Vanu o Sate Leki

A o faatupulaia feeseeseaiga i le va o le Au Paia o Aso e Gata Ai ma isi i Ilinoi i le tautotogo o le 1844, sa amata ona vaavaai Iosefa Samita ma le Aufono a Limagafulu mo se nofoaga e siitia i ai e mafai ai e le Au Paia ona atinae le malo o le Atua i le filemu.¹ O nofoaga sa iloiloina na aofia ai le Republic o Texas, le teritori sa fefinauaia o Oregon, ma teritori o Mekisiko i Mauga Papa ma Kalefonia. O le sailiga mo se nofoaga fou e faapotopoto i ai sa faateteleina ina ua mavae le tagatavaleina o Iosefa ma Ailama Samita. Sa faia le faaiuga a le Aufono a Limagafulu e aveese Texas ina ua maua e le Iunaite Setete, ae sa manatu e manaia Kalefonia ona o ona uafu i le vasa, talu ai sa faatalitali taitai o le Ekalesia mo se faapotopotoina tele o le Au Paia mai misiona a le Ekalesia i fafo.²

Ae peitai, e oo atu i le tautoulu o le 1845, ua lilifa atu finagalo o taitai o le Ekalesia e aofia ai Polika Iaga, Parley Pratt, ma Siaosi A. Samita i le itulagi o le Vai Masima Tele [Great Salt Lake], o se laufanua sa ta’u lava sa i lalo o le puleaga a Mekisiko, ae sa tele lava ina le aināina ma e natura lona puipuia e Mauga Papa tetele. I lana fuafuaga e auina atu muamua se vaega e ta se auala agai i sisifo, sa saunoa atu Polika Iaga i le Aufono, “Ua maea ona faamaonia mai e leai lava se faigata tele o le auina atu o tagata i talaatu o mauga [Papa]. Ua tatou fuafuaina e auina atu i latou i se nofoaga e latalata i le Vai Masima Tele [Great Salt Lake] ma a mavae ona tatou oo atu iina, i sina taimi itiiti e mafai ona tatou agai atu i le ulu o le Fagaloa o Kalefonia, po o le Fagaloa o le St Francisco.” O le itulagi o le Vai Masima Tele sa manatulia foi o se nofoaga lelei mo le atinaeina o sootaga ma malo o Initia Amerika i sisifo.³

Sa taunuu se vaega taiala muamua sa taitaia e Polika Iaga i le Vanu o Sate Leki ia Iulai 24, 1847.⁴ E le pei o isi vanu i le eria, ia sa aina e Initia Amerika mo le tele o le tausaga, o le Vanu o Sate Leki sa na ona faaaogaina itiiti mo tuligamanu ma potopotoga e tagata Ute ma le Shoshone o le faaitulagi. Nai lo le faataape taitoatasi i itu eseese o le laufanua, sa tolauapi le vaega a Polika Iaga i se olo a o latou iloiloina le aai ona filifilia ai lea o fasi fanua e faamautu ai. I le musuia ai i le faafanua a Iosefa Samita o le Aai o Siona, sa taitaia ai e Polika Iaga ia le aufuafanua o Orson Pratt ma Henry Sherwood e maka ni poloka tetele mo aai i luga o se ata o laina ma poloka sasa’o e lautetele ona auala, ma tuu ai le avanoa i le ogatotonu mo le malumalu i le lumanai.⁵ O fasifanua mo le nofoia e tagata sa faasūsūina e le Vaitafe Papa’u o le Aai [City Creek], o se auvai e tafe mai le mauga e ui atu i le vanu, ina ia mafai e paionia ona atinae faatoaga ma togalaau a le tagata lava ia. O le laufanua tamaoaiga mo faatoaga i le itu i saute o le aai sa faasaoina mo faatoaga tetele o meaai e pei o le saito, sana, ‘ate, ma ta’ata’a. E le pei o isi aufaato’a i le itu matutu o Amerika Sisifo, o e sa tele ina matua nonofo valavala lava le tasi mai le isi, o nei vaega muamua o le Au Paia sa faataatiaina se mamanu mo le fausiaina o o latou fale vavalalata faatasi ma le totōina o faatoaga i fafo atu o le aai autu. O lenei mamanu na mulimulitaia mulimuli ane e le Au Paia i nofoaga faato’a i le itulagi o le Pesini Tele [Great Basin].⁶

O atavane o loo faaalia ai le Aai o Sate Leki i le 1853, saunia e Frederick Piercy.

A o faaauau pea ona taunuu mai isi o le Au Paia i tausaga na sosoo ai, sa atinaeina e taitai o le Ekalesia isi nofoaga mo le nofoia e tagata agai i itu sasae, saute, ma sisifo o le nofoaga mo le malumalu o le lumanai. E faaopoopo ai i uarota tutotonu o le Aai o Sate leki, sa faato’a e le Au Paia nuu faifaatoaga i tafatafa o isi vaitafe papa’u i le vanu. Faatasi ai ma le tulaga faifaipea o le faapotopotoina o le Au Paia i Iuta ma le faamaeaina o le auala nofoaafi e uia ai le konetineta atoa i le 1869, sa tupu le Aai o Sate Leki i se aai tele, ma avea ai ma sulufaiga tumau mo le Au Paia, ma tumau ai lava ona avea ma nofoaga ma laumua o le Ekalesia i le lalolagi atoa.⁷

Punaoa o le Ekalesia

“Part 3: September–October 1845,” i le Matthew J. Grow, Ronald K. Esplin, Mark Ashurst-McGee, Gerrit J. Dirkmaat, and Jeffrey D. Mahas, eds., Administrative Records, Volume 1, josephsmithpapers.org.

Lisi o Punaoa o loo Ta’ua

O lomiga nei o loo tuuina atu ai nisi faamatalaga e uiga i lenei autu. I le faasinoina atu po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Brian Q. Cannon, “Settling the Salt Lake Valley, 1847–1870,” i le Brandon S. Plewe, ed., Mapping Mormonism: An Atlas of Latter-day Saint History (Provo, Utah: Brigham Young University Press, 2012), 84–85.

Richard H. Jackson, “Geography and Settlement in the Intermountain West: Creating an American Mecca,” Journal of the West, vol. 33, no. 3 (Iulai 1994), 22–34.

C. Mark Hamilton, Nineteenth-Century Mormon Architecture and City Planning (New York: Oxford University Press, 1995).

Autu Fesootai:: Nofoaga Faato’a o Paionia, Faigamalaga a Paionia, Femalagaaiga, Aufono a Limagafulu, Se Akerise ma Gogosina, Malumalu o Sate Leki

Faamatalaga

1. Tagai i le Autu: Aufono a Limagafulu.

2. “The Council of Fifty in Nauvoo, Illinois,” Introduction to Administrative Records, Volume 1, josephsmithpapers.org; “Part 3: September–October 1845,” Administrative Records, Volume 1, josephsmithpapers.org. Tagai foi i le Autu: Aufono a Limagafulu.

3. “Aufono a Limagafulu, Minute, Mati 1844–Ianuari 1846; Voluma 3, 6 Me 1845–13 Ianuari 1846,” 23–24, josephsmithpapers.org. Tagai foi i le “Aufono a Limagafulu, Minute, Mati 1844–Ianuari 1846; Voluma 3, 6 Me 1845–13 Ianuari 1846,” 102, josephsmithpapers.org. Tagai Autu: Lamanite Identity [Faasinomaga o sa Lamana].

4. Tagai i le Autu: Faigamalaga a Paionia.

5. Brian Q. Cannon, “Settling the Salt Lake Valley: 1847—1870,” i le Brandon S. Plewe, ed., Mapping Mormonism: An Atlas of Latter-day Saint History (Provo, Utah: Brigham Young University Press, 2012), 84–85; “‘Explanation of the Plat of the City of Zion,’ circa 25 June 1833,” in Letterbook 1, 38–41, ma le “Revised Plat of the City of Zion, circa Early August 1833,” Source Note, 1, josephsmithpapers.org and Brigham Young, Discourse, April 6, 1853, o loo maua i le https://history.ChurchofJesusChrist.org/article/trek/pioneer-story-great-salt-lake-valley-emmigration-square-brigham-young. Tagai foi i Autu: Iuta, Siona/Ierusalema Fou.

6. Richard H. Jackson, “Geography and Settlement in the Intermountain West: Creating an American Mecca,” Journal of the West, vol. 33, nu. 3 (Iulai 1994), 23–25; Cannon, “Settling the Salt Lake Valley, 1847–1870,” 84–85; ma le C. Mark Hamilton, Nineteenth-Century Mormon Architecture & City Planning (New York: Oxford University Press, 1995), 139–40.

7. Tagai i le Autu: Pioneer Settlements. Tagai foi i le Stanley B. Kimball, “A Forgotten Trail and Mormon Settlements,” Ensign, Fep. 1980, 33–35.