Auauna Atu i lo Outou Atua saunia e Walter Rane

20–26 Aperila

Mosaea 4–6

“O Se Suiga Tele”

A o e faitauina ma manatunatu loloto i le Mosaea 4–6, ia nofouta i uunaiga a le Agaga Paia. O a mea lelei ua musuia oe e fai? (tagai Mosaea 5:2).

Tusifaamaumau Ou Lagona Uunai

Pe ua e faalogo i se tasi o talanoa ma sa lagona ua musuia e suia ai lou olaga? Atonu e te filifili, ona o mea ua e faalogo i ai, ia fai si eseesega o lou ola—pe o se eseesega tele foi. O le lauga a le Tupu o Peniamina o le ituaiga o lena ituaiga o lauga, ma o upumoni sa ia aoao mai sa i ai lena ituaiga o aafiaga i tagata o e sa faalogo i ai. Sa faasoa mai e le Tupu o Peniamina i lona nuu mea na aoao atu e le agelu ia te ia---e faapea o faamanuiaga ofoofogia e mafai e ala i “le toto togiola o Keriso” (Mosaea 4:2). O lana savali na suia ai la latou vaaiga atoa ia i latou lava (tagai Mosaea 4:2), sa suia ai o latou naunauga (tagai Mosaea 5:2), ma sa musuia ai i latou e osifeagaiga ma le Atua o le a latou faia e le aunoa lona finagalo (tagai Mosaea 5:5). O le ala lea na aafia ai i upu a Peniamina lona nuu. Pe o le a faapefea ona aafia ai oe?

Manatu mo Suesuega Faaletagata Lava Ia o Tusitusiga Paia

Mosaea 4

E ala ia Iesu Keriso, e mafai ai ona ou maua ma faatumauina se faamagaloga o a’u agasala.

O le faatoilaloina o le tagata natura e le faigofie. E manaomia ai se taumafaiga tele e avea “o se tagata paia e ala i le togiola a Keriso le Alii” (Mosaea 3:19). O nisi taimi, tusa lava pe na e lagonaina ua faamagaloina au agasala, e mafai lava ona e tauivi e tausi lena lagona ma tumau ai i luga o le ala o le amiotonu. Na aoao atu e le Tupu o Peniamina lona nuu i le ala e maua ai ma faatumauina se faamagaloga o agasala ma ola ai pea lava pea o se tagata paia. A o e suesueina le mataupu 4 o le Mosaea, e mafai ona e fesili ifo ia te oe lava ni fesili e pei o nei:

Fuaiupu 1–12:O a faamanuiaga na aumaia e le faamagaloga o agasala i le nuu o Peniamina? O a mea o aoao atu e le Tupu o Peniamina e fesoasoani ai ia te i latou e faatumauina le faamagaloga o a latou agasala? O le a se mea na ia aoao mai e uiga i le ala tatou te maua ai le faaolataga? Matau na fai mai le Tupu o Peniamina e tatau ona tatou “manatua pea lava pea” (fuaiupu 11). O le a se mea ua musuia oe e fai ia manatua ai nei mea?

Fuaiupu 12–16:E tusa ai ma nei fuaiupu, o le a le mea e tupu i o tatou olaga pe afai tatou te faia mea ua faamatala mai i le fuaiupu 11? Pe ua e oo i nei suiga i lou olaga? E faapefea ona fesootai i suiga o loo faamatala mai i le Mosaea 3:19?

Fuaiupu 16–30:E faapefea e le faasoa atu i e matitiva ona fesoasoani ia i tatou e faatumauina le faamagaloga o a latou agasala? E mafai faapefea ona e faaaogaina le fuaiupu 27 i au taumafaiga ia avea e faapei o Keriso?

Tagai foi David A. Bednar, “Faatumauina Pea le Faamagaloina o a Outou Agasala,” Ensign po o le Liahona, Me 2016, 59–62; Dale G. Renlund, “Taofimau i le Liliu Tele o le Loto,” Ensign po o le Liahona, Nov. 2009, 97–99.

Mosaea 5:1–7

O le Agaga o le Alii e mafai ona matu’ia se suiga tele i lo’u loto.

E le o se mea e le masani ai mo tagata le faapea mai, “E le mafai ona ou sui. Ona pau lava o a’u ia.” I se faatusatusaga e ese ai, o le aafiaga o le nuu o Peniamina ua faaalia mai ai ia i tatou le ala e mafai ai e le Agaga ona suia moni o tatou loto. Na aoao mai e Peresitene Russell M. Nelson: “E mafai ona tatou suia a tatou amioga. E mafai ona sui o tatou lava manaoga. … O le suiga moni—suiga tumau—e na o le faamaloloina, faamamaina ma le mana gafatia o le Togiola a Iesu Keriso e mafai ona oo mai ai. … O le talalelei a Iesu Keriso o se talalelei o suiga!” (“O Filifiliga mo le Faavavau,” Ensign po o le Liahona, Nov. 2013,  108).

A o e faitau e uiga i suiga na oo i ai le nuu o Peniamina, mafaufau pe na faapefea e le “suiga tele” ona tau atu i le liua moni ona tupu—pe mafai foi ona tupu—i lou olaga. Pe na i ai ni nai taimi “tetele” na tau atu ai i le suiga o le loto, pe na tuputupu malie lou liuga?

Tagai foi Esekielu 36:26–27; Alema 5:14; David A. Bednar, “Faaliliuina i le Alii,” Ensign po o le Liahona, Nov. 2012, 106–9.

E mafai e le Faaola ona suia o tatou loto ma o tatou olaga. O Aao Faamalolo, saunia e Adam Abrams

Mosaea 5:5–15

Ou te tauaveina i o’u lava luga le suafa o Keriso pe a ou osia feagaiga.

O se tasi mafuaaga o le manao o le Tupu o Peniamina e talanoa atu i lona nuu o le “tuu atu i le nuu o se igoa.” O nisi o sa Nifae a o isi e tupuga mai ia Moleka, ae e le o igoa ia sa ia mafaufau i ai. Sa ia valaaulia le nuu e tauave i o latou lava luga “le suafa o Keriso” e avea o se vaega o la latou feagaiga o le usitai i le Atua (Mosaea 1:11; 5:10). O le a se mea ua e aoao mai le Mosaea 5:7--9 i le uiga o le tauave i ou lava luga o le suafa o Keriso?

Na aoao mai e Elder D. Todd Christofferson, “O le punavai [o le mana o amioga lelei ma le faaleagaga] o le Atua lea. O lo tatou ala i lena mana e ala i a tatou feagaiga ma Ia” (“O Le Mana o Feagaiga,” Ensign po o le Liahona, Me 2009, 20). A o faitauina le Mosaea 5:5--15, fai se lisi o faamanuiaga o le a oo mai i lou olaga a o e tausia feagaiga na e osia ma le Atua. E faapefea e le tausia o au feagaiga ona fesoasoani ia te oe e faatumauina le “suiga tele” na oo atu ia te oe e ala ia Iesu Keriso ma Lana Togiola?

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Mosaea 4:9–12

E mafai faapefea e lou aiga ona “talitonu i le Atua” ma le atoatoa (Mosaea 4:9) ma “manatua pea lava pea, le silisili ese o le Atua”? (Mosaea 4:11). Atonu e mafai e tagata o le aiga ona faitau le Mosaea 4:9–12 ma faailoa mai fasifuaitau ia e fesoasoani e fausia ai lo latou faatuatua i le Atua. Ona mafai lea ona latou tusia i lalo nei fasifuaitau ma tuu faasolosolo i le fale e fai ma faamanatu. E faapefea e le manatuaina o nei mea ona fesoasoani ia i tatou e “olioli ai pea lava” ma “faatumauina se faamagaloga o [a tatou] agasala”? (Mosaea 4:12)

Mosaea 4:14–15

O a ni mea ua tatou aoao e uiga i le tauaimisa ma le fetaua’i mai nei fuaiupu?

Mosaea 4:16–26

E faapefea ona avea i tatou uma ma tagata aisi? E tusa ai ma nei fuaiupu, e tatau faapefea ona tatou taulimaina fanau uma a le Atua? (Mosaea 4:26). O ai e manaomia la tatou fesoasoani?

Mosaea 4:27

Pe o taufetuli saoasaoa lou aiga nai lo lou malosi? Atonu e mafai ona e valaaulia tagata o lou aiga e iloilo a latou gaoioiga ina ia mautinoa o latou filiga ae ia atamamai foi.

Mosaea 5:5–15

O le a se mea o fautuaina mai e le tauaveina o le suafa o Keriso i o tatou luga, e uiga i la tatou sootaga ma Ia? E ono fesoasoani le talanoa e uiga i le mafuaaga e tusi ai e tagata o latou igoa i nisi taimi i luga o a latou meatotino. E mafai faapefea ona tatou faaali atu faapea o i tatou e “ou” le Faaola?

Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai ia te Au—Mo le Peraimeri.

Faaleleia o Lo Tatou Aoao Atu

Faafailele se siosiomaga alofa. O lagona o tagata o le aiga ma le ala e taulima ai e le tasi le isi e mafai ona matua tosina ai le agaga i lo outou fale. Fesoasoani i tagata uma o le aiga e fai a latou vaega i le atinaeina o se aiga alofa, ma le faaaloalo ina ia lagona ai e tagata uma le saogalemu e fefaasoaai aafiaga, fesili, ma molimau. (Tagai Aoao Atu i le Ala a le Faaola, 15.)

I Lana Tausiga E Le Aunoa, saunia e Greg K. Olsen