I le Galuega a Lou Atua, saunia Walter Rene

20--26 Aperila

Mosaea 4--6

“Se Liuga Tele”

O le fea o aoaoga a le Tupu o Peniamina i totonu o le Mosaea 4--6 o le a sili ona fesoasoani i tamaiti o e aʻoaʻoina e amata ona iloa “se liuga tele” (Mosaea 5:2) i o latou loto? Faamaumau ou lagona a’o e saili ma le agaga tatalo mo le taitaiga.

Tusifaamaumau Ou Lagona Uunai

Valaaulia le Fefaasoaai

Tusi igoa o tamaiti taitoatasi o lau vasega i luga o se fasi pepa, ma tuu fasi pepa i totonu o se koneteina. Ao e pikiina igoa taitasi mai le koneteina, valaaulia lena tamaitiiti e faasoa mai se mea latou te manatuaina mai le lesona o le vaiaso ua tuanai po o se mea na latou aoaoina mai le Mosaea 4--6 i le fale i lenei vaiaso.

Aoao atu le Aoaoga Faavae: Tamaiti Laiti

Mosaea 4:1--3, 10

O le salamo na te aumaia le olioli.

Fesoasoani i tamaiti e aoao e uiga i le meaalofa ofoofogia o le salamo lea e maua ona o le Togiola a Iesu Keriso.

Gaoioiga e Mafai Ona Fai

• Faaaoga le Mosaea 4:1--3, ma le 10 e aoao ai tamaiti i le uiga o le salamo. Mo se faataitaiga, fesoasoani ia i latou e iloa na lagona e le nuu o le Tupu o Peniamina le faanoanoa e uiga ia latou agasala ma ole atu mo se faamagaloga (fuaiupu 1--2), ma na taʻu atu e le Tupu o Peniamina ia i latou e lafoai (pe taofia le faia) oa latou agasala (fuaiupu 10). Faitau fuaiupu 3 ia i latou, ma fesili atu pe o le a se lagona o tagata ina ua latou salamo.

• Fesili atu i tamaiti pe o le a le lagona pe a palapala o tatou lavalava. O a ni o tatou lagona pe a tatou toe mama? Faamatala atu e pei o le tataina o lavalava palapala, e mafai ona tatou salamo pe a tatou faia se mea sese. Faaali atu se ata o Iesu Keriso, ma molimau atu o loo ia te Ia le mana e aveesea ai a tatou agasala ma toe faamamaina i tatou pe afai tatou te salamo. Usu faatasi le fuaiupu lona lua o le “Fesoasoani Mai Ia Te A‘u Tama Pele” (Tusipese a Tamaiti, 52). Fesili atu i tamaiti po o a mea o aoao mai e le pese e uiga i le salamo.

Mosaea 4:13--26

E tatau ona tatou taulimaina isi ma le alofa ma le agalelei.

E faapefea ona e faaaogaina le Mosaea 4:13--26 e aoao ai tamaiti “ia alofa le tasi i le isi, ma auauna le tasi i le isi”? (fuaiupu 15).

Gaoioiga e Mafai Ona Fai

• Tusi se tamai fatu i luga o le laupapa. Valaaulia tamaiti e faasoa mai ni auala e mafai ona latou agalelei ai i isi. O taimi uma latou te fefaasoaai ai, tape ese le fatu ma tusi se isi e tele atu. Molimau atu o lo tatou alofa mo isi e tuputupu aʻe ao tatou agalelei ia i latou. Tuu atu i tamaiti ni fatu [oti mai ni fasipepa], ma valaaulia i latou e tusi i luga o na fatu auala e mafai ona latou faaalia ai le alofa ma ia agalelei.

• Fesoasoani i tamaiti e fatu ni taga e fai a’o latou usuina se pese e faatatau i le alofa i isi, e pei o le “Fetalai Mai Iesu e Alofa i Tagata Uma” po o le “Ia Fealofani” (Tusipese a Tamaiti, 39, 74).

Mosaea 5:5–15

A ou osia feagaiga ma le Atua, ou te tauaveina i oʻu lava luga le suafa o Keriso.

Mafaufau loloto pe mafai faapefea ona e fesoasoani i tamaiti o e aoaoina e saunia e osia feagaiga o le papatisoga ma le Atua ma “taʼua o le fanau a Keriso” (Mosaea 5:7).

Gaoioiga e Mafai Ona Fai

• Fesoasoani i tamaiti e fai ni pine e faʻaalia ai le igoa “Iesu Keriso” ma faapipii i a latou ofu i luga ifo o latou fatu (tagai i le itulau o gaoioiga o lenei vaiaso). Faamatala atu na aoaoina e le Tupu o Peniamina ona tagata afai tatou te osia feagaiga, po o folafolaga, ma le Atua, e pei lava “o le tusia pea i o [tatou] loto” o le suafa o Keriso (Mosaea 5:12). O le a le mea tatou te folafola atu e fai pe a tatou papatiso ma tagofia le faamanatuga? (tagai Mosaea 5:8; MF&F 20:37, 77, 79).

• Fesili atu i tamaiti pe o le a se mea latou te faia e avea ai ma uo ma se tasi (mo se faataitaiga, talanoa ma i latou, faifai mea ma i latou, ma faʻaalu se taimi ma i latou) Faitau le Mosaea 5:13 i tamaiti. O le a se mea e mafai ona tatou faia ina ia tatou iloa atili Iesu Keriso, ina ia le avea o Ia o se “tagata ese” ia i tatou?

Aoao atu le Aoaoga Faavae: Tamaiti Matutua

Mosaea 4:1--11

E mafai ona ou salamo.

E faapefea ona e fesoasoani i tamaiti ia malamalama i le uiga o le salamo? O fea fuaiupu i le Mosaea 4:1--11 e te lagona o le a fesoasoani ia i latou?

Gaoioiga e Mafai Ona Fai

• Tusi le upu faamagaloga i luga o le laupapa. Faitau faatasi le Mosaea 4:1--3, ma fai atu i tamaiti e saili upu i le fuaiupu 3 lea e faamatala ai faamanuiaga e oo mai pe a tatou salamo ma maua le faamagaloga.

• Fai atu i tamaiti e taʻu mai mea e tatau ona tatou faia ina ia tatou salamo ma le faamaoni. Fesoasoani ia i latou e sue nisi o nei mea i le Mosaea 4:10, ma talanoa i uiga o upu ma fuaitau o loo maua i lena fuaiupu. Faasoa atu se tala e faaalia ai le salamo, atonu mai lou lava olaga pe mai se mekasini a le Ekalesia talu ai nei.

• Fesoasoani i tamaiti e saili upu i le Mosaea 4:6,9, ma le 11 lea e faamatalaina le Tama Faalelagi. Aisea e taua ai le malamalama pe faapei le Tama Faalelagi pe a manaomia ona tatou salamo? Faasoa atu lau molimau i le auala na e lagonaina ai le alofa o le Atua a’o e salamo.

Mosaea 4: 12--26

E musuia au e le talalelei e taulimaina isi i le alofa ma le agalelei.

Na aoao mai le Tupu o Peniamina afai tatou te o mai ia Keriso ma maua se faamagaloga oa tatou agasala, o le a “faatumuina i le alofa o le Atua” i tatou (Mosaea 4:12), lea e taitaia i tatou ia agaalofa ma agalelei i isi.

Gaoioiga e Mafai Ona Fai

• Fesoasoani i tamaiti e suesue le Mosaea 4:13--16, 26 ma faailoa fasifuaitau o loʻo faʻamatalaina pe faʻapefea ona tatou auauna atu i isi. Valaaulia i latou e faatino nei mea pe tusi ni ata o ia mea, ma tuu atu i isi tamaiti e mate le fuaitau. E faʻapefea ona tatou faʻaalia le alofa ma le agalelei i le fale, i le aʻoga, poʻo le lotu?

• Valaaulia tamaiti e faasoa mai se aafiaga na latou fiafia ai pe auauna atu ai i se tasi ma le lagona na latou maua i lena aafiaga. O a nisi mafuaaga atonu e le mananao ai tagata e auauna atu i isi? Fesili atu i tamaiti pe o le a se latou tala e fai atu i se tasi e tauanauina ai i latou e fesoasoani i tagata o loʻo manaʻomia le fesoasoani. E mafai ona latou maua ni manatu i le Mosaea 4:16--26.

Na aoao i tatou e Iesu Keriso ina ia agalelei atu i isi.

Mosaea 5:5–15

Pe a ou papatiso ma tagofia le faamanatuga, ou te tauaveina i oʻu lava luga le suafa o Keriso.

O le toatele o tamaiti o loo e aoaoina atonu ua uma ona papatisoina ma o loo faafou a latou feagaiga e ala i le faamanatuga. Faamanatu ia i latou o se vaega taua oa latou feagaiga o le papatisoga o le tauaveina io latou luga le suafa o Iesu Keriso.

Gaoioiga e Mafai Ona Fai

• Tusi se li’o i luga o le laupapa, ma tuu se ata o Iesu Keriso i le ogatotonu o le li’o. Valaaulia tamaiti e tusi ni ata o i latou lava a’o outou faitauina faatasi le Mosaea 5:8 . O le a le mea o fai mai lenei fuaiupu e tatau ona tatou tauaveina io tatou luga? O le a le mea ua tatou “ulu atu” i ai? Valaaulia tamaiti e tusi le suafa o Keriso i ata oi latou lava ma tuu ia ata i le lio faatasi ma le Faaola. O a feagaiga tatou te faia pe a tatou papatiso ma tagofia le faamanatuga? (tagai Mosaea 18:8–9; MF&F 20:77, 79).

• Talanoa i tamaiti pe aisea e tuu ai e tagata o latou igoa i luga o mea, e pei o meaaoga, ofu ta’alo, ma isi (tagai Mosaea 5:14--15). E faʻapefea ona tatou faʻaalia o ia i tatou le suafa o Keriso o loo “tusia pea i o [tatou] loto”? (Mosaea 5:12.

• Valaaulia se alii talavou po o se tamaitai mai le uarota e asiasi i lau vasega ma faamatala feagaiga tatou te faafou e ala i le taumamafa i le faamanatuga. Faitau tatalo o le faamanatuga mai le Mataupu Faavae ma Feagaiga 20:77 ma le 79 ma tamaiti, valaaulia i latou e vaavaai mo fasifuaitau e faamatala ai mea ua tatou osifeagaiga e fai ma taui ua folafola mai e le Atua ia i tatou.

Fautuaina le Aoaoina i le Aiga

Valaaulia tamaiti e tusi se mea na latou aoaoina i le aso ma faaaoga a latou ata tusi e aoao ai o latou aiga.

Faaleleia o Lo Tatou Aoao Atu

Aoao atu tamaiti ia tusifaamaumau o latou lagona uunai. E oo lava foi i tamaiti e mafai ona latou aoaoina uiga masani o le faamauina o lagona faaleagaga---mo se faataitaiga, e ala i le faailogaina o tusitusiga paia, tusia o ata, po o le tusia o ni tusitusiga faigofie.