Viliamu Paulo Tanielu

Sa soifua mai Viliamu Paulo Tanielu i Stellenbosch, Aferika i Saute, i le aso 20 o Aokuso, 1864.¹ O ia ma lona tama, o Viliamu Carl, sa o uma i laua i le faaiu o Fepuari mo le tele o tausaga, o se mau faasino i le tulaga o se tagata puupuu sa i ai Viliamu Carl po o lona itagofie (o Fepuari o le masina aupito puupuu lea o le tausaga).²

Ina ua matua ae Viliamu Paulo i se aganuu faailoga tagata tele, ma sa faailoa mai o se tagata “lanu,” o se upu sa faaaoga i Aferika i Saute e faasino ai i tagata e fefiloi le tupuaga. Sa avea Aferika i Saute ma se vaega o le upega fesootai o fefaatauaiga o pologa, lea sa solosolo mai talafatai o Aferika e oo atu i motu o Initonesia. Mulimuli ane sa faakoloneina e Peretania, ma sa i ai i Aferika i Saute se faitau aofai o tagata lanu matua eseese lea na iloga ai se talafaasolopito iloga lava. Na fai mai Tanielu o le aiga o lona tama o tupuga mai Europa ma lona tina na tupuga mai tagata faapologaina o Malay o e na aveesea mai Batavia (lea ua avea nei ma Jakarta, Initonesia) e le Vaega Dutch a Initia i Sasae.³ E foliga mai foi ua ia faailoa mai le i ai o tuaa uli Aferika.⁴

I le 1893, na faaipoipo atu ai Viliamu ia Clara Elizabeth Carelse, o se fafine lanu mai Cape Town.⁵ E toafa le la fanau na sao ma avea ma tagata matutua.⁶ E ui lava o se aganuu o le faailogalanu e faasaga i lona tupuaga na tuuitiitia ai le tele o ona avanoa, ae sa avea Viliamu ma se tagata faipisinisi laitiiti i Cape Town, sa faagaoioia se faleoloa sui ofu, se pisinisi faletaavale laupasese, ma se faatoaga laitiiti.⁷ I le mulimuli ai i le faataitaiga a ona matua, o Viliamu o se Kerisiano faamaoni. O ia o se tasi o le Ekalesia Dutch Toefaatulagaina ma sa auauna atu o se tiakono, o se toeaina, ma se tasi o le faailipu o le faapotopotoga i le ekalesia a St. Stephen i Cape Town.⁸

Sa faailoa atu Viliamu i le O Le Ekalesia a Iesu Keriso o le Au Paia o Aso e Gata Ai e lona tuafafine, o Phyllis Sampson. Sa papatisoina o ia ma lona toalua ma siitia atu i Iuta i le 1911. Sa malaga foi le atalii o Viliamu o Apelu ma le uso o lona tina ma lona uncle ma sa papatisoina i Iuta.⁹ I le taimi muamua, sa lei fiafia i ai Viliamu, ae na vave lava ona ia faia se faauoga ma le peresitene o le misiona o Nicholas G. Samita, o se tasi o ana tagata faifaatau i lana faleoloa sui ofu. O ana talanoaga ma Samita ma isi faifeautalai na afua faaosofia ai lona fiafia i le Ekalesia, ae o la latou faamalamalamaga o le tapu na taofia ai le faauuina o alii e tuaa Uli na faapopoleina ai o ia. Sa naunau Viliamu e malaga i Iuta e aoao atili e uiga i le Ekalesia ma talosaga atu i ona taitai.¹⁰

A o i ai i Iuta i le 1915, sa feiloai ai Viliamu ma Peresitene Iosefa F. Samita, o le sa faamautuina le tapu ae na tuuina atu ia te ia se faamanuiaga, ma uunaia o ia ia faamaoni ma ta’u atu o le a iu ina faauuina o ia i le perisitua.¹¹ Sa papatiso Viliamu i Clearfield, Iuta, faatasi ai ma lona atalii o Simona, o le sa malaga faatasi ma ia. Mulimuli ane i lena tausaga na toe foi atu ai Viliamu ma ona atalii i lo latou aiga.¹²

Na vave ona ia iloaina o le ola a’e o se Tagata lanu o le Au Paia o Aso e Gata Ai i Cape Town i lena taimi na aumaia ai luitau faapea foi ma faamanuiaga. I le tasi itu, o le aganuu a Aferika i Saute i le tele o tausaga e tau atu i faailoga tagata na faasiliesea ai tagata papae o Aferika i Saute, o e sa faateleina le mumusu e fegalegaleai ma tagata uli ma faapea tagata lanu. Sa lagona e Tanielu ma lona aiga le le taliaina i totonu o le paranesi i Mowbray e toatele ai tagata paepae. E latou te nonofo na o i latou i le pito i tua ma mou ese atu i le faaiuga o sauniga.¹³ I le isi itu, sa masani ona molimau atu Viliamu i faamanuiaga o le talalelei i lona olaga. Sa faapitoa ona ia faatauaina le avanoa e valaau atu ai i le faatuatua ma le perisitua o faifeautalai ma tagata o le ekalesia i le lotoifale ia maua faamanuiaga faamalolo mo ona faafitauli eseese faalesoifua maloloina. Sa ia molimau mai o le mana o le Atua na faamaloloina ai o ia i le tele o taimi.¹⁴

Sa auai soo Viliamu i sauniga o le Aso Sa, tuuina atu lana molimau, puipuia le Ekalesia i nusipepa i le lotoifale, ma faasoa atu le talalelei i lona aiga ma uo.¹⁵ Sa papatisoina Clara i le 1918 faatasi ai ma se isi uo lanu a le aiga, o Ema Beehre.¹⁶ O le afafine o Viliamu, o Alice, ma lona atalii o Viliamu Carl sa papatisoina i le 1920.¹⁷ Sa fesoasoani Viliamu ma lona aiga e saili ni tupe mo se okeni mo le fale fou o le Ekalesia i Mowbray, amata se vasega faalevaiaso o le Tusi Paia i lo latou fale, ma maea i le avea ai ma se tasi o e na taimua i tauvaga lautele a le misiona e faitau tusitusiga paia ma faasoa atu kopi o le Tusi a Mamona.¹⁸ Sa masani ona talimalo Viliamu ma Clara i faifeautalai ma tagata o le paranesi i lo latou fale mo taumafataga. Mo le tele o tausaga, o le auai i se taumafataga o le afiafi i le fale o le au Tanielu o se ala masani mo faifeautalai fou.¹⁹ O nei taumafataga o se auala taua lea na saofaga ai le aiga i le Au Paia o Aso e Gata Ai i le lotoifale i Aferika i Saute, ma sa maua e Clara se tulaga tauleleia o se kuka sili ona lelei.

O Viliamu (agavale pito i luma) ma Clara (lona tolu mai le taumatau) na talimalo i faifeautalai uma i le Misiona a Aferika i Saute i se taumafataga faapitoa o le afiafi, ca. 1927.

Sa faaauau pea ona faananau Viliamu mo le faauuina i le perisitua ma faamanuiaga o le malumalu. I le 1920, sa ia faailoa atu ai lona le fiafia i le peresitene o le misiona o Nicholas G. Smith e faapea o lona uso faaletulafono o Tavita na faauuina i Iuta. Na manino lava le foliga paepae o Tavita e ui o lona tina o se fafine lanu.²⁰ E pei o Tavita, o le toatele o tagata e fefiloi o latou tupuaga i lena taimi na tuuina atu i latou lava o e o se vaega e ese o tagata lanu, o se faiga ua lauiloa o le “faailoga o tagata.”²¹ Pe tusa o le taimi lava lea e tasi, na fai mai ai Viliamu lava ia ua na o Europa ma Meleisia ona tupuaga.²² E ui ina sa manino le lotovaivai i nisi o taimi, ae sa faaauau pea e Viliamu ona tulimatai atu ma le onosai i le aso o le a faauuina ai o ia ma o le a agavaa ai lona aiga mo faamanuiaga o le malumalu, pe i lenei olaga po o le olaga a sau.²³

I tausaga na sosoo ma le liua o Viliamu, sa faaauau pea ona faia e le aiga o Tanielu le vasega suesue o le Tusi Paia i le po o le Aso Gafua. O fonotaga o se auala lea mo lona aiga e tumau ai le auai malosi o ni Au Paia o Aso e Gata Ai e ui lava ina sa latou lagonaina le faatupulaia o lagona lē talia lelei o i latou i gaoioiga a isi paranesi i le lotoifale. E ui ina sa iu ina taumamao uma atalii o Viliamu mai le Ekalesia, ae sa faaauau pea ona auai malosi Viliamu, Clara, ma Alice.²⁴ Sa faamautinoa e Viliamu o minute o le vasega Tusi Paia ua sa’o lelei ona tausia ma lafoina i le Aai o Sate Leki ina ia i ai i latou “i le Talafaasolopito o le Ekalesia.”²⁵

Ia Novema 1931, na fatuina ai e le peresitene o le misiona o Don McCarroll Dalton se paranesi mai le vasega suesue o le Tusi Paia. Ua faaigoaina o le “Paranesi o le Alofa,” sa aofia ai le aiga o Tanielu ma Ema Beehre. Sa auai faatasi isi uo lanu faatasi ma faifeautalai ma nisi o tagata papae o le ekalesia mai Cape Town. Sa vaetofia Viliamu e avea ma peresitene o le paranesi, na o le pau lea o le tagata o le Tupuaga uli Aferika ua lauiloa na auauna atu i lena tofiga i luma atu o le 1978.²⁶ O Clara na valaauina e avea ma peresitene o le Aualofa ma Alice e avea ma failautusi o le paranesi.²⁷

Na vaai atu Viliamu i le paranesi o se faamanuiaga mo lona aiga. Sa lagona e Dalton o le tuuina atu ia Viliamu o le “avanoa e faatino ai se galuega patino” i le Ekalesia o se auala talafeagai lea e iloa ai lona sao ma le tuuto. E pei o le toatele Au Paia o Aso e Gata Ai, sa faamoemoe Dalton o le a le pine ae tuuina mai e le Alii nisi faaaliga e faatatau i le tapu.²⁸ Sa oo ina faatalitonuina o ia e ala i le faatuatua ma le tuuto o Viliamu ma isi, “[o le a] siitia ai le papupuni,” ma sa ia talitonu “o le a oo mai le taimi [o le a] oo mai ai lenei tamai aiga ma le sauniga masani o le po o le Aso Gafua ma le faamaoni [o Viliamu] [o le a] faasino atu i Aferika o ni [faataitaiga] o le faatuatua.”²⁹

O le faaletonu o le soifua maloloina o Viliamu i le amataga o le vaitau o le 1930. E ui i le tausiga faafomai, faamanuiaga faaleperisitua, ma le faatuatua ma tatalo a tagata uli ma Au Paia o Aso e Gata Ai papae i Cape Town, na maliu Viliamu i le aso 13 o Oketopa, 1936. Sa faanoanoa tagata o le Ekalesia i le lotoifale i lona maliu i le falelotu o le paranesi a Mowbray.³⁰ A o lei maliu o ia, sa lomia e Viliamu lana molimau i le nusipepa a le misiona: “Ou te iloa o Iosefa Samita o se Perofeta a le Atua i Aso e Gata Ai,” sa ia folafola atu ai, “ma iloa sa avea o ia ma se meafaigaluega i le toe faatuina o le Ekalesia a Iesu Keriso, ma o le Talalelei toefuataiina e leai ni mea o i ai ae na o aoaoga a Keriso lava Ia.”³¹ Ina ua mavae le faaaliga ia Iuni 1978 lea na aveesea ai le tapu o le faailoga o le ituaiga o tagata i le faauuina i le perisitua ma le auai atoatoa i le malumalu, sa faamautinoa ai e Alice, o le afafine o Viliamu ma Clara ua maea galuega o le malumalu a ona matua, ma faataunuuina ai le folafolaga a Peresitene Samita o le a i ai se aso o le a faauuina ai Viliamu.³²

Faasinomaga o Tusi

O lomiga nei o loo tuuina atu ai nisi faamatalaga faaopoopo e uiga i lenei autu. I le faasinoina atu po o le faafesoota’ia o oe i nei punaoa, matou te le faamaonia pe faamautinoa atu le anotusi po o manatu o tusitala.

W. P. Daniels, “My Testimony,” Cumorah’s Southern Messenger, vol. 9, nu. 2 (Fep. 20, 1935), 28–29.

Evan P. Wright, A History of the South African Mission, Period II, 1903–1944 ([Leai se nofoaga o le lomiga: Evan P. Wright, ca. 1985]).

Autu Fesootai: Tuueseeseina e tusa ma Faailoga Tagata, Tapu o le Perisitua ma le Malumalu

1. Evan P. Wright, A History of the South African Mission, Period II, 1903–1944 ([Leai se nofoaga o le lomiga: Evan P. Wright, ca. 1985]), 251.

2. Faamaumauga o Tagata o le Ekalesia, Uarota lona 33, Siteki a Liparate, Aai o Sate Leki, 1913; Wright, History of the South African Mission, 251.

3. Viliamu Paulo Tanielu ia Heber J. Grant, Fepuari 11, 1926, faila o le misiona a le Au Peresitene Sili, 1908, 1915–1949, Potutusi o le Talafaasolopito o le Ekalesia.

4. Wright, History of the South African Mission, 255. O le toatele o e na iloaina Tanielu na malamalama ia te ia o loo i ai ni ona tuaa Uli. Tagai i le Samuel Martin, Talaaga o le Tagata Lava ia, Ianuari 1, 1927, 289, Potutusi o le Talafaasolopito o le Ekalesia; tusitalaaga Royal D. Crook, Ianuari 1, 1924, MS 9055, CHL.

5. Wright, History of the South African Mission, 251.

6. Faamaumauga o Tagata o le Ekalesia i Cape Colony, Aferika i Saute, 1853–1946, Tuufaatasiga o Faamaumauga o Tagata o le Ekalesia, CR 375 8, Potutusi o le Talafaasolopito o le Ekalesia.

7. Wright, History of the South African Mission, 252; tusitalaaga o Crook, 23 Oketopa, 1922.

8. Wright, History of the South African Mission, 254.

9. Faamaumauga o Tagata o le Ekalesia i Cape Colony; David S. Sampson, Folafolaga o le faamoemoe e avea ma se tulaga moni, 4 Aperila, 1913, FamilySearch.org.

10. Wright, History of the South African Mission, 253–55.

11. Wright, History of the South African Mission, 255.

12. Faamaumauga o Tagata o le Uarota a Clinton, Tuufaatasiga o Faamaumauga o Tagata o le Ekalesia, CR 375 8, Potutusi o le Talafaasolopito o le Ekalesia; “Personals,” The Herald-Republican [Aai o Sate Leki], Nov. 21, 1915, 2–A.

13. Wright, History of the South African Mission, 247; tagai i le Autu: Tuueseeseina e tusa ma Faailoga Tagata.

14. W. P. Daniels, “My Testimony,” Cumorah’s Southern Messenger, vol. 9, nu. 2 (Fep. 20, 1935), 28–29; minute eseese o le Paranesi o le Alofa, 1925–1934, 21 Aokuso, 1933, Potutusi o le Talafaasolopito o le Ekalesia; tagai i le Autu: Faamalologa.

15. Minute aoao a le paranesi o Mowbray, Iuni 14, 1923; Wright, History of the South African Mission, 254–55.

16. Faamaumauga o Tagata o le Ekalesia i Cape Colony.

17. Faamaumauga o Tagata o le Ekalesia i Cape Colony.

18. “Mission Wide Book of Mormon Reading Competition,” Cumorah’s Southern Cross, vol. 5, nu. 10 (Oketopa 1931), 232; “Book of Mormon Reading Competition,” Cumorah’s Southern Cross, vol. 6, nu. 3 (Mati 1932), 43–45; “East London Wins Book of Mormon Reading Contest,” Cumorah’s Southern Cross, vol. 6, nu. 4 (Aperila 1932), 62.

19. Don McCarroll Dalton, talafaamaumau o le misiona a Aferika i Saute, 6 Novema, 1933, Don McCarroll Dalton Papers, L. Tom Perry Tuufaatasiga Faapitoa, Potutusi a Harold B. Lee, Provo, Iuta; Samuel Martin, Taalaaga o le Tagata Lava ia, Ianuari 1, 1927, MS 6365, Potutusi o le Talafaasolopito a le Ekalesia, Aai o Sate Lek; Minute aoao o le Misiona a Aferika i Saute, 8 Mati, 1921, Potutusi o Talafaasolopito o le Ekalesia, Aai o Sate Leki.

20. Sa faamalamalama mai e Peresitene Samita e faapea o Viliamu “ma lona aiga o tagata lanu ae latou te latalata atili atu i le ola ai i le Talalelei nai lo soo se tasi i lenei misiona. Ae peitai, o loo latou taumanatunatu e uiga i le alualu i luma o o latou toto o e e le o ola i le Talalelei faapea foi ma i latou, o e o tino e papae” (Nicholas G. Smith i le Au Peresitene Sili, Iuni 17, 1920, faila o misiona a le Au Peresitene Sili, 1908, 1915–1949, Potutusi o le Talalelei o le Ekalesia, Aai o Sate Leki).

21. Tagai i le Allyson Hobbs, A Chosen Exile: A History of Racial Passing in American Life (Cambridge, Mass.: Harvard University Press, 2016).

22. I le 1926, na faatagaina ai le tuafafine o Viliamu, o Phyllis, i le malumalu i le Aai o Sate Leki ma sa amata ona faatino sauniga mo o latou tuaa. Ina ua fesiligia o ia e le au peresitene o le malumalu i le 1925, sa tusia e Viliamu mo lona puipuiga, ma finau atu (e feteenai ma lana faailoaga na muamua atu) e leai ni a latou sootaga i tagata Uli Aferika. I lana tusi na finau ai Viliamu e toalaiti ni tagata o tuaa Uli i Aferika i Saute, o se manatu na faamaonia e Peresitene Samita e le sa’o. (Nicholas G. Smith ia Heber J. Grant, 17 Mati, 1926; Phyllis Sampson ia George F. Richards, Aokuso 18, 1926; Viliamu Paulo Tanielu ia Heber J. Grant, Fepuari 11, 1926, faila o le misiona a le Au Peresitene Sili, 1908, 1915–1949, Potutusi o le Talafaasolopito o le Ekalesia, Aai o Sate Leki).

23. Minute eseese o le Paranesi o le Alofa, 1925–1934, Fepuari 22, 1932, LR 11787 19, Potutusi o le Talafaasolopito o le Ekalesia, Aai o Sate Leki, Wright, History of the South African Mission, 255.

24. Wright, History of the South African Mission, 255; Talafaasolopito Tuugutu Alice Okkers, MSS 1937, Tuufaatasiga Faapitoa L. Tom Perry, Potutusi Harold B. Lee, Iunivesite o Polika Iaga.

25. Minute eseese o le Paranesi o le Alofa, 1925–1934, 21 Aokuso, 1933.

26. Sa o se mea masani mo peresitene o misiona le fautuaina atu ma le valaauina o peresitene o paranesi. O minute o le paranesi o loo ono faailoa mai ai e faapea o Elder John A. Widtsoe o le Korama a le Toasefululua, o le sa auauna atu o se Peresitene o le Misiona a Europa, na faamaonia le valaauga o Tanielu (Minute o le Paranesi o le Alofa, 14 Teema, 1931, Potutui o le Talafaasolopito o le Ekalesia, Aai o Sate Leki).

27. Sa le o se mea e le masani ai le valaauina o tamaitai e avea ma failautusi i lena taimi; tagai i le, mo se faataitaiga, Faatonuga i Epikopo ma Fesoasoani, Failautusi o Siteki ma Uarota Instructions to Bishops and Counselors, Stake and Ward Clerks: No. 13, 1921 (Aai o Sate Leki: O Le Ekalesia a Iesu Keriso o le Au Paia o Aso e Gata Ai, 1921), 32; W. H. Brummer, “They Broke the Ice,” Cumorah’s Southern Messenger, vol. 36, nu. 4 (Aperila 1961), 98–99; Minute Aoao o le Uarota Kanarra, Aperila 14–20, 1912, LR 4305 11, Potutusi o le Talafaasolopito o le Ekalesia, Aai o Sate Leki.

28. Don McCarroll Dalton i le Au Peresitene Sili, 11 Aperila, 1930, Pepa a Don McCarroll Dalton, MSS 1509, Tuufaatasiga Faapitoa L. Tom Perry, Potutusi a Harold B. Lee, Iunivesite a Polika Iaga.

29. Dalton, Tusitalaaga o le misiona a Aferika i Saute, 21 Aokuso, 1933.

30. “Malolo Nei mai Tausiga ma le Faanoanoa,” Cumorah’s Southern Messenger, vol. 10, nu. 10 (Oke. 20, 1936), 153.

31. Daniels, “My Testimony.”

32. Wright, History of the South African Mission, 259.