Mataupu 11

O Se Faamanuiaga Matagofie

O le tele o taeao, e faalogoina ai e Ana Elisa Secrist lana tama tama e lua tausaga le matua o Moronae, o valaau mo lona tamā. Sa tau aso ona oo lea i le aso e fanau ai [le pepe], ma e oo mai i le taimi lea, o lona toalua o Iakopo, na faigofie lava e ia ona fesoasoani i le atalii. Ae o le aso 15 o Setema, 1852, na latou tutū ai ma lana fanau laiti e toatolu i le faitotoa o lo latou fale e le’i uma ona fai i le Aai o Sate Leki ma vaavaai atu ao ave atu e Iakopo ana solofanua i luga o se maupuepue i sasa’e o le aai. I le tumutumu o le maupuepue sa tālo mai ai lona pulou ia i latou, ma autilo tasi mai i le aai, ona mouese ai lea i tua atu o le patu [o le maupuepue].¹

O Iakopo o se tasi lea o le anoano o faifeautalai na valaauina i le galuega i le konafesi ia Aokuso 1852. Faatasi ai ma faatonuga ia o ese atu i se vave e mafai ai, sa auai atu ai o ia i se vaega o alii faifeautalai e toa valusefulu na faamoemoe tonu e agai atu i Peretania Tele ma isi atunuu o Europa. O ia o se tasi o faifeautalai e toafa na auina atu i Siamani, lea sa tofia e galue ai mo le tolu tausaga.²

Sa taulima e Ana Elisa le le i ai [i ina] o lona toalua i lea taimi i le lelei na ia mafaia ai. Sa ola a’e faatasi i laua ma Iakopo i se taulaga laitiiti i sasae o le Iunaite Setete. I le āluga o lo la faamasaniga tumau, sa faigaluega ai Iakopo i se isi setete, ma a o toesea o ia, sa la fetusiai ni tusi aualofa uumi. Sa faaipoipoina i laua i le 1842, ma sa le’i leva ae auai loa i le Ekalesia, ona mulimuli atu ai lea i le Au Paia i sisifo. Sa i ai uma ia i la’ua ni molimau malolosi e uiga i le talalelei toefuataiina, ma sa le’i manao Ana Elisa e tomumu e uiga i le valaauga o le misiona a Iakopo. Ae sa foliga mai na lemu le alu a le taimi a o toesea ai o ia, ma sa ia lagonaina le mamafatu ma le faavauvau.³

O le sefulutolu o aso talu ona aluese atu lona toalua, na fanauina ai e Ana Elisa se pepe tama lauulu uliuli. Sa ia tusi atu ia Iakopo i le aso na sosoo ai. “Sa matou fuaina le mamafa o le pepe, ma e sefulu ma le afa pauna lona mamafa,” o lana lipoti atu lea. “O lea e le’i faaigoaina o ia. A i ai sau igoa mo ia, ona tusi mai lea o lona igoa i lau tusi.”⁴

Sa taumate e Ana Elisa le umi ona faatoa maua lea e Iakopo le tala fou. Sa utuvā taimi e oo mai ai meli i le vanu i le tele o masina o le tausaga, ma e matuai taofia atoa lava pe a toulu le kiona o le taumalulu i luga o laufanua valevalenoa lea na matuai le mafai ai ona uia auala o le meli. Sa itiiti foi ni mafuaaga sa ia te ia e faamoemoe ai mo se tali mai lona toalua a’o le’i oo i le tautotogo.

Ae peitai, sa le’i leva ona fanau le pepe, ae maua e Ana Elisa se tusi mai ia Iakopo, na auina mai a o i ai lava o ia i le ala i sasa’e. Sa mafai ona ia iloa mai lona anotusi, na te le’i mauaina lana tusi. Sa ia faamatala mai ia te ia, sa ia vaai i lona aiga i se miti. Sa taaalo faatasi ia tamaiti e toatolu i luga o le fola a’o taoto Ana Elisa i le moega ma se pepe tama faatoa fanau.

Sa tusia e Iakopo, afai na te fanauina se atalii, sa manao o ia e faaigoa ia Nifae.

Sa maua e Ana Elisa lana tali. Sa ia faaigoaina le pepe ia Hipa Nifae Secrist.⁵

---

I le taumafanafana o le 1852, na taunuu ai Iona Dorius e luasefulu ona tausaga i le itumalo o Vendsyssel i Tenimaka i mātū.⁶ O se fai seevae faaa’oa’o mai Copenhagen, ma sa faataatitia ese e Iona ana meafaigaluega ina ia auauna atu i se misiona i lona atunuu moni. Sa auai o ia i le Ekalesia faatasi ma lona tamā o Nikolai, ma lona tuafafine laitiiti o Augusta a o le’i leva ona taunuu atu uluai faifeautalai o le Au Paia o Aso e Gata Ai i Tenimaka. Sa auai lona uso matua o Carl i le Ekalesia i le sili teisi atu ma le tausaga mulimuli ane.⁷

Na vave le ola o le Ekalesia i Tenimaka talu mai le taimi na tatalaina ai e Pita Hansen ma Erastus Snow le misiona. I totonu o le lua tausaga talu ona la taunuu mai, sa la’ua lolomiina ai le Tusi a Mamona i le faaTake—o le uluai lomiga lea o le tusi e le faaPeretaniaina—ma amataina ai se nusipepa e faalemasina na ta’ua o le Skandinaviens Stjerne. O lenei ua avea Tenimaka ma aiga i le silia ma le lima selau o tagata o le ekalesia ua faatulagaina i ni paranesi e sefululua.⁸

Ae peitai, o le tinā o Iona, o Ane Sofia, sa ita i le lotu fou ma le le lauiloa, ma sa ia faaaogaina le auai i ai o lana tane o ni mafuaaga o le tatalaga o lo laua faaipoipoga. O le vaitaimi na tete’a ai Ane Sofia ma Nikolai, na valaauina ai Iona faatasi ma isi tagata fou liliu mai e auauna i ni misiona i le lotoifale, ae na tuua e Augusta ia Tenimaka faatasi ma le vaega muamua o le Au Paia Sekanitenevia e faapotopoto i Siona.⁹

I Vendsyssel, sa malaga atu ai Iona i saute e fono ma le Au Paia i se nuu maotua na ta’ua o Bastholm.¹⁰ Sa latou fono i le maota o se tasi o tagata o le Ekalesia i le lotoifale. Sa lagona e Iona le olioli ma le musuia a o ia tautala atu i le faapotopotoga. Ona sa tala’i muamua o ia i le eria, sa ia iloaina ai le toatele o tagata sa i totonu o le potu.

Pe tusa o le aoauli, i le toeitiiti lava uma ai o le fonotaga, na ulufale atu ai i totonu o le fale ma lalafi solo faataamilo i le faitotoa se vaega leaga o tagata galulue i faatoaga ma ni meafaigaluega ma ni pate. I se taimi na muamua atu o lena tausaga, na talosaga atu ai le Au Paia Take i le ofisa faitulafono a le malo mo le puipuiga e faasaga i tagata faatupu vevesi, ae e leai se mea na faia i ai. Sa feagai foi tagata fou liliu mai i Suetena na lata ane ma ni feteenaiga faapena, lea na uunaia ai ni isi o tagata talitonu e papatiso i totonu o le tanevai a tana nai lo o le lamatia i le vaaia o i latou i totonu o se vaitafe.¹¹

Ina ua ma’ea le fonotaga, sa alu atu Iona i le faitotoa o le a alu. Sa potopoto faatasi mai le au faatupu vevesi, ma sa lagona e Iona le tuia o lona vae i se mea. Sa le ano o ia i le tiga ae laa atu lava i fafo, ae na toetoe o le taimi lava lea na pu’e ai o ia mai tua e tagata galulue i faatoaga ma tasasa solo lona tua. Sa ia lagonaina le matuitui o le tiga i lona tino a o tatui o ia e tamaloloa i laau ma meafaigaluega ma’ai seia oo ina manu’a ma tafetotoi.

I se auala na sao ese ai Iona ma sola atu i le fale na latalata ane o se tagata o le Ekalesia na igoa ia Pita Jensen. O iina, na aveese ai e ana uo ona lavalava masaesae, faamamā ona manu’a, ma faamoe o ia. Sa faauu ma faamanuia o ia e se alii, ma sa tu se olomatua i totonu o lona potu e puipui o ia. Ina ua mavae se itula ma le afa, ae tatu’i atu e tamaloloa onanā le faitotoa. Sa faapa’u ifo le olomatua i ona tulivae ma tatalo mo se fesoasoani. Sa fai atu o ia ia Iona, “E tatau ona latou sasaina a’u, faatoa mafai ai ona latou sasaina oe.”

O se taimi e le’i umi mulimuli ane, na laga atu ai tamaloloa onanā i totonu o le potu. Sa taumafai le fafine e taofi i latou, ae na latou tuleia o ia agai i le puipui. Sa latou siosiomia le moega ma amata ona tasasa le tino totolia ma manu’anu’a o Iona. O le vilivilita’i ina ia malamalama pea ma ia to’a, sa mafaufau ai Iona i le Atua. Ae sa oo ina mau le vaega faatupu vevesi i ona lima ma toso ese o ia mai le moega ma avatu ai i fafo.¹²

---

Sa ui ane Soren Thura i talaane o le fale o Jensen ae ona vaaia ai le vaega faatupu vevesi o sa’esa’e atu Iona i se vaitafe lata ane. O nisi o alii sa fe’ei ma laulauvavale solo. O isi sa pepese leotetele. Na laa atu Soren ia i latou ma tuleiese nisi o i latou. O o latou mānāva sa malosi le namu pireniti [brandy]. Sa tepa atu Soren ia Iona. Sa foliga laitiiti ma vaivai i lona ofumoe.

Sa vave lava ona iloa e le au alii ia Soren. O ia o se tagata atamai o le autau tietie solofanua a Take ma sa i ai [sona] talaaga i Bastholm o le avea ma se tagata taalo afeleti malosi. O le manatu ai o le a ia manao e fia auai ma i latou, sa fai mai nei alii ia te ia e faapea, ua latou pueina se “failauga Mamona” ma o le a togiina o ia i le vaitafe. “O le a matou faaali atu i le faifeau Mamona lea le ala e papatiso ai” sa latou fai ane ai.

“Faasaoloto o ia,” sa fai atu ai Soren. “O le a tuu mai le tama lea ia te a’u, ma ia tofotofo se tasi o outou le au palaaai e taofia a’u.” Sa faigofie lava le umī ma le malosi o Soren nai lo soo se tasi i le au faatupu vavesi, o lea na latou faapa’ū ai i lalo le faifeautalai, toe sasa o ia mo ni nai taimi, ma nanati ese loa.¹³

Sa toe ave atu e Soren ia Iona i le fale o Jensen ma sa toe foi ane i le aso na sosoo ai e asi o ia. Sa talitonu Iona na auina atu e le Atua ia Soren e laveai o ia. Sa molimau atu Iona, “E le sili atu lenei mea nai lo mea na tutupu i le nuu o le Atua i aso anamua, ma o aoa’iga faapea ua faamoemoeina e faalotomaualalo ai i tatou i luma o le Alii.”

O le savali a Iona na ootia ai Soren, ma sa toe foi mai o ia i lea aso ma lea aso e talanoa ma le alii talavou e uiga i lana misiona ma le talalelei toefuataiina.⁴

---

A o toe malosi Iona mai le fasiga o ia, o lona tuafafine e sefulufa tausaga le matua, o Augusta, sa sopo atu i Mauga Papa i se solo o taavale solofanua o le pe a ma le selau o le Au Paia sa malaga ai. O le auala sa latou malaga ai sa oneonea ma lauleaga i le mavae ai o le lima tausaga o malaga e tele agai atu i le Vanu o Sate Leki. Ae e ui lava i le iloa lelei o le ala, ae sa popole lava i latou i le auala na i luma atu. Na oo mai le tau o le tautoulu i laufanua valevalenoa, ma lafo mai ai savili ma’ati’ati i laufanua mafola a o pa’ū maualalo le fua malūlū i se malūlū na toetoe lava a le mafai ona onosaia.

O le mea na sili ona leaga, na lelavava ia povi, ma na faaaoga uma e le Au Paia a latou falaoamata na totoe, na faamalosia ai i latou e auina atu se tagata tietie solofanua e muamua atu mo nisi sapalai. O le leai ai o se auala e iloa ai po o le a le umi o le a taunuu mai ai se toomaga, sa savavali vaivai ai le Au Paia ma le leai o se meaai. Sa silia ma le 150 maila lo latou mamao ese mai le Aai o Sate Leki, ma o le vaega tifato o la latou malaga o loo i luma atu pea.¹⁵

Sa masani ona savavali ia Augusta ma ana uo ia mamao atu lava i luma o le solo o taavale solofanua ona faatalitali mai lea mo lo latou oo atu. Ao o atu i le ala, sa latou mafaufau ai i fale na latou tuua. O tagata Take e toa luasefulu valu sa i ai i le vaega sa folau mai i le Iunaite Setete faatasi ma Erastus Snow, o lē na muamua atu i le Aai o Sate Leki ae mulimuli atu Augusta ma isi tagata uma o le vaega i se isi solo o taavale solofanua. O le toatele lava o tagata malaga mai Sekanitenevia, na aofia ai ma Augusta, sa tau leai ma se upu faaPeretania na iloa. Ae o taeao ma po uma lava sa latou auai faatasi ai ma le Au Paia e tautatala faaPeretania e tatalo ma usu viiga.¹⁶

E oo mai i le taimi lenei, ua faamaonia ai o le malaga i le Aai o Sate Leki sa sili atu le faigata ma umi nai lo o le mea sa faamoemoeina e Augusta. A o faalogo atu o ia i tagata Amerika o tautatala i la latou gagana e le malamalama ai, sa ia iloa ai le laitiiti tele o mea sa ia iloa e uiga i lona aiga fou. Sa ia lagonaina foi le ma’imanatu. E faaopoopo atu i ona tuagane o Carl ma Iona, sa i ai ni ona uso laiti e toatolu na igoa ia Karolaine, Repeka, ma Nikolina. Sa manao i tagata uma o lona aiga ia faatasia ma ia i Siona i se aso. Ae na te le’i iloa pe mata o le a tupu lena mea, ae maise lava ona ua tete’a ona matua.¹⁷

I le ala agai atu i sisifo, sa ola ai Augusta i ni tufaaga laiti a o a’e atu le solo o taaavle solofanua i luga o mato, faaifoifo i vanu maualalō, ma sopoia auvai vaiti i mauga. I le gutu o le Tofē o Echo, e tusa ma le fasefulu maila mai le Aai o Sate Leki, sa iloa muamua atu ai e tamaitai o le vaega le alii sa auina atu ia muamua [e aumai] ni sapalai. E le’i umi ae oo mai se taavale solofanua na tumu i falaoa, falaoamata, ma masi, lea sa tufatufaina e kapeteni i le Au Paia lotofaafetai.¹⁸

O ni nai aso mulimuli ane, na oo atu ai le solo o taavale solofanua i totonu o le Vanu o Sate Leki. Sa faafeiloai e Erastus Snow le Au Paia Take a o latou o mai i le aai ma valaaulia i latou i lona fale mo se taumafataga i le afiafi o falaoa vine ma le alaisa. I le mavae ai o masina o ai i fasi falaoa matūtū ma aano o pafalō, sa mafaufau Augusta, e le’i tofo lava i se mea ua sili atu le manaia.¹⁹

---

I le aso 8 o Novema, 1852, na tatala ai e Siaosi Q. Kanona lana tama’i tusi talafaamaumau enaena ma tusi ai, “Ua pisi lava i le tusitusi.” O le aso atoa sa punou ai o ia i luga o se laulau i le fale o Ionatana ma Kiti Napela, i le faaliliuga o le Tusi a Mamona i le faaHawaii. O le taimi nei, a o tomanatu o ia i lana galuega o le aso, sa ole atu o ia i le Alii e fesoasoani ia te ia e faaumaina le galuega faatino.

“Ou te mafaufau i ai o se faamanuiaga matagofie,” sa tusia ai e Siaosi i lana apitalaaga. “Ou te lagona e tatau ona ou olioli ao ou auai i lenei galuega, ma e mu ma maena a’e lo’u loto a o ou mafaufau i mataupu faavae matagofie o loo i ai i totonu.”²⁰

Ina ua feiloai Siaosi ia Ionatana Napela ia Mati 1851, na te le’i iloa le taua o le a avea ai Napela i le galuega a le Alii i Hawaii. Ae ana le oo ia Ianuari 1852—na toeitiiti atoa le tausaga talu mai le la feiloaiga muamua—e le ioe Napela e papatiso.²¹ Na iloa e Napela ua moni le talalelei toefuataiina, ae o le tetee mai o tagata o le nuu ma le lotu Porotesano i le lotoifale na taofia ai o ia mai le vave auai i le Ekalesia. Ae o le taimi lea, na faamanuiaina ai Siaosi i le papatisoina o tagata e toatele ma le faatuina o ni paranesi se fa i Maui.²²

Faatasi ai ma le fesoasoani ma faamalosiauga a Napela, na amata faaliliu ai e Siaosi le Tusi a Mamona ao le’i leva ona uma le papatisoga o Napela. Mo le tele o itula e aunoa ma se malōlō, sa suesue ai e Siaosi fuaitau mai le tusi ma taumafai i le mea sili sa ia mafaia e tusi se faaliliuga faaHawaii i luga o se pepa. Ona ia faitau atu lea o le mea na ia tusia ia Napela, o lē sa fesoasoani ia te ia i le faaleleia o le faaliliuga. I le avea ai ma se loia atamai tele, sa matuai fetaui lelei ai lava Napela e taialaina Siaosi i le lavelave o lana gagana moni. Sa ia suesueina foi ma le toto’a mataupu faavae o le talalelei ma na vave malamalama ai i le upumoni.

I le taimi muamua, sa lemu lava le alu o le faagasologa, ae o le la naunau e faasoa atu le savali o le Tusi a Mamona i tagata Hawaii na faamalosiauina ai i laua e galulue pea. Sa le’i leva ae o la lagonaina le oo ifo o le Agaga i o laua luga, ma sa mafai ona la galulue televave i le tusi, e oo lava i taimi na la tau ai i fuaitau na ta’u mai ai ni aoaoga faavae ma ni manatu lavelave. Sa alualu foi i luma le lelei o Siaosi i le faaHawaii i aso taitasi a o faailoa atu e Napela ia te ia ni upu ma ni faaupuga fou.²³

I le aso 11 o Novema, na aumai ai e ni uso a faifeautalai ia Siaosi ni tusi se tolu ma ni lomiga se fitu o le Deseret News mai Iuta. O le galala ai mo ni faamatalaga mai le aiga, sa faitau ai e Siaosi ia tusi ma pepa i le taimi lava sa ia maua ai le avanoa. I se tasi o tusi, sa ia iloa ai na faitau atu e le aposetolo o Orson Pratt le faaaliga e uiga i faaipoipoga autaunonofo i le Au Paia ma talai faalauaitele atu ai e uiga i ai. Sa le’i faateia o ia i lea tala fou.

Sa ia tusi i lana apitalaaga, “O le mea lenei sa ou silamata’ia.” “Ou te talitonu i ai o le taimi talafeagai lea.”²⁴

Na lipotia mai e le isi tusi e faapea, ua silafia e taitai o le Ekalesia le faaliliuga o le Tusi a Mamona ma faamaoniaina le galuega faatino. O le tusi lona tolu na logo mai ai o ia e faapea, o le aposetolo o Ioane Teila, o le toalua o le tuafafine o lona tamā, na toe taliu atu lata mai nei mai lana misiona i Farani ma na manao ia Siaosi e foi atu foi i le fale. O Elisapeta Hoagland, o le tamaitai talavou sa faamasani tumau ma Siaosi ao le’i alu i lana misiona, sa faatalitali mai foi o ia i lona toe taliu atu. Ae peitai, sa manao Uiliata Lisati o le Au Peresitene Sili ia Siaosi e mafaufau e faauma le faaliliuga a o le’i sau i le fale.

Sa iloa e Siaosi sa ia auauna atu i se misiona faamaoni. Na tuputupu a’e o ia mai se alii talavou ma’imanatu, ma lē mafai ona faaleo atu ona manatu, ma avea o se faifeau ma se faifeautalai malosi. Afai e filifili o ia e alu i le fale i le taimi nei, e leai se tagata e mafai ona faapea mai, na te le’i faalauteleina le valaauga na tuuina atu e le Alii ia te ia.

Ae, sa ia talitonu na tatalo tuaa o tagata Hawaii mo le avanoa e faalogo ma olioli ai i latou e tupuga mai ia i latou i faamanuiaga o le talalelei. Ma sa manao o ia e olioli faatasi ma ona tuafafine ma uso Hawaii i le malo selesitila. E mafai faapefea ona ia tuua Hawaii ao le’i uma lana faaliliuga?²⁵ O le a nofo o ia e faauma lana galuega.

O ni nai aso mulimuli ane, i le uma ai ona faaalu o le taeao faatasi ma le Au Paia i Maui, sa manatunatu ai Siaosi i le agalelei o le Atua, ma sa faatumulia lona loto i le oliol ma le fiafia e le mafaamatalaina.

“O la’u tautala ma [la’u] gagana e fai lava si vaivai e faaleoina atu lagona ou te maua pe a ou mafaufau loloto i le galuega a le Alii,” sa ia alaga ai i totonu o lana apitalaaga. “Oka, ana mafai ona faaaoga lo’u laulaufaiva, ma lo’u taimi ma taleni, ma mea uma o ia te a’u pe anaina i Lona viiga ma le mamalu, e viia ai Lona suafa, ma i le faasalalauina atu o se malamalama o Ona uiga auaumama i soo se mea lava atonu e faasaga i ai la’u vili.”²⁶

---

O le tautoulu lena, na auina atu ai Iona Dorius ma isi faifeautalai Take e talai atu le talalelei i Nouei. E pei o Tenimaka, sa faatagaina e Nouei ni isi o saolotoga faalelotu i tagata Kerisiano o e sa le’i auai i le ekalesia a le setete. Ae peitai na silia ma le sefulu tausaga o lapatai e tusi ma nusipepa ia tagata Nouei e uiga i le matautia o le Au Paia o Aso e Gata Ai, ma liliuina ai manatu faaalia o tagata lautele e faasaga i le Ekalesia.²⁷

I se tasi o aso, sa faia ai e Iona ma ana soa se fonotaga i se tamai fale e latalata i le aai o Fredrikstad. Ina ua uma ona lagiina e le aofia le viiga “Le Agaga Paia Ua pei o le Afi,” sa saunoa Iona e uiga i le afuaga o le Ekalesia ma tautino atu na toe faaali mai e le Atua o Ia Lava i tagata. Ina ua uma lana [tautalaga], sa poloaia e se tamaitai talavou e faamaonia atu le moni o ana upu i le Tusi Paia. Sa ia faia lava, ma sa faagaeetia o ia i mea sa ia ta’u atua.²⁸

O le lua o aso mulimuli ane, sa malolo ai Iona ma ana soa mo le po i se faletalimalo i fafo o Fredrikstad. Sa fesili le pule o le faletalimalo po o ai i latou, ma sa faailoa atu e alii talavou i latou o ni faifeautalai o le Au Paia o Aso e Gata Ai. Sa popole le pule o le faletalimalo. Sa matuai faasā o ia e taitai o le itumalo ona faanonofo le Au Paia o Aso e Gata Ai [i lona faletalimalo].

A o talanoa faifeautalai i le pule o le faletalimalo, sa laa mai i fafo se alii leoleo mai se potu lata ane ma poloai atu e fia vaai i le tusifolau o Iona. “O loo i Fredrikstad,” sa faamalamalama atu ai e Iona.

“O le a taofia oe,” sa fai atu ai le leoleo, ona faasaga atu lea i le soa a Iona ma poloai atu mo lona tusifolau. Ina ua le mafai e le faifeautalai ona tuuina atu [lona tusifolau], sa taofia foi o ia e le leoleo ma taitai atu i la’ua i se potu e faatalitali ai mo le tu’iina i fesili. Sa faateia i laua, ona na iloa ai e Iona ma lana soa, sa faatumulia le potu i le Au Paia Nouei—o tamaitai ma alii—o e foi na taofiaina. Na i ai faatasi ma i latou ni isi o faifeautalai Take, e aofia ai se toatasi ua lua vaiaso o i ai i le vaavaaiga a leoleo.²⁹

Na le’i leva atu, na amata ai e taitai o le malo i le eria ona tapu’e ma tu’ifesili ia faifeautalai ma isi tagata o le Ekalesia. E toatele tagata Nouei sa matuai masalosalo i le Au Paia ma na talitonu o lo latou faatuatua i le Tusi a Mamona ua latou le agavaa ai mo le puipuiga na tuuina mai i lalo o tulafono o le saolotoga o mea taulotu a le atunuu.

O tala e faapea, na faatino e tagata o le Ekalesia i le Iunaite Setete ia faaipoipoga autaunonofo sa oo ai foi ina manatu ni isi o tagata Nouei o le Au Paia o ni tagata faatupu vevesi o e sa mananao e faapiopio le talitonuga ma tulaga faatauaina anamua a tagata Nouei. O le tu’ifesiliina ma le faafalepuipuiina o le Au Paia o Aso e Gata Ai, sa faamoemoe taitai [o le malo] e faailoa atu ai e le o i latou o ni Kerisiano ma ia taofia ai le salalau atu o le tapuaiga fou.³⁰

Sa le’i umi ae momoli atu Iona i Fredrikstad ma tuu ai i le falepuipui faatasi ma isi faifeautalai e toafa, e aofia ai Christian Larsen, o se taitai o le Ekalesia i Nouei. Sa taulima e le leoleo falepuipui ma lona aiga ia faifeautalai ma le faaaloalo, ma faataga i latou e tatalo, faitau ma tusitusi, pepese, ma talanoa e uiga i le talalelei. Ae sa leai se tasi na saoloto e alu ese [mai le falepuipui].³¹

Ina ua mavae ni nai vaiaso, ona fesiligia lea e le faamasino o le itumalo ma isi taitai ia ni isi o faifeautalai. Sa taulima e le faamasino ia alii e pei o ni tagata solitulafono, sa tau le faalogo mai i mea na latou fai atu ai, ma na musu e tuu latou te tautatala atu ina ua latou taumafai e faamalamalama atu, o la latou savali sa ogatusa lava ma le faaKerisiano ma le Tusi Paia.

“O le a le faamoemoega ua outou o mai ai i le atunuu lenei?” sa fesili mai ai taitai ia Christian.

“Ina ia aoao tagata i le talalelei moni a Iesu Keriso,” sa fai atu ai Christian.

“Mata e te toe foi i Tenimaka, pe afai e faasaolotoina oe mai le falepuipui?”

“Seiiloga lava e faamalolo a’u e le Atua e ala mai i Ana auauna o ē na auina mai a’u iinei.”

“Mata o le a tuu lou talai atu ma le faia o papatisoga?”

Sa fai atu Christian, “Afai e te mafaia pe mafai e soo se tasi o au faitaulaga ona faatalitonu a’u e faapea, o le matou aoaoga faavae ma le tapuaiga ua le ogatusa lea ma aoaoga faavae a Keriso, ona ou te fia maua le faaolataga ma fai le finagalo o le Atua.”

Sa fai mai le taitai o le au tu’ifesili, “Matou te manatu ua le tusa lea ma le mamalu o o matou faitaulaga ona finau ma oe,” “Ua ou faasāina nei oe ona e taitai sese ni isi lava agaga e ala i au aoaoga faavae sese.”³²

A o faatalitali Iona ma faifeautalai mo le latou aso i le faamasinoga, sa latou nonofo faatasi i se sela ma Iona Andreas Jensen. O Jensen o se kapeteni o vaasami, ma o se tagata lotu malosi o lē sa tuuina atu ana oloa faalelalolagi i e matitiva ma amata talai atu ma alagaina le salamo i luga o magaala. Ona o lona naunautai e folafola atu le afioga a le Atua, sa taumafai ai o ia e faasoa atu ona manatu faalelotu i le Tupu o Oscar le 1 o Suetena ma Nouei, ae sa teena o ia i taimi uma sa ia sailia ai se au faalogologo. O lona le fiafia sa ta’u ai e Jensen le tupu o se “tagata agasala faaeaina” ma sa vave lava ona pu’eina ma faafalepuipuiina.

E le’i umi ae faasoa atu e faifeautalai le talalelei toefuataiina ia Jensen. O le taimi muamua, sa le fia faalogo le kapeteni i le savali, ae sa ia tatalo mo i latou, ma sa latou tatalo mo ia. I se tasi o aso, a o molimau atu faifeautalai ia Jensen, sa faafuasei ona faatumulia tagata uma sa i totonu o le sela i le olioli. Sa matuai tagi lava Jensen ma na susulu ona foliga. Sa ia tautino atu ua ia iloa e moni le talalelei toefuataiina.

Sa talosaga faifeautalai i le faamasinoga ia lava se taimi e faasaoloto ai Jensen ina ia papatisoina, peitai sa teena la latou talosaga. E ui i lea, sa faamautinoa atu e Jensen i faifeautalai o le a papatiso o ia i le taimi lava e faasaoloto ai o ia mai le falepuipui.³³

Sa tusia e Iona i lana apitalaaga, “O lenei mea na aumaia ai i matou uma e faafetai ma le faamaualalo i le Atua, ma e moni lava sa o se aso fiafia tele mo i matou.” “Sa matou pepese ma vivii i le Atua ona o Lona agalelei.”³⁴

1. Ann Eliza Logan Secrist to Jacob F. Secrist, Sept. 29, 1852; Jacob F. Secrist, “For the Satisfaction of My Wife and Children,” Dec. 3, 1853, [1], Jacob F. Secrist Collection, CHL.

2. Jacob F. Secrist, “For the Satisfaction of My Wife and Children,” Dec. 3, 1853, [1], Jacob F. Secrist Collection, CHL; Minutes, Deseret News, Extra, Sept. 14, 1852, 10.

3. Ann Eliza Logan Secrist to Jacob F. Secrist, Sept. 29, 1852, Jacob F. Secrist Collection, CHL; “Anne Eliza Secrist,” in Soule, “Exerps from a History,” [1]; Effie Secrist Miller, “History of Jacob Foutz Secrist,” [1], Jacob F. Secrist Family Papers, CHL; tagai foi letters between Jacob F. Secrist and Ann Eliza Logan Secrist, 1841–42, i le Jacob F. Secrist Collection, CHL; ma le Ann Eliza Logan Secrist to Jacob F. Secrist, May 30 ma le Nov. 21, 1853, Jacob F. Secrist Collection, CHL.

4. Ann Eliza Logan Secrist to Jacob F. Secrist, Sept. 29, 1852; Jacob F. Secrist to Ann Eliza Logan Secrist, July 26, 1853, Jacob F. Secrist Collection, CHL. O le fuaiupu muamua o le upusii na faasa’oina mo le manino; o le “’afa” i le uluai tusiga na suia i le “i le ‘afa.”

5. McBride, “Utah Mail Service before the Coming of the Railroad,” 15–31; Jacob F. Secrist, “For the Satisfaction of My Wife and Children,” Dec. 3, 1853, [8]–[9], Jacob F. Secrist Collection, CHL; tagai foi Ann Eliza Logan Secrist to Jacob F. Secrist, Oct. 30, 1852; May 30, 1853, Jacob F. Secrist Collection, CHL.

6. Dorius, Autobiography and Journal, [1]; Jensen, “Diary of J. F. Ferdinand Dorius,” [1], 34. E foliga mai na amata alu Iona i le igoa Ioane (o le suiga pei o le faaleoga o Iona, i se taimi ina ua mavae le malaga atu i le Iunaite Setete. Autu: Denmark

7. Jensen, Diary of J. F. Ferdinand Dorius,” 2, 4–8, 15; tagai foi Stevens, Autobiography, 1.

8. Van Orden, Building Zion, 56; Crawley, Descriptive Bibliography, 2:213–16, 251–54.

9. Stevens, Autobiography, 1–2; Jensen, “Diary of J. F. Ferdinand Dorius,” 4–8, 19; Dorius, “Sketch of the Life,” 6.

10. Jensen, “Diary of J. F. Ferdinand Dorius,” 34.

11. Mulder, Homeward to Zion, 41–44.

12. Jensen, “Diary of J. F. Ferdinand Dorius,” 34–36; Dorius, “Sketch of the Life,” 18.

13. Jensen, “Diary of J. F. Ferdinand Dorius,” 36; Dorius, Dorius Heritage, 35–36; Dorius, “Sketch of the Life,” 18–19; “Thure, Soren Christensen,” Andrew Jenson Collection, CHL; Woodruff, Journal, Sept. 24, 1868. O upusii a le vaega faatupu vevesi ua faasa’oina mo le faafaigofie ona faitauina; o le punavai autu o loo i ai le “Sa latou fai mai, o le a latou faaali atu i lenei Faifeau Mamona le ala e papatiso ai.”

14. Jensen, “Diary of J. F. Ferdinand Dorius,” 36; Dorius, “Sketch of the Life,” 18–19; Dorius, Dorius Heritage, 35–37. Ua faasa’oina le upusii mo le faigofie ona faitauina; “O lenei mea sa” i ai i le uluai tusiga ua suia i le “O lenei mea o loo,” ma le “sa faamoemoeina i le uluai tusiga ua suia i le “ua faamoemoeina.”

15. Stevens, Autobiography, 1, 4–5; Butler, “Short History,” 67–68; Eli B. Kelsey Company (1852) list, Pioneer Database, history.ChurchofJesusChrist.org/overlandtravel/companies; tagai foi Burton, City of the Saints, 169–70.

16. Stevens, Autobiography, 1–2, 4–5; Jenson, “Scandinavian Mission,” 813; tagai foi Eli B. Kelsey Company (1852) list, Pioneer Database, history.ChurchofJesusChrist.org/overlandtravel/companies.

17. Stevens, Autobiography, 1–2, 4–5; Jensen, “Diary of J. F. Ferdinand Dorius,” 19.

18. Butler, “Short History,” 70–71; Clayton, Latter-day Saints’ Emigrants’ Guide, 17–20.

19. Stevens, Autobiography, 4–5. Autu: Pioneer Trek

20. George Q. Cannon, Journal, Nov. 8, 1852; Cannon, My First Mission, 59. O le fuaiupu muamua o le upusii na faasa’oina mo le faigofie ona faitauina; o le “tusitusi” i le uluai tusiga ua suia i le “i le tusitusi”” Topics: George Q. Cannon; Hawaii

21. George Q. Cannon, Journal, Jan. 5, 1852; tagai foi i le tusiga mo Mar. 8, 1851. Autu: Jonathan Napela

22. George Q. Cannon, Journal, May 11 ma le 22, 1851; Aug. 13–18, 1851; Dec. 12, 1851; Cannon, My First Mission, 31, 42–43.

23. Cannon, My First Mission, 58–61; Woods, “Jonathan Hawaii Napela,” 136–37.

24. George Q. Cannon, Journal, Nov. 11–13, 1852. Autu: Faaipoipoga Autaunonofo i Iuta

25. George Q. Cannon, Journal, Nov. 11 ma le 23, 1852.

26. George Q. Cannon, Journal, Nov. 29, 1852.

27. Tagai Biography of Anne K. Smoot, 1, 5–7; and Ulvund, “Perceptions of Mormonism in Norway,” 208–11, 214–16. Autu: Norway

28. Biography of Anne K. Smoot, 6–9; Jensen, “Diary of J. F. Ferdinand Dorius,” 38, 46–47.

29. Dorius, Dorius Heritage, 43; Jensen, “Diary of J. F. Ferdinand Dorius,” 48–49. Johan Dorius quotation edited for readability; original source has “It was in Frederikstad.”

30. Dorius, Dorius Heritage, 43; Haslam, Clash of Cultures, 38–41.

31. Christian Larsen, Journal, Oct. 14–Nov. 12, 1852.

32. Christian Larsen, Journal, Nov. 12, 1852; Dorius, Dorius Heritage, 43–45. O le fesili lona lua mai taitai o Nouei ua faasa’oina mo le manino; o le punavai autu o loo i ai le “E toe foi i Tenimaka, pe afai e faasaolotoina mai oe mai le falepuipui?”

33. Dorius, Dorius Heritage, 44; Jenson, History of the Scandinavian Mission, 65–66; “Jensen, Johan Andreas,” Andrew Jenson Collection, CHL; Jensen, “Diary of J. F. Ferdinand Dorius,” 50.

34. Jensen, “Diary of J. F. Ferdinand Dorius,” 50.