Elijah Able

O Elijah Able (o nisi taimi e sipelaina Abel po o Abels) o se uluai tagata o le Ekalesia Aferika- Amerika ma o le tagata e sili le lauiloa o ni nai alii uli na faauuina i le perisitua i le taimi o soifua Iosefa Samita.

E itiiti se mea ua iloaina e uiga i le soifuaga o Abel a o talavou. O lona fanau mai i Maryland o loo tusia i le va o le 1808 ma le 1812, ma o suafa o ona matua e le o mailoa.¹ E foliga mai o ia o se atalii a se ulugalii e eseese atunuu. Na faaalia mai e le Tusigaigoa o le I.S. i le 1850 o Abel sa kuata lona toto uliuli, a e o se isi punaoa na faailoa mai ai o ia e tasi vae valu le toto uliuli.²

Na ola ae Abel ma avea o se tagata matua i le Iunaite Setete i le taimi o le faailoga lanu. Na faatagaina e setete i saute le faapologaina o tagata e i ai tuaa Aferika; na avea pologa ma se tulaga solitulafono i setete i matu, e ui lava o tagata papae i matu na masani lava ona vaai i tagata uli i se tulaga maualalo, ma o le faaipoipoga i tagata uli na masani ona vaai i ai o se solitulafono. Ae peitai o le talalelei toefuataiina na faamoemoe mo tagata uma, “e uliuli pe paʼepaʼe, e pologa pe saoloto” (2 Nifae 26:33), ma ia Setema 1832, na papatiso ai e se tagata paepae o le Ekalesia e igoa ia Esekielu Ropati ia Abel i Ohaio, o se setete i matu lea na sili atu ai le feoeoeai o tagata uli ma tagata papae.

Ina ua siitia mai Abel i le laumua o le Ekalesia i Katelani, o faamatalaga autu o lona talafaasolopito na foliga e pei lava o isi alii matutua o le ekalesia. Na faauuina o ia i le Perisitua Mekisateko, na maua lona faamanuiaga faapeteriaka i lalo o lima o Iosefa Samita le Matua, ma na faauuina o se Fitugafulu. I le 1838, na malaga ai Abel i se misiona i Niu Ioka ma Kanata. Mulimuli ane, na ia faatasi atu i le faatasiga autu o le Au Paia i Navu, Ilinoi.

I le 1842, na siitia atu ai Abel i Sinisinati, Ohaio, lea na ia faigaluega ai o se kamuta ma na toaga o ia i le paranesi o le lotoifale o le Ekalesia. I le 1847, na ia faaipoipo ai i se teine uli o le Au Paia o Aso e Gata Ai o, o Maria Ana Adams, ma na maua e le ulugalii se fanau e toafa.³ I le 1853, na malaga atu ai Abel ma le aiga i Iuta. I le isi tolu sefulu tausaga, na toaga lava Abel i lana uarota i le Aai o Sate Leki, na galue i le Malumalu o Sate Leki, ma na auauna atu i se isi misiona i Ohaio.

I le 1852, o se tausaga ae lei taunuu le au Abel i Iuta, na faasilasila atu ai e Polika Iaga se aiaiga o le taofia o le perisitua mai alii uli. Na i ai pea ia Abel lona tofi o le perisitua ma lona agavaa i le perisitua, ae ina ua ia talosaga ia Peresitene Iaga mo le faatagaga e maua ai lona faaeega paia ma faamauina ia Maria Ana, na teena le talosaga. I le 1879, na toe teena ai se talosaga lona lua mai ia Abel e Peresitene Ioane Teila.⁴ Na tumau pea le faamaoni o Abel seia oo ina maliu ia Tesema 25, 1884.

I le amataga o le seneturi lona luasefulu, na matuai galo ai lava le tulaga o Abel o se tagata uli na umia le perisitua. Na toe maua mulimuli ane e tusitala o le talafaasolopito Mamona le tala i le faauuga o Abel, lona faatuatua i le talalelei toefuataiga, ma lana auaunaga o se uluai faifeautalai.

Autu e Fesootai: Jane Elizabeth Manning James, Race and the Priesthood