, eds., Eliza R. Snow: The Complete Poetry (Provo and Salt Lake City: Brigham Young University Press and University of Utah Press, 2009).

Maureen Ursenbach Beecher, ed., The Personal Writings of Eliza R. Snow (Logan: Utah State University Press, 2000).

Autu Fesootai: Female Relief Society of Nauvoo [Aualofa a Tamaitai o Navu], Peraimeri, Young Women Organizations (Faalapotopotoga a Tamaitai Talavou

Faamatalaga

1. Tagai i le Autu: Sidney Rigdon.

2. Tagai i le Autu: Viiga.

3. Tagai i Autu: Faaeeina mai o le Mana, Malumalu o Katelani, Faapaiaga o Malumalu ma Tatalo o Faapaiaga, Faamanuiaga Faapeteriaka, Meaalofa o Gagana.

4. Tagai i le Autu: Mormon-Missouri War of 1838 [Taua a Mamona-Misuri o le 1838].

5. Tagai i le Autu: Tina i le Lagi.

6. Jill Mulvay Derr, Carol Cornwall Madsen, Kate Holbrook, and Matthew J. Grow, eds., The First Fifty Years of Relief Society: Key Documents in Latter-day Saint Women’s History (Salt Lake City: Church Historian’s Press, 2016), xvii.

7. Eliza R. Snow, i le “Miss E. R. Snow’s Address to the Female Relief Societies of Weber County,” Latter-day Saints’ Millennial Star, vol. 33, no. 37 (Sept. 12, 1871), 578.

8. Eliza R. Snow, i le “Great Indignation Meeting,” Deseret News, vol. 28, no. 50 (Jan. 19, 1870), 555.

9. Tagai i Autu: Faaeega Paia o le Malumalu, Korama Faauuina (“Faatulagaga Paia”).

10. Tagai i le Autu: Autaunonofo i Iuta.

11. The Life and Labors of Eliza R. Snow Smith; with a Full Account of Her Funeral Services (Salt Lake City: Juvenile Instructor, 1888), 15–37.

12. “The Mormon Poetess is Dead,” New York Times, Dec. 6, 1887.