Initipene, Misuri

I le 1827, na faavaeina ai e tagata na nofoia mai i saute o le Iunaite Setete se aai na ta’ua o Initipene i le Itumalo fou na faatulagaina o Jackson, i Misuri.¹ Sa i ai le aai i se nofoaga sa muai fuafuaina i le tuaoi o le atunuu: e taatia i le faatausiusiuga i sisifo o ala vaitafe mai isi vaega uma o le Iunaite Setete ma e i le faatausiusiuga i sasae o le Auala o Santa Fe, lea e mamao lava e tau atu i le teritori lea sa tele ina nofoia e Initia Amerika. Sa faaigoaina le aai i le Faalauiloaga o le [Tutoatasi] o Initipene a le I.S. ae o le itumalo sa faaigoaina ia Andrew Jackson, o le sa avea ma toa o le atunuu a o avea ai ma se taitai maualuga i le Vaegaau a le I.S. ma sa filifilia mulimuli ane o se peresitene o le Iunaite Setete.

I le amataga o le 1831, sa ui atu ai faifeautalai o le Au Paia o Aso e Gata Ai i Initipene mo le taimi muamua, ma le faamoemoe e talai atu i Initia Amerika o e sa nonofo i laueleele i sisifo o Misuri. Sa le’i leva ae asiasi atu Iosefa Samita i Initipene ma maua ai se faaaliga lea na faailoa mai ai le eria “o le nofoaga tutotonu” o Siona—o le nofoaga o se aai paia lea o le a manumalo ai le amiotonu ma o le a sauniuni ai le Au Paia mo le Afio Mai Faalua o Iesu Keriso.² I le aso 2 o Aokuso, 1831, sa fofogaina ai e Sini Rikitone le laueleele “ua faapaiaina ma tuuto atu i le Alii mo le umia ma o se tofi mo le Au Paia.” O le aso na sosoo ai, sa faapaiaina ai e Rikitone se nofoaga e afa maila i sisifo o le ogatotonu o Initipene mo le fausiaina o se malumalu, ma o Iosefa Samita sa faataatiaina le maatulimanu muamua.³

I lalo o le taitaiga a Epikopo Edward Partridge, o le Au Paia muamua lava sa nofoia le eria, sa amata faatauina mai ni fanua ma tapena mo isi Au Paia e faapotopoto atu i ai e atinae ai Siona. I le va o le 1831 ma le 1833, na faatau mai ai e le Ekalesia le 180 eka i Initipene ma le 1,200 eka o eria taulalata ane o le Itumalo o Jackson, ma sa faapotopoto atu i ai le tusa ma le 1,200 o le Au Paia i le itumalo ma faatulaga ai ni paranesi se lima.⁴ O Iuni o le 1833, na auina atu ai e le Au Peresitene Sili, o le taimi lea a o i ai i Katelani, Ohaio, ia se faafanua ua vaevaeina, po o se fuafuaga o le aai, i taitai o le Ekalesia i Misuri mo le “Aai o Siona,” na faaalia ai le ala e tatau ona faatulaga ai le aai faataamilo i se lotoa o ni malumalu e luasefulufa, o maota paia na faapaiaina ia faataunuu ai manaoga faaletino ma faaleagaga o le Au Paia.

O le mea e faanoanoa ai, sa oo ina faateteleina le le talitonuina e tagata na nofoia muamua le eria i le i ai o le Au Paia o Aso e Gata Ai i Misuri. O le faateteleina o feteenaiga i le va o le Au Paia ma o latou tuaoi, sa faapea ona oo i se tulaga faigata i le taumafanafana o le 1833, lea na iu ai ina tutuliesea uma tagata o le Au Paia mai le itumalo. E ui lava i la latou malaga ese, sa mumusu le Au Paia e faatau atu o latou fanua o loo i le Itumalo o Jackson, ma le faamoemoe e mafai ona latou toe mauaina mai i le fesoasoani a le setete po o le malo. Ina ua toilalo a latou taumafaiga ia toe maua mai o latou fanua, sa taulai loa le Au Paia i le fausiaina o nofoaga fou e faapotopoto i ai i Ilinoi ma mulimuli ane i Iuta.

E ui lava ina mavae ona taitai atu e Polika Iaga ma le au Aposetolo e Toasefululua le toatele o le Au Paia i sisifo, ae toatele lava sa faamoemoe e toe foi atu i se aso e atinae Siona e latalata i Initipene. Ae o le taimi lea, na toe foi atu ai i le eria ia tagata o isi lotu o e na vavaeese mai i Le Ekalesia a Iesu Keriso o le Au Paia o Aso e Gata Ai. O le asō, e tele lotu ua faapea mai o Iosefa Samita na faavaeina [a latou ekalesia] e manatu i nofoaga na fesootai ma taumafaiga a le Au Paia anamua e atinae Siona, o ni nofoaga paia.

Punaoa o le Ekalesia

“Independence Visitors’ Center, Missouri,” history.lds.org.

Aaron L West, “Questions and Answers about the Temple Lot in Independence, Missouri,” history.lds.org.

Jed Woodworth, “The Center Place: MFF 52, 57, 58,” i le Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Aai o Sate Leki: O Le Ekalesia a Iesu Keriso o le Au Paia o Aso e Gata Ai, 2016), 122–29.

David W. Grua, “Waiting for the Word of the Lord: MFF 97, 98, 101,” i le McBride and Goldberg, Revelations in Context, 196–201.

Faatomuaga Lauiloa i le “Revelation, 20 July 1831 [MFF 57],” josephsmithpapers.org.

Faatomuaga Lauiloa i le “Plat of the City of Zion, circa Early June–25 June 1833,” josephsmithpapers.org.

Graham W. Doxey, “Missouri Myths,” Ensign, Apr. 1979, 64–65

Autu e Faatatau i Ai: Vevesiga i le Itumalo o Jackson, Siona/Ierusalema Fou, Faapotopotoina o Isaraelu

Faamatalaga

1. John L. Fowles, “Missouri and the Redemption of Zion: A Setting for Conflict,” i le Arnold K. Garr and Clark V. Johnson, eds., Regional Studies in Latter-day Saint Church History: Missouri (Provo, Utah: Religious Studies Center, Brigham Young University, 1994), 158.

2. “Revelation, 20 July 1831 [MFF 57],” i le Revelation Book 1, 93, josephsmithpapers.org; ua faalaugatasia le sipelaga; tagai foi Mataupu Faavae ma Feagaiga 57:3.

3. “John Whitmer, History, 1831–circa 1847,” 32, josephsmithpapers.org; ua faalaugatasia le sipelaga.

4. Faatomuaga Lauiloa i le “Plat of the City of Zion, circa Early June–25 June 1833,” josephsmithpapers.org.