Talafaasolopito o le Ekalesia
Faapologaina o Initia ma Tautua Fai Faamalosi

“Faapologaina o Initia ma Tautua Faamalosi,” O Autu o le Talafaasolopito a le Ekalesia

“Faapologaina o Initia ma Tautua Fai Faamalosi”

Faapologaina o Initia ma Tautua Fai Faamalosi

Mo le tele o tausaga a’o lei taunuu atu paionia o le Au Paia o Aso e Gata Ai i le Vanu o Sate Leki i le 1847, na faafesuiai ai e Initia Amerika i le eria ia fafine ma tamaiti na tapueina mai vaega o tagata faatautee. Sa maua foi ma faatau atu e tagata faafetauai oloa Amerika Papae ma Europa ia tagata Initia Amerika sa tapueina ma avea ma ni pologa po o ni au tautua fai faamalosi, ma fausia ai se faafetauaiga o pologa i Sisifo.1 I totonu o ni vaiaso talu ona ulufale atu i le vanu, na fetaui ai le Au Paia i tagata Initia o e na tapueina mai tamaiti mai isi vaega. Sa faatau mai e ni isi o le Au Paia ia tamaiti mai nei tagata faatau pologa, i nisi o tulaga, i le vaaia ai o le au faafetauai oloa o fasiotia pe faataugā i latou [tamaiti] sa le’i faatauina mai e le Au Paia.2 Sa vaetamaina ma taumafai aiga Paionia e tuufaatasi nei tamaiti i totonu o nuu o le Au Paia o Aso e Gata Ai, e ui lava i eseesega faaleaganuu ma le faailoga tagata. O nisi sa faaaogaina ma agaleagaina nei tamaiti Initia.

O Mati 1852 na pasia ai e le ofisa faitulafono a le Teritori o Iuta “Se Tulafono mo le Toomaga o Pologa ma Pagota Initia,” o se tulafono na faatonutonuina ai le faatauina mai ma le tausiga o tamaiti Initia. O tamaiti e mafai ona avea ma ni au tautua o auauna a aiga seia oo atu i le 20 tausaga, ae o i latou na maua ni auauna sa manaomia ona latou faagaoioia se maliega faaletulafono ma taitai o le itumalo, e faalavalava ia tamaiti “i se faiga lagolelei ma tauagafau,” ma tuuina atu i latou i aoaoga.3 Na manatu Polika Iaga o le tulafono o se faasalavei lelei i le faafesuiaiga o pologa Initia; nai lo o le faatauina mai o tagata e tapueina e faapologa, na talitonu Iaga o le a “faatau mai [e le Au Paia] i latou i le saolotoga.”4

E silia i le 400 tamaiti Initia mai nuu o Ute, Paiute, Goshute, Shoshone, ma Navajo na auina atu i totonu o aiga o le Au Paia o Aso e Gata Ai e avea o ni au tautua fai faamalosi po o ni tagata vaetamaina i le va o le pasiaina o le tulafono i le 1852 ma le amataga o le vaitaimi o le 1880.5 Pe a ma le 60 pasene na faatauina mai e ala i fefaatauaiga ma tagata gaoi. O nisi na avea ma ni tamaiti na matuaoti ona o feteenaiga vevesi i le va o Initia ma le Au Paia o Aso e Gata Ai po o isi tagata Europa-Amerika. E toeitiiti 20 pasene sa faatau atu pe tuuina atu i aiga o le Au Paia o Aso e Gata Ai e matua po o tagata o aiga, o e na ala ona faia ona o le manaomia o mea tautupe ma le faamoemoe o le sili atu ona popole [mo le manuia] o tamaiti. Ina ua oo ina matutua tamaiti au tautua fai faamalosi, e toatele na tauivi ma le manatuaina o o latou aiga na tupuga mai ai, ae o isi na toe foi atu i nuu o Initia o ni tagata talavou pe ua i le popofou o ni tagata matutua. O isi sa nonofo ai lava i nuu [o tagata] papae, e ui ina sa masani ona latou lagonaina le faaletāua. Ae o isi na avea ma ni faifeautalai ma ni taitai o le Ekalesia ina ua matutua.6

Ina ua latalata i le faaiuga o le Taua a Tagata Amerika, na pasia ai e le Konekeresi a le Iunaite Setete le Suiga Lona Sefulutolu o le Faavae, lea na faasāina ai le faiga o pologa ma au tautua fai faamalosi. I le Iunaite Setete i sisifo, na i ai lava pea le faiga o au tautua fai faamalosi, ae o tulafono fou faalemalo na tuuitiitia ai le numera o konakarate fou mo tautua fai faamalosi. A o faamalosia e le malo nei tulafono ma atili faatapulaaina ai malo Initia i taofiga, sa faapea ona tuuitiitia ai le faiga o au tautua fai faamalosi a Iuta ma e oo atu i le faaiuga o le vaitaimi o le 1870 ua tele lava ina faamutaina.7

Faamatalaga

  1. E faatatau i le tulaga lautele o faafetauaiga o pologa Initia, tagai Ned Blackhawk, Violence over the Land: Indians and Empires in the Early American West (Cambridge, Mass.: Harvard University Press, 2008).

  2. Brian Q. Cannon, “‘To Buy Up the Lamanite Children as Fast as They Could’: Indentured Servitude and Its Legacy in Mormon Society,” Journal of Mormon History, vol. 44, no. 2 (Apr. 2018), 1–6.

  3. “An Act for the Relief of Indian Slaves and Prisoners,” i le Acts, Resolutions and Memorials Passed at the Several Annual Sessions of the Legislative Assembly of the Territory of Utah (Salt Lake City, 1866), 87–88.

  4. Christopher B. Rich Jr., “True Policy for Utah,” Utah Historical Quarterly, vol. 80, no. 1 (Winter 2012), 66.

  5. O le vaetamaga sa o se ituaiga fou o faiā faaleaiga a Amerika i le seneturi lona 19, o le uluai tulafono o le vaetamaga na pasia i Massachusetts i le 1851. E oo ane i le 1884 ua leai se fuaitau faaletulafono mo le vaetamaga o tamaiti i le Teritori o Iuta. E muamua atu i nei tulafono, o au tautua fai faamalosi ma tagata aooga faataitai i galuega sa o ni auala masani ia mo tamaiti o aiga faigaluega, matitiva, pe malepelepe e maua ai penefiti o le ola i se fale o ni aiga tu lelei, e aofia ai aoga ma aoaoga i matātā eseese. E toatele le au faitofa e manatu o tulafono o vaetamaga o se taunuuga o le faiga o au tautua fai faamalosi. Tagai Susan L. Porter, “A Good Home: Indenture and Adoption in Nineteenth-Century Orphanages,” i le E. Wayne Carp, ed., Adoption in America: Historical Perspectives (Ann Arbor: University of Michigan Press, 2002), 27–29.

  6. Cannon, “To Buy Up the Lamanite Children as Fast as They Could,” 6–35.

  7. Richard Darrell Kitchen, “Mormon-Indian Relations in Deseret: Intermarriage and Indenture, 1847 to 1877” (PhD diss., Arizona State University, 2002), 222–23.I le Glenn R. Stubbs, “A Biography of George Albert Smith, 1847 to 1877” (PhD diss., Brigham Young University, 2002), 222-23.