Meaalofa o le Tautala i Gagana

O le tautala i gagana sa ta’ua i faaaliga ia Iosefa Samita o se tasi o meaalofa e tele a le Agaga e mulimuli ia i latou o e faatuatua ia Iesu Keriso.¹ E lua ni auala na iloa ai e uluai Au Paia o Aso e Gata Ai lenei meaalofa. Muamua, o le tautala po o le pepese i se gagana e le masani ai, o nisi taimi e faaigoa o le glossolalia. O lea ituaiga o faailoaga sa talitonu na faapogai mai i ona po o Paulo ma sa masani ona mulimuli mai ai se faaliliuga musuia.² O le ala lona lua sa iloa ai e tagata o le Ekalesia le meaalofa o le tautala i gagana o le folafolaina atu o le talalelei i se gagana e le masani ai le tagata tautala ae masani ai tagata e faalogologo atu ia te ia. O lea faiga, sa lauiloa o le xenoglossia, sa faaalia i le aso o le Penetekoso ina ua tautatala faavavega ia soo anamua o Iesu Keriso i gagana e le masani ai ma sa folasia atu ai le talalelei i Nuuese.³

I se fonotaga i le 1835, sa maua ai e Elizabeth Ann Whitney se faamanuiaga mai le peteriaka o le Ekalesia o Iosefa Samita le Matua, lea na folafola atu ai ia te ia le “meaalofa o le usuina o pese musuia.” I le taimi o lena fono, sa tulai ae ai Whitney a amata ona pese i se gagana sa lei masani ai. I le faatumulia ai i le Agaga Paia, sa faamatalaina e Pale P. Palate lana pese mo isi sa faalogologo ai. “I aso anamua sa i ai se tagata,” o le amataga lea o le pese, “I totonu o se togalaau manaia, I le mea sa taufuifui ai fugalaau e le mate matagofie, Ma sa sasala matagofie lona manogi; Faauta, o lona igoa o Atamu.” Sa talitonu Iosefa Samita le Matua, sa lagiina e Whitney i le gagana mama a’ia’i o le lagi.⁴ O faataitaiga o glossolalia, e pei o le pese a Whitney, sa tutupu i nisi o sauniga faalelotu i Amerika, ma e ui ina sa maimoaina ma le le talitonu e le tele o Kerisiano,⁵ o lea faiga sa talia lelei e uluai Au Paia o Aso e Gata ai, o e sa talitonu o se faafouga o meaalofa faaleagaga o se vaega taua o le Toefuataiga o le talalelei. Sa manatu Polika Iaga o le tautala i gagana o se aafiaga “musuia” faaleagaga ma o se vaega taua o lona liua.⁶

I Katelani, o feeseeseaiga o le Au Paia o Aso e Gata Ai e uiga i le faamaoni o nisi o faaaliga faaleagaga na oo ai ina sailia e Iosefa Samita se faaaliga e faatatau i le mataupu.⁷ Sa tali mai le Alii e ui ina sa ulu atu i le Ekalesia ni faaaliga faaleagaga sese, ae sa mafai e le Au Paia o Aso e Gata Ai ona iloatino le mea tonu mai faaaliga sese, e aofia ai faataitaiga o glossolalia, pau lava le mea ia latou mulimuli i le Agaga Paia ma mamanu ua faatuina mai e le Alii.⁸ Sa lapataia mulimuli ane e Iosefa le Au Paia e faapea e mafai e Satani ona faapopoto le tautala i gagana ma faapea o le a le faaalia lava e le Alii ia aoaoga faavae o le Ekalesia i lea faiga.⁹ Sa ia faamaninoina atili, “Na tuuina mai gagana mo le faamoemoega o le talai atu ia i latou o a latou gagana e le malamalama ai,” ma faaopoopo atu e faapea soo se tasi “e i ai le Agaga Paia e mafai ona tautala i mea a le Atua i lana lava gagana, faapea foi ona tautala i se isi gagana.”¹⁰ Sa faaauau pea ona avea le glossalalia o se vaega taua o le tapuaiga a le Au Paia o Aso e Gata Ai i le vaega na totoe o le seneturi 19, e ui ina sa faifai malie ona mou atu lea faiga ma mou uma atu ai i le amataga o le seneturi 20.

Mai le amataga, sa talia ai e le Au Paia o Aso e Gata Ai le meaalofa faaleagaga o le tautala i gagana ese, e avea o se fesoasoani i le faasalalauina o le talalelei. O faaaliga ia Iosefa Samita na folafola atu ai i faifeautalai lenei meaalofa, ma e toatele ua lipoti maia ni aafiaga faavavega i le folafolaina atu o le talalelei i gagana e le masani ai. I le avea ai ma se faifeautalai e 23-tausaga le matua i Hawaii i le 1850, sa galue malosi ai George Q. Cannon e aoao le faa-Hawaii ina ia mafai ai e ia ona talai, e faaaoga ai le “faatuatua i luma o le Alii ia maua ai le meaalofa o le tautala atu ma malamalama i le gagana.” Sa ia faamatala faapea i se tasi afiafi a o aoao atu, sa ia “lagonaina ai se uunaiga uiga ese i o’u taliga” ma “mai lena taimi agai i luma, sa ia te au ae itiiti, pe afai sa i ai, se faigata e malamalama ai i mea sa tautatala mai ai tagata.” O Ailama Jensen, o se faifeautalai fou i Nouei i le 1890, sa lotovaivai ina ua ulagia o ia e tagata i lona le mafai ona tautala. Sa ia tu i se pupu laau, ma sa tatalo ia tuu atu e le Alii ia te ia le meaalofa o gagana. Sa molimau mai Jensen e faapea na amata mai lena aso, “sa sili ona faigofie lo’u tautala atu i le gagana Nouei nai lo lo’u tautala faa-Peretania.”¹¹

A o faalauteleina le galuega faafaifeautalai i le faaiuga o le seneturi 19 ma le amataga o le seneturi 20, sa amata ona taatele le xenoglossia e malamalama ai i le meaalofa o gagana. Sa amatalia e Misiona mo le Aoaoina o Gagana ma mulimuli ane ai nofoaga tutotonu mo le aoaoina o faifeautalai, ni polokalama e suesue ai gagana e aumaia ai le meaalofa faaleagaga o gagana, e tapena ai faifeautalai e folafola atu le talalelei i le tele o gagana ese. Ua molimauina e Au Paia o Aso e Gata Ai i le lalolagi atoa le mana o lenei meaalofa faaleagaga.¹²

Punaoa o le Ekalesia

“E Mafai Faapefea Ona Sili Atu Lo’u Aoaoina o le Gagana a La’u Misiona?” i le Tala’i La’u Talalelei: O Se Taiala mo le Galuega Faafaifeautalai (Aai o Sate Leki: O Le Ekalesia a Iesu Keriso o le Au Paia o Aso e Gata Ai, 2004), 137.

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

J. Spencer Fluhman, “The Joseph Smith Revelations and the Crisis of Early American Spirituality,” in Andrew H. Hedges, J. Spencer Fluhman, and Alonzo L. Gaskill, eds., The Doctrine and Covenants: Revelations in Context (Provo, Utah: Religious Studies Center, Brigham Young University, 2008), 66–89.

Steven C. Harper, “‘A Pentecost and Endowment Indeed’: Six Eyewitness Accounts of the Kirtland Temple Experience,” in John W. Welch, ed., Opening the Heavens: Accounts of Divine Manifestations, 1820–1844 (Provo, Utah: Brigham Young University Press, 2005), 351–71.

Mark Lyman Staker, Hearken, O Ye People: The Historical Setting of Joseph Smith’s Ohio Revelations (Salt Lake City: Greg Kofford Books, 2009), 119–46, 167–91.

Autu Fesootai: Meaalofa o le Agaga

Faamatalaga

1. Tagai Mataupu Faavae ma Feagaiga 46:24–25; tagai foi “Revelation, circa 8 March 1831–A [DC 46],” in Revelation Book 1, 78, josephsmithpapers.org.

2. Tagai 1 Korinito 14:1–14

3. Tagai Galuega 2.

4. Jennifer Reeder and Kate Holbrook, eds., At the Pulpit: 185 Years of Discourses by Latter-day Saint Women (Salt Lake City: Church Historian’s Press, 2017), 7–9, 360 (footnote 9).

5. Robert H. Abzug, Cosmos Crumbling: American Reform and the Religious Imagination (New York: Oxford University Press, 1994), 66.

6. Sa manatua e Iosefa Samita ia Polika Iaga na muai folasia atu ia te ia le tautala i gagana; tagai J. Spencer Fluhman, “The Joseph Smith Revelations and the Crisis of Early American Spirituality,” i le Andrew H. Hedges, J. Spencer Fluhman, ma Alonzo L. Gaskill, eds., O Le Mataupu Faavae ma Feagaiga: Faaaliga i le Matalalaga (Provo, Utah: Religious Studies Center, Brigham Young University, 2008), 74; tagai foi Minute Book 1, 179, josephsmithpapers.org; Stephen Post Papers, in Steven C. Harper, “‘A Pentecost and Endowment Indeed’: Six Eyewitness Accounts of the Kirtland Temple Experience,” in John W. Welch, ed., Opening the Heavens: Accounts of Divine Manifestations, 1820–1844 (Provo, Utah: Brigham Young University Press, 2005), 351–52.

7. Tagai “Revelation, circa 8 March 1831–A [DC 46],” in Revelation Book 1, 76–78, josephsmithpapers.org.

8. “Faaaliga, 9 Maye 1831 [MFF 50],” in Revelation Book 1, 82–85, josephsmithpapers.org.

9. Iosefa Samita,“Try the Spirits,” Times and Seasons, vol. 3, no. 11 (Apr. 1, 1842), 743–48.

10. Joseph Smith, “History, 1838–1856, volume C-1 [2 November 1838–31 July 1842],” 8, josephsmithpapers.org; sipelaga ma faailoga ua faalaugatasia.

11. George Q. Cannon, ta’ua i le Edwin F. Parry, “Missionary Life,” Juvenile Instructor, vol. 33, no. 20 (Oct. 15, 1898), 682–83. Ua sii mai e Parry le tele o faataitaiga o faifeautalai ma isi ua iloa le meaalofa o gagana.

12. David F. Boone, “Missionary Work: 1900–Present,” i le Brandon S. Plewe, ed., Mapping Mormonism: An Atlas of Latter-day Saint History (Provo, Utah: Brigham Young University Press, 2012), 180.16–17.