Tolauapiga a Siona (Tolauapiga a Isaraelu)

Mai ia Me e oo ia Iuni 1834, e tusa ma le 230 alii, fafine, ma tamaiti na savavali agai i Misuri e fesoasoani i Au Paia o e sa tutuliese mai le Itumalo o Siakisone, Misuri, i le tausaga talu ai. O lenei faigamalaga, ua lauiloa i aso nei o le Tolauapiga a Siona, ae na muai faaigoaina o le Tolauapiga a Isaraelu. Sa faavaeina ina ua mavae ona maua e Iosefa Samita se faaaliga ia Fepuari 1834, lea sa faatonuina ai o ia e valaau atu (faapotopoto) le malosiaga o le maota a le Alii e laveai Siona mai i ona fili.¹ Na faatonuina e le faaaliga taitai o le Ekalesia e faapotopoto ia le itiiti ma le 100, ma pe a mafai ia alii e 500 e malaga atu i Misuri. Ia Mati, na faimalaga atu ai Iosefa Samita ma isi i Niu Ioka e aumai ni volenitia ma se fesoasoani tautupe mo le faigamalaga.

Ata o le Tolauapiga a Isaraelu ua taunuu i Misuri.

Na taitaia e Iosefa se vaega mai Katelani, Ohaio i Misuri. I le taimi lava lea, na tuua ai e Ailama Samita ma Lyman Wight ia Teritori o Pontiac, Michigan, ma se vaega e tusa ma le 20 tagata. Sa aoina tagata i le ala, ma sa tuufaatasia vaega e lua ia Iuni i le maliliega i le Salt River i Misuri ao le’i agai atu i le Itumalo o Kalei. I le malaga atoa, na masani lava ona mafatia tagata auai mai le le lava o meaai ma vai inu. Talu ai na latou savalia le lata i le 40 maila i le aso, sa aafia foi nisi i le mafo’e ma le toto o vae. Na faitio nisi o le au malaga ona o nei tulaga, lea sa le lelei ai le malaga mo isi.²

E ui na faaalia e le faaaliga ia Fepuari 1834 le tolauapiga e pei o se faagaoioiga o se militeri, ae sa vaaia e Iosefa Samita ma isi taitai o le Ekalesia o se faatosinaga mama o le puipuiga. O le talitonu ai o le a naunau le kovana o Misuri o Tanielu Dunklin e logo fitafita o le malo e toe faafoi le Au Paia i o latou fanua, sa manao Iosefa i le Tolauapiga o Isaraelu e savavali i Misuri e talosaga ia Dunklin e valaau fitafita a le malo. Ina ua mavae ona toe faafeao atu e fitafita o le malo le Au Paia i le Itumalo o Siakisone, sa tumau ai le Tolauapiga a Isaraelu e puipui tagata o le Ekalesia mai le toe tulieseina.

O tagatanuu o Misuri i sisifo, sa faapopoleina i le agai atu o le tolauapiga ma sa latou sauniuni mo e siitaua. Ia Iuni 19, 1834, mo se faataitaiga, e toalima ni alii na faaauupegaina na agai atu i le tolauapiga i Fishing River ma sa tauto atu o le Tolauapiga a Isaraelu o le a “vaaia seoli ae le’i oo i le taeao” mai se vaega o alii e 400 . Ae peitai, na tetele le papa o faititili i lena po, sa touulu ai ni timuaisa tetele, sa sua tutu’i ai le Fishing River e lata i le 40 futu le loloto, ma taofia ai le osofaiga. “E foliga mai o le poloaiga o le tauimasui sa sau mai le Atua o taua e puipui ai ona auauna mai le faaumatiaga a o latou fili,” sa faaiuina ai le talafaasolopito a Iosefa Samita.³

I le iloa ai o le tetee i le tolauapiga ma le faalogo atu ua toe foi Dunklin i lana folafolaga e valaau fitafita o le malo, sa talosagaina ai e Iosefa Samita le Alii mo se taitaiga. Ia Iuni 22, 1834, sa ia mauaina se faaaliga o ta’u mai ai ua le o toe manaomia e le tolauapiga ona laveai Siona. Sa faaauau pea le faaaliga, a’o le’i mauaina lena laveai, sa tatau ai i toeaiina o le Ekalesia ona mauaina se faaeega paia o le mana i le maota o le Alii i Katelani, lea na fausia i lena taimi. Sa amata ona taape le tolauapiga i le faaiuga o Iuni. O lenei faataapeapeina na faanatinatiina ina ua pepesi le kolera i tagata o le tolauapiga, na i’u lava ina maliliu ai tagata auai e 13 ma le toa 2 o tagata o le Ekalesia i Misuri. Ia Iulai 1834, na toe foi ai le toatele o tagata auai i le tolauapiga i Katelani.

E ui e le’i toe foi le Au Paia i a latou fanua i le Itumalo o Siakisone, ae e toatele i latou sa malaga faatasi ma le Tolauapiga a Isaraelu sa lei vaai i le faigamalaga o se toilalo. O nisi, e pei o Polika Iaga, sa manatu i ai o se avanoa lelei le savavali faatasi ai ma Iosefa Samita ma aoao mataupu faavae o le taitaiga mai ia te ia. O isi sa vaaia le aao o le Atua o faamanuia o latou olaga i le taimi atoa o le faigamalaga. O le faigamalaga sa avea ma se auala e tuuina atu le lumanai lelei mo taitai o le Ekalesia. Ina ua faavaeina le Korama a Aposetolo e Toasefululua ia Fepuari 1835, e toa 8 o le uluai toa 12 o alii sa savavali ma le Tolauapiga a Isaraelu. O tamaloloa uma na valaauina i le uluai Fitugafulu ia Fepuari 1835 sa avea foi ma sui o le tolauapiga.

Punaoa o le Ekalesia

Alexander L. Baugh, “Joseph Smith and Zion’s Camp,” Ensign, June 2005, 42–47.

Matthew C. Godfrey, “The Acceptable Offering of Zion’s Camp,” i le Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 213–18.

“Revelation, 24 February 1834 [DC 103],” i le Notebook of Revelations, 7–18, josephsmithpapers.org

“Revelation, 22 June 1834 [DC 105],” i le Revelation Book 2, 97–100, josephsmithpapers.org.

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Peter Crawley and Richard L. Anderson, “The Political and Social Realities of Zion’s Camp,” BYU Studies, vol. 14, nu. 4 (1974), 406–20.

Matthew C. Godfrey, “‘The Redemption of Zion Must Needs Come by Power’: Insights into the Camp of Israel Expedition, 1834,” BYU Studies, vol. 53, nu. 4 (2014), 125–46.

Andrea G. Radke, “We Also Marched: The Women and Children of Zion’s Camp, 1834,” BYU Studies, vol. 39, nu. 1 (2000), 147–65.

Autu e Fesootai i ai: Jackson County Violence

Faamatalaga

1. “Revelation, 24 February 1834 [DC 103],” josephsmithpapers.org.

2. History, 1838–1856, volume A-1 [23 December 1805–30 August 1834], 495, josephsmithpapers.org.

3. History, 1838–1856, volume A-1 [23 December 1805–30 August 1834], 497, josephsmithpapers.org