Fautua Maualuga

I masina na sosoo ai ma le faatulagaga o le Ekalesia ia Aperila 1830, o le tele o i latou na umia le perisitua sa mafai ona faapotopoto faatasi e taulima ia pisinisi a le Ekalesia i konafesi faalekuata. I totonu o se tausaga o le faatulagaga o le Ekalesia, sa matuai faatupulaia manaoga faaletaitaiga a o tuputupu ae le faitau aofai o le Ekalesia, sa faatutuina nuu fou i Ohaio ma Misuri, ma sa poloaiina e le Alii le Au Paia e faalautele a latou taumafaiga e faavae le Ekalesia. Sa lei pine ae taloina e faaaliga ia Iosefa Samita ia aufono eseese e fono e fuafua i manaoga eseese.¹ O nei aufono sa faapotopoto pe a manaomia ai e faafoe ia pisinisi e amata mai i le 1832, e aofia ai se aufono sa taitaia e Iosefa Samita ma ona fesoasoani e toalua.² Ae ina ia mafai ona faaatoa le aufono, sa valaauina ai e Iosefa ia faitaulaga sili sa avanoa i taimi taitasi sa manaomia ai ona latou fono.³

Ia Fepuari 1834, sa fono ai Iosefa Samita ma se vaega o faitaulaga sili i Katelani ma sa ia faapea atu ai o le a ia aoaoina i latou “i le faatulagaga o aufono i aso anamua … e pei ona faaali atu ia te ia i le faaaliga.⁴ Ona ia faaauau ai lea e faatulaga le uluai fono tumau a fautua maualuga, sa aofia ai faitaulaga sili e 12, o le a taulimaina mataupu tau le taitaiga ma aoaiga e aafia ai le Ekalesia i Katelani.⁵ O lena taumafanafana, sa faatulagaina ai le fono a fautua maualuga lona lua i Misuri mo le faamoemoega o le “faamautuina o pisinisi taua e ono oo atu i o latou luma ia e le mafai ona faia ni faaiuga e le Epikopo ma lana aufono.”⁶

O le tautotogo na sosoo ai, sa tofia ai Aposetolo e Toasefululua. E ui o lo latou tiute autu o le folafola atu o le talalelei, ae sa avea foi i latou o fautua maualuga e femalagaai e faatautaia pisinisi a le Ekalesia i paranesi laiti i fafo atu o siteki i Katelani ma Misuri. Ina ua lolomi le Mataupu Faavae ma Feagaiga i le 1835, sa faaaofia ai filifiliga mai minute o le uluai fono a fautua maualuga, ma ni faaopoopoga e faamanino ai le matafaioi a Aposetolo e Toasefululua, e avea ma se tasi o uluai vaega, e tuuina atu ai faatonuga e uiga i faiga faavae mo le faafoeina o aufono.⁷

I Navu, sa tuu atu ai e Iosefa Samita i Aposetolo e Toasefululua le pule e vaavaaia ai nisi o pisinisi a le Ekalesia i siteki faapea foi paranesi maotua.⁸ Ina ua mavae lona maliu, sa galulue le Toasefululua o se Pulega Aoao i le Ekalesia, a o fautua maualuga sa faaauau pea ona faatulagaina i le tulaga faalesiteki. O le taimi nei, ua fesoasoani fautua maualuga a siteki e faatautaia pisinisi a le Ekalesia i totonu o a latou siteki, e auai i le faia o faaiuga o aoaiga, ma lagolago ia au peresitene o siteki i la latou auaunaga.

Autu Fesootai: Restoration of the Melchizedek Priesthood, Korama a le Toasefululua