Mataupu 2

Ua Lava le Mamalu

Na malulu le agi o le savili a o taunuu atu Polika Iaga i le Sugar Creek i le afiafi o le aso 15 o Fepuari, 1846. Sa fola faataamilo i se togavao na lofia i le kiona, ma sa le’i mamao ese mai se auvai aisā le faitau selau o le Au Paia na tetete i lalo o ofutele ma palanikeke sūsū. O le toatele o aiga na faapotopoto faataamilo i afi po o lalo o faleie na faia mai ie o moega po o ufi o taavale solofanua. O isi na faapupuu faatasi i totonu o taavale toso po o taavale solofanua mo se mafanafana.¹

O le taimi lava lena na silafia ai e Polika e tatau ona ia faatulagaina le tolauapiga. Faatasi ai ma le fesoasoani a isi taitai o le Ekalesia, sa ia vaevaeina ai le Au Paia i ni vaega ma valaauina ni kapeteni e taitaia i latou. Sa ia lapatai atu e uiga i le faia o ni malaga e le manaomia e toe foi atu ai i Navu, i le paie, ma le nonōina mai o aitema e aunoa ma se faatagaga. O alii e tatau ona puipuia i taimi uma lava le tolauapiga ma ia mataitūina le tumama, ma na tatau i aiga taitoatasi ona tatalo faatasi i taeao ma afiafi.²

Na le’i umi ae lagonaina loa le agaga i le tolauapiga. O le o ese saogalemu ai mai Navu, sa tau le popole ai le Au Paia i le au faatupu vevesi po o faamata’u a le mālō e taofia le malaga ese atu. I afiafi, na tātā ai e se faili pu ni musika tiotio a’o sisiva ai alii ma tamaitai. O le Au Paia foi o e na faia faaipoipoga autaunonofo sa tau le puipuia ma amata ona talanoa saoloto e uiga i le mataupu faavae ma le ala e fesootai faatasi ai o latou auaiga.³

Ae o le taimi foi lea, na faaalu ai e Polika ni itula se tele e faaleleia atili ai fuafuaga mo le siitia atu i sisifō.⁴ A o anapogi ma tatalo ai i totonu o le malumalu i se taimi e le’i umi ae tuua loa Navu, sa ia vaai ai i se faaaliga vaaia ia Iosefa Samita o faasino atu i se tagāvai sa lealea i luga a’e o se tumutumu mauga. Na faatonuina o ia e Iosefa, “E atinae [le aai] i lalo ifo o le vaega e gase i ai le tagāvai, ma o le a outou manuia ma maua ai le filemu.”⁵ Na silafia e Polika e iai se nofoaga na saunia e le Alii mo le Ekalesia, ae o le taitaiina atu o le faitau afe o le Au Paia iina, o se galuega o le a matuai faigata lava.

O le taimi lea, na taunuu mai ai ni tusi i le tolauapiga mai ia Sam Brannan, o lē na folau atu nei mo Kalefonia i luga o le Brooklyn. Sa iai i ia tusi le konokarate na folafola mai ai se malaga atu saogalemu mo le Au Paia ae faafesuia’i ma se fanua i Sisifō. Sa faitau ma le faaeteete e Polika ma le au aposetolo ia le konokarate. Sa fautuaina mai e le tusi a Sam, afai latou te le sainia, e mafai e le peresitene o le Iunaite Setete ona poloaiina le Au Paia e aveese a latou auupega ma tuu le faapotopoto faatasi.⁶

Sa le talitonu i ai Polika. E ui lava i lona le talitonuina o le malo, ae ua tonu lava ia te ia e taumafai e galulue faatasi i ai nai lo o le galue faasagatau i ai. O le mea moni, i se taimi e le’i mamao a’o le’i tuua Navu, sa ia faatonuina ai Jesse Little, o le toeaina pule faamalumalu fou o setete i sasae, e talosaga mo le Ekalesia ma talia soo se fautuaga ta’uaogaina mai le faigamalo faalesetete e fesoasoani ai i le malaga atu a le Au Paia. Sa vave ona iloa e Polika ma le au aposetolo o le konokarate sa leai se mea ae na’o se fuafuaga lavelave na mamanuina e faamalie ai alii na tusiaina. Nai lo o le sainia o le maliega, na tonu i le au aposetolo e faalagolago i le Atua ma tepa atu ia te Ia mo le puipuiga.⁷

I le aluga o le masina, na pau maualalo ai le fua o le ea i lalo ifo o le maka e liu kiona ai, ma na liu aisa ai le laualuga o le Vaitafe o le Misisipi, ma faapea ona faigofie ai ona sopoia le isi itu o le vaitafe. E le’i umi ae tolauapi le tusa ma le lua afe o tagata i le Sugar Creek, e ui sa toe foi atu nisi i Navu mai lea taimi ma lea taimi ona o ni feau po o ni isi mea.

O feoaiga e o atu ma o mai, na popole ai Polika, o lē sa talitonu, o nei Au Paia na tuulafoaia o latou aiga ae ua matele ina taulai atu i o latou fanua i le aai. Faatasi ai ma le tuai ona alu o le savaliga umi agai atu i sisifo, sa tonu ai ia te ia ua oo i le taimi e me’i ai le Au Paia mai le Sugar Creek, e tusa lava pe sa le’i lava tapena ia vaega.

I le aso 1 o Mati, sa amata o ai taavale solofanua e lima selau i sisifo e sopo atu i laufanua vaoa o Iowa. Sa manao lava Polika e auina atu se vaega e muamua atu i luga o Mauga Papa i lena tausaga, ae o le mea muamua, sa manaomia e le Au Paia ia punaoa uma e faaminoi mamao ese atu ai le tolauapiga mai Navu.⁸

---

A o tuua e le Au Paia ma Polika le Sugar Creek, sa nofo ai pea i Navu ia Luisa Pratt, e fasefulu ma le tolu ona tausaga, ma sauniuni ai e tuua le aai faatasi ma lana fanau teine laiti e toafa. O le tolu o tausaga na muamua atu, na valaauina ai e le Alii lana tane, o Addison, i se misiona i Motu o le Pasefika. Talu mai lena taimi, o le le faatuatuaina o le tautua o meli feaveai i le va o Navu ma Tubuai, o le motu i Farani Polenisia lea sa auauna atu ai Addison, na faigata ai ona fesootai ma ia. O le tele o ana tusi ua ta’i fia masina le umi ae faatoa taunuu mai, ae o nisi na sili atu ma le tausaga le leva.

O le tusi aupito lata mai a Addison na faamanino mai ai, o le a le fetaui le taimi e oo mai ai i le fale ma le taimi latou te o atu ai i sisifo. Sa faatonuina o ia e le toasefululua e nofo ai pea i Motu o le Pasefika seia oo ina latou valaau mai e foi atu pe auina mai ni faifeautalai e sui ia te ia. I se tasi o taimi, sa faamoemoe ai Polika e auina atu nisi faifeautalai i atumotu ina ua uma ona maua e le Au Paia ia faaeega paia, ae o le savaliga sopo mai Navu na tolopoina ai lena fuafuaga.⁹

Sa manao Luisa e alu i le malaga e aunoa ma lona toalua, ae o le mafaufau e uiga i ai na popole ai o ia. Sa le fiafia i le tuua o Navu ma le malumalu, ma sa le fiafia foi i le manatu o le malaga i taavale solofanua i luga o Mauga Papa. Sa manao foi o ia e vaai i ona mātua ua pulapula lagoto soifua i Kanata—atonu e mo le taimi mulimuli lava—a’o le’i o atu i sisifō.

Afai na te faatau ese atu ana povi toso taavale toso, e mafai ona lava se tupe e asiasi atu ai i ona matua ma totogi ai pasese mo lona aiga i se vaa e alu atu i le talafatai o Kalefonia, ma faapea ona aloese ai mai le malaga i luga o le laueleele.

Na toeitiiti lava a mautu le manatu o Luisa e o atu i Kanata, ae sa iai lava se mea na ia lagonaina le le fetaui. Sa tonu ia te ia e tusi atu ia Polika Iaga e uiga i ona atugaluga e faatatau i le malaga i luga o le laueleele ma lona manao e vaai i ona matua.

Sa ia tusi atu, “Afai e te saunoa mai o le malaga i taavale toso e toso e povi o le auala sili lea ona lelei mo le faaolataga, o le a ou auai i ai ma lo’u loto ma lo’u malosi atoa, ma ou te talitonu e mafai ona ou lavātia e aunoa ma se faaseā e pei o se isi lava tamaitai.”¹⁰

I se taimi puupuu ane, na taunuu ane ai se ave feau ma le tali a Polika. “O maia. O le laveaiga i povi toso taavale toso o le auala aupito saogalemu lea,” sa ia fai atu ai ia te ia. “O le a faafetaui i tatou e Uso Pratt i le vaomatua, i le mea tatou te malolo ai, ma o le a matuai le fiafia lava pe afai e le iai lona aiga faatasi ma i matou.”

Sa mafaufau Luisa i le fautuaga, saunia lona loto ia faafeagai ma le auala faigata na i luma atu, ma filifili ai e mulimuli i le tino autu o le Au Paia, e tusa lava pe ola pe oti ai.¹¹

---

O le tautotogo lena, na amata ai e le Au Paia na malaga ui atu i Iowa ona ta’u i latou lava o le Tolauapiga a Isaraelu, i le au Eperu anamua lea na taitai ese e le Alii mai le nofopoloaga i Aikupito. O lea aso ma lea aso, sa latou tauivi ai ma elemene e pei o le kiona ma timuga faalealofa lea na faapea ona vaivaia ma palapalā ai laufanua vaoa o Iowa. Sa maualuluga ma aave le tatafe o vaitafe ma auvai. O auala pefu na liu suavai ma avea o ni pala. Sa fuafua le Au Paia ia sopoia le tele o le teritori i totonu o se masina, ae i lena taimi, sa na’o le tasi vaetolu o le mamao na latou ūia.¹²

I le aso 6 o Aperila, o le lona sefuluono ai lea o tausaga talu ona faavaeina le Ekalesia, sa timuga ai le aso atoa. Sa faaalu e Polika le tele o itula i ona tulivae i totonu o le palapala, i le fesoasoani i le Au Paia a o agai atu i le ala i se nofoaga na ta’ua o Locust Creek. O iina sa fesoasoani ai o ia e faatulaga taavale solofanua, faatutu faleie, ma tātā fafie seia oo ina mautu uma le Au Paia i le tolauapiga. Sa manatu se tasi o tamaitai o lē na vaai atu ia [Polika] i totonu o le palapala, o toso ma tulei se taatavale toso e aveese mai le pala na pa’ulia ai, sa fiafia lava o ia e pei o se tupu, e ui lava i luitau na siomia ai o ia.

O lena afiafi, na taia ai le tolauapiga i timuga malulu ma timu aisa, ma faapea ona lilofia ai i le aisa. I le taeao, na maua atu ai e Viliamu Clayton o le failautusi a Polika ma o le taitai o le failipu, ua taape solo le tolauapiga. E tele faleie na mafolafola i luga o le eleele malōtiaa. Na malepe se taavale toso ona na pau i ai luga se laau. Na leai foi ni sapalai a nisi o alii o le failipu.¹³

Sa faasoa atu e Viliamu ana mea sa i ai ma lana aufaili, e ui ina sa itiiti foi ni mea a lona lava aiga. O Viliamu, o se tasi o tagata muamua o le Au Paia na faatinoina faaipoipoga autaunonofo, sa malaga faatasi ma ana avā e toatolu ma lana fanau e toafa. O le isi ona toalua o Diantha, sa iai pea lava i Navu, i lalo o le tausiga a lona tina. Sa mamafa o ia i lana pepe muamua ma sa vaivai lona soifua maloloina, lea na faaopoopo atu i le atuatuvale o Viliamu a o savalia le ala.

A o malolo le au Clayton i Locust Creek faatasi ma le Tolauapiga a Isaraelu, na fautuaina atu e Polika se fuafuaga e faatu ai se nofoaga e malolo ai i le ogatotonu o le auala e sopoia ai Iowa e mapu i ai le Au Paia seia te’a le leaga o le tau, fau ni faleoo, ma toto ni laau mo i latou o le a o mai mulimuli ane. O le a faapea ona vaai e ni isi o le Au Paia le nofoaga malolo ae toe foi atu isi i Navu e taiala atu vaega i Iowa. Ae o isi tagata uma o le tolauapiga o le a latou o atu pea i luma faatasi ma ia i le Vaitafe o Misuri.¹⁴

I le aso 14 o Aperila, na ala ai Viliamu i le po atoa e tutuli mai solofanua ma povi ia na faapea ona taape solo i le tolauapiga. I le taeao, sa manaomia lava ona moe o ia, ae na maua e se tasi o tagata i le tolauapiga se tusi na ta’ua ai Dianatha ma le fanauga o lana pepe. O lena po, na patipatia ai e VIliamu le fanauga [o lana pepe], i le usuina ma le taina o musika faatasi ma le aufaili seia oo lava i le leva o le po.

Sa lagi lelei le taeao na sosoo ai, ma na vaaia e Viliamu ni aso lelei atu i le lumanai mo le Tolauapiga a Isaraelu. O le nofo ai i lalo ma se vaitusi ma se pepa, sa ia tusia ai se viiga faamalosiau mo le Au Paia:

O mai, o mai, outou le Au Paia;

Galulue fiafia.

E ui ina mata faigata,

O le a manuia.

Ua sili lava le taumafai

Ia tiai ia le faavaivai;

Ae faia pea, ma fiafia—

Ua Lelei! Ua Lelei!¹⁵

---

E tasi le selau o maila agai i sasae, na tulai ai Uilifoti Uitilafi i luga o le taumua o se vaa vaitafe i le Vaitafe o Misisipi, ma faataupupula atu i se meavaai i le malumalu o Navu. O le taimi mulimuli na ia vaai ai i le malumalu, sa le’i uma lava ona puipui. Ae o lea ua iai se taualuga, ni faamalama iila, ma se olo maualuga na faatu ai i luga se faailo o le tau na foliga mai o se agelu.¹⁶ Na iai vaega o le malumalu na uma ona faapaiaina mo galuega o sauniga, ma o le a le umi ae mae’a loa le fale atoa ma saunia ai e faapaiaina atoa i le Alii.

Sa matuai matautia lava le malaga foi mai a Uilifoti mai Peretania. Sa sasa e matagi ma galu malolosi le vaa agai i luma ma tua. Sa onosai pea Uilifoti, sa ma’ivasa ma faanoanoa tele. “Soo se tamaloa lava o le a faatau atu se faatoaga ae alu i le sami e ola ai,” o lana oi lea i lena taimi, “e ese la lona lagona ma a’u.”¹⁷

Sa muamua malaga ese mai Phebe mai Egelani, ma aumai ai le la fanau o Susana ma Iosefa i luga o se vaa na faatumulia i le Au Paia o e sa malaga atu i le Iunaite Setete. Na nofo umi teisi Uilifoti i Liverpool, e faamae’a nisi o mea tautupe, faasee atu le tulaga faaleautaitai o le Ekalesia i le peresitene fou o le misiona, ma talosagaina ni foai e faauma ai le fauina o le malumalu.¹⁸

Sa ia faamanatu atu i tagata o le Ekalesia e faapea, “O le fauina o le malumalu o le Atua, e tutusa lava le fiafia i ai o tagata faamaoni uma o le Au Paia, e tusa lava po o fea e i ai o ia.”¹⁹ E ui ina o le a tatau ona lafoaia le malumalu i se taimi e le mamao talu ona uma ona fausia, ae na naunau lava le Au Paia i itu uma e lua o le Vasa Atelani e faamae’a e usiusitai ai i le poloaiga a le Alii i le Ekalesia i le 1841.

Na tautino mai le Alii e ala mai ia Iosefa Samita e faapea, “Ou te tuu atu ia te outou se taimi ua lava e fausia ai se fale mo aʼu, ma afai tou te lē faia nei mea i le faaiuga o le taimi tuupoina, o le a teena outou o se ekalesia, faatasi ma o outou tagata maliliu, ua fetalai mai ai le Alii lo outou Atua.”²⁰

E ui ina sa toatele le Au Paia Peretania sa matitiva, ae sa faamalosiau atu Uilifoti ia i latou e foai atu soo se mea latou te mafaia e totogi ai mo le malumalu, ma folafola atu faamanuiaga mo a latou osigataulaga. Sa latou foai atu ma le agalelei, ma sa faafetai Uilifoti mo lo latou faapaiaga.²¹

Ina ua taunuu atu i le Iunaite Setete, sa piki mai e Uilifoti lona afafine o Phebe Amelia i Maine ma malaga atu i saute e asi ona matua, o e sa ia tauanauina latou te o atu faatasi i sisifō.²²

Ina ua taunuu atu i Navu, sa toe faatasia Uilifoti ma lona faletua ma feiloai atu ia Orson Hyde, o le aposetolo pule faamalumalu i le aai, o lē sa iai se talafou laitiiti e lipoti mai. Faatasi ai ma le Au Paia sa iai pea i Navu, ia ni isi o e sa lagonaina le lelavava ma le tuulafoaiina. Sa fesiligia foi e ni nai tagata toalaiti le mauaina e le Toasefululua o tulaga faaleautaitai i le Ekalesia. O ni isi o i latou o le tuafafine ma le uso faaletulafono o Uilifoti, o Iunesi ma Dwight Webster.²³

Sa faavauvau Uilifoti mo ni aso i lenei talafou. Sa ia aoaoina ma papatisoina ia Iunesi ma Dwight i le sefulu tausaga na muamua atu. Talu ai nei, sa laua tosina atu ai i se alii na igoa ia Iakopo Strang, o le sa faapea mai na filifilia faalilolilo o ia e Iosefa Samita e sosoo atu ia te ia. Sa sese le tautinoga a Strang, ae o ona uiga tausaafia na talitonu ai nisi o le Au Paia i Navu, e aofia ai ma Ioane Page ma Viliamu Samita, le uso laitiiti o le perofeta, ia na avea muamua ma ni aposetolo.²⁴

I le aso 18 o Aperila, sa faapea ona matuai ita ai Uilifoti ina ua ia iloaina sa taumafai Dwight ma Iunesi e faatalitonu ona matua ia mulimuli ia Strang nai lo o le o atu i sisifō. Sa valaau e Uilifoti lona aiga e faapotopoto faatasi ma ia tausalaina le perofeta pepelo. Ona aluese ai lea o ia e uta ana taavale toso.

“Ua tele naua a’u mea e fai,” sa ia tusia ai i lana apitalaaga, “ae ua laitiiti le taimi e fai ai.”²⁵

---

O le tautotogo lena, sa faataalise ai le aufaigaluega e faauma le malumalu a’o le’i oo i lona faapaiaga faalauaitele i le aso 1 o Me. Sa latou faia se fola piliki e faataamilo i le faatanoa o le vai papatisoga, faapipii laupapa teuteu i o latou tulaga, ma vali ia puipui. Sa alu le ao atoa o faia le galuega ma sa masani ona faia seia tau lava i le po. Talu ai ona sa itiiti tupe a le Ekalesia e totogi ai le aufaigaluega, o le toatele o i latou sa ositaulagaina vaega o o latou totogi ina ia mautinoa na saunia le malumalu e faapaia i le Alii.²⁶

O le lua o aso a’o lumanai le faapaiaina, na faauma ai e le aufaigaluega ona vali le potutele mo potopotoga i le fogafale muamua. O le aso na sosoo ai, na latou saluina ai i fafo le pefu ma otatoa o le potu tele ma tapena ai mo le sauniga. Sa le mafai e le aufaigaluega ona faauma nai vaega laiti o potu uma lava, ae na latou iloaina, o le a le taofia e na mea le Alii mai le taliaina o le malumalu. O le talitonu e faapea ua latou faataunuuina le poloaiga a le Atua, na latou valiina ai upu “Ua silasila mai le Alii i la tatou osigataulaga” i luga a’e o pulelaa e faasolo i puipui i sasae o le potutele o potopotoga.²⁷

O le nofouta ai i le aitalafu na latou nofo aitalafu ai i le aufaigaluega, na faasilasila ai e taitai o le Ekalesia e faapea, o le sauniga muamua o le faapaiaga o le a faia o se fuafuaga mo foai agaalofa. Sa talosagaina i latou na auai atu e foai atu se talā e fesoasoani e totogi ai le auleipa le tagolima.

I le taeao o le aso 1 o Me, na tuua ai e Elvira Stevens e sefulufa tausaga ia lana tolauapiga i sisifo o Misisipi ma sopoia le vaitafe ina ia auai i le faapaiaga. O se teineitiiti matuaoti sa le’i leva ona siitia atu lona aiga i Navu ae maliliu ona matua, ae o lea ua nonofo nei Elvira ma lona uso ua faaipoipo. Ona na leai se isi tagata o lana tolauapiga na mafai ona auai faatasi ma ia mo le faapaiaga, o lea sa alu ai na’o ia.

O le iloa ai e faapea, atonu o le a tele ni tausaga faatoa toe fausia se isi malumalu i Sisifo, o lea na faataunuuina ai e le au aposetolo ia faaeega paia o nisi o tagata talavou nofofua, e aofia ai ma Elvira. O lenei la, i le tolu o masina mulimuli ane, sa a’ea’e atu ai o ia i faasitepu e toe agai atu i faitotoa o le malumalu, ma foai atu lana talā, ma maua ai se nofoaga i totonu o le potu tele o potopotoga.²⁸

Sa amatalia le sauniga i se viiga mai se aufaipese. Ona faia lea e Orson Hyde le tatalo o le faapaiaga. “Ia foai mai Lou Agaga e mafuta iinei,” sa ia aioi ai, “ma tau ina lagona e tagata uma se faatosinaga paia i o latou loto sa fesoasoani Lona aao i lenei galuega.”²⁹

Sa lagona e Elvira le mana faalelagi i totonu o le potu. Ina ua uma le sauniga, sa toe foi atu o ia i lana tolauapiga, ae sa toe foi mai o ia mo le isi sauniga na sosoo ai i le lua o aso mulimuli ane, ma le faamoemoe ia toe lagona ai lea lava mana e tasi. Sa tuuina atu e Orson Hyde ma Uilifoti Uitilafi ni lauga e uiga i galuega o le malumalu, perisitua, ma le toetutu. Ae lei faamae’aina le fonotaga, na viia e Uilifoti le Au Paia mo le faamaeaina o le malumalu e ui lava o le a tatau ona latou lafoaiaina.

Sa ia saunoa atu, “E faitau afe le Au Paia ua maua o latou faaeega paia i totonu [o le malumalu], ma o le a le pe lava lea malamalama.” “Ua lava le mamalu lenei mo le fausiaina o le malumalu.

Ina ua uma le sauniga, sa toe foi atu Elvira i lana tolauapiga, ma toe sopoia ai le vaitafe mo le taimi mulimuli.³⁰ O le taimi lea, na faaalu e le Au Paia i Navu le taimi atoa na totoe o le ao ma le po e tapena ai ma aveese nofoa, laulau ma isi meafale seia oo ina gaogao le malumalu ma tuu atu ai i aao o le Alii.³¹

---

O ni nai vaiaso talu ona uma le faapaiaga o le malumalu, na amata agai atu ai i sisifo ia Lusia Pratt ma lana fanau teine faatasi ma se vaega o le Au Paia. O Ellen na sefulufa [ona tausaga] i le taimi lea, o Faranisisi na sefululua, o Loise sa iva, ma Ana sa lima. Sa iai ni a latou avega na toso e ni povipo’a se lua, ma ni povifafine se lua, ma se taavale toso na tumu i lavalava fou ma sapalai.

A o le’i sopoia le vaifate e ui atu i Iowa, na afe Luisa i le fale meli ma maua ai se tusi umi mai ia Addison sa tusia i le aso 6 o Ianuari, 1846—i le lima masina na muamua atu. Sa lipoti mai e Addison e faapea, o le taimi lea ua i ai o ia i Tahiti faatasi ma nisi o uo Tubuai, o le ulugalii ua faaipoipoina o Nabota ma Telii, ua latou o e fesoasoani i lona uso a faifeautalai o Peniamina Grouard i le galuega faafaifeautalai i le motuamu latalata ane o Anaa. Na ia auina mai ia Luisa le onosefulu talā ma ni upu alofa mo ia ma tamaiti.

Sa faamoemoe Addison e auauna atu i le Au Paia o le motu mo ni tausaga se tele o i lumanai, ae e le mafai ona faia e aunoa ma lona aiga. Sa ia tusia, “A mafai ona e maua soo se tusi, ma iai ni ou taimi avanoa, ou te manatu, e sili ai ona outou auai ma tamaiti i le aoaoina o le gagana Tahiti, aua o lo’u manatu, atonu o le a outou faaaogaina i totonu o ni nai tausaga.”³²

Sa fiafia Luisa i le tusi, ma sa o se mea na faateia ai ona o le fiafia o lana malaga agai atu i sisifo. Na uma timuga o le tautotogo, ma sa fiafia o ia e tietie i le solofanua i lalo o lagi manino ao aveina e se alii na faafaigaluega i ana taavale toso. Sa alapo o ia i taeao uma lava, tulituli mai ia povi na taape solo, ma fesoasoani e tutuli mai i latou i le ao. Sa iai taimi na popole ai o ia i le mamao sa malaga ese atu ai mai ona matua ma isi tagata o lona aiga, ae sa faamafanafanaina o ia e lona talitonu ia Siona. Sa ta’ua i faaaliga ia Siona o se nofoaga o le sulufaiga, o se laueleele o le filemu. O le mea lena sa manao i ai o ia i lona olaga.

“O ni isi taimi ou te lagona ai le fiafia,” sa ia tusia ai i lana apitalaaga i le aso 10 o Iuni. “Ua valaauina i matou e le Alii, ma tofia mo i tatou se nofoaga lea e mafai ona tatou ola ai i le filemu ma ia saoloto ai mai le fā’atu i o tatou faaoosala le alolofa!”³³

O le lima o aso mulimuli ane, na taunuu ai Luisa ma lana vaega i Mount Pisgah, o le tasi o nofoaga malolo tetele e lua na faatuina e le Au Paia a o agai atu i le auala i Iowa. Sa nonofo latalata le autolauapi i le auvae o maupuepue maualalalo ma malifa lea na ufitia i se togalaau o laau o aluna. E pei ona sa fuafuaina e Polika, sa nonofo le Au Paia iina i faleie po o faleoo ogalaau ma toto ai togalaau e sapalai ai meaai mo vaega o le a taunuu mulimuli ane. O isi eria o le tolauapiga na maua ai ni fanua lafumanu mo povi.

Sa filifili e Luisa se tulaga i le paolo o nisi o laau aluna mo lona aiga. Sa manaia le nofoaga, ae o luga a’e na malosi le vevela o le la i le autolauapi o le Au Paia, o le toatele o i latou na lelavāvā mai timuga ma le palapala na latou tauivi ai i lena tautotogo.

“Tau ina ia tauia i latou e le Alii mo o latou osigataulaga uma,” o mafaufauga ia o Luisa.³⁴

---

Na mamao lava i luma i le ala, na malolo ai Polika ma le Tolauapiga a Isaraelu i se nofoaga na ta’ua o Mosquito Creek, e le mamao mai le Vaitafe o Misuri. Sa latou fiaaai, e lua masina na tuai ai ma le taimi atofaina, ma matuai matitiva lava.³⁵ Ae sa maua’i lava Polika e auina atu se vaega e muamua atu i luga o Mauga Papa. Sa talitonu o ia, na manaomia ona faatini e se vaega o le Au Paia le malaga i lena vaitau, aua o le umi lava e feofeoai ai le Au Paia e aunoa ma se nofoaga mautu, o le a taumafai foi ona fili e faataapeape i latou pe poloka lona auala.³⁶

Peitai, sa silafia e Polika, o le faalavalavaina o se vaega faapea o le a afaina ai punaoa a le Au Paia. E toaitiiti na iai ni tupe po o ni sapalai faasili, ma na faatapulaa ni avanoa na tuuina mai e Iowa mo ni galuega totogi. Ina ia feola i laufanua vaoa, e toatele le Au Paia na faatau atu a latou meatotino taugata i le ala pe na galulue i soo se ituaiga galuega ia maua ai ni tupe mo meaai ma sapalai. A o agai atu le tolauapiga i sisifo ma tau leai ni tagata o nuu, o le a na ona atili faigata ai ona maua nei avanoa.³⁷

Sa mamafatū foi isi mataupu ia Polika. O tagata o le Au Paia sa le’i auai i le vaega na muamua atu, sa manaomia se nofoaga e nonofo ai mo le taumalulu. Sa mananao le au Omaha ma isi tagatanuu Moni o e sa aināina le laueleele i sisifo o le Vaitafe o Misuri, e faataga le Au Paia e tolauapi iina i le taimi o le taumalulu, ae sa mumusu sui o le malo e faataga i latou e nofoia fanua na puipuia e Initia mo se vaitaimi umi.³⁸

Sa silafia foi e Polika, o le Au Paia mamai ma limavaivai o i Navu, sa faalagolago i le Ekalesia e ave atu i latou i sisifō. Mo se taimi, sa faamoemoe ai o ia e fesoasoani atu ia i latou e ala i le faatau ese atu o meatotino taua i Navu e aofia ai le malumalu. Ae e oo ane i le taimi lea, e le’i faamanuiaina lava lenei taumafaiga.³⁹

I le aso 29 o Iuni, na iloa ai e Polika e toatolu ni alii ofisa mai le Fitafita a le Iunaite Setete na o mai i Mosquito Creek. Na faasilasila e le Iunaite Setete le taua ma Mekisiko, ma na faataga e Peresitene James Polk ia alii e saili se autau e toa lima selau o le Au Paia mo se osofaiga faamiliteli i le gataifale o Kalefonia.

O le aso na sosoo ai, sa talanoaina ai e Polika faapea ma Heber Kimball ma Willard Richards le talafou. Sa le’i iai se finauga a Polika ma Mekisiko, ma o le manatu e uiga i le fesoasoani atu i le Iunaite Setete na oso ai lona le fiafia. Ae e mafai ona avea Sisifō ma teritori o Amerika pe afai e manumalo le Iunaite Setete i le taua, ma o le fesoasoani i le fitafita e mafai ona faaleleia ai le faiā o le Au Paia ma le atunuu. Ma le mea e sili ona taua, o le totogi o alii e lesitalaina e mafai ona fesoasoani e faatupe ai e le Ekalesia lana malaga atu i sisifō.⁴⁰

Sa talanoa Polika ma alii ofisa i le taimi lava na latou taunuu ai. Sa ia iloa ai, na oo mai o latou faatonuga ina ua faalogo Tomasi Kane, o se alii talavou na masani lelei i le Gataifale i Sasae, e uiga i le tulaga pagatia o le Au Paia ma faailoa atu Jesse Little i taitai taua i Uosigitone DC. Ina ua mavae ni talosaga, na feiloai Jesse ma Peresitene Polk ma tauanau o ia e fesoasoani i le Au Paia ia me’i atu i sisifō e ala i le lesitalaina o nisi o i latou i le auaunaga faafitafita.

O le vaaia ai o aogā o le tuutuuga, na faamaonia ai ma le loto atoa e Polika ia faatonuga. Sa ia tautino atu, “O le ofo muamua lenei ua tatou maua mai i le malo e manuia ai i tatou,” sa ia tautino atu ai. “Ou te fautuaina atu e tatau ona faapotopoto mai volenitia e lima selau, ma o le a ou faia le mea sili e vaai ai e aumai uma o latou auaiga, i le mamao e mafai ona oo i ai lo’u malosiaga, ma fafaga i latou pe i ai foi ni a’u mea e ai.”⁴¹

---

Sa matuai ita lava Drusilla Hendricks i le faaiuga a Polika e felagolagomai ma le Iunaite Setete. O lona toalua o Iakopo, na fana lona ua i se fetauiga ma le au Misuri i le 1838, ma na faapea ona pe ai se vaega o lona tino. E pei foi o isi i le tolauapiga, sa tiga pea o ia i le malo ona o le le fesoasoani i le Au Paia i lena taimi. E ui a sa lava le matua o lana tama tama o Viliamu e volenitia ai mo le autau, ae sa le’i manao ia e auai atu i ai o ia. Faatasi ai ma le pe o se vaega o le tino o lana tane, sa faalagolago ai o ia i le fesoasoani atu a lana tama tama.⁴²

Sa asiasi atu le au saili fitafita i le tolauapiga i aso uma lava, na masani ona o atu faatasi ma Polika po o isi aposetolo. Na molimau atu Polika, “Afai tatou te mananao i le avanoa e o atu ai i mea e mafai ona tatou tapuai ai i le Atua e tusa ai ma o tatou lava loto fuatiaifo, e ao ona tatou faatuina se autau.”⁴³ Na toatele le Au Paia na folo lava lo latou feita ae lagolagoina le taumafaiga, ae sa le mafai e Drusilla ona talia le valavala ai ma lana tama tama.

O isi taimi na musumusu atu ai le Agaga ia te ia, “Ua e fefe e faalagolago i le Atua o Isaraelu? Pe le’i i ai faatasi ea o Ia ma oe i ou tofotofoga uma? Pe le’i tuuina atu ea e Ia ou manaoga?” Na te faailoaina atu le agalelei o le Atua, ae a ona manatua le le alolofa o le malo, ona toe oso a’e ai lea o lona ita.

I le aso e malaga ese atu ai le autau, sa alapo ai lava Viliamu e faapotopoto mai povi. Sa vaavaai atu Drusilla ia te ia ao savali atu i vao uumi ma le susū, ma na popole o ia ina ne’i tele atu le afaina e faia ia te ia e le le lava o lona faatuatua nai lo o le lelei. E ono lavea o ia ao malaga i le auala faatasi ma lona aiga e pei foi ona faigofie ona lavea pe a savavali faatasi ma le autau. Ma afai ae tupu lena mea, o le a toe salamo o ia i le faanofo o [Viliamu].

Sa amata e Drusilla le ti o le taeao, ma le le mautinoa po o le a le mea a fai ia Viliamu. O le pe’a atu i luga o le taavale toso e aumai se falaoamata, sa ia toe lagonaina foi le musumusu a le Agaga: Pe le’i manao ea o ia i faamanuiaga silisili a le Alii?

“Ioe,” sa ia fai atu leotele ai.

“Ia e faapefea la ona e maua e aunoa ma le faia o se osigataulaga maoae?” na fesili mai ai le Agaga. “Tuu lau tama tama e alu i le autau.”

“Ua fai si tuai tele,” na ia fai atu ai. “O le a latou savavali ese atu i le taeao nei.”

Na toe foi mai Viliamu, ma na faapotopoto le aiga mo le malutaeao. A o faamanuia e Iakopo meaai, sa faateia Drusilla ina ua faasalaveia e se tamaloa le tolauapiga. “O mai alii” sa ia alaga mai ai. “E le’i lava alii i le autau.”

Na pupula a’e mata o Drusilla ma vaaia ai Viliamu o faataupupula atu ia te ia. Sa ia maitauina ona foliga, ma taulotoina ia vaaiga taitasi. Sa ia iloaina o le a auai atu o ia i le autau. “Afai ou te le toe vaai ia te oe seia oo i le taeao o le toetutu,” sa ia mafaufau ai, “o le a ou iloa lava oe la’u tama e.”

Ina ua uma le malutaeao, sa faapea ona tatalo toatasi Drusilla. Sa ia augani atu, “Ia faasaoina lona ola, ma ia toe faafoi mai o ia ia te a’u ma i tagata auai o le Ekalesia.”

“O le a faia lava ia te oe,” sa musumusu mai ai le Agaga, “e pei ona sa faia ia Aperaamo ina ua ia ofoina atu Isaako i le fata faitaulaga.”

Sa su’e e Drusilla ia Viliamu, ma maua atu o loo saofai i totonu o le taavale toso, o loo punou ma uu lona ulu. “E te fia alu tou te o ma le autau?” sa ia fesili atu ai. “Afai e te fia alu, na ou maua se molimau o le mea sa’o lou alu.”

“Na saunoa mai Peresitene Iaga, e mo le faaolataga o lenei nuu,” sa fai mai ai Viliamu, “ma atonu e sili ai le fai i ai o so’u sao e pei o soo se isi lava.”

“Sa ou taofia mai oe,” na fai atu ai Drusilla, “ae afai e te fia alu, o le a ou le toe taofia lava oe.”⁴⁴

1. Sessions, Diary, Feb. 15, 1846; Historian’s Office, History of the Church, volume 15, Feb. 17 ma le 28, 1846, 9–10, 36–39; Pace, Autobiography, chapter 2; Eliza R. Snow, Journal, Feb. 14 ma le 19, 1846; Meeks, Reminiscences, 14; Helen Mar Whitney, “Our Travels beyond the Mississippi,” Woman’s Exponent, Dec. 1, 1883, 12:102.

2. Historian’s Office, History of the Church, volume 15, Feb. 16–18, 1846, 9–10, 21–22; Stout, Journal, Feb. 16–17, 1846.

3. Helen Mar Whitney, “Our Travels beyond the Mississippi,” Woman’s Exponent, Dec. 1, 1883, 12:102; Dec. 15, 1883, 12:111; Historian’s Office, History of the Church, volume 15, Feb. 28, 1846, 39; Tullidge, Women of Mormondom, 327.

4. Historian’s Office, History of the Church, volume 15, Feb. 17 and 23, 1846; Mills, “De Tal Palo Tal Astilla,” 105–6.

5. Au Paia, voluma 1, mataupu 46; George A. Smith, in Journal of Discourses, June 20, 1869, 13:85.

6. Samuel Brannan to Brigham Young, Jan. 12, 26, ma le 27, 1846, Brigham Young Office Files, CHL; Historian’s Office, History of the Church, volume 15, Feb. 17, 1846, 11.

7. Brigham Young to Jesse Little, Jan. 20, 1846, Jesse C. Little Collection, CHL; Historian’s Office, History of the Church, volume 15, Feb. 17, 1846, 21.

8. Historian’s Office, History of the Church, volume 15, Feb. 28, 1846, 39–40; Mar. 1, 1846, 1–2; Horace K. Whitney, Journal, Mar. 9, 1846; Brigham Young to William Huntington and Council, June 28, 1846, copy; Brigham Young to Joseph Young, Mar. 9, 1846, Brigham Young Office Files, CHL.

9. Louisa Barnes Pratt to Brigham Young, Mar. 24, 1846; Brigham Young to Addison Pratt, Aug. 28, 1845, Brigham Young Office Files, CHL; tagai foi Au Paia, voluma 1, mataupu 41. Autu: Louisa Barnes Pratt

10. Louisa Barnes Pratt to Brigham Young, Mar. 24, 1846, Brigham Young Office Files, CHL; Louisa Barnes Pratt, Journal and Autobiography, 127.

11. Louisa Barnes Pratt, Journal and Autobiography, 127. O le fuaiupu mulimuli o le upusii na faasa’oina mo le faigofie ona faitauina; o le punavai muamua o loo i ai le “O le a faafetaui i tatou e Uso Pratt i le vaomatua i le mea tatou te nonofo ai, o le a matuai le fiafia lava pe afai e le iai lona aiga ma i tatou.”

12. Wells, Diary, volume 1, Mar. 1–25, 1846; Apr. 4 ma le 6–7, 1846; Orson Pratt, Journal, Mar. 4–5 ma le 24, 1846; Apr. 6, 9–10, ma le 30, 1846; Tullidge, Women of Mormondom, 312–13; Historian’s Office, History of the Church, volume 15, Feb. 18, 1846, 22.

13. Historian’s Office, History of the Church, volume 15, Apr. 6–7, 1846, 9–10; Sessions, Diary, Apr. 6, 1846; Clayton, Diary, Apr. 6–7, 1846.

14. Church Historian’s Office, History of the Church, volume 15, Apr. 10 ma le 12, 1846, 12–16; Dahl, William Clayton, 64; Diantha F. Clayton to William Clayton, Mar. 10, 1846, CHL.

15. Clayton, Diary, Apr. 15, 1846; “Come Ye Saints,” Collected Material relating to William Clayton, CHL; tagai foi “O Mai, Outou o le ‘Au Pa‘ia,” Viiga, nu. 17.

16. Woodruff, Journal, Aug. 27–28, 1844, ma le Apr. 13, 1846; Clayton, History of the Nauvoo Temple, 57–59; “First Meeting in the Temple,” Times and Seasons, Nov. 1, 1845, 6:1017; John Taylor, Journal, Aug. 23, 1845, 119; Scofield, History of Hancock County, 860.

17. Woodruff, Journal, Feb. 16–17, 1846.

18. Woodruff, Journal, Jan. 16–23, 1846; Wilford Woodruff, “To the Saints in the British Isles, Greeting,” Latter-day Saints’ Millennial Star, Feb. 1, 1846, 7:42; Wilford Woodruff to “Brother George,” Dec. 18, 1845, in Times and Seasons, Feb. 15, 1846, 6:1129–30; see also Wilford Woodruff to Brigham Young, Apr. 1, 1845, Brigham Young Office Files, CHL.

19. Wilford Woodruff, “The Temple of the Lord,” Latter-day Saints’ Millennial Star, June 15, 1845, 6:13.

20. Mataupu Faavae ma Feagaiga 124:31-32 (Revelation, Jan.19, 1841, i le josephsmithpapers.org).

21. Wilford Woodruff, “The Temple of the Lord,” Latter-day Saints’ Millennial Star, June 15, 1845, 6:13; Wilford Woodruff, “To the Saints in the British Isles, Greeting,” Latter-day Saints’ Millennial Star, Feb. 1, 1846, 7:42.

22. Woodruff, Journal, Mar. 6–22, 1846.

23. Woodruff, Journal, Apr. 13 ma le 14, 1846; “Ecclesiastical Officers and Church Appointees,” i le JSP, J3:468, e maua i le josephsmithpapers.org; Orson Hyde to “Dear Brethren,” Mar. 27, 1846, Brigham Young Office Files, CHL.

24. Woodruff, Journal, Apr. 18, 1846; Joseph Smith to James J. Strang, June 18, 1845 [1844], in Voree Herald, Jan. 1846, [1]; Jensen, “Gleaning the Harvest,” 4; 6, note 17; John E. Page to James J. Strang, Feb. 1, 1846, i le Voree Herald, Apr. 1846, [6]–[7]; William Smith to “Brother Strang,” Mar. 11, 1846, in Voree Herald, Apr. 1846, [7]. Autu: Latter Day Saint Movements [Feoaiga a le Au Paia o Aso e Gata Ai]

25. Woodruff, Journal, Apr. 18 ma le 20, 1846.

26. Mendenhall, Diary, Apr. 1–4, 1846; Samuel W. Richards, Journal, Apr. 22–29, 1846; Haight, Journal, Apr. 6, 1846; Morris, Autobiography, 40–41.

27. Samuel W. Richards, Journal, Apr. 23 ma le 29–30, 1846; Brigham Young, in Journal of Discourses, Jan. 1, 1877, 18:304; Lanman, Summer in the Wilderness, 31–33.

28. Barney, “Ruins of the Nauvoo Temple”; JSP, CFM:525, note 71.

29. Historian’s Office, General Church Minutes, Thomas Bullock booklet no. 8, May 1, 1846.

30. Barney, “Ruins of the Nauvoo Temple”; Historian’s Office, History of the Church, volume 15, May [1], 1846, 34; Scott, Journal, May 1, 1846; Woodruff, Journal, May 1 and 3, 1846.

31. Holzapfel and Cottle, “Visit to Nauvoo,” 11. Autu: Nauvoo Temple [Malumalu o Navu]

32. Louisa Barnes Pratt, Journal and Autobiography, 128–29; Addison Pratt to “My Dear Family,” Jan. 6, 1846, Addison Pratt Family Collection, CHL.

33. Louisa Barnes Pratt, Journal and Autobiography, 129–33; tagai foi Mataupu Faavae ma Feagaiga 90:30–31; 109:59; 115:6; 124:36.

34. Louisa Barnes Pratt, Journal and Autobiography, 134; Parley P. Pratt, Autobiography, 381. Ua faasa’oina le upusii mo le manino; ua faaopoopo i ai le upu “latou.”

35. Bennett, Mormons at the Missouri, 45. Autu: Pioneer Trek

36. Historian’s Office, History of the Church, volume 15, June 28, 1846, 87–89; Brigham Young to William Huntington and Council, June 28, 1846, Brigham Young Office Files, CHL.

37. Orson Pratt, Journal, Feb. 1846; Mar. 6, 1846; June 19, 1846; tagai foi Bennett, Mormons at the Missouri, 32–33.

38. Brigham Young to William Huntington and Council, June 28, 1846, Brigham Young Office Files, CHL.

39. “Conference Minutes,” Times and Seasons, Nov. 1, 1845, 6:1011; Orson Pratt, Journal, Apr. 28–29, 1846; Brigham Young to Jesse Little, Jan. 20, 1846; Jesse Little to James K. Polk, June 1, 1846, Jesse C. Little Collection, CHL.

40. Historian’s Office, History of the Church, volume 15, June 29–30, 1846, 89–90; Quaife, Diary of James K. Polk, 444–50; Brigham Young to “the High Council of the Church,” Aug. 14, 1846, Brigham Young Office Files, CHL; tagai foi Arrington, Great Basin Kingdom, 21. Autu: Mexican-American War

41. James Allen, Circular to the Mormons, June 26, 1846, copy; S. W. Kearny to James Allen, June 19, 1846, copy, Federal and Local Government Files, 1844–76, Brigham Young Office Files, CHL; Historian’s Office, History of the Church, volume 16, July 1, 1846, 3–4; July 6, 1846, 22–23; July 13, 1846, 43–47; tagai foi Grow, Liberty to the Downtrodden, 58–59. O le fuaiupu mulimuli o le upusii ua faasa’oina mo le faigofie ona faitauina; o le punavai muamua o loo i ai le “Ou te tuuina atu ia faapotopoto ni volenitia se lima selau, ma o le a ou faia le mea silisili ia vaai e aumai uma o latou aiga i luma, i le mamao e mafai ona oo i ai lo’u malosiaga, ma fafaga i latou pe a iai foi ni a’u meaai.” Autu: Thomas L. and Elizabeth Kane; Mormon Battalion

42. Hendricks, Reminiscences, 19–20, 26; tagai foi Au Paia, voluma 1, mataupu 29 ma le 32.

43. “Minutes of a Meeting at Head Quarters Camp of Israel,” Historian’s Office, General Church Minutes, July 13, 1846; Historical Department, Journal History of the Church, July 13, 1846.

44. Hendricks, Reminiscences, 26–28.