Susa Young Gates

Na fanau Susa Young Gates i le aso 18 o Mati, 1856. O ia o le afafine lona lua o Polika Iaga ma Lucy Bigelow ma o le pepe muamua na fanau i le Maota o le Liona i le Aai o Sate Leki. Na ia tuputupu ae o siomia e le tele o tamaiti ma na olioli i se olaga fiafia ao laitiiti na faatumuina i le aoga, musika, tala faatino, siva, ma faamalositino. Na faapitoa lava le talenia o Susa i musika ma le tusia o solo.¹

Atatosi o Susa Young Gates ao laitiiti.

I le 14 o tausaga, na siitia atu ai Susa i le 300 maila mai le Aai o Sate Leki i se taulaga laitiiti o St. George i Iuta i saute. I le lua tausaga mulimuli ane, sa faaipoipo ai o ia i se fomai nifo talavou, o Alma Dunford. E toalua le la fanau, o se afafine ma se atalii, ae na faaletonu le faaipoipoga, ma na tatalaina e Susa le faaipoipoga ma Dunford i le 1878. Na matuai matautia le tatalaina o le faaipoipoga mo Susa. Na te lei toe mauaina lana fanau ma na itiiti se fesootaiga ma lana tama teine mo le tele o tausaga; na ia le maua foi lona fanua mai lona tama. O tala faatupu a le nuu e faasagatau ia te ia na matautia le agaleaga.²

I le mavae ai o se tausaga i le Aoga a Polika Iaga i Provo, lea na ia faatulaga ai le matagaluega muamua o musika, na ia faaipoipo ia Jacob F.Gates, o se alii talavou mai St. George, ia Ianuari 1880. O lenei faaipoipoga na faamaonia o se punaoa o le fiafia tumau ma le lagolago tutusa. Sa la auauna atu faatasi i se misiona i Hawaii mai le 1885 i le 1889.

E oo atu i le 1880 ua amata e Susa ona faatulagaina o ia lava o se tusitala, tuuina atu lipoti, tusiga, ma tala i lomitusi o le lotoifale, e faaaogaina ai soo lona igoa tusitusi, o le Homespun. I le 1889 na ia faavaeina ai le Young Woman’s Journal, o se mekasini faalemasina a le Sosaiete o le Mutuale Faaleleia a Tamaitai Talavou, lea na ia faatonuina seia oo i le 1900. Na ia saofaga atu i mekasini ma nusipepa mo aso o totoe o lona soifua, ma i le 1914, na ia avea ma faatonu muamua o le Mekasini a le Aualofa. Mo Susa, o le tusitusi o se naunautaiga pele lea na ia faia ai se saofaga aoga i le atunuu. “O lou agaga atoa o le fausiaina o lenei malo,” na ia tusi atu ai i se tasi e latalata i ai e uiga i ona naunautaiga faaletusitusi. “Ou te galue malosi e fesoasoani i ou uso i lenei lava galuega.³

Mai le 1890 agai i luma, na auai Susa i se faaalia lelei o galuega lautele, faalemalo, ma le auaunaga i le Ekalesia. Na ia auauna atu i le Aufono o Tupe mo le Iunivesite o Polika Iaga, na faiaoga i vasega faatausi aiga, ma faalauiloa le faamalositino i le aoga. Na ia auai i le Aufono o Tamaitai o le Atunuu, saunoa atu i fonotaga a le atunuu, ma auauna atu o se sui o ni nai fonotaga o le konekeresi, ma taitaia le Komiti Faasalalau. Sa ia avea le galuega o gafa ma galuega o le malumalu o se faamamafa faapitoa i le ogatotonu o lona olaga ma avea o se faamalosiau i le faatulagaina o nei eria o se taulai autu mo tagata o le Ekalesia.⁴ Na ia auauna atu i le aufono aoao o le YLMIA seia oo i le 1911, ina ua valaaulia o ia i le aufono aoao o le Aualofa, lea na auauna atu ai o ia seia oo i le 1922. I ona tausaga mulimuli ane, na ia lolomiina ai se talaaga o lona tama, O le Tala o le Soifuaga o Polika Iaga, ma maua ai le faitau afe o itulau o se tusiga e lei lolomiina na fuafua o se talafaasolopito o tamaitai o le Au Paia o Aso e Gata Ai.

Atapue o Susa Young Gates.

Na aafia Susa Young Gates i le tele o faaletonu ma faanoanoaga i lona olaga, e aofia ai le maliliu o le toavalu o lana fanau e sefulutolu, o nisi na maliliu i lalo o tulaga matautia e le masani ai. Sa aafia o ia i ni faafitauli ogaoga o le soifua maloloina, faaletonu o mea tautupe, ma le loto momomo mai filifiliga a tagata o le aiga. Ae ui i lea, o lona faatuatua na taulaina lona olaga, ma na ia manatua na ia aoao ia aua le “saili e sui le finagalo o le Atua ia fetaui ma ou lava manaoga.” Nai lo lena, na ia fai mai ai, na ia aoao ia “anapogi ma tatalo ia ou maua le faamalieina” e tusa lava po o le a le mea e aumai e le Alii. “Afai e faia e le Atua ia ou faamalieina i Ana mea uma e faia mo au,” na ia saunoa ai, “o le a [le eseesega] o mea e oo mai ia te au?”⁵

Atatosi o Susa Young Gates mulimuli ane i le olaga.

Punaoa o le Ekalesia

Lisa Olsen Tait, “Susa Young Gates and the Vision of the Redemption of the Dead: MF&&F 138,” in Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 315–22.

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina atu po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

James B. Allen and Jessie L. Embry, “‘Provoking the Brethren to Good Works’: Susa Young Gates, the Relief Society, and Genealogy,” BYU Studies, vol. 31, no. 2 (Spring 1991), 115–38.

Autu Fesootai: Brigham Young, Retrenchment, Young Women Organizations, Relief Society, Church Periodicals, Church Academies, Women’s Suffrage

Faamatalaga

1. Harold H. Jensen, “Susa Young Gates,” Juvenile Instructor, vol. 64, no. 3 (March 1929), 135.

2. Susa described the events of her marriage and divorce to Alma in a letter to her sister Zina Young Williams. Susa Young Gates to Zina Young Williams, May 18, 1878, Susa Young Gates papers, circa 1870–1933, Church History Library, Salt Lake City.

3. Susa Young Gates to Zina D. H. Young, May 5, 1888, Susa Young Gates papers, circa 1870–1933, Church History Library, Salt Lake City.

4. Lisa Olsen Tait, “Susa Young Gates and the Vision of the Redemption of the Dead: D&C 138,” in Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 316–17.

5. Susa Young Gates, “Not My Will,” Young Woman’s Journal, vol. 4, no. 12 (Sept. 1893), 570–71.